Imit Zeova, Bondye Laverite

“Parski zot bann zanfan ki Bondye i kontan, fer tou zot zefor pour fer tou parey li.”—EFEZYEN 5:1.

1. Ki lopinyon serten dimoun i annan lo laverite, e akoz zot rezonnman i an defo?

“KISISA laverite?” (Zan 18:38) Sa kestyon ki Pilat ti demande dan zar pe boufonnen 2,000 an pase, i sizere ki laverite i tro difisil pour trouve. Bokou dimoun ozordi pou dakor avek sa. Serten i demande si vreman laverite i egziste. Petet ou’n deza tann dimoun dir ki sakenn i deside kwa ki vre pour li. Oubyen zot dir ki napa keksoz ki san poursan vre oubyen laverite pe toultan sanze. En tel rezonnman i an defo. Bi resers ek ledikasyon se zisteman pour aprann bann fe, aprann laverite, konsernan sa lemonn ki nou pe viv ladan. Laverite i pa lopinyon personnel en dimoun. Par egzanp, lanm en dimoun i swa kontinyen viv apre lanmor swa i pa kontinyen viv. Satan i swa egziste swa i pa egziste. Lavi i swa annan en bi swa i napa en bi. Dan sak legzanp, zis en larepons ki kapab byen. Enn i vre e lot pa vre. I pa kapab ki tou le de i vre.

2. Dan ki fason Zeova i Bondye laverite, e ki kestyon nou pou diskite aprezan?

² Dan lartik presedan, nou ti vwar ki Zeova i Bondye laverite. I konn laverite lo tou keksoz. Kontrerman avek son adverser rizer, Dyab, Zeova i toultan koz laverite. Deplis, Zeova i touzour pare pour revel laverite avek lezot. Zapot Pol ti enplor bann konpanyon Kretyen: “Parski zot bann zanfan ki Bondye i kontan, fer tou zot zefor pour fer tou parey li.” (Efezyen 5:1) Vi ki nou bann Temwen Zeova, ki mannyer nou kapab fer parey li letan nou koze e viv dapre laverite? Akoz sa i sitan enportan? Ki lasirans nou annan ki Zeova i aprouv bann ki les laverite enfliyans zot lavi? Annou vwar.

3, 4. Ki mannyer zapot Pol ek Pyer ti dekrir sa ki ti pou arive dan “bann dernyen zour”?

³ Nou viv dan en lepok kot mansonz relizye i partou kote. Parey zapot Pol ti predir anba lenspirasyon divin, bokou dimoun dan “bann dernyen zour” i fer krwar zot atase avek  Bondye, me an realite zot pa les Bondye transform zot lavi. Serten i opoz laverite parski zot ‘lespri i totalman koronpi.’ Deplis, ‘bann move dimoun ek bann anbeter, zot . . . fer touzour plis progre dan sa ki mal, zot anbet lezot e zot osi zot ganny anbete.’ Menm si sa bann dimoun pe toultan aprann, zot pa zanmen arive ganny “en konnesans laverite.”—2 Timote 3:1, 5, 7, 8, 13.

⁴ Zapot Pyer ti osi ganny enspire pour ekrir konsernan bann dernyen zour. Zis parey i ti profetize, dimoun pa zis rezet laverite me zot osi monk Parol Bondye ek bann ki anons son mesaz laverite. “An swivan zot prop dezir,” sa bann monker i bliye si deliz ti detrir lemonn dan letan Noe, ki en lavertisman pour sa zizman ki pe vini. Lefe ki zot pa anvi vwar larealite parey i ete, maler pour zot kan i ariv ler pour Bondye detrir bann mesan.—2 Pyer 3:3-7.

Serviter Zeova i konn Laverite

5. Dapre profet Danyel, ki ti pou arive dan “letan lafen,” e ki mannyer sa profesi in ganny akonpli?

⁵ Letan profet Danyel ti dekrir “letan lafen,” i ti predir en devlopman diferan parmi pep Bondye. Laverite ti pou ganny reetablir. I ti ekrir: “Bokou pou rode, e sa vre konnesans pou vin an abondans.” (Danyel 12:4) Sa gran Rizer pa’n arive konfiz e avegle pep Zeova. Zot in rode dan Labib e zot in reisi trouv sa vre konnesans. Dan premye syek, Zezi ti fer keksoz pli kler pour son bann disip. I ti “ouver zot lespri pour zot kapab konpran Lekritir.” (Lik 24:45) Dan nou letan, Zeova in fer parey. Atraver son Parol, son lespri, ek son lorganizasyon, i’n fer plizyer milyon dimoun partou lo later konpran sa ki li i deza konnen—laverite.

6. Ki laverite pep Bondye ozordi i konpran?

⁶ Nou konman pep Bondye, nou konpran bokou keksoz ki otreman nou pa ti pou’n konnen. Nou konn larepons bann kestyon ki bann savan dan sa lemonn in lalit avek pour plizyer milener. Par egzanp, nou konnen akoz soufrans i egziste, akoz dimoun i mor, e akoz zonm pa kapab anmenn lape ek linite dan lemonn. Nou’n osi ganny en vizyon lo sa ki lavenir i rezerve pour nou—Rwayonm Bondye, paradi lo later, ek lavi parfe e eternel. Nou’n arive konn Zeova, sa Enn ki pli o dan liniver. Nou’n aprann konsernan son personnalite atiran e osi ki nou bezwen fer pour ganny son benediksyon. Konn laverite in fer nou kapab rekonnet sa ki pa vre. Ler nou pratik laverite, i ed nou pour pa gat nou lenerzi dan bann keksoz initil e i ed nou pour annan en pli bon lavi. I osi donn nou en lespwar merveye pour lavenir.

7. Ki kalite dimoun ki kapab konpran sa laverite dan Labib e ki kalite dimoun ki pa kapab konpran?

⁷ Eski ou konpran laverite dan Labib? Si wi, ou’n ganny beni en kantite. Kan en ekriven i ekrir en liv, i ekrir li dan en fason ki pou atir serten kalite dimoun. Serten liv i ganny ekrir pour bann dimoun byen edike, serten pour bann zanfan, e lezot pour bann dimoun dan bann domenn spesyalize. Kantmenm tou dimoun i kapab fasilman ganny en Labib, zis en serten kalite dimoun ki kapab konpran li e apresye li. Zeova in fer li pour bann dimoun ki annan limilite, bann senp dimoun. Nenport ledikasyon, kiltir, pozisyon dan lasosyete, oubyen group etnik ki sa bann dimoun i sorti ladan, zot kapab konpran Labib. (1 Timote 2:3, 4) De lot kote, bann ki pa dan dispozisyon neseser pa kapab konpran Labib, kantmenm zot kapab pli entelizan e pli edike. Bann dimoun orgeye e vantar pa kapab konpran sa laverite presye ki dan Parol Bondye. (Matye 13:11-15; Lik 10:21; Akt 13:48) Zis Bondye ki ti kapab prodwir en tel liv.

Bann Serviter Zeova i koz Laverite

8. Akoz Zezi ti kapab dir ki se li menm laverite?

⁸ Bann Temwen fidel Zeova i koz laverite, zis parey Zeova. Zezi Kri, Temwen prensipal Zeova, ti siport laverite par sa ki i ti ansennyen e par lafason ki i ti viv e mor. I ti defann laverite konsernan parol ek promes Zeova. Pour sa rezon ki Zezi ti kapab dir ki se li menm laverite.—Zan 14:6; Revelasyon 3:14; 19:10.

9. Ki Labib i dir konsernan koz laverite?

 ⁹ Zezi ti “ranpli avek lagras ek laverite” e “ti napa okenn mansonz dan son labous.” (Zan 1:14; Izai 53:9) Bann vre Kretyen i swiv legzanp ki Zezi in kite par koz laverite avek lezot. Pol ti donn son bann konpanyon Kretyen sa konsey: “Sakenn devre koz laverite avek son prosen akoz nou tou ansanm nou manm en sel lekor.” (Efezyen 4:25) Bokou letan avan, profet Zekarya ti ekrir: “Koz laverite avek kanmarad.” (Zekarya 8:16) Bann Kretyen i koz laverite akoz zot anvi fer plezir Bondye. Zeova i koz laverite e i konnen ki mansonz i fer ditor. Alors, i annan tou rezon ekspekte son bann serviter pour koz laverite.

10. Akoz dimoun i koz manti, e ki move rezilta sa i anmennen?

¹⁰ Pour bokou dimoun, koz manti i paret en bon zouti pour zot ganny serten lavantaz. Dimoun i koz manti pour sov pinisyon, pour ganny serten benefis, oubyen pour ganny laprouvasyon lezot. Pourtan, koz manti i en vilen defo. Deplis, en dimoun ki koz manti pa kapab ganny laprouvasyon Bondye. (Revelasyon 21:8, 27; 22:15) Kan lezot i konnen ki nou abitye koz laverite, zot krwar sa ki nou dir; zot annan konfyans dan nou. Parkont, si lezot i dekouver ki nou’n koz manti menm zis en fwa, zot kapab pa tro oule krwar sa ki nou dir alavenir. En proverb Afriken i dir: “En mansonz i gat mil laverite.” En lot proverb i dir: “Dimoun pa pou krwar en manter menm si i koz laverite.”

11. Ki nou bezwen fer anplis ki koz laverite?

¹¹ Imit Bondye laverite i enplik plis ki zis koz laverite. I en fason viv. I montre ki nou vreman ete. Nou fer lezot konn laverite pa zis par sa ki nou dir me osi par sa ki nou fer. Pol ti demande: “Ou ki ansenny lezot, akoz ou pa ansenny ou prop lekor? Ou ki ansennyen ki fodre pa vole akoz ou vole? Ou ki ansennyen ki fodre pa fer adilter, akoz ou fer li?” (Romen 2:21, 22) Si nou pou ansenny lezot laverite, nou bezwen reflekte laverite dan tou sa ki nou fer. Dimoun i devret vwar laverite pa zis dan sa ki nou dir me osi dan sa ki nou fer. Andotmo, nou bezwen onnet. Sa i fer en gran lefe lo konman lezot pou reazir anver sa ki nou ansennyen.

12, 13. Ki en zenn ti ekrir konsernan lonnekte, e kwa ki ti fer li annan en standar moral tre onivo?

¹² Bann zenn parmi bann serviter Zeova i osi konpran lenportans lonnekte. Dan en konpozisyon lekol, Jenny ki sa letan ti annan 13 an, ti ekrir: “Lonnekte i en keksoz ki mon vreman atas en gran valer avek. Malerezman, ozordi pa bokou dimoun ki onnet dan tou keksoz. Mon’n promet mon lekor ki mon pou toultan onnet dan lavi. Mon pou onnet menm si koz laverite pa benefisye mwan ek mon bann zanmi toudswit. Mon fer sir ki mon bann zanmi i bann dimoun ki koz laverite e onnet.”

¹³ Dan remark ki ansennyan Jenny ti fer lo son konpozisyon, i ti dir: “Kantmenm ou ankor byen zenn, ou’n devlop bann prensip moral ki vreman drwat. Mon konnen ki ou pou reste atase avek ou prensip akoz ou vreman annan en gran determinasyon.” Kwa ki’n ed sa zenn fiy pour annan en tel determinasyon? Okonmansman son konpozisyon, Jenny ti dir ki son larelizyon i “etabli bann standar dan [son] lavi.” Set an in pase depi ki Jenny in ekrir sa konpozisyon. Parey son ansennyan ti prezimen, Jenny pe kontinyen gard son standar moral tre onivo konman en Temwen Zeova.

 Bann Serviter Zeova i revel Laverite

14. Akoz bann serviter Bondye i annan en gro responsabilite pour soutenir laverite?

¹⁴ Byensir, i annan lezot dimoun apard ki Temwen Zeova ki koz laverite e esey fer zefor pour onnet. Parkont, Temwen Zeova zot, zot annan en gro responsabilite pour soutenir laverite. Nou’n ganny konfye avek laverite dan Labib, en laverite ki kapab fer dimoun ganny lavi eternel. Alors, i nou devwar pour partaz sa konnesans avek lezot. Zezi ti dir: “Sa ki resevwar bokou pou bezwen rann kont bokou.” (Lik 12:48) Sirman, bann ki’n ganny beni avek konnesans presye Bondye, i bezwen “rann kont bokou.”

15. Ki lazwa ou gannyen letan ou fer lezot konn laverite dan Labib?

¹⁵ I en lazwa pour fer lezot konn laverite dan Labib. Parey bann premye disip Zezi, nou anons sa bon nouvel bann ki “fatige e dekouraze parey bann mouton ki napa berze” e bann ki’n ganny avegle e konfize par “bann lansennyman demon.” Sa bon nouvel i en mesaz lespwar ki vreman ankourazan. (Matye 9:36; 1 Timote 4:1) Zapot Zan ti ekrir: “Napa en pli gran lazwa pour mwan ki ler mon tande ki mon bann zanfan i swiv laverite.” (3 Zan 4) Fidelite bann “zanfan” Zan—petet bann ki i ti ede konn laverite—ti donn li bokou lazwa. Nou kontan letan nou vwar dimoun aksepte Parol Bondye avek lapresyasyon.

16, 17. (a) Akoz pa tou dimoun ki aksepte laverite? (b) Ki lazwa ou kapab gannyen ler ou fer lezot konn laverite dan Labib?

¹⁶ I vre ki pa tou dimoun ki pou aksepte laverite. Zezi ti koz laverite konsernan Bondye, menm kan lezot pa ti kontan. I ti dir sa avek bann Zwif ki ti opoz li: “Akoz zot pa krwar mwan? Sa ki pour Bondye i ekoute sa ki Bondye i dir, me zot, zot pa pour Bondye, sanmenm rezon ki zot pa oule ekoute.”—Zan 8:46, 47.

¹⁷ Parey Zezi, nou pa ezite pour fer lezot konn sa laverite presye konsernan Zeova. Nou  pa ekspekte tou dimoun pour aksepte sa ki nou dir zot, parski pa tou ki ti aksepte sa ki Zezi ti dir. Toudmenm, nou kontan akoz nou konnen ki nou pe fer sa ki byen. Labonte leker Zeova i fer li anvi ki laverite i ganny revele avek bann imen. Vi ki bann Kretyen i posed laverite, zot vin bann lalimyer dan sa lemonn ki dan fernwanr. Ler nou les lalimyer laverite briye par nou parol ek aksyon, nou kapab ed lezot pour donn laglwar nou Papa dan lesyel. (Matye 5:14, 16) Nou fer konnen piblikman ki nou rezet fo versyon Satan lo laverite e soutenir Parol Bondye ki pir e ki pa’n sanze. Sa laverite ki nou konnen e partaze, i kapab liber bann ki aksepte li.—Zan 8:32.

Les Laverite enfliyans ou Lavi

18. Akoz e konman Zezi ti montre faver Natanael?

¹⁸ Zezi ti kontan laverite e i ti koz laverite. Pandan son minister lo later, i ti montre faver bann ki ti koz laverite. Konsernan Natanael, Zezi ti dir: “La en vre Izraelit, ki napa [sa ki fo dan li, NW ].” (Zan 1:47) Par laswit, Natanael, ki petet ti osi apel Bartelemi, ti ganny swazir konman enn sa 12 zapot. (Matye 10:2-4) Pa sa i en loner!

19-21. Ki mannyer en zonm ki ti aveg ti ganny beni pour koz laverite?

¹⁹ En sapit antye dan levanzil Zan i rakont resi en zonm onnet ki ti ganny beni avek Zezi. Nou pa konn son non. Sa ki nou konnen se ki sa zonm ti abitye mandyan e i ti aveg depi son nesans. Bann dimoun ti sirprann letan Zezi ti fer sa zonm vwar kler. Nouvel konsernan sa mirak ti ariv ziska kot serten Farizyen. Sa bann Farizyen ti ay laverite e zot ti’n deside antre zot pour met an deor sinagog tou bann ki met lafwa dan Zezi. Vi ki paran sa zonm ki ti aveg ti konn sa, zot ti per. Alor zot ti dir zot pa konnen ki mannyer zot garson in vwar kler e lekel ki’n fer li vwar kler.—Zan 9:1-23.

²⁰ Sa zonm ki ti’n ganny geri, ti ganny apele ankor enn fwa devan bann Farizyen. Avek kouraz, i ti dir laverite san pran kont okenn konsekans ki kapab arive. I ti eksplike ki i’n ganny geri e se Zezi ki ti fer li. I ti soke pour vwar ki sa bann zonm enportan e edike pa ti krwar ki Zezi ti sorti kot Bondye. Alors, san okenn lafreyer, i ti sey fer zot aksepte larealite: “Si sa zonm pa ti sorti kot Bondye i pa ti pou kapab fer nanryen.” Vi ki zot pa ti kapab dir nanryen ankor, bann Farizyen ti dir sa zonm i ensolan e zot ti pous li deor.—Zan 9:24-34.

²¹ Kan Zezi ti tann sa ki ti’n arive, i ti pran letan pour rod sa zonm. Ler i ti vwar li, i ti ranforsi son lafwa ki i ti deza annan. Zezi ti ouvertman idantifye li konman Mesi. Sa zonm ti vreman ganny beni pour dir laverite! Sirman, laprouvasyon Bondye i lo bann ki koz laverite.—Zan 9:35-37.

22. Akoz nou devret les laverite enfliyans nou lavi?

²² Pratik laverite i en keksoz ki nou devret pran oserye. I enportan pour devlop e mentenir en bon relasyon avek lezot e avek Bondye. Pour nou parey Bondye laverite, nou bezwen fran, senser, fasil pour aprose, e diny konfyans. Sa i fer nou ganny son laprouvasyon. (Psonm 15:1, 2) De lot kote, nou pa ganny faver Zeova kan nou koz manti, nou pa diny konfyans, e nou pa senser. (Proverb 6:16-19) Alors, determinen pour les laverite enfliyans ou lavi. Wi, imit Bondye laverite par konn laverite, koz laverite, e viv laverite.

Ki ou pou reponn?

• Akoz nou rekonesan ki nou konn laverite?

• Ki mannyer nou kapab imit Zeova, Bondye laverite?

• Ki byenfe nou gannyen kan nou fer lezot konn laverite dan Labib?

• Akoz i enportan pour les laverite enfliyans nou lavi?

[Kestyon]

[Portre lo paz 29]

Vi ki zot in ganny konfye avek laverite dan Labib, bann Kretyen i partaz li avek lezot

 [Portre lo paz 31]

Sa zonm aveg ki Zezi ti geri ti ganny beni akoz i ti koz laverite