Konsolasyon pour bann ki pe kriy osekour

LABIB pa en liv ki koz lo ki mannyer nou kapab annan en bon lasante mantal. Me i konsol nou e i ed nou pour apresye lavi kantmenm nou rankontre problenm. Labib i dir fransman: “Zonm, ki fanm in donn nesans, i viv en pti gin letan e son lavi i ranpli avek problenm.” (Zob 14:1) Serten nou bann leprev i akoz nou prop lenperfeksyon. Me lekel ki pli responsab pour soufrans ki imen pe pas ladan?

Labib i idantifye li konman en lespri mesan ki apel Dyab ek Satan. I pe “tronp lemonn antye” e pe kree bokou problenm ki pe anvair limanite. Anmenmtan, Labib i dir nou ki son letan pe fini. (Revelasyon 12:9, 12) Byento Bondye pou entervenir e met en lafen avek tou maler ki Satan in anmenn lo zabitan later. Dapre Labib, sa nouvo lemonn kot pou annan lazistis ki Bondye in promet, pou fer fini tou dezespwar.—2 Pyer 3:13.

Pa i vreman rekonfortan pour konnen ki sa bann soufrans ki imen pe pas ladan i tanporer! Anba dominasyon Rwayonm Bondye ki dan lanmen Zezi Kri, lenzistis ek soufrans pou fini. Konsernan sa Lerwa ki Bondye in apwente, Labib i deklare: “I pou delivre sa enn pov ki pe kriy osekour, osi sa enn ki pe soufer e nenport ki ki napa personn pour vin ed li. I pou senpatiz avek bann dimoun senp ek bann pov, e i pou sov lanm bann ki pov. I pou liber zot dan lopresyon ek vyolans, e zot disan pou presye dan son lizye.”—Psonm 72:12-14.

I pa mank bokou letan pour sa bann parol profetik ganny realize. Nou pou kapab rezwir lavi eternel lo later ki pou vin en paradi, dan bann kondisyon merveye. (Lik 23:43; Zan 17:3) Konnesans lo sa bann promes rekonfortan dan Labib i anmenn lespwar ek konsolasyon pour bann ki pe kriy osekour.

[Portre lo paz 32]

Pti fiy ki dan lapenn: Photo ILO/J. Maillard