Lamizer​—Kote nou kapab trouv en Solisyon permanan

MENM si i annan bokou rapor ki pa ankourazan lo lamizer atraver lemonn, i annan dimoun ki kontinyen krwar ki serten keksoz konkret i kapab ganny fer. Par egzanp, dapre en lartik dan Manila Bulletin, Labank Devlopman Lazi ti raporte ki: “Lazi i kapab elimin lamizer dan 25 an.” Sa labank ti sizer devlopman ekonomik konman en fason pour elimin lamizer nwanr.

Lezot lorganizasyon ek gouvernman in fer en gran lalis sizesyon ek plan pour esey rezourd sa problenm. La detrwa sa bann sizesyon: progranm sekirite sosyal, amelyor nivo ledikasyon, kennsel det ki bann pei ki pe devlope i drwa bann pei devlope, retir bann restriksyon enportasyon afen ki bann pei ki annan en gran poursantaz dimoun mizer i kapab vann zot prodwi pli fasilman, e donn lakaz bann pov.

Lannen 2000, Lasanble Zeneral Nasyon Ini ti etablir bann lobzektif ki devret ganny akonpli avan lannen 2015. Sa i enkli elimin lamizer nwanr ek lafanmin, osi byen ki elimin sa gran diferans dan reveni ki antre kot bann lakour ki egziste dan bann pei. Menm si sa bann lobzektif i kapab ekselan, bokou dimoun pa krwar ki zot pou ganny akonpli dan sa lemonn divize.

Mezir pratik pour fer fas avek Lamizer

Napa bokou lespwar ki nou pou vwar en vre progre dan sa sitiasyon lo en nivo mondyal.  Alor, kote en dimoun i kapab ale pour ganny led? Parey nou’n mansyonnen pli boner, i annan en sours lasazes pratik ki kapab ed dimoun depi konmela menm. Lekel sa sours? Sa i Parol Bondye, Labib.

Kwa ki fer Labib diferan avek tou lezot sours lenformasyon? I sorti kot nou Kreater, lotorite pli o ki egziste. Nou Kreater in fer ekrir bann konsey tre presye, bann prensip pratik ki itil pour tou dimoun, dan tou pei, e nenport ki letan zot pe viv. Si sa bann prensip i ganny aplike, i kapab ed dimoun mizer pour ganny en lavi pli satisfezan depi konmela menm. Annou vwar detrwa legzanp.

En bon Pwennvi lo Larzan. Labib i dir: “Lasazes i en proteksyon parey larzan i en proteksyon; me lavantaz avek konnesans i ki lasazes i permet son propriyeter pour viv.” (Eklezyast 7:12) Ki sa verse i oule dir? Larzan pa fer tou keksoz. I vre ki i donn en serten sekirite. I permet nou aste serten keksoz ki nou bezwen, me i annan son limit. I annan keksoz ki annan plis valer ki larzan pa kapab aste. Ler nou rekonnet sa, i ed nou annan en pwennvi balanse lo keksoz materyel. Alor nou pa pou fristre parey sa bann dimoun ki enterese zis pour ganny bokou larzan. Larzan pa kapab aste lavi, me letan nou azir avek lasazes, sa i kapab protez nou lavi konmela menm e donn nou loportinite pour ganny lavi eternel alavenir.

Viv dapre ou Mwayen. Sa ki nou anvi i pa toultan sa ki nou vreman bezwen. Nou bezwen donn priyorite bann keksoz ki nou bezwen. Nou kapab fasilman konvenk nou lekor ki nou bezwen en keksoz, kan an realite i zis en keksoz ki nou anvi e pa en keksoz ki nou bezwen pour viv. En dimoun ki byen servi son lespri pou premyerman met dekote larzan pour bann keksoz esansyel—manze, lenz, landrwa reste, ek lezot ankor. Apre, avan ki i depans larzan lo okenn keksoz anplis, i pou kalkile si lakantite larzan ki reste li i ase pour aste sa keksoz anplis. Dan enn son bann parabol, Zezi ti sizere ki en dimoun i “asize premyerman e estimen konbyen i pou koute, e war si i annan ase larzan.”—Lik 14:28.

Eufrosina, i en manman tousel avek trwa zanfan an Filipin. Son mari in kit li depi detrwa lannen pase. I’n pas dan difikilte pour ganny son lavi e pour depans son larzan byen dapre en bidze. Pandan sa letan, i ti fer son bann zanfan aprann rekonnet kwa ki devret vin premye keksoz pour aste. Par egzanp, petet bann zanfan i kapab vwar en keksoz ki zot anvi gannyen. Olye ki zis dir non, i rezonn avek zot dan sa fason: “Ou kapab ganny sa keksoz si ou anvi, me ou pou bezwen deside. Avek larzan ki nou annan nou pou ganny zis en keksoz. Nou kapab aste sa keksoz ki ou kontan, oubyen nou kapab aste en pe lavyann ouswa legim pour nou manz avek nou diri sa semenn. Aprezan, lekel ki ou anvi gannyen? Deside.” Laplipar-di-tan, bann zanfan i vitman konpran e zot dakor pour aste manze olye en lot keksoz.

Satisfe avek sa ki nou annan. I annan en lot prensip Labib ki dir: “Si nou annan manze ek lenz sa i ase.” (1 Timote 6:8) Larzan dan li menm pa anmenn boner. En kantite dimoun ris pa zwaye, tandis ki bokou dimoun mizer i vreman zwaye. Serten dimoun mizer in aprann pour kontant zot avek zis bann keksoz debaz dan lavi. Zezi ti mansyonn annan en ‘lizye senp’ savedir en lizye ki fikse lo bann  keksoz pli enportan. (Matye 6:22) Sa i ed en dimoun pour kontant li avek sa ki i annan. Bokou dimoun mizer i satisfe avek zot lavi akoz zot in devlop en bon relasyon avek Bondye e zot annan en lavi fanmiy ere. Sa i de keksoz ki larzan pa kapab aste.

Sa i zis detrwa legzanp serten sizesyon pratik dan Labib ki kapab ed bann ki mizer pour fer fas avek zot sitiasyon. I annan ankor bokou lezot. Par egzanp, evit bann move labitid parey fimen e zwe larzan ki gaspiy larzan. Rekonnet keksoz pli enportan dan lavi, sirtou bann lobzektif spirityel. Dan bann landrwa kot napa ase travay, esey ofer en skil oubyen servis ki lezot i bezwen. (Proverb 22:29; 23:21; Filipyen 1:9-11) Labib i ankouraz dimoun pour aplik “lasazes pratik ek abilite pour reflesir” akoz “zot pou anmenn lavi pour ou.”—Proverb 3:21, 22.

Menm si bann sizesyon dan Labib i kapab ed bann ki lit avek lamizer, sa pa anpes dimoun kestyonn lavenir. Eski bann ki mizer pa pou zanmen sorti dan lamizer en zour? Eski sa bann diferans ant bann ki tre ris ek bann ki tre mizer pou ganny korize? Annou egzamin en solisyon ki bokou dimoun pa konnen.

Labib i donn Rezon pour annan Lespwar

Bokou dimoun i dakor ki Labib i en bon liv. Kantmenm sa, laplipar zot pa konnen ki Labib i ofer bann lenformasyon spesifik ki endik bann gran sanzman ki pou arive byento.

Bondye i annan lentansyon pran aksyon pour rezourd problenm limanite, enkli lamizer. Vi ki bann gouvernman in prouve ki zot pa ni kapab oubyen ni anvi rezourd sa bann problenm, alor Bondye pou retir zot. Ki mannyer i pou fer sa? Dan Danyel 2:44, Labib i deklare: “Bondye lesyel pou etabli en rwayonm ki pa pou zanmen ganny detrir. Sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm e li menm i pou dire pour letan endefini.”

Apre ki i’n retir sa bann “rwayonm,” oubyen gouvernman, Dirizan ki Bondye in apwente pou azir. Sa Dirizan pa en imen, me i en kreatir pwisan ki parey Bondye li menm. I annan sa abilite pour fer bann gran sanzman neseser pour elimin sa bann diferans ki egziste. Bondye in swazir son prop Garson pour fer sa. (Akt 17:31) Psonm 72:12-14 i dekrir sa ki sa Dirizan pou fer: “I pou delivre sa enn pov ki pe kriy osekour, osi sa enn ki pe soufer e nenport ki ki napa personn pour vin ed li. I pou senpatiz avek dimoun senp e pov, e i pou sov bann ki pov. I pou liber zot dan lopresyon ek vyolans, e zot disan pou presye dan son lizye.” Pa sa i en lespwar merveye! Soulazman alafendefen! Dirizan ki Bondye in apwente, pou azir dan lentere bann pov ek bann senp dimoun.

Sa letan, tou sa kantite problenm ki lamizer in anmennen pou ganny rezourd. Psonm 72 verse 16 i dir: “I pou annan legren an abondans lo later; anler lo bout montanny pou  annan en provizyon.” I pou nepli annan mankman manze akoz lafanmin, napa larzan, oubyen akoz napa en bon ladministrasyon.

Lezot problenm osi pou ganny rezourd. Par egzanp, ozordi en gran poursantaz dimoun ki viv lo later pa kapab annan en lakaz pour zot menm. Me Bondye i promet: “Zot pou konstri lakaz e zot pou reste ladan; wi, zot pou plant pye rezen e zot pou manz son fri. Zot pa pou konstri pour en lot reste, e zot pa pou plante pour en lot manze. Osi lontan ki en pye dibwa i viv, mon pep pou viv; e sa bann ki mon’n swazir pou profit plennman travay zot lanmen.” (Izai 65:21, 22) Tou dimoun pou annan zot prop lakaz e apresye zot travay. Alor Bondye pe promet en solisyon total e permanan pour lamizer. I pou nepli annan sa gran diferans ant dimoun ris ek dimoun pov. Dimoun pou nepli rente zis pour zot kapab viv.

Pour en dimoun ki tann sa bann promes Labib pour premye fwa, i kapab krwar ki sa bann keksoz pa posib. Me egzamin en pe pli oprofon Labib i montre ki tou bann promes Bondye dan lepase in vin vre. (Izai 55:11) Alor kestyon ki nou devret demande se pa si i pou arive, me ki fodre ou fer pour benefisye ler i arive?

Eski ou pou la?

Vi ki sa gouvernman i gouvernman Bondye, nou devret vin sa kalite dimoun ki Bondye pou aksepte konman sitwayen sa gouvernman. I’n enform nou ki fodre nou fer pour nou kalifye. Bann gidans in ganny ekrir dan Labib.

Sa Dirizan, Garson Bondye, i drwat. (Izai 11:3-5) Alor, bann ki ganny aksepte pour viv anba sa gouvernman pou bezwen drwat zot osi. Proverb 2:21, 22 i dir: “Bann zonm drwat i sa bann ki pou reste lo later, e bann ki san repros i sa bann ki pou ganny garde. An se ki konsern bann mesan, zot pou ganny retire lo later; e sa bann ki tret, pou ganny arase lo later.”

Eski i annan en fason pour aprann konman pour fer sa ki Bondye i ekspekte nou fer? Wi i annan. Par etidye Labib e aplik son bann gidans, ou pou kapab rezwir sa lavenir merveye. (Zan 17:3) Bann Temwen Zeova pou kontan pour ed ou avek sa letid. Nou envit ou pour profit sa loportinite pour form parti en sosyete ki pa pou zanmen eksperyans lamizer ek lenzistis.

[Portre lo paz 5]

Eufrosina: “Depans byen larzan dapre en bidze, i ed mon fanmiy pour annan sa ki nou bezwen”

[Portre lo paz 6]

Larzan pa kapab aste en bon relasyon avek Bondye ek en lavi fanmiy ere