Zeova, Bondye Laverite
Zeova, Bondye Laverite
“Ou’n liber mwan, O Zeova, Bondye laverite.”—PSONM 31:5
1. Ki mannyer ti ete dan lesyel e lo later letan ti napa mansonz?
TI ANNAN en letan kot ti napa mansonz. Dan lesyel, bann lanz ti pe servi zot Kreater, “Bondye laverite.” (Psonm 31:5) Ti napa mansonz, ti napa trik. Zeova ti koz laverite avek son bann garson spirityel. I ti fer sa akoz i ti kontan zot e akoz i ti vreman enterese avek zot byennet. Lo later, sitiasyon ti menm parey. Zeova ti kree premye zonm ek fanm e i ti fer en mwayen pour kominik avek zot. I ti toultan kominik avek zot dan en fason ki kler, fran, e vre. Ti bezwen vreman gou sa letan!
2. Lekel ki ti entrodwir mansonz, e akoz?
2 Me avek letan, en garson spirityel Bondye ti annan lodas pour opoz Zeova. I ti anvi vin en bondye ki opoz Zeova. Sa kreatir spirityel, ki nou konn li konman Satan Dyab ozordi, ti anvi lezot ador li. Pour akonpli son lobzektif, i ti entrodwir mansonz konman en mwayen pour li kapab annan kontrol lo lezot. Ler i ti fer sa, i ti vin en “manter e papa tou mansonz.”—Zan 8:44.
3. Konman Adan ek Ev ti reazir anver mansonz Satan, e ki rezilta sa in anmennen?
3 Satan ti servi en serpan pour dir Ev ki si i dezobei komannman Bondye e manz sa fri ki i ti dir zot pa manze, i pa ti pou mor. Sa ti en mansonz. Deplis, i ti dir li ki si i manz sa fri, i pou vin parey Bondye pour konn sa ki byen ek sa ki mal. Sa osi ti en mansonz. I vre ki Ev pa ti’n zanmen deza tann mansonz avan sa. Me i ti’n bezwen rekonnet ki sa ki sa serpan ti’n dir li pa ti an armoni avek sa ki Bondye ti’n dir son msye, Adan. Kantmenm sa, i ti swazir pour krwar Satan olye Zeova. Vi ki i ti’n ganny anbete, i ti pran sa fri e manze. Plitar, Adan ti manz sa fri li osi. (Zenez 3:1-6) Parey Ev, Adan pa ti’n deza tann mansonz avan sa. Me selman li, i pa ti’n ganny anbete. (1 Timote 2:14) Par son aksyon, Adan ti montre ki i ti’n rezet son Kreater. Sa in anmenn en katastrof lo limanite. Dezobeisans Adan in fer pese ek lanmor, ansanm avek koripsyon ek soufrans, propaz avek tou son desandans.—Romen 5:12.
4. (a) Ki lalang Satan ti donnen dan zarden Edenn? (b) Ki nou bezwen fer pour nou pa ganny tronpe avek Satan?
4 Mansonz ti osi propaze. Nou bezwen admet ki sa mansonz ki Satan ti dir dan zarden Edenn ti en latak lo Zeova. I ti pe met an dout si vreman Zeova i en Bondye laverite. Satan ti dir ki Bondye ti pe anbet sa premye koup imen akoz i ti pe priv zot en bon keksoz. Byensir sa pa ti leka. Adan ek Ev pa ti benefisye letan zot ti dezobei. Zot ti mor zis parey Zeova ti’n dir. Kantmenm sa, Satan ti kontinyen koz lalang lo Zeova, ki fer ki plizyer syek plitar, zapot Zan ti ganny enspire pour ekrir ki Satan pe “tronp lemonn antye.” (Revelasyon 12:9) Pour evite ganny tronpe avek Satan, nou bezwen annan konfyans total dan Zeova ek son Parol, ki toultan koz laverite. Ki mannyer ou kapab devlop e afermi ou konfyans dan Zeova pour ki ou fortifye ou defans kont trik ek mansonz Satan?
Zeova i konn Laverite
5, 6. (a) Ki konnesans Zeova i annan? (b) Ki mannyer konnesans zonm i ete konpare avek pour Zeova?
5 Labib i toultan idantifye Zeova konman “Kreater lemonn.” (Efezyen 3:9) I sa Enn “ki’n kre lesyel ek later ek lanmer ek tou sa ki lo later e dan lanmer.” (Akt 4:24) Vi ki Zeova i Kreater, i konn laverite lo tou keksoz. Annou pran en legzanp. En zonm i desin son plan lakaz e apre i konstri sa lakaz li menm. I fer tou keksoz li menm, met son dibwa, klout son klou, eksetera. Definitivman, i pou konn sa lakaz anbalao e i pou pli byen konpran sa lakaz ki okenn dimoun ki pe obzerve. Dimoun i konn byen keksoz ki zot fabrike oubyen fer. Pareyman, sa enn ki’n kree tou keksoz i konn tou sa ki annan pour konnen lo sa ki i’n kree.
6 Profet Izai ti eksprim grander konnesans Zeova dan en fason merveye. Nou lir: “Lekel ki’n mezir delo dan zis son kre lanmen, ki’n mezir dimansyon lesyel avek zis son lanmen, ki’n pez lapousyer dan en mezir, e ki’n pez bann montanny ek kolin dan en balans? Lekel ki’n mezir dimansyon lespri Zeova, e lekel ki’n servi konman en konseye pour li, pour fer li konn keksoz? Avek ki i ti rod konsey pour kelken fer li konpran? Lekel ki’n enstri li dan semen lazistis oubyen ansenny li konnesans, oubyen fer li konn semen pour sa vre konprenezon?” (Izai 40:12-14) Vreman, Zeova i “en Bondye ki konn tou” e i “annan konnesans parfe.” (1 Samyel 2:3; Zob 36:4; 37:16) Nou pa konn preski nanryen konpare avek li! Kantmenm zonm in arive ganny en konnesans vreman remarkab, nou konprenezon lo kreasyon pa ni menm tous “bordir sa ki [Bondye] i fer.” I parey en “pti son feb” konpare avek en “loraz pwisan.”—Zob 26:14.
7. Ki David ti rekonnet konsernan konnesans Zeova? Ki nou osi nou bezwen rekonnet alors?
7 Vi ki Zeova in kree nou, i fer sans ki i konn nou byen. Lerwa David ti rekonnet sa. I ti ekrir: “O Zeova, ou’n egzamin mwan byen, e ou konn mwan. Ou konnen kan mon asize e kan mon leve. Ou’n egzamin mon panse dan lwen. Kan mon vwayaze e kan mon alonze, tousala ou’n mezire. Ou’n vin familye avek tou mon bann fason. Tou parol ki ankor lo mon lalang, ou’n deza konnen ki mon pe al dir, O Zeova.” (Psonm 139:1-4) Byensir, David ti realize ki imen i annan liberte pour swazir. Bondye in donn nou sa abilite pour obeir ouswa dezobei li. (Deterononm 30:19, 20; Zozye 24:15) Toudmenm, Zeova i konn nou bokou pli byen ki nou konn nou prop lekor. I anvi sa ki byen pour nou, e i dan en pli bon pozisyon pour gid nou. (Zeremi 10:23) Anfet, napa okenn ansennyan, okenn eksper, okenn konseye ki pli byen ekipe pour ansenny nou laverite e pour fer nou vin saz e ere.
Zeova i koz Laverite
8. Ki mannyer nou konnen ki Zeova i en Bondye laverite?
8 Konn laverite e toultan koz laverite i de keksoz diferan. Par egzanp, Dyab ti swazir pour ‘pa kontan laverite.’ (Zan 8:44) Parkont, Zeova li i “ris an . . . verite.” (Egzod 34:6) Labib i souvan montre ki Zeova i en Bondye laverite. Zapot Pol ti dir ki “Bondye pa kapab manti” e ki Bondye “pa zanmen manti.” (Ebre 6:18; Tit 1:2) Laverite i en par enportan dan personnalite Bondye. Nou kapab depan lo Zeova e annan konfyans dan li akoz i koz laverite. I pa zanmen tronp son bann serviter fidel.
9. Ki mannyer non Zeova i relye avek laverite?
9 Zis non Zeova li menm i en levidans ki i toultan koz laverite. Son non i vedir “I fer arive.” Sa i idantifye Zeova konman sa enn ki ptit-a-pti realiz tou sa ki i’n promet. Napa personn ankor ki kapab fer sa. Vi ki Zeova i pli o dan liniver, napa nanryen ki kapab anpes li realiz son plan. Zeova pa zis koz laverite, me zis li tousel ki annan sa pouvwar ek lasazes pour fer tou sa ki i dir vin vre.
10. (a) Ki mannyer Zozye ti vwar pour li menm ki Zeova i toultan koz laverite? (b) Ki promes Zeova ki ou’n vwar ganny realize?
10 Zozye ti enn parmi bokou dimoun ki ti vwar bann levennman remarkab ki ti prouve ki Zeova i koz laverite. Zozye ti Lezip kan Zeova ti fer dis fleo vin lo sa nasyon, e averti zot avan. Zozye ti osi vwar promes Zeova pour delivre bann Izraelit Lezip ganny realize, apre pour anmenn zot dan Later Promiz, konkerir bann larme Kananeen ki ti opoz zot. Ver lafen son lavi, Zozye ti dir avek bann ansyen nasyon Izrael: “Zot konn byen avek tou zot leker e avek tou zot lanm ki napa okenn parol parmi tou bann bon parol ki Zeova zot Bondye in dir zot ki pa’n reisi. Zot tou zot in vin vre pour zot. Napa en parol ki pa’n reisi.” (Zozye 23:14) Menm si ou pa’n vwar sa bann mirak ki Zozye ti vwar, eski ou’n vwar promes Bondye vin vre dan ou lepok?
Zeova i revel Laverite
11. Kwa ki montre ki Zeova i anvi kominik sa ki vre avek limanite?
11 Mazin en paran ki annan en gran konnesans me selman i koz avek son zanfan enn fwa dan rar. Eski ou pa rekonesan ki Zeova pa koumsa? Avek lanmour, Zeova i kominik avek bann imen e i fer li dan en fason zenere. Labib i apel li “Gran Enstrikter.” (Izai 30:20) Vi ki i annan labonte leker, i kominik menm avek bann ki pa anvi ekout li. Par egzanp, Zeova ti fer Ezekyel al pres avek bann dimoun ki li i ti konnen pa pou oule ekoute. Zeova ti dir: “Garson zonm, ale, antre parmi lakaz Izrael, e dir zot mon parol.” Apre i ti averti Ezekyel: “Zot pa pou oule ekout ou, akoz zot pa’n ekout mwan; akoz tou sa bann dan lakaz Izrael, zot latet i dir e zot annan leker dir.” Sa pa ti en latas fasil pour fer. Me Ezekyel ti fer li fidelman, e an fezan sa i ti reflekte konpasyon Zeova. Si ou pres dan en teritwar ki difisil e ou depan lo Bondye, ou kapab asire ki i pou fortifye ou zis parey i ti fortifye Ezekyel.—Ezekyel 3:4, 7-9.
12, 13. Konman ki Bondye in kominik avek bann imen?
12 Zeova i anvi ki “tou dimoun i ganny sove e ganny konnesans laverite.” (1 Timote 2:4) I’n koz atraver bann profet, bann lanz, e menm son garson byenneme, Zezi Kri. (Ebre 1:1, 2; 2:2) Zezi ti dir avek Pilat: “Mon’n ne e mon’n vin dan lemonn pour servi temwen pour laverite. Tou sa ki pour laverite i pou ekout mon lavwa.” Pilat ti ganny en bon loportinite pour aprann laverite konsernan laranzman ki Zeova in fer pour sov nou, direkteman avek Garson Bondye. Me Pilat pa ti pour laverite e i pa ti anvi Zezi ansenny li. Okontrer, dan zar pe boufonnen, Pilat ti dir: “Kisisa laverite?” (Zan 18:37, 38) I vreman domaz pour li. Parkont, bokou dimoun ti ekout laverite ki Zezi ti anonse. I ti dir avek son bann disip: “Zot, zot ere; zot lizye i war kler e zot zorey i tande!”—Matye 13:16.
13 Zeova in prezerv laverite dan Labib e i’n fer li disponib pour dimoun partou lo later. Labib i revel keksoz parey zot vreman ete. I dekrir bann kalite Bondye, son plan ek komannman. I osi dekrir kondisyon reel ki bann imen i ladan. Zezi ti dir dan son lapriyer avek Zeova: “Ou parol i laverite.” (Zan 17:17) Sa i fer Labib en liv inik. Zis li tousel ki’n ganny ekrir anba lenspirasyon Bondye ki konn tou keksoz. (2 Timote 3:16) I en kado presye ki imen in gannyen, en kado ki bann serviter Bondye i apresye bokou. I saz pour lir li toulezour.
Reste atase avek Laverite
14. Nonm serten keksoz ki Zeova in dir i pou fer. Akoz nou devret krwar li?
14 Nou devret pran oserye sa ki Bondye i dir nou atraver son Parol. I vreman sa ki i dir i ete, e i pou fer sa ki i’n dir i pou fer. Nou annan tou rezon pour met konfyans dan Bondye. Nou kapab krwar letan Zeova i dir ki i pou “tir vanzans lo bann ki pa konn Bondye ek bann ki pa obei levanzil ki konsern nou Senyer Zezi.” (2 Tesalonisyen 1:8) Nou kapab osi met konfyans dan Zeova ler i dir ki i kontan bann ki resers ladrwatir, ki i pou donn lavi eternel bann ki demontre lafwa, e ki i pou retir soufrans, plere, e menm lanmor. Zeova ti fer vwar ki nou vreman kapab met konfyans dan sa dernyen promes, par dir avek zapot Zan: “Ekri, sa bann parol i serten e i vre.”—Revelasyon 21:4, 5; Proverb 15:9; Zan 3:36.
15. Ki serten mansonz ki Satan i promote?
15 Satan i tou lekontrer avek Zeova. Olye fer keksoz kler, i anbet dimoun. Pour akonpli son lobzektif pour fer dimoun abandonn vre ladorasyon, Satan i promot en kantite mansonz. Par egzanp, Satan i oule fer nou krwar ki Bondye pa enterese avek nou e i pa enterese avek bann soufrans ki annan lo later. Pourtan, Labib i montre ki Zeova i vreman enterese avek tou sa ki i’n kree e i regrete ki mesanste ek soufrans i egziste. (Akt 17:24-30) Satan i osi anvi dimoun krwar ki i pa vo lapenn resers bann keksoz spirityel. De lot kote, Labib i asir nou ki “Bondye pa enzis pour li oubliy travay ki zot in fer, ni lanmour ki zot in montre pour li.” Deplis, i dir klerman ki “i rekonpans tou bann ki rod li.”—Ebre 6:10; 11:6.
16. Akoz bann Kretyen i bezwen reste vizilan e reste atase avek laverite?
16 Zapot Pol ti ekrir sa konsernan Satan: “Pour bann enkredil, ki bondye-zidol sa syek i’n avegle zot lentelizans, pour ki zot pa war lalimyer Bonn Nouvel, konsernan laglwar Kris, ki zimaz Bondye.” (2 Korentyen 4:4) Parey Ev, serten dimoun i antyerman ganny anbete par Satan Dyab. Lezot i fer parey Adan, ki pa ti ganny anbete me ki ti swazir pour dezobei volonterman. (Zid 5, 11) Alors, i enportan ki bann Kretyen i reste vizilan e i reste atase avek laverite.
Zeova i oule ki nou annan en “Lafwa senser”
17. Ki nou devret fer pour ganny laprouvasyon Zeova?
17 Vi ki Zeova i en Bondye laverite dan tou sa ki i fer, i ekspekte bann ki ador li pour fer parey zot osi. En psalmis ti ekrir: “O Zeova, lekel ki pou vin en envite dan ou latant? Lekel ki pou reste dan ou montanny sen? Sa ki napa okenn repros kont li e ki pe pratik ladrwatir, e koz laverite dan son leker.” (Psonm 15:1, 2) Pour bann Zwif ki ti sant sa, ler zot ti mansyonn montanny sen Zeova, san dout sa ti fer zot mazin Montanny Siyon, kot Lerwa David ti anmenn lars lalyans kot sa latant ki i ti’n enstale laba. (2 Samyel 6:12, 17) Sa montanny ek sa latant ti fer rapel landrwa kot Zeova ti reste dan en sans senbolik. Laba, bann dimoun ti kapab apros Bondye pour sipliy li pour ganny son faver.
18. (a) Ki nou bezwen fer pour vin zanmi avek Bondye? (b) Ki nou pou diskite dan lartik swivan?
18 Tou sa ki oule vin zanmi avek Zeova, i bezwen koz laverite “dan son leker,” pa zis avek son labous. Bann vre zanmi Bondye i bezwen annan en leker senser e montre ki zot annan “en lafwa senser” parski sa ki nou fer i sorti dan nou leker. (1 Timote 1:5; Matye 12:34, 35) En zanmi Bondye pa devret malonnet oubyen rize, parski “Zeova i deteste en dimoun . . . ki tronp lezot.” (Psonm 5:6) Temwen Zeova partou lo later i fer bokou zefor pour imit Bondye laverite. Lartik swivan pou egzamin sa.
Ki ou pou reponn?
• Akoz Zeova i konn laverite lo tou keksoz?
• Kwa ki montre ki Zeova i en Bondye laverite?
• Konman Zeova in revel laverite?
• An rapor avek laverite, ki Zeova i ekspekte avek nou?
[Kestyon]
[Portre lo paz 23]
Bondye laverite i konn tou keksoz lo sa ki i’n kree
[Portre lo paz 25]
Promes Zeova pou vin vre