Bann Serviter Zeova I Annan En Vre Lespwar

“Larestan Zakob pou vin parmi bokou dimoun parey laroze ki sorti kot Zeova, . . . ki pa met lespwar dan zonm.”—MIKA 5:7.

1. Ki mannyer Izrael spirityel i en sours soulazman spirityel?

ZEOVA i Kreater lapli ek laroze. I pa servi dan nanryen pour met lespwar dan zonm pour fourni swa laroze ouswa lapli. Profet Mika ti ekrir: “Larestan Zakob pou vin parmi bokou dimoun parey laroze ki sorti kot Zeova, parey bann gro lapli lo vezetasyon, ki pa met lespwar dan zonm oubyen esper bann imen.” (Mika 5:7) Lekel ozordi ki reprezant “larestan Zakob”? Zot bann Izraelit spirityel, sa restan “Izrael Bondye.” (Galat 6:16, NW ) Pour bokou dimoun lo later, zot parey “laroze sorti kot Zeova” e “gro lapli lo vezetasyon.” Wi, vreman bann Kretyen swazir i en benediksyon sorti kot Bondye pour bann dimoun. Konman bann proklanmater Rwayonm, Zeova i servi zot pour fer dimoun konn sa vre lespwar, ki trouve dan son Parol.

2. Akoz nou annan vre lespwar kantmenm nou pe viv dan sa lemonn boulverse?

² I pa sirprenan ki sa lemonn napa en vre lespwar. Problenm politik, moralite ki pe degrade, krim, kriz ekonomik, terorism, lager, tousala i bann keksoz ki nou ekspekte i arive dan en lemonn ki ganny dominen par Satan Dyab. (1 Zan 5:19) Bokou dimoun i per sa ki lavenir i kapab anmennen. Me nou konman bann adorater Zeova, nou pa per, akoz nou annan en lespwar solid pour lavenir. I en vre lespwar akoz i baze lo Parol Bondye. Nou annan lafwa dan Zeova e dan son Parol akoz sa ki i dir i toultan vin vre.

3. (a) Akoz Zeova ti pe al pran aksyon kont Izrael ek Zida? (b) Akoz parol Mika i aplik pour nou letan?

³ Profesi enspire Mika i fortifye nou pour mars onon Zeova e i donn nou en fondasyon pour annan vre lespwar. Dan wityenm syek A.N.L., ler Mika ti profetize, pep ki Bondye ti’n fer lalyans avek ti divize an de nasyon, Izrael ek Zida. Zot tou le de, zot ti pe inyor lalyans Bondye. Sa ti fer zot standar moral abes en kantite, ti anmenn apostazi, ek en gran lanmour pour keksoz materyel. Alor, Zeova ti averti ki i pou pran aksyon kont zot. Byensir, lavertisman Zeova ti ganny adrese avek bann dimoun ki ti viv dan letan Mika. Me sitiasyon denozour i sitan parey dan letan Mika, ki son parol i osi aplik pour nou letan. Sa pou pli evidan pandan ki nou egzamin serten pwen for dan sa set sapit liv Mika.

Sa ki en Apersi lo Liv Mika i revele

4. Ki lenformasyon Mika sapit 1 ziska 3 i fourni?

⁴ Annou pas an bref lo sa ki annan dan liv  Mika. Dan sapit 1, Zeova i devwal revolt Zida ek Izrael. Akoz zot dezobeisans, Izrael pou ganny detri e pinisyon Zida pou ariv ziska larantre Zerizalenm. SAPIT 2 i revele ki bann dimoun ris e bann ki annan pouvwar pe maltret bann ki san defans. Me toudmenm, i osi annan en promes divin. Pep Bondye pou ganny rasanble dan linite. SAPIT 3 i mansyonn deklarasyon Zeova kont bann dirizan ek bann profet dezobeisan. Bann dirizan pe enterfer avek lazistis, e bann profet pe koz manti. Malgre sa sitiasyon, Mika i ganny lafors avek led lespri sen pour anons zizman Zeova ki pe vini.

5. Ki lide prensipal ki trouve dan Mika sapit 4 ek 5?

⁵ SAPIT 4 i predir ki dan bann dernyen zour, tou nasyon pou vin kot montanny eleve Zeova pour li enstri zot. Avan ki sa i arive, Zida pou ganny egzile an Babilonn, me Zeova pou delivre li. SAPIT 5 i revele ki Mesi pou ne Betleenm an Zida. I pou gid son pep e delivre zot kont bann nasyon dominer.

6, 7. Ki pwen ki ganny prezante dan profesi Mika sapit 6 ek 7?

⁶ Dan Mika sapit 6, Zeova i fer ekrir son lakizasyon kont son pep dan zar konmsi en zafer ki pe deroule an kour. Ki i’n fer pour fer son pep rebele? Nanryen. An realite, sa ki i ekspekte zot fer i vreman rezonnab. I anvi son bann adorater demontre lazistis, labonte, e vin modes anmezir ki zot mars avek li. Olye ki zot fer sa, Izrael ek Zida in revolte e zot pou bezwen sibir konsekans.

⁷ Dan dernyen sapit son profesi, Mika i denons mesanste son bann kontanporen. I pa perdi kouraz, me i determinen pour “kontinyen esper” Zeova. (Mika 7:7) Dan konklizyon sa liv, Mika i eksprim son konfyans ki Zeova pou annan pitye pour son pep. Listwar i montre ki sa lespwar ti ganny realize. An 537 A.N.L., ler Zeova ti’n fini  disiplin son pep, avek mizerikord i ti fer en restan son bann adorater retourn dan zot prop pei.

8. Konman ou pou rezim sa ki annan dan liv Mika?

⁸ Vreman Zeova in revel bann lenformasyon ekselan atraver Mika! Sa liv enspire i fourni bann lavertisman lo konman Zeova i azir avek sa ki pretann servi li me ki enfidel. I predir bann levennman ki pe arive ozordi. Deplis i donn bann konsey lo fason ki nou devret konport nou pandan sa bann letan difisil pour nou kapab fortifye nou lespwar.

Souvren Senyer Zeova i koze

9. Dapre Mika 1:2, ki Zeova ti pe al fer?

⁹ Aprezan annou egzamin liv Mika pli an detay. Dan Mika 1:2, nou lir: “Ekoute, O lepep, zot tou; port latansyon, O later ek sa ki ranpli ou, e les Souvren Senyer Zeova servi konman en temwen kont zot, Zeova dan son tanp sen.” San okenn dout, si ou ti pe viv dan letan Mika, sa parol ti pou’n kapte ou latansyon. An realite, zot kapte nou latansyon ozordi parski Zeova pe koze depi son tanp sen e i pe adres pa zis Izrael ek Zida me dimoun partou. Dan lepok Mika, pour tro bokou letan dimoun ti’n inyor Souvren Senyer Zeova. Byento, sa ti pou sanze. Zeova ti’n determinen pour pran serten aksyon.

10. Akoz parol dan Mika 1:2 i enportan pour nou?

¹⁰ Sa i aplik osi pour nou letan. Revelasyon 14:18-20 i montre ki Zeova i dan son tanp sen e i ankor pe kominik avek nou. Byento, Zeova pou sirman pran aksyon, e bann levennman enportan pou sok limanite ankor. Safwasi, se bann move “grap rezen lo later” ki pou ganny zete dan gran preswar lakoler Zeova, ki pou anmenn destriksyon konplet lo sistenm Satan.

11. Ki sa parol dan Mika 1:3, 4 i vedir?

¹¹ Ekout sa ki Zeova pe al fer. Mika 1:3, 4 i dir: “Gete! Zeova pe sorti dan son landrwa e i pou sirman desann e mars lo bann landrwa o lo later. Bann montanny pou fonn anba li, e bann plato pou fann an de, parey lasir akoz dife, parey delo ki pe ganny vide sorti lo en landrwa apik.” Eski Zeova pou kit son landrwa reste dan lesyel e fizikman mars lo bann montanny ek plato Later Promiz? Non. Pa fodre ki i fer sa. I pou zis tourn son latansyon lo later pour ki son lavolonte i ganny akonpli. Deplis, se pa vreman later ki pou sibir sa bann keksoz ki’n ganny dekrir, me son zabitan. Ler Zeova i azir, rezilta pou katastrofik pour bann enfidel—i pou konmsi montanny ki fonn parey lasir e bann plato ki ouver an de par en tranbleman-d-ter.

12, 13. An armoni avek 2 Pyer 3:10-12, ki fodre nou fer pour ki nou lespwar i asire?

¹² Petet parol profetik Mika 1:3, 4 i fer ou mazin en lot profesi ki predir bann levennman katastrofik lo later. Parey i’n ganny rikorde dan 2 Pyer 3:10, zapot Pyer ti ekrir: “Zour [Zeova] pou ariv konman en voler. Sa zour lesyel pou disparet avek en gran fraka; e bann eleman lesyel pou fonn avek dife. Later avek tou sa ki lo la pou ganny brile.” Zis parey avek profesi Mika, parol Pyer pa aplik pour sa lesyel ek later ki nou vwar avek nou lizye. Sa bann parol i refer avek en gran ladetres ki pe vin lo sa sistenm mesan.

¹³ Menm si i annan sa dezas ki pe aprose, bann Kretyen i kapab get lavenir avek konfyans, parey Mika. Konman? Par swiv sa konsey ki trouve dan bann verse swivan dan let Pyer. Sa zapot ti dir: “Parski tousala pou ganny detri, ki kalite lavi zot devre viv? Zot devre anmenn en lavi sen e annan respe pour Bondye, letan zot pe esper sa zour, an fezan zot mye pour fer sa zour vin pli vit!” (2 Pyer 3:11, 12) Nou lespwar pour lavenir pou garanti si nou devlop en leker obeisan e fer sir ki nou kondwit i sen e ki nou anmenn  en lavi ki demontre respe pour Bondye. Pour fer ki nou lespwar i asire, nou pa devret zanmen oubliye osi ki zour Zeova pou sirman arive.

14. Akoz Izrael ek Zida ti merit ganny pini?

¹⁴ Zeova i eksplike akoz son pep i merit ganny pini. Mika 1:5 i dir: “Se akoz revolt Zakob ki i annan tousala, wi akoz bann pese lakaz Izrael. Lekel revolt Zakob? Pa i Samari? Lekel bann oter Zida? Pa i Zerizalenm?” Si Izrael ek Zida i egziste se gras a Zeova. Pourtan, zot in rebel kont li, e zot rebelyon in menm ariv dan kapital Izrael ek Zida, setadir Samari ek Zerizalenm.

Bann move Pratik i partou

15, 16. Bann dimoun ki ti viv dan letan Mika ti koupab pour ki move aksyon?

¹⁵ En legzanp mesanste bann dimoun dan letan Mika i klerman ganny dekrir dan Mika 2:1, 2: “Maler pour sa ki pe konplot lemal, pour sa ki pe pratik sa ki move lo zot lili! Kan lizour i fer zot konmans fer li, akoz i dan zot pouvwar. Zot in anvi bann plantasyon e zot in sezi zot; osi bann lakaz, e zot in pran; e zot in trik en zonm kosto ek son fanmiy, en zonm ek son leritaz.”

¹⁶ Bann dimoun egois pa dormi aswar me zot pe kalkile konman pour pran plantasyon ek lakaz zot vwazen. Ler lizour i fer, zot depese pour realiz zot plan. Zot pa ti pou’n komet bann move keksoz parey, si zot ti’n mazin lalyans Zeova. Lalwa Moiz i fer laranzman pour ki bann pov i ganny proteze. Anba Lalwa Moiz, okenn fanmiy pa devret perdi son leritaz pour touzour. Me sa pa enteres sa bann dimoun egois. Zot inyor parol dan Levitik 19:18, ki dir: “Ou devret kontan ou prosen parey ou prop lekor.”

17. Ki kapab arive ler bann ki pretann servi Bondye i met keksoz materyel premye dan zot lavi?

¹⁷ Sa i montre ki kapab arive ler en dimoun ki pretann servi Bondye i negliz bann lobzektif spirityel e rod bann keksoz materyel avan. Pol ti averti bann Kretyen dan son letan: “Bann ki oule vin ris i tonm dan tantasyon e dan pyez en kantite dezir bet e move, ki plonz dimoun dan larin e fer zot maler.” (1 Timote 6:9) Si premye lobzektif dan lavi en dimoun se pour ganny larzan, alor i pe ador en fo bondye—Larises. Sa fo bondye pa ofer okenn lespwar asire pour lavenir.—Matye 6:24.

18. Ki ti pe al arive avek bann dimoun ki ti tay deryer larzan ek keksoz materyel dan letan Mika?

¹⁸ Bokou dimoun dan letan Mika ti vwar pour zot menm, atraver difikilte, ki depan lo bann keksoz materyel i anven. Dapre Mika 2:4, Zeova i dir: “Sa letan dimoun pou dir sa parol lo zot e pou sirman zemir, wi en zemisman. Enn pou bezwen dir: ‘Nou’n konpletman ganny depouye! I’n pran sa ki mon pep i annan. I aras mwan sa! Avek sa enn enfidel i partaz nou prop plantasyon.’ ” Wi, sa bann voler lakaz ek plantasyon pou perdi leritaz zot prop fanmiy. Zot pou ganny deporte dan en pei etranze, e “sa enn enfidel,” setadir dimoun lezot nasyon, pou pran zot posesyon avek zot. Tou lespwar pour en lavenir prospere pou ganny brize.

19, 20. Ki ti arive avek bann Zwif ki ti met konfyans dan Zeova?

¹⁹ Me bann ki met konfyans dan Zeova pou trouv zot lespwar vin en realite. Zeova i fidel anver son lalyans ki i ti fer avek Abraam ek David. I annan pitye pour bann dimoun, parey Mika, ki kontan li e sagren ki zot bann frer i elwannyen avek Zeova. Bondye pou reetablir zot dan son letan fikse.

²⁰ Sa ti arive an 537 A.N.L., apre ki Babilonn ti tonbe e ler en restan Zwif ti retourn se zot. Sa letan, parol dan Mika 2:12 ti trouv en premye lakonplisman. Zeova i dir: “Mon pou sertennman reini Zakob, zot tou; mon pou san fot rasanble larestan Izrael. Mon  pou reini zot dan linite, parey en troupo dan lanklo, parey en troupo dan zerb; zot pou fer bokou tapaz akoz i pou ranpli avek zonm.” Vreman Zeova i en Bondye ki ranpli avek lanmour! Apre ki i’n fini disiplin son pep, i permet en restan pour retournen e servi li dan sa pei ki i ti donn zot zanset.

Menm Zafer dan nou Letan

21. Ki mannyer sitiasyon ozordi i parey avek letan Mika?

²¹ Pandan ki nou’n egzamin sa bann verse dan sa de premye sapit Mika, eski ou etonnen pour vwar konman ki sitiasyon ozordi i parey dan letan Mika? Parey dan letan Mika, bokou dimoun ozordi i pretann servi Bondye. Me parey Zida ek Izrael, zot divize e zot menm lager antre zot. Bokou dimoun ris dan Kretyente in fer soufer bann ki pov. Deplizanpli, bann sef relizye i toler bann aktivite ki Labib i klerman kondannen. I pa sirprenan alor ki Kretyente pou byento trouv son lafen, ansanm avek larestan “Gran Babilonn” lanpir mondyal fo larelizyon! (Revelasyon 18:1-5) Me parey dan letan Mika, Zeova pou protez bann serviter fidel lo later.

22. Lekel sa de group ki’n met zot lespwar dan Rwayonm Bondye?

²² An 1919, bann Kretyen swazir ti separ zot konpletman avek Kretyente e konmans proklanm sa bon nouvel Rwayonm avek tou nasyon. (Matye 24:14) Okonmansman, zot ti rod larestan Izrael Bondye. Apre sa, ‘lezot mouton’ ti konmans ganny rasanble, e sa de group ti vin “en sel troupo e en sel berze.” (Zan 10:16) Ozordi, kantmenm zot servi Bondye dan 234 pei, tou bann adorater fidel Zeova i vreman “ini.” Aprezan, dan lanklo mouton i annan “bokou tapaz akoz i ranpli avek zonm,” osi byen ki madanm ek zanfan. Zot pa met zot lespwar dan sa sistenm, me dan Rwayonm Bondye, ki pou byento reetablir Paradi lo later.

23. Akoz ou konvenki ki ou lespwar i asire?

²³ Konsernan bann adorater fidel Zeova, dernyen verse dan Mika sapit 2 i dir: “Zot lerwa pou pas devan zot, avek Zeova devan zot.” Eski ou vwar ou dan sa laprosesyon laviktwar, pe swiv ou Lerwa, Zezi Kri, avek Zeova devan? Si wi, ou kapab annan konviksyon ki laviktwar i garanti e ou lespwar i asire. Sa pou vin pli evidan ler nou egzamin lezot pwen enteresan dan profesi Mika.

Ki ou pou reponn?

• Akoz Zeova ti deside pran aksyon kont Zida ek Izrael dan letan Mika?

• Ki kapab arive ler sa bann ki pretann servi Bondye i met keksoz materyel premye dan zot lavi?

• Apre ki nou’n egzamin Mika sapit 1 ek 2, akoz ou konvenki ki ou lespwar i asire?

[Kestyon]

[Portre lo paz 6]

Profesi Mika i kapab fortifye nou spirityelman

[Portre lo paz 7]

Parey bann restan Zwif an 537 A.N.L., bann Izraelit spirityel ek zot konpanyon i promot vre ladorasyon