Fer Zeova Konfyans

“Ou mon lespwar, O Souvren Senyer Zeova, mon konfyans depi mon zenes.” —PSONM 71:5.

1. Ki sitiasyon difisil David ti fer fas avek?

GOLYAT ti mezir preski trwa met oter. I pa sirprenan alor ki tou solda lo fron batay Izrael ti per pour al debout avek li! Toulezour, lizour konman aswar, Golyat, sa zean Filisten, ti monk larme Izrael e demann zot pour anvoy zot sanpyon vin lager avek li. Finalman, pa en solda ki ti aksepte sa lenvitasyon, me en senp garson. I ti apel David e i ti en gardyen mouton. David ti en pti nen konpare avek son oponan. Anfet, i probab ki i ti pli leze ki bann lekipman proteksyon ek lekipman batay Golyat! Kantmenm sa, sa zenn garson ti debout avek Golyat e i’n vin en legzanp kouraz ziska ozordi.—1 Samyel 17:1-51.

2, 3. (a) Akoz David ti kapab fer fas avek Golyat avek sitan bokou konfyans? (b) Ki sa de pa ki nou pou diskite ki pou fer nou annan konfyans dan Zeova?

² Kot David ti ganny sa kouraz? Annou vwar en parol ki David ti ekrir plitar: “Ou mon lespwar, O Souvren Senyer Zeova, mon konfyans depi mon zenes.” (Psonm 71:5) Wi, depi ki i ti ankor zenn, David ti met tou son konfyans dan Zeova. I ti debout avek Golyat, an dizan: “Ou pe vin kot mwan avek en lepe ek en lans. Me mwan mon pe vin kot ou avek non Zeova bann larme, Bondye fron batay Izrael, ki ou’n provoke.” (1 Samyel 17:45) Golyat ti met son konfyans dan son gro lafors ek son zarm, me David li i ti met konfyans dan Zeova. Sa enn ki pli o dan liniver ti dan son kote. Alors, akfer David ti bezwen per en senp zonm, kantmenm i ti kapab byen gran e byen arme?

³ Letan ou lir konsernan David, eski ou swete ki ou konfyans dan Zeova ti a pli solid? Petet bokou nou ti a anvi sa. Alors, annou egzamin de pa ki nou kapab pran pour fer Zeova konfyans. Premyerman, nou bezwen kontinyelman annan kontrol lo en lobstak ase komen ki anpes nou met konfyans dan Zeova. Dezyenmman, nou bezwen aprann kisisa vreman met konfyans dan Zeova.

Sirmont en Lobstak ki anpes met Konfyans dan Zeova

4, 5. Akoz bokou dimoun i vwar li difisil pour met konfyans dan Bondye?

⁴ Kwa ki anpes dimoun met zot konfyans dan Bondye? Souvannfwa, dimoun i konfize vi ki zot pa konnen akoz bann move keksoz i arive. Bokou dimoun in ganny ansennyen ki Bondye i responsab pour bann soufrans ki pe arive. Kan en maler i arive, bann sef relizye i kapab dir ki Bondye in “pran” sa bann viktim e zot avek li dan lesyel. Deplis, bokou dirizan relizye i ansennyen ki depi byen lontan Bondye in fini progranm sak levennman ki arive dan lemonn. Sa i enkli sak maler ek move keksoz ki arive. I ti pou difisil pour met konfyans dan en Bondye ki annan leker dir koumsa. Satan, ki pe avegle lespri bann ki pa krwar, i pare pour promot tou sa bann “lansennyman demon.”—1 Timote 4:1; 2 Korentyen 4:4.

⁵ Satan i anvi dimoun perdi konfyans dan Zeova. Sa lennmi Bondye pa oule nou konnen akoz vreman imen pe soufer. Menm si nou’n vwar dan Labib akoz nou soufer, Satan i oule nou bliye. Alors, i ti a byen si detanzaot nou revwar sa trwa rezon prensipal akoz i annan soufrans dan lemonn. Letan nou fer sa, nou pou konvenki dan nou leker ki Zeova pa responsab pour sa bann problenm ki nou rankontre dan lavi.—Filipyen 1:9, 10.

6. Ki mannyer 1 Pyer 5:8 i idantifye en rezon akoz dimoun i soufer?

 ⁶ En rezon akoz imen i soufer se ki Satan i anvi fer pep Zeova aret servi li. I ti esey fer menm zafer avek Zob. Me i pa ti reisi. Toudmenm Satan pa oule les tonbe. Vi ki i kontrol sa lemonn, i pe esey ‘devor’ bann serviter fidel Zeova. (1 Pyer 5:8) Sa i enkli nou tou! Satan i anvi fer nou aret servi Zeova. Se pour sa ki i toultan fer nou ganny persekite. Kantmenm persekisyon i fer mal, nou annan bon rezon pour nou persevere. Letan nou persevere, nou ede prouve ki Satan i en manter e sa i fer plezir Zeova. (Zob 2:4; Proverb 27:11) Ler nou vwar ki Zeova i donn nou lafors pour andir persekisyon, nou konfyans dan li i vin pli solid.—Psonm 9:9, 10.

7. Dapre Galat 6:7, akoz dimoun i soufer?

⁷ En dezyenm rezon akoz nou soufer i ganny trouve dan sa prensip: “En dimoun i rekolte sa ki in senmen.” (Galat 6:7) Parler, dimoun i senmen letan zot fer bann move swa e zot rekolte serten soufrans konman konsekans. Zot kapab swazir pour dray vit e apre fer aksidan. Bokou dimoun i swazir pour fimen, ki fer zot malad leker oubyen ganny kanser poumon. Bann ki swazir pour viv en lavi dezordonnen i kapab soufer apre, akoz problenm fanmiy, zot perdi respe pour zot lekor, zot ganny bann maladi ki ganny transmet par sèks, e bann lansentman ki zot pa ti anvi. Petet zot sey blanm Bondye pour bann tel soufrans, me an realite zot in vin viktim zot prop move desizyon.—Proverb 19:3.

8. Dapre Eklezyast 9:11, akoz dimoun i soufer?

⁸ En lot rezon pour soufrans i ganny trouve dan Eklezyast 9:11: “Mon’n vwar lo sa later ki lakours pa touzour al pour sa ki vit, ni lager pour sa ki for, ni manze pour sa ki saz, ni menm faver pour sa ki entelizan, akoz letan ek levennman san ekspekte i ariv lo zot tou.” Parler, dimoun i senpleman dan en move landrwa e dan en move moman. San ekspekte, soufrans oubyen lanmor i kapab pran nou tou san pran kont nou pwen for oubyen nou pwen feb. Par egzanp, en latour ti tonbe Zerizalenm dan letan Zezi e touy 18 dimoun. Zezi ti montre ki Bondye pa ti pe pini sa bann dimoun ki’n mor pour pese ki zot ti’n fer. (Lik 13:4) Non, Zeova pa responsab pour bann tel soufrans.

9. Ki bokou dimoun pa konpran konsernan soufrans?

 ⁹ I enportan pour konpran akoz nou soufer. De lot kote, i annan en lot laspe konsernan soufrans ki bokou dimoun i vwar difisil konpran. Sa se akoz Zeova i permet soufrans.

Akoz Zeova i permet Soufrans?

10, 11. (a) Dapre Romen 8:19-22, ki’n arive avek “tou lakreasyon”? (b) Ki mannyer nou kapab konnen lekel ki’n kondann lemonn pour vin en naryen ditou?

¹⁰ En pasaz dan let ki zapot Pol ti ekrir bann Romen, i fer nou pli byen konpran sa size enportan. Pol ti ekrir: “Lemonn antye ki Bondye in kree pe esper avek pasyans sa moman kan Bondye pou revel son bann garson. Parski lemonn antye in ganny kondannen pour vin en nanryen ditou non pa par son prop swa, me akoz sa enn ki’n fer li soumet, me avek en lespwar ki sa kreasyon pou ganny libere en zour avek pouvwar destrikter ki pe gard li dan lesklavaz, pour partisip dan laliberte ek laglwar bann zanfan Bondye. Nou konnen, annefe, ki ziska aprezan tou lakreasyon Bondye pe soupire e soufer parey en madanm ki pe ganny baba.”—Romen 8:19-22.

¹¹ Pour konpran sa bann verse, nou bezwen premyerman reponn serten kestyon enportan. Par egzanp, Lekel ki’n kondann lemonn pour vin en nanryen ditou? Serten i dir Satan, e lezot i dir Adan. Me ni enn ni lot pa’n kapab fer sa. Akoz? Parski sa enn ki’n kondann lemonn pour vin en nanryen ditou, in fer li “avek en lespwar.” Wi, i donn bann ki fidel lespwar ki zot “pou ganny libere en zour avek pouvwar destrikter ki pe gard li dan lesklavaz.” Ni Adan ni Satan pa kapab ofer nou en tel lespwar. Zis Zeova ki kapab fer sa. Alors, i kler ki se Zeova ki’n kondann lemonn pour vin en nanryen ditou.

12. Ki konfizyon in annan konsernan lidantite “tou lakreasyon,” e ki mannyer sa kestyon i kapab ganny reponn?

¹² Me lekel sa “tou lakreasyon” ki sa pasaz pe koz lo la? Serten dimoun i dir ki sa “tou lakreasyon” pe refer avek tou kreasyon, enkli bann zannimo ek plant. Me eski bann zannimo ek plant i annan lespwar “pour partisip dan laliberte ek laglwar bann zanfan Bondye”? Non. (2 Pyer 2:12) Alors, “tou lakreasyon” i bezwen pe refer avek zis bann imen. Se zot parmi kreasyon Bondye ki’n ganny afekte avek pese ek lanmor akoz sa rebelyon dan zarden Edenn e se zot ki vreman bezwen en lespwar.—Romen 5:12.

13. Ki sa rebelyon dan zarden Edenn in anmennen pour limanite?

¹³ Ki sa rebelyon in fer egzakteman avek limanite? Pol i dir ki i’n fer li vin en nanryen ditou. * Dapre en liv referans, sa mo ki’n ganny tradwir la konman nanryen ditou i dekrir “en lobze ki pa fonksyonn konman fodre.” Alors i pa servi dan nanryen ditou. Zonm in ganny kree pour viv pour touzour e travay ansanm konman en sel fanmiy ini pour pran swen avek later ki ti pou en paradi. Me kontrerman avek sa, zot lavi i kourt, i ranpli avek soufrans, e i fatigan. Parey Zob ti dir, “zonm, ki fanm in donn nesans, i viv en pti gin letan e son lavi i ranpli avek problenm.” (Zob 14:1) Vreman sa lavi i anven!

14, 15. (a) Akoz nou kapab dir ki desizyon Zeova pour kondann limanite ti zis? (b) Akoz Pol ti dir ki kreasyon in ganny kondannen pour en nanryen ditou “pa par son prop swa”?

¹⁴ Aprezan, nou ariv lo sa kestyon prensipal: Akoz sa ‘Enn ki ziz later antye’ in kondann bann imen par fer zot annan en lavi ranpli avek soufrans e fatigan? (Zenez 18:25) Eski i zis pour li fer sa? Mazinen ki nou premye paran ti fer. Letan zot ti rebel kont Bondye, zot ti pran kote avek Satan, ki ti kestyonn drwa Zeova pour dirize. Zot aksyon ti montre ki zot ti siport sa deklarasyon konmkwa zonm ti pou  pli byen san Zeova. Zot ti a fer konman zot oule e anba gidans en lanz rebel. Kan Zeova ti pas son zizman lo sa de rebel, dan en sans, i ti donn zot sa ki zot ti oule. I ti les zonm fer ki mannyer zot oule anba lenfliyans Satan. Dan en tel sirkonstans, ki desizyon ki ti pou pli zis ki permet limanite vin nanryen ditou me avek en lespwar?

¹⁵ Byensir, lemonn pa’n ganny kondannen “par son prop swa.” Nou’n ne konman lesklav pese ek koripsyon san okenn swa dan sa zafer. Me akoz Zeova i annan mizerikord, i’n permet Adan viv e ganny zanfan. Kantmenm nou, desandans Adan, nou’n ganny kondannen pour vin en nanryen ditou, nou annan loportinite pour fer sa ki Adan ek Ev pa’n arive fer. Nou kapab ekout Zeova e vwar pour nou menm ki son fason dirize i drwat e parfe, tandis ki dominasyon zonm san gidans Zeova in zis fer lavi anven, ranpli avek douler ek fristrasyon. (Zeremi 10:23; Revelasyon 4:11) Lenfliyans Satan i fer keksoz pli pir ankor. Listwar i kapab konfirmen ki sa i vre.—Eklezyast 8:9.

16. (a) Akoz nou asire ki Zeova pa responsab pour sa bann soufrans ki nou vwar dan sa lemonn ozordi? (b) Ki lespwar Zeova in donn bann imen ki reste fidel?

¹⁶ I kler ki desizyon Zeova pour kondann limanite pour en nanryen ditou ti zis. Me eski sa i vedir ki Zeova ki’n fer lavi anven e pe fer nou soufer ozordi? Annou konpar sa sitiasyon avek en ziz ki pas en santans zis, lo en kriminel. Sa prizonnyen i kapab soufer bokou, letan i pe servi son santans dan prizon. Me eski i kapab dir ki sa ziz ki’n fer li soufer? Non. Deplis, mesanste pa sorti kot Zeova. Zak 1:13 dan Traduction du monde nouveau, i dir: “Bondye pa kapab ganny teste par sa ki mal, e li menm i pa teste personn dan sa fason.” Annou pa bliye osi ki Zeova in pas sa santans “avek en lespwar.” Avek lanmour, i’n fer laranzman pour bann desandans fidel Adan ek Ev nepli viv sa lavi anven e pour “partisip dan laliberte ek laglwar bann zanfan Bondye.” Bann imen ki reste fidel pa pou zanmen bezwen trakas ankor ki sa later i kapab plonz ankor dan sa kalite lavi ki pa abouti dan nanryen. Lefe ki Zeova in tret sa sitiasyon dan en fason ki zis, sa pou montre enn fwa pour tou ki i annan drwa diriz limanite.—Izai 25:8.

17. Letan nou revwar akoz imen pe soufer dan sa lemonn ozordi, ki lefe sa i fer lo nou?

¹⁷ Ler nou revwar sa trwa rezon akoz imen i soufer, eski nou vwar okenn rezon pour blanm Bondye pour mesanste ki egziste ozordi oubyen pour perdi konfyans dan li? Okontrer, sa i donn nou rezon pour dir parey Moiz: “Sa Ros, son aktivite i parfe, akoz tou son bann semen i lazistis. En Bondye fidel, avek ki napa lenzistis; i drwat e zis.” (Deterononm 32:4) Detanzaot, annou vwar si nou kapab personnelman reponn sa bann kestyon konsernan soufrans par reflesir oprofon lo zot. Dan sa fason, nou pou kapab reziste zefor Satan pour senm dout dan nou lespri letan nou rankontre bann leprev. Parkont, parey nou ti mansyonnen okonmansman lartik, annou vwar kisisa met konfyans dan Zeova.

Ki savedir met Konfyans dan Zeova

18, 19. Ki parol dan Labib ki ankouraz nou pour met konfyans dan Zeova, me ki bann fo konsep serten i annan dan sa domenn?

¹⁸ Parol Bondye i sipliy nou: “Met ou konfyans dan Zeova avek tou ou leker e pa apiy lo ou prop lentelizans. Dan tou ou semen pran  li an konsiderasyon, e li i pou fer drwat tou ou santye.” (Proverb 3:5, 6) Sa i en zoli parol e i vreman rekonfortan. Byensir napa personn dan liniver antye ki pli diny konfyans ki nou Papa byenneme dan lesyel. Toudmenm, i pli fasil pour lir sa parol ki met li an pratik.

¹⁹ Bokou dimoun pa byen konpran ki savedir met konfyans dan Zeova. Serten i krwar ki en tel konfyans i zis en santiman zwaye ki zot santi dan zot leker. Lezot i krwar ki met konfyans dan Bondye i vedir ki nou ekspekte li pour protez nou kont tou difikilte, pour rezourd tou nou problenm ki nou rankontre toulezour, egzakteman parey nou anvi e toudswit! Me sa pa rezonnab. Konfyans pa zis en santiman, e i pa zis en keksoz imaziner. Pour bann adilt, konfyans i enplik fer bann desizyon ki’n ou pran letan pour byen reflesir lo la.

20, 21. Ki i enplike dan met konfyans dan Zeova? Donn en legzanp.

²⁰ Annou get ankor ki Proverb 3:5 i dir. I opoz met konfyans dan Zeova avek apiy lo nou prop lentelizans. Sa i endike ki nou pa kapab fer tou le de. Eski sa i vedir ki nou pa devret servi nou lespri? Non, parski se Zeova ki’n donn nou sa lespri, e i ekspekte nou pour servi li. (Romen 12:1, NW ) Me lo ki nou apiye oubyen depan lo la letan nou fer desizyon? Si sa ki nou lespri i dir nou pa an armoni avek panse Zeova, eski nou aksepte ki lasazes Zeova i pli siperyer ki pour nou? (Izai 55:8, 9) Met konfyans dan Zeova i vedir les son panse gid nou.

²¹ Annou vwar en legzanp. Mazin en zanfan pe asize deryer dan loto, e son paran i dan sit devan. Son papa pe dray. An alan, zot rankontre en problenm. Petet zot in mank semen, oubyen letan pa bon, oubyen kekfwa semen pa bon. Ki mannyer en zanfan obeisan ki annan konfyans dan son paran pou reazir? Eski i pou kriye deryer e dir son papa ki pou fer? Eski i pou kestyonn desizyon son paran e pa ekoute kan zot dir li kit son sentir atase? Non, normalman i pou fer son paran konfyans e les keksoz dan zot lanmen menm si zot enparfe. Zeova i en Papa parfe. Eski pa nou devret met tou nou konfyans dan li ler nou rankontre bann sitiasyon difisil?—Izai 30:21.

22, 23. (a) Akoz nou devret met nou konfyans dan Zeova kan nou rankontre problenm, e ki mannyer nou kapab fer sa? (b) Ki nou pou diskite dan lartik swivan?

²² Toudmenm, Proverb 3:6 i endike ki nou devret ‘pran li an konsiderasyon dan tou sa ki nou fer,’ pa zis letan nou rankontre difikilte. Alors, bann desizyon ki nou pran toulezour, i devret montre ki nou annan konfyans dan Zeova. Kan problenm i arive, nou pa devret dezespere, panik, oubyen refize pour swiv gidans Zeova pour pli byen rezourd sa problenm. Nou devret vwar bann leprev konman en loportinite pour siport souvrennte Zeova, prouve ki Satan i en manter, e devlop lobeisans ek lezot kalite ki fer plezir Zeova.—Ebre 5:7, 8.

²³ Nou kapab montre ki nou annan konfyans dan Zeova dan nenport ki problenm ki pe menas nou. Nou fer sa dan nou lapriyer, e ler nou rod gidans dan Parol Zeova e dan son lorganizasyon. Me ki mannyer nou kapab montre konfyans dan Zeova sirtou kan nou rankontre problenm dan sa lemonn ozordi? Lartik swivan pou diskit sa.

[Not anba lo paz]

Ki ou pou reponn?

• Ki mannyer David ti montre ki i ti fer Zeova konfyans?

• Nonm trwa keksoz ki fer imen soufer ozordi. Akoz i byen pour nou revwar zot detanzaot?

• Ki santans Zeova ti pase lo limanite, e akoz sa ti zis?

• Ki savedir met konfyans dan Zeova?

[Kestyon]

[Portre lo paz 23]

David ti fer Zeova konfyans