Nou Pou Mars Onon Zeova Pour Touzour!

“Nou pou mars onon Zeova nou Bondye pour letan endefini, wi pour touzour.” —MIKA 4:5.

1. Ki mesaz ki trouve dan Mika sapit 3 ziska 5?

ZEOVA i annan en keksoz pour dir son pep, e i pe servi Mika konman son profet. Bondye in deside pour pran aksyon kont bann ki fer sa ki mal. I pe al pini Izrael akoz zot ti rezet li. Me erezman, pour bann ki mars onon Zeova, zot zot pou ganny beni. Sa bann mesaz i klerman ganny eksprimen dan sapit 3 ziska 5 profesi enspire Mika.

2, 3. (a) Ki bann lider Izrael ti sipoze pe fer, me an realite ki zot ti pe fer? (b) Ki mannyer ou pou eksplik sa bann lekspresyon ki Mika i servi dan Mika 3:2, 3?

² Profet Bondye i dir: “Silvouple, ekoute, zot sef Zakob e zot komandan Izrael. Eski pa i zot zafer pour konn lazistis?” Wi, sanmenm sa ki zot ti sipoze pe fer. Me an realite ki zot pe fer? Mika i dir: “Zot ki ay sa ki byen e kontan sa ki mal, ki aras lapo lo dimoun e lavyann lo zot lezo; zot sa bann ki’n osi manz laser mon pep, e ki’n aras zot lapo, e ki’n kraz zot lezo, e ki’n kraz zot an pti morso parey sa ki dan en marmit e parey lavyann dan en gran marmit.”—Mika 3:1-3.

³ I enkrwayab, me bann dirizan pe kraz bann dimoun pov, ki san defans! Sa bann ki ti ekout Mika ti fasilman konpran son bann lekspresyon ki i ti servi. Pour prepar en mouton ki’n ganny touye, i bezwen ganny bwi. Alor premyerman son lapo i ganny retire e apre son bann lezo. Parfwa bann lezo i ganny kraze pour ki son lanmwel i kapab sorti. Lavyann ansanm avek lezo i ganny bwi dan en gran resipyan, parey sa enn ki Mika ti mansyonnen. (Ezekyel 24:3-5, 10) Sa legzanp i vreman adapte avek sa move tretman ki lepep ti pe gannyen avek zot bann move dirizan!

Zeova i ekspekte ki nou demontre Lazistis

4. Ki diferans ki egziste ant Zeova ek bann dirizan Izrael?

⁴ I annan en diferans remarkab ant Zeova, sa Berze ranpli avek lanmour, ek bann dirizan Izrael. Vi ki zot pa ti demontre lazistis, zot pa ti reisi akonpli zot devwar pour protez troupo. Okontrer, avek legoism, zot ti eksplwat bann mouton senbolik. Zot pa ti donn sa bann dimoun ordiner lazistis e zot ti responsab pour fer zot ganny touye parey Mika 3:10 i fer resorti. Ki nou kapab aprann atraver sa sitiasyon?

5. Ki Zeova i ekspekte avek sa bann ki annan serten responsabilite parmi son pep?

⁵ Bondye i ekspekte sa bann ki annan serten responsabilite parmi son pep pour demontre lazistis. Ozordi, sanmenm sa ki nou trouve parmi serviter Zeova. Deplis, sa i an armoni avek Izai 32:1, kot nou lir: “Gete! En lerwa pou renny pour ladrwatir; e bann prens zot, zot pou diriz pour lazistis.” Me ki nou trouve dan letan Mika? “Bann ki ay sa ki byen ek bann ki kontan sa ki mal” i kontinyen detourn lazistis.

Lapriyer lekel ki ganny reponn?

6, 7. Ki pwen enportan ki Mika 3:4 i fer resorti?

⁶ Eski bann move dimoun dan letan Mika  i ekspekte ganny faver Zeova? Definitivman non! Mika 3:4 i deklare: “Zot pou apel Zeova pour led, me i pa pou reponn zot. Sa letan, i pou kasyet son figir avek zot, akoz zot in fer sa ki mal.” Sa i aksantye en pwen tre enportan.

⁷ Zeova pa pou reponn nou lapriyer si nou kontinyen fer pese. Sa i leka si nou pe viv de kalite lavi, setadir kasyet keksoz mal ki nou fer anmenmtan pretann ki nou pe servi Bondye fidelman. Dapre Psonm 26:4, David ti sante: “Mon pa’n asiz avek bann manter; e mon pa asosye avek sa bann ki kasyet sa ki zot ete.” Zeova osi pa pou ekout lapriyer bann ki volonterman dezobei son Parol!

Ganny Lafors avek Lespri Bondye

8. Ki lavertisman bann fo profet dan letan Mika ti gannyen?

⁸ Bann dirizan Izrael pe vreman fer bann keksoz deplorab! Pep Bondye pa konnen kote zot pe ale lo plan spirityel gras a sa bann fo profet. Sa bann lider voras i kriye, “‘Lape!’ me an realite ler personn pa met en keksoz dan zot labous zot sangtifye lager kont li.” Zeova i dir: “Alor zot pou dan fernwanr, ki fer ki pou napa vizyon; e zot pou dan teneb, ki fer ki zot pa pou devinen. Wi, soley pou kous lo bann profet, e lizour pou vin sonm pour zot. Bann ki ganny vizyon pou onte, e bann deviner pou sirman dezapwente. Zot pou bezwen kouver zot moustas.”—Mika 3:5-7a.

9, 10. Ki savedir ‘kouver moustas,’ e akoz napa okenn rezon pour Mika fer sa?

⁹ Akoz zot pou “kouver zot moustas”? Sa i en keksoz ki bann kontanporen Mika i fer akoz laont ki zot annan. Sa bann move zonm i annan tou rezon pour zot onte. I “napa okenn larepons sorti kot Bondye” pour zot. (Mika 3:7b) Zeova pa port okenn latansyon anver lapriyer bann move dimoun ki annan lorgey.

¹⁰ I napa okenn rezon pour Mika ‘kouver son moustas.’ Li i pa onte. Zeova i reponn son lapriyer. Get ki sa profet fidel i dir dan Mika 3:8: “Parkont, mwan mon ranpli avek lafors, akoz lespri Zeova, lespri lazistis ek pwisans.” Mika i vreman rekonesan ki toudilon son minister ki’n dir pour lontan, i’n toultan “ranpli avek lafors, akoz lespri Zeova”! Sa in donn li kouraz “pour fer Zakob konn son revolt e Izrael konn son pese.”

11. Ki mannyer bann imen i ganny lafors pour anons mesaz Bondye?

¹¹ Mika i bezwen plis ki zis lafors imen pour kapab anons zizman Bondye. Lespri Zeova oubyen son lafors aktif i esansyel. Eski sa i leka pour nou osi? Nou kapab akonpli nou travay predikasyon selman si Zeova i fortifye nou par mwayen son lespri sen. Si nou volonterman fer pese nou pa pou reisi dan sa travay predikasyon. Dan en ka parey, Bondye pa reponn nou lapriyer pour donn nou lafors pour fer sa travay. Definitivman nou pa kapab anons mesaz nou Papa seles amwen ki “lespri Zeova”  i lo nou. Atraver nou lapriyer ki ganny egzose e avek led lespri sen, nou kapab anons parol Bondye avek kouraz, parey Mika.

12. Akoz bann premye disip Zezi ti kapab ‘kontinyen anons Parol Bondye san okenn lafreyer’?

¹² Petet ou rapel sa resi dan Akt 4:23-31. Meton ou ti en disip Zezi dan premye syek. Bann persekiter i anvi ferm labous bann disip Zezi. Me sa bann disip fidel i priy avek Zeova. Zot sipliy li: “Senyer, regard menas ki zot in fer, e permet ou serviter anons ou mesaz avek lasirans san okenn lafreyer.” Son rezilta? Kan zot ti’n fini priye, landrwa kot zot ti’n reini ti sekwe. Zot tou zot ti ranpli avek lespri sen e zot ti konmans anons mesaz Bondye san okenn lafreyer. Fotespere ki nou osi nou tourn ver Zeova dan lapriyer e depan lo son led par lespri sen pandan ki nou akonpli nou minister.

13. Ki ti pou arive avek Zerizalenm ek Samari, e akoz?

¹³ Annou mazin ankor dan letan Mika. Dapre Mika 3:9-12, bann dirizan koronpi pe zize zis pour ganny gous, bann pret i enstri pour ganny en rekonpans, e bann fo profet i devinen pour ganny larzan. I pa sirprenan ki Bondye i donn lord pour ki kapital Zida, Zerizalenm, i “vin zis en ta debri”! Vi ki fo ladorasyon ek imoralite i partou dan Izrael osi, Mika i ganny enspire pour averti ki Bondye pou fer Samari vin “en ta debri.” (Mika 1:6) Annefe, Mika ti viv pour vwar Samari ganny detri par bann larme Asiryen an 740 A.N.L., parey ti’n ganny predir. (2 Lerwa 17:5, 6; 25:1-21) I ti evidan ki sa bann mesaz pwisan kont Zerizalenm ek Samari i kapab ganny delivre zis par mwayen lafors Zeova.

14. Ki mannyer sa profesi dan Mika 3:12 ti ganny akonpli, e ki lefe sa i devret fer lo nou?

¹⁴ Zida pa pou kapab evit zizman Zeova. Dapre lakonplisman profesi ki ganny ekrir dan Mika 3:12, Siyon pou ganny “laboure parey en plantasyon.” Ozordi, nou konnen ki sa bann keksoz ti arive ler bann Babilonnyen ti devaste Zida ek Zerizalenm an 607 A.N.L. Sa ti arive bokou letan apre ki Mika ti profetize, me i ti asire ki sa ti pou arive. Sirman nou osi nou devret annan sa menm konfyans ki sa sistenm mesan ozordi pou fini, parey i’n ganny predir konsernan ‘zour Zeova.’—2 Pyer 3:11, 12.

Zeova i met Keksoz annord

15. Ki mannyer ou pou dekrir dan ou prop mo sa profesi dan Mika 4:1-4?

¹⁵ Apre sa, nou vwar ki Mika i anons en mesaz lespwar ki tre eksitan. Sa parol ki trouve dan Mika 4:1-4 i vreman ankourazan! Mika i dir: “I pou arive dan bann dernyen zour ki montanny lakaz Zeova pou ganny byen etabli parlao bann montanny, e i pou sirman ganny lev pli o ki bann kolin; e la ki bann pep pou rasanble. . . . I pou sirman ziz bokou pep, e i pou met keksoz annord konsernan bann nasyon pwisan dan lwen. Zot pou bezwen forz zot lepe an pyos e zot lans an sizay. Nasyon pa pou lev lepe kont nasyon e zot pou nepli aprann lager. Zot pou vreman asize, sakenn anba son pye rezen e anba son pye fig, e pou napa personn ki pou fer zot tranble; parski se labous Zeova bann larme ki’n dir sa.”

16, 17. Ki mannyer Mika 4:1-4 pe ganny akonpli ozordi?

¹⁶ Lekel sa “bokou pep” ek “bann nasyon pwisan” ki ganny mansyonnen dan sa verse? Zot pa bann nasyon ek gouvernman sa lemonn. Okontrer, sa profesi i aplik pour bann dimoun sorti dan tou nasyon, ki ozordi zot ini dan servis sakre lo montanny vre ladorasyon Zeova.

¹⁷ An akor avek profesi Mika, byento ladorasyon pir Zeova pou ganny pratike dan lemonn antye. Konmela menm, bann  dimoun ki “dan dispozisyon neseser pour lavi eternel” pe ganny ansennyen dan semen Zeova. (Akt 13:48, NW ) Zeova pe zize e met keksoz annord spirityelman pour bann krwayan ki pran pozisyon pour Rwayonm. Zot pou parmi sa “gran lafoul” ki pou sirviv “sa gran ladetres.” (Rev. 7:9, 14, NW ) Vi ki zot in forz zot lepe an pyos, alor konmela menm zot pe viv anpe avek lezot konpanyon Temwen Zeova e avek lezot dimoun. Pa ou kontan ki ou parmi zot!

Determinen pour mars onon Zeova

18. Ki ‘asiz anba ou prop pye rezen ek fig’ i reprezante?

¹⁸ Denozour, kot lafreyer i kouver lemonn parey en nyaz epe, nou vreman zwaye ki bokou dimoun pe aprann konsernan semen Zeova. Ozordi, nou esper avek enpasyans sa letan ki pros pour arive, kot tou bann ki kontan Bondye pou nepli aprann lager. Zot pou osi asiz anba zot prop pye rezen ek pye fig. Pye fig ti souvan ganny plante dan bann plantasyon rezen. (Lik 13:6) Asiz anba ou prop pye rezen ek pye fig i reprezant lape, prosperite, ek sekirite. Konmela menm, nou relasyon avek Zeova i donn nou lape lespri ek sekirite spirityel. Ler sa bann kondisyon pou egziste anba dominasyon Rwayonm, nou pa pou per e nou pou viv an sekirite total.

19. Ki savedir mars onon Zeova?

¹⁹ Pour rezwir faver ek benediksyon Bondye, nou bezwen mars onon Zeova. Mika 4:5 i fer sa byen kler: “Akoz tou bann pep, zot, zot pou mars sakenn onon zot bondye; me nou, nou pou mars onon Zeova nou Bondye pour letan endefini, wi pour touzour.” Mars onon Zeova pa senpleman vedir ki nou dir ki Zeova i nou Bondye. I demann plis ki zis partisip dan bann renyon Kretyen e dan travay predikasyon Rwayonm, menm si sa bann aktivite i osi enportan. Si nou pe mars onon Zeova, nou’n dedye nou lavi avek li e nou pe esey nou mye pour servi li fidelman akoz nou kontan li avek tou nou leker. (Matye 22:37) Konman bann vre adorater, nou determinen pour mars onon Zeova nou Bondye pour touzour.

20. Ki Mika 4:6-13 ti predir?

²⁰ Aprezan, annou egzamin bann parol profetik dan Mika 4:6-13. “Fiy Siyon” i bezwen al an egzil “ziska Babilonn.” Se egzakteman sa ki ti arive avek zabitan Zerizalenm dan setyenm syek A.N.L. Toudmenm, profesi Mika i endike ki en restan pou retourn Zida, e ler Siyon i ganny reetablir, Zeova pou fer sir ki son bann lennmi i ganny kraze.

21, 22. Konman Mika 5:2 ti ganny akonpli?

²¹ Mika sapit 5 i predir lezot devlopman remarkab. Par egzanp, remarke ki Mika 5:2-4 ti dir. Mika i profetize ki en Sef ki Bondye in apwente—enn ki “son lorizin i depi letan ansyen,” pou sorti Betleenm. I pou dirize konman en berze “gras a lafors Zeova.” Deplis, sa Sef pou renonmen, pa zis dan Izrael, me “ziska tou bout later.” Lamazorite dimoun i kapab pa konnen lekel li, me pour nou i pa en mister.

²² Lekel sa dimoun pli enportan ki’n deza ne an Betleenm? Lekel ki pou renonmen “ziska tou bout later”? Napa lot ki Mesi, Zezi Kri! Ler Erod Legran ti demann bann sef pret ek profeser Lalwa kote Mesi ti pou ne, zot ti reponn: “Betleenm an Zide.” Zot ti menm sit sa parol dan Mika 5:2. (Matye 2:3-6) Serten dimoun ordiner ti osi konn sa, akoz Zan 7:42 i sit zot pe dir: “Lekritir pa i dir ki Mesi i devret en desandan Lerwa David e sorti Betleenm vilaz kot David i sorti?”

Vre Soulazman pour Lepep

23. Ki pe arive ozordi an rapor avek lakonplisman Mika 5:7?

²³ Mika 5:5-15 i refer avek en latak Asiryen  ki pa pou reisi pour lontan e i fer resorti ki Bondye pou revanz lo bann nasyon dezobeisan. Mika 5:7 i promet restorasyon pour en restan Zwif dan zot pei natal, me sa bann parol i osi aplik dan nou letan. Mika i deklare: “Larestan Zakob pou vin parmi bokou dimoun parey laroze ki sorti kot Zeova, parey bann gro lapli lo vezetasyon.” Mika i servi sa zoli konparezon pour predir ki en restan Zakob oubyen Izrael spirityel, pou vin en benediksyon sorti kot Bondye pour bann dimoun. Ozordi “lezot mouton” Zezi, ki annan lespwar pour viv lo later, i kontan pour servi zepol kont zepol avek sa restan “Izrael Bondye,” pour ede soulaz lezot spirityelman. (Zan 10:16, NW; Galat 6:16, NW; Tsefanya 3:9) Dan sa laspe, i annan en pwen enportan pour reflesir lo la. Konman bann proklanmater Rwayonm, nou tou nou devret seri nou privilez pour anmenn vre soulazman pour lezot dimoun.

24. Ki bann pwen dan Mika sapit 3 ziska 5 ki’n enpresyonn ou?

²⁴ Ki ou’n aprann dan sapit 3 ziska 5 dan profesi Mika? Petet sa bann pwen swivan: (1) Bondye i ekspekte sa bann ki annan serten responsabilite parmi son pep pour demontre lazistis. (2) Zeova pa pou reponn nou lapriyer si nou volonterman fer pese. (3) Nou kapab akonpli nou travay predikasyon si selman Bondye i fortifye nou par mwayen son lespri sen. (4) Pour rezwir  faver Bondye, nou devret mars onon Zeova. (5) Konman bann proklanmater Rwayonm, nou devret seri nou privilez pour anmenn vre soulazman pour dimoun. Petet i annan lezot pwen ki ou’n apresye. Me ki lezot keksoz ki nou kapab aprann dan sa liv profetik Labib? Sa lot lartik pou ed nou aprann bann leson pratik ki nou kapab retire dan sa de dernyen sapit profesi Mika ki fortifye nou lafwa.

Ki ou pou reponn?

• Ki Bondye i ekspekte avek bann ki annan responsabilite parmi son pep?

• Akoz lapriyer ek lespri sen i enportan an rapor avek nou servis pour Zeova?

• Ki mannyer dimoun i ‘mars onon Zeova’?

[Kestyon]

[Portre lo paz 12]

Eski ou kapab eksplik sa legzanp ki Mika i servi konsernan en marmit?

[Portre lo paz 15]

Parey Mika, avek kouraz nou akonpli nou minister