Akoz Nou Bezwen Priye Tou Letan?
Akoz Nou Bezwen Priye Tou Letan?
“Priye tou letan! Dan tou sirkonstans remersi Bondye.” —1 Tesalonisyen 5:17, 18.
1, 2. Konman Danyel ti montre ki i apresye sa privilez pour priye, e ki lefe sa ti annan lo son relasyon avek Bondye?
PROFET Danyel ti abitye priy Bondye trwa fwa par zour. I ti tonm azenou devan son lafnet lasanm anler, ki ti vir avek lavil Zerizalenm, e fer son lapriyer. (1 Lerwa 8:46-49; Danyel 6:10) Menm kan en lalwa ti sorti ki ti defann priy avek okenn dimoun eksepte Daris, lerwa Med, Danyel pa ti ezite pour priye. Son lavi ti kapab an danze, me Danyel ki ti en zonm ki ti abitye fer lapriyer, ti kontinyen priy Zeova tou letan.
2 Konman Zeova ti vwar Danyel? Kan lanz Gabriyel ti vin reponn lapriyer Danyel, i ti dekrir Danyel konman en profet ki Zeova i kontan, son byenneme. (Danyel 9:20-23) Dan profesi Ezekyel, Zeova ti refer avek Danyel konman en zonm drwat. (Ezekyel 14:14, 20) I kler ki Danyel ti devlop en relasyon pros avek Bondye atraver lapriyer. Menm Daris ti rekonnet sa.—Danyel 6:16.
3. Konman lapriyer i kapab ed nou reste fidel, parey leksperyans en misyonner i montre?
3 Priy regilyerman i osi kapab ed nou fer fas avek bann leprev dir. Annou vwar legzanp Harold King. I ti en misyonner Lasin e i ti ganny kondannen senk an prizon kot i pa ti ganny drwa vwar personn. Frer King ti koz lo son leksperyans, an dizan: “Zot kapab separ mwan avek mon bann kanmarad, me personn pa kapab separ mwan avek Bondye. . . . Trwa fwa par zour, mon ti azenou dan mon lasanm, kot nenport ki ki pase ti kapab vwar mwan, e mon ti priye aotvwa. Mon ti mazin Danyel ki Labib i koz lo li. . . . I paret ki pandan sa bann moman, lespri Bondye ti gid mon lespri ver bann pli bon keksoz e kalme mwan. Lapriyer ti vreman fortifye mwan spirityelman e rekonfort mwan!”
4. Ki kestyon an rapor avek lapriyer nou pou egzaminen dan sa lartik?
4 Labib i dir: “Priye tou letan! Dan tou sirkonstans remersi Bondye.” (1 Tesalonisyen 5:17, 18) An rapor avek sa konsey, annou egzamin sa bann kestyon swivan: Akoz nou devret egzamin nou lapriyer en pe pli pre? Akoz nou bezwen apros Zeova dan lapriyer tou letan? Ki nou devret fer si nou santi nou onte pour priye akoz serten defo?
Devlop Lanmitye atraver Lapriyer
5. Ki lanmitye spesyal lapriyer i ed nou pour rezwir?
5 Eski ou ti a kontan Zeova konsider ou konman son zanmi? I ti koz lo patrias Abraam dan sa fason. (Izai 41:8; Zak 2:23) Zeova i anvi nou devlop sa menm kalite relasyon avek li. Anfet, i envit nou pour apros avek li. (Zak 4:8) Eski pa sa lenvitasyon i fer nou reflesir lo sa laranzman inik, lapriyer? Pa i difisil pour ganny en apwentman pour koz avek en zofisye gouvernman! Deplis, bliye pour vin son zanmi! Pourtan, Kreater liniver i ankouraz nou pour apros li san ezitasyon dan lapriyer, nenport ler ki nou oule oubyen bezwen fer li. (Psonm 37:5) Letan nou priye toultan, sa i ed nou pour annan en bon lanmitye avek Zeova.
6. Ki legzanp Zezi i ansenny nou konsernan nesesite pour “priye” toultan?
6 Parkont, i sitan fasil pour nou negliz lapriyer! Zis pour fer fas avek presyon toulezour i kapab sitan pran nou latansyon ki nou pa fer okenn zefor pour koz avek Bondye. Zezi ti ankouraz son bann disip pour “priye” toultan, e li menm i ti fer sa. (Matye 26:41) Menm si i ti okipe depi bomaten ziska aswar, i ti met letan dekote pour priy son Papa dan lesyel. Parfwa, Zezi ti lev “byen granmaten, avan lizour,” pour li priye. (Mark 1:35) I annan letan osi ki i ti al dan en landrwa li tousel alafen lazournen pour koz avek Zeova. (Matye 14:23) Zezi ti toultan fer letan pour priye. Nou osi nou devret fer parey.—1 Pyer 2:21.
7. Ki bann sitiasyon ki devret pous nou pour koz avek nou Papa dan lesyel sak zour?
7 I annan plizyer moman ki apropriye pour fer nou lapriyer personnel. Par egzanp, sak fwa nou rankontre problenm, tantasyon, e annan desizyon pour fer. (Efezyen 6:18) Kan nou rod gidans Bondye dan tou laspe nou lavi, byensir nou lanmitye avek li pou agrandi. Letan de zanmi i sirmont bann problenm ansanm, pa zot lanmitye i vin pli solid? (Proverb 17:17) Sanmenm sa ki arive letan nou depan lo Zeova e eksperyans son led.—2 Kronik 14:11.
8. Ki nou aprann konsernan longer nou lapriyer personnel atraver legzanp Neemya, Zezi, ek Ana?
8 Nou vreman kontan ki Bondye pa met okenn restriksyon lo ki kantite letan oubyen konbyen fwa nou kapab koz avek li dan lapriyer! Neemya ti vitman fer en lapriyer dan son leker avan i ti fer son demann avek lerwa Pers. (Neemya 2:4, 5) Zezi osi ti fer en pti lapriyer kan i ti demann Zeova pour donn li pouvwar pour resisit Lazar. (Zan 11:41, 42) De lot kote, Ana ti “priy Zeova pour en bon pe letan” kan i ti dir Li tou sa ki i ti annan dan son leker. (1 Samyel 1:12, 15, 16) Nou lapriyer personnel i kapab kourt oubyen long depandan lo nou bezwen ek sirkonstans.
9. Akoz nou devret osi loue e remersi Zeova pour tou sa ki i fer pour nou?
9 Bokou lapriyer dan Labib i eksprim lapresyasyon profon pour pozisyon siprenm Zeova ek son bann travay merveye. (Egzod 15:1-19; 1 Kronik 16:7-36; Psonm 145) Dan en vizyon, zapot Zan ti vwar 24 ansyen—sif konplet bann Kretyen swazir dan zot pozisyon dan lesyel—pe loue Zeova, an dizan: “Nou Senyer, nou Bondye, ou merite resevwar laglwar, loner ek pisans, parski ou’n kree tou keksoz, e se par ou lavolonte ki zot egziste e ki zot in ganny kree.” (Revelasyon 4:10, 11) Nou osi nou annan rezon pour loue nou Kreater toultan. Pa bann paran i kontan kan zot zanfan i remersi zot senserman pour en keksoz ki zot in fer pour li! En bon fason pour amelyor nou lapriyer, se pour reflesir lo labonte Zeova e eksprim nou lapresyasyon profon pour sa.
“Priye tou letan”—Akoz?
10. Konman lapriyer i fortifye nou lafwa?
10 Priye regilyerman i enportan pour nou lafwa. Apre ki i ti montre nesesite pour “touzour priye e pa perdi kouraz,” Zezi ti demande: “Ler Fis-de-Lonm pou vini, eski i pou trouv lafwa lo later?” (Lik 18:1-8) Lapriyer ki sorti ofon nou leker i batir lafwa. Kan patrias Abraam ti pe vin vye e i pa ti ankor ganny en zanfan, i ti koz avek Bondye lo sa size. Zeova ti reponn par premyerman demann li pour get anler dan lesyel e vwar si i kapab kont tou sa zetwal. Apre Bondye ti rasir Abraam: “Koumsa ou semans pou vini.” Ki ti arive apre? Abraam “ti met lafwa dan Zeova; akoz sa i ti konsider li konman enn ki drwat.” (Zenez 15:5, 6) Si nou ouver nou leker avek Zeova dan lapriyer, aksepte son bann lasirans dan Labib, e obeir li, i pou fortifye nou lafwa.
11. Ki mannyer lapriyer i kapab ed nou fer fas avek problenm?
11 Lapriyer i osi kapab ed nou rezourd nou problenm. Eski ou pe anmenn en fardo e ou sitiasyon i tre difisil? Labib i dir nou: “Larg ou fardo lo Zeova li menm, e li menm i pou soutenir ou. Zanmen i pou les sa enn ki drwat drive.” (Psonm 55:22) Kan nou annan en desizyon difisil pour fer, nou kapab imit legzanp Zezi. I ti pas lannwit antye pour priye avan ki i ti swazir son 12 zapot. (Lik 6:12-16) Lavey son lanmor, Zezi ti priy avek sitan bokou santiman ki “son transpirasyon ti tonm ater parey gro gout disan.” (Lik 22:44) Ki rezilta? “Bondye ti egzos li akoz son lobeisans.” (Ebre 5:7) Nou lapriyer senser e regilye pou ed nou fer fas avek bann presyon ek leprev difisil.
12. Ki mannyer lapriyer li menm i en laprev ki Zeova i personnelman enterese avek nou?
12 En lot rezon pour nou apros avek Zeova dan lapriyer se ki li an retour, i pou apros avek nou. (Zak 4:8) Kan nou ouver nou leker avek Zeova dan lapriyer, eski pa nou santi ki i enterese avek nou bezwen e ki i vreman pran swen avek nou? Nou eksperyans lanmour Bondye personnelman dan nou lavi. Zeova pa’n donn personn sa responsabilite pour ekout okenn lapriyer ki son bann serviter i fer avek li konman zot Papa dan lesyel. (Psonm 66:19, 20; Lik 11:2) Deplis, i envit nou pour ‘desarz tou nou sousi lo li, parski limenm ki pran swen avek nou.’—1 Pyer 5:6, 7.
13, 14. Akoz nou bezwen priye toultan?
13 Lapriyer i kapab fer nou ganny en pli gran devouman pour predikasyon. I kapab osi fortifye nou kan nou anvi aret dan semen akoz dimoun pa montre lentere oubyen akoz zot opoz nou. (Akt 4:23-31) Deplis, lapriyer i kapab protez nou kont “tou bann riz Dyab.” (Efezyen 6:11, 17, 18) Kan nou bezwen lite pour fer fas avek bann leprev ki nou rankontre toulezour, nou kapab toultan demann Bondye pour donn nou lafors. Dan sa model lapriyer ki Zezi in fourni, i ti demande ki Zeova i “anpes nou tonm dan le mal.”—Matye 6:13.
14 Si nou kontinyen demann led dan lapriyer pour kapab kontrol nou bann tandans pour fer sa ki mal, nou pou santi lanmen Zeova. Nou annan sa lasirans: “Bondye i fidel dan son promes, e i pa pou permet ki nou ganny tante plis ki nou kapab siporte, me avek tantasyon i osi donn mwayen pour sorti pour ki ou kapab siporte.” (1 Korentyen 10:13) Zapot Pol li menm ti santi ki Zeova ti pran swen avek li dan diferan sitiasyon. I ti dir: “Mon kapab fer fas avek tou par [Bondye] ki donn mwan lafors.”—Filipyen 4:13; 2 Korentyen 11:23-29.
Persevere dan Lapriyer malgre nou Defo
15. Ki i kapab arive kan nou annan en kondwit ki pa an akor avek standar Bondye?
15 Pour nou lapriyer ganny egzose, nou bezwen aksepte konsey dan Parol Bondye. Zapot Zan ti ekrir: “Nenport keksoz ki nou demann li, nou pou gannyen parski nou gard son konmannman e nou fer sa ki fer li plezir.” (1 Zan 3:22) Me ki i kapab arive si nou annan en kondwit ki pa an akor avek standar Zeova? Adan ek Ev ti kasyet zot apre ki zot ti’n fer pese dan zarden Edenn. Nou osi nou kapab anvi kasyet nou “devan figir Zeova” e aret priye. (Zenez 3:8) Klaus, en sirveyan rezyonal ki annan bokou leksperyans ti fer sa remark: “Mon’n remarke ki laplipar-di-tan premye fot ki bann ki pe elwannyen avek Zeova ek son lorganizasyon i fer, se ki zot aret priye.” (Ebre 2:1) Sa ti leka avek José Ángel. I dir: “Pour apepre wit an, mon ti priy Zeova enn fwa dan rar. Mon ti santi mwan onte pour koz avek li, kantmenm mon ti ankor konsider li konman mon Papa dan lesyel.”
16, 17. Donn legzanp pour montre konman priye regilyerman i kapab ed nou sirmont nou defo.
16 Serten i kapab santi zot onte pour priye akoz serten defo ki zot annan oubyen akoz zot in tonm dan lemal. Okontrer, la i lemoman pour nou benefisye plis avek lapriyer. Yona ti sove letan Zeova ti donn li en latas pour fer. Me ‘dan son ladetres, i ti kriy Zeova e I ti reponn li. Dan vant Seol, Yona ti kriy osekour, e Zeova ti tann son lavwa.’ (Yona 2:2) Yona ti priye, Zeova ti reponn son lapriyer, e Yona ti rekipere spirityelman.
17 José Ángel osi ti priy avek senserite pour ganny led. I rapel: “Mon ti ouver mon leker e sipliy Bondye pour pardonn mwan. I ti vreman ed mwan. Mon pa krwar mon ti pou’n retourn dan laverite si mon pa ti’n ganny led atraver lapriyer. Aprezan mon priy regilyerman toulezour. Mon vreman kontan kan i ariv ler pour mwan priye.” Nou pa devret ezite pour koz fransman avek Bondye konsernan nou bann fot e avek limilite demann li pardon. Kan Lerwa David ti konfes son pese, Zeova ti pardonn li. (Psonm 32:3-5) Zeova i anvi ed nou, pa kondann nou. (1 Zan 3:19, 20) Deplis, lapriyer bann ansyen dan kongregasyon i kapab ed nou spirityelman, parski zot lapriyer i “annan en gran pisans.”—Zak 5:13-16.
18. Ki konfyans bann serviter Bondye i kapab annan kantmenm zot in kapab elwanny en kantite?
18 Lekel sa papa ki ti pou rezet son garson ki abes li apre ki i’n fer en fot e vin kot li pour demann led ek konsey? Parabol garson perdi e retrouve i montre ki nou Papa dan lesyel i kontan ler nou retourn kot li kantmenm nou ti’n kapab elwanny en kantite avek li. (Lik 15:21, 22, 32) Zeova i enplor tou bann ki fer fot pour kriy li, “akoz i pou kontan pour pardonnen.” (Izai 55:6, 7) Kantmenm David ti fer bann pese grav, i ti priy Zeova, “Ekout mon lapriyer O Bondye, e pa kasyet ou kan mon pe demann ou faver.” I ti osi dir: “Aswar, bomaten, e midi, nek mon trakase menm e plennyen, e [Zeova] i antann mon lavwa.” (Psonm 55:1, 17) Pa sa i rasir nou!
19. Akoz nou pa devret konklir ki nou’n perdi laprouvasyon Bondye kan nou lapriyer pa paret pe ganny reponn?
19 Me si nou pa ganny en larepons pour nou lapriyer deswit? Dan sa ka, nou bezwen fer sir ki sa ki nou’n demande i an armoni avek lavolonte Zeova e i’n ganny demande onon Zezi. (Zan 16:23; 1 Zan 5:14) Disip Zak ti mansyonn serten Kretyen ki zot lapriyer pa ti ganny reponn akoz zot pa ti demann pour en bon rezon. (Zak 4:3) De lot kote, nou pa devret vitman konklir ki nou’n perdi laprouvasyon Bondye si nou lapriyer pa paret pe ganny reponn. Parfwa Zeova i les bann serviter fidel kontinyen priy pour en pe letan lo en keksoz avan ki son larepons i vin kler. Zezi ti dir: “Demande zot a gannyen, rode zot a trouve.” (Matye 7:7) Alors, nou bezwen “persevere dan lapriyer.”—Romen 12:12, NW.
Priy regilyerman
20, 21. (a) Akoz nou bezwen priye toultan dan sa bann “dernyen zour”? (b) Ki nou pou gannyen kan nou apros tronn lagras Zeova sak zour?
20 Presyon ek problenm pe kontinyen ogmante dan sa bann “dernyen zour,” marke par “letan difisil.” (2 Timote 3:1) Bann leprev i kapab fasilman preokip nou lespri. Me kan nou priye toultan, sa pou ed nou konsantre lo bann keksoz spirityel menm si nou kontinyen rankontre problenm, tantasyon, ek dekourazman. Letan nou priye toulezour, nou ganny sa soutyen esansyel ki nou bezwen.
21 Zeova, “ki ekout lapriyer,” pa zanmen tro okipe pour ekout nou. (Psonm 65:2) Annou pa zanmen tro okipe pour koz avek li. Nou lanmitye avek Bondye i keksoz pli presye ki nou annan. Fotespere nou pa zanmen pran li alalezer. “Alor annou apros avek konfyans devan tronn lagras Bondye, pour ki nou ganny pardonnen e trouv lagras pour ed nou dan moman neseser.”—Ebre 4:16.
Ki ou pou reponn?
• Ki nou aprann atraver profet Danyel konsernan valer lapriyer?
• Ki mannyer nou kapab fer nou lanmitye avek Zeova vin pli solid?
• Akoz nou bezwen priye toultan?
• Akoz nou pa devret les laont anpes nou priy Zeova?
[Kestyon]
[Portre lo paz 16]
Neemya ti fer en pti lapriyer dan son leker avan ki i ti koz avek lerwa
[Portre lo paz 17]
Ana ti “priy Zeova pour en bon pe letan”
[Portre lo paz 18]
Zezi ti priye lannwit antye avan ki i ti swazir son 12 zapot
[Portre lo paz 20]
Nou ganny plizyer loportinite pour priye pandan lazournen