Andire Dan Bann Leprev I Anmenn Loner Pour Zeova

“Me si ou soufer avek [landirans, NW ] pour sa ki ou byen fer, sa i ganny aprouve par Bondye.”—1 PYER 2:20.

1. Vi ki tou Kretyen i enterese pour akonpli zot dedikasyon, ki kestyon ki devret ganny egzaminen?

BANN Kretyen in dedye zot lavi avek Zeova e zot anvi fer son lavolonte. Pour akonpli zot dedikasyon, zot fer tou sa ki zot kapab pour swiv lepa zot Legzanp, Zezi Kri, e pour donn temwannyaz lo laverite. (Matye 16:24; Zan 18:37; 1 Pyer 2:21) Me Zezi ek lezot dimoun fidel ti donn zot lavi e mor akoz zot lafwa konman bann martir. Eski sa i vedir ki tou Kretyen i ekspekte mor pour zot lafwa?

2. Konman bann Kretyen i vwar leprev ek soufrans?

² Konman bann Kretyen, nou ganny ankouraze pour reste fidel ziska nou lanmor, pa neseserman pour mor pour nou lafwa. (2 Timote 4:7; Revelasyon 2:10) Sa i vedir ki menm si nou pare pour soufer—e, si neseser, pour mor—pour nou lafwa, i pa en keksoz ki nou anvi fer. Nou pa trouv okenn lazwa dan soufrans e ni ganny okenn plezir dan douler ek imilyasyon. Me vi ki nou ekspekte pas atraver leprev ek persekisyon, nou bezwen byen reflesir konman nou kapab reazir kan i ariv lo nou.

Fidel dan Leprev

3. Ki legzanp dan Labib kot dimoun in fer fas avek persekisyon ki ou kapab rakonte? (Vwar bwat “Konman zot ti fer fas avek Persekisyon,” lo lot paz.)

³ Dan Labib, nou trouv plizyer resi ki montre konman bann serviter Bondye dan lepase ti reazir kan zot ti fer fas avek bann sitiasyon danzere. Sa bann diferan fason ki zot ti reazir i fourni gidans pour bann Kretyen denozour si zanmen zot bezwen fer fas avek sa bann difikilte parey. Egzamin sa bann resi dan bwat “Konman zot ti fer fas avek Persekisyon,” e vwar ki ou kapab aprann atraver zot.

4. Ki nou kapab dir konsernan lafason ki Zezi ek lezot serviter fidel ti reazir kan zot ti rankontre leprev?

⁴ Menm si Zezi ek lezot serviter fidel Bondye ti reazir dan diferan fason anver persekisyon, depandan lo sirkonstans, i kler ki zot pa ti met zot lavi an danze san okenn rezon. Kan zot ti vwar zot dan bann sitiasyon danzere, zot ti kouraze me pridan. (Matye 10:16, 23) Zot lobzektif ti pour fer avanse travay predikasyon e pour mentenir zot fidelite avek Zeova. Zot reaksyon dan diferan sitiasyon i fourni legzanp pour bann Kretyen ki rankontre leprev ek persekisyon ozordi.

5. Ki persekisyon ki ti arive an Malawi dan bann lannen 1960, e konman bann Temwen laba ti reazir?

⁵ Dan nou letan, pep Zeova in souvan eksperyans bann kondisyon vreman difisil e perdi zot byen akoz lager, restriksyon, oubyen persekisyon direk. Par egzanp, dan bann lannen 1960, bann Temwen Zeova an Malawi ti ganny persekite severman. Zot Lasal Rwayonm, lakaz, manze, ek biznes—preski tou sa ki zot ti posede—ti ganny detrir. Zot ti ganny bate severman e pas atraver lezot leksperyans ki vreman fer lapenn. Ki mannyer sa bann frer ek ser ti reazir? Plizyer milye dimoun ti bezwen evakye zot vilaz. Plizyer ti al pran refiz dan lafore, tandis ki lezot ti bezwen al reste tanporerman an Mozanbik. Menm si plizyer dimoun fidel ti perdi zot lavi, lezot ti swazir pour kit sa landrwa danzere, ki ti aparaman en desizyon rezonnab dan sa bann tel  sirkonstans. Par fer sa, sa bann frer ti swiv legzanp ki Zezi ek Pyer in kite.

6. Ki bann Temwen an Malawi pa ti abandonnen malgre persekisyon sever?

⁶ Menm si bann frer ek ser an Malawi ti bezwen kit zot landrwa oubyen al reste an kasyet, zot ti rod e swiv direksyon teokratik e kontinyen zot aktivite Kretyen an sekre pli byen ki zot ti kapab. Ki rezilta zot ti gannyen? Zis avan sa restriksyon an 1967, lakantite proklanmater Rwayonm ti’n ariv en maksimonm 18,519. Menm si sa restriksyon ti ankor pe pran lefe e bokou ti’n sov an Mozanbik, an 1972 en nouvo maksimonm 23,398 proklanmater ti ganny raporte. Zot ti pas en mwayenn plis ki 16 er-d-tan dan predikasyon sak mwan. San dout, zot aksyon ti anmenn loner pour Zeova, e benediksyon Zeova ti lo sa bann frer ek ser fidel dan sa moman tre difisil. *

7, 8. Pour ki rezon serten i swazir pour pa kit zot landrwa, menm si persekisyon pe koz problenm?

 ⁷ De lot kote, dan bann pei kot lopozisyon i en problenm, serten frer ek ser i kapab deside pour pa kit zot landrwa, menm si zot kapab fer li. Al reste en lot landrwa i kapab rezourd serten problenm, me tre probab i pou kapab kree lezot difikilte. Par egzanp, eski zot pou kapab reste an kontak avek lezot Kretyen e pa izol zot spirityelman? Eski zot pou kapab kontinyen avek zot progranm spirityel anmezir ki zot fer zefor pour reetablir zot, petet dan en pei ki pli prospere oubyen dan enn ki fourni plis loportinite pour ganny keksoz materyel?—1 Timote 6:9.

⁸ Lezot i swazir pour pa al reste en lot landrwa akoz zot enterese avek byennet spirityel zot bann frer ek ser. Zot swazir pour reste e fer fas avek sa sitiasyon pour kapab kontinyen pres dan zot teritwar e pour vin en sours lankourazman pour bann konpanyon Kretyen. (Filipyen 1:14) Par fer en tel swa, serten in menm kapab kontribye pour ganny bann zafer an kour dan zot pei. *

9. Ki fakter en dimoun i devret egzaminen ler i pe deside si i pou reste ouswa i pour ale akoz persekisyon?

⁹ Pour ale oubyen pour reste—sa i sertennman en desizyon personnel. Byensir, sa bann tel desizyon i devret ganny pran selman apre ki nou’n rod gidans Zeova dan lapriyer. Me nenport desizyon ki nou swazir, nou devret gard antet parol zapot Pol: “Sakenn antre nou pou bezwen rann kont devan Bondye pour son prop lekor.” (Romen 14:12) Parey nou ti vwar pli boner, sa ki Zeova i ekspekte se ki tou son serviter i reste fidel dan tou sirkonstans. Serten son bann serviter pe rankontre leprev ek persekisyon la konmela, lezot i kapab rankontre plitar dan zot lavi. Tou son bann serviter pou ganny teste dan en fason ou en lot, e personn pa devret ekspekte ki i pou ganny  eparnyen. (Zan 15:19, 20) Konman bann serviter Zeova ki’n dedye nou lavi avek li, nou pa kapab evit sa kestyon iniversel ki enkli sangtifikasyon non Zeova ek zistifikasyon son drwa pour dirize.—Ezekyel 38:23; Matye 6:9, 10.

“Pa rann mal pour mal”

10. Ki legzanp enportan Zezi ek bann zapot in kite an sa ki konsern fer fas avek presyon ek lopozisyon?

¹⁰ En lot prensip enportan ki nou kapab aprann avek lafason ki Zezi ek lezot zapot ti reazir anba presyon se pa zanmen revanze kont nou bann persekiter. Napa okenn par dan Labib ki endik nou ki Zezi ek son bann disip ti organiz zot konman en group lopozisyon oubyen servi vyolans pour kapab lager kont zot bann persekiter. Okontrer, zapot Pol ti konsey bann Kretyen, “pa rann mal pour mal. . . . Byenneme, pa vanze, me les lakoler Bondye azir. Parski Senyer i dir dan Lekritir: ‘Mwan ki pou fer peye.’ ” Deplis, “pa les lemal domin zot, me okontrer zot domin lemal par sa ki byen.”—Romen 12:17-21; Psonm 37:1-4; Proverb 20:22.

11. Ki en istoryen i dir lo latitid bann premye Kretyen anver Leta?

¹¹ Bann premye Kretyen ti pran sa konsey aker. Dan son liv L’Église primitive et le monde, istoryen Cecil J. Cadoux i dekrir latitid bann Kretyen anver Leta pandan peryod lannen 30-70 N.L. I ekrir: “Nou napa okenn levidans ki bann Kretyen ki ti pe viv sa letan ti fer okenn zefor pour reziste persekisyon par servi vyolans. Sel keksoz ki zot ti fer se pour kondann severman sa bann dirizan oubyen konfiz zot par sove. Me reaksyon normal en Kretyen anver persekisyon pa ti al pli lwen ki refize pour obeir bann lalwa gouvernman ki zot ti santi i kapab fer en konfli avek zot lobeisans anver Kris. Zot ti fer sa dan en fason ferm e modere.”

12. Akoz i pli bon pour andir persekisyon olye revanze?

¹² Eski reste dosil anver lotorite i pli bon fason azir? Eski bann dimoun ki reazir dan sa fason pa pe fer louvraz bann ki determinen pour elimin zot vin pli fasil? Eski pa i pou pli bon pour en dimoun defann son lekor? Dapre pwennvi imen, sa i kapab paret leka. Me konman bann serviter Zeova, nou asire ki swiv gidans Zeova dan tou keksoz i pli bon fason fer keksoz. Nou gard antet parol Pyer: “Si ou soufer avek [landirans, NW ] pour sa ki ou’n byen fer, sa i ganny aprouve par Bondye.” (1 Pyer 2:20) Nou asire ki Zeova i konn tre byen nou sitiasyon e i pa pou les keksoz kontinyen pour toultan. Ki mannyer nou kapab asire? Zeova ti dir avek son pep egzile an Babilonn: “Sa ki tous zot, pe tous mon kannet lizye.” (Zekarya 2:8) Ziska ki tan en dimoun pou les son kannet lizye ganny touse? Zeova pou fourni en soulazman dan son letan apropriye. Nou napa okenn dout lo sa.—2 Tesalonisyen 1:5-8.

13. Akoz Zezi ti les son lennmi aret li san ki i debat avek zot?

 ¹³ Dan sa domenn, nou kapab pran Zezi konman nou legzanp. Kan i ti les son bann lennmi aret li dan zarden Zetsemane, se pa akoz i pa ti kapab defann son lekor. Annefe, i ti dir son bann disip: “Zot pa konnen ki mon kapab demann mon Papa led, e deswit i a anvoy mwan plis ki douz larme lanz? Alor, ki mannyer lekritir ki dir ki sa i devre pas koumsa, pou ganny akonpli?” (Matye 26:53, 54) Lakonplisman lavolonte Zeova ti annan en pli gran lenportans pour Zezi, menm si sa ti vedir ki i bezwen soufer. I ti met tou son konfyans dan parol sa psonm profetik David: “Ou pa pou abandonn mwan dan Seol. Ou pa pou les sa enn ki fidel avek ou vin lapouritir.” (Psonm 16:10) Bokou lannen plitar, zapot Pol ti dir konsernan Zezi: “Olye lazwa ki i merite, i’n sibir lanmor lo [poto siplis, NW ] san pran kont laont e la i’n asiz dan kote drwat tronn Bondye.”—Ebre 12:2.

Lazwa ki nou gannyen par sangtifye Non Zeova

14. Ki sa lazwa ki ti soutenir Zezi dan tou son bann leprev?

¹⁴ Ki sa lazwa ki ti soutenir Zezi atraver sa tes pli sever ki nou kapab mazinen? Dan tou bann serviter Zeova, Zezi, garson byenneme Bondye, ti sirman target prensipal Satan. Alors par mentenir son fidelite dan leprev, Zezi ti pou donn en larepons defini anver provokasyon Satan kont Zeova. (Proverb 27:11) Eski ou kapab mazin sa lazwa ek satisfaksyon ki Zezi ti’n bezwen santi apre son rezireksyon? I ti’n bezwen santi li ere, ler i realize ki i’n akonpli sa rol ki i ti’n ganny donnen pour zwe konman en zonm parfe dan zistifikasyon drwa Zeova pour dirize ek sangtifikasyon son non! Deplis, par asiz “dan kote drwat tronn Bondye” i san dout en loner merveye e sa pli gran sours lazwa pour Zezi.—Psonm 110:1, 2; 1 Timote 6:15, 16.

15, 16. Ki persekisyon kriyel bann Temwen an Sachsenhausen ti andire, e kwa ki ti donn zot sa lafors pour fer li?

¹⁵ Pareyman, pour bann Kretyen, i en lazwa pour partisip dan sangtifikasyon non Zeova par andir leprev ek persekisyon, an swivan legzanp Zezi. En legzanp apropriye ti leksperyans bann Temwen ki ti soufer dan sa kan konsantrasyon byen renonmen Sachsenhausen, e ki ti nobou reste vivan dan sa lamars difisil kot bokou dimoun ti mor alafen Dezyenm Lager Mondyal. Pandan sa lamars, plizyer milye prizonnyen ti mor akoz kondisyon letan, maladi, lafengal oubyen ganny egzekite britalman lo bor semen par bann gard Nazi ki ti apel SS. Bann Temwen, an tou 230 zot, ti sirviv par reste pros avek kanmarad e ed kanmarad menm si zot ti bezwen met zot prop lavi an danze.

¹⁶ Kwa ki ti donn sa bann Temwen lafors pour andir sa bann tel persekisyon kriyel? Dek ki zot ti an sekirite, zot ti eksprim zot lazwa ek rekonesans pour Zeova dan en dokiman ki ti annan pour tit “Rezolisyon sa 230 Temwen Zeova sorti dan sis nasyonalite, ki ti rasanble ansanm dan en lafore pre avek Schwerin an Mecklenburg.” Zot ti deklare: “En gran peryod letan leprev dir in fini, e bann ki’n ganny prezerve, konmsi ganny retire dan sa four dife, napa ni menm loder  lafimen lo zot. (Vwar Danyel 3:27) Okontrer, zot ranpli avek lafors ek pwisans sorti kot Zeova e zot pe esper avek enpasyans bann nouvo lord Lerwa, pour kapab fer avanse bann lentere Teokratik.” *

17. Ki bann kalite leprev ki pep Bondye pe rankontre konmela?

¹⁷ Parey sa 230 frer ek ser fidel, nou osi nou lafwa i kapab ganny teste, menm si nou pa ankor deza ‘lite ziska vers nou disan.’ (Ebre 12:4) Me en leprev i kapab dan diferan fason. I kapab bann sikannri avek bann kanmarad lekol, oubyen presyon lezot pour komet limoralite ek lezot keksoz mal. Deplis, nou determinasyon pour pa pran disan, pour marye selman dan Senyer, oubyen pour elve zanfan dan lafwa dan en lakour divize i kapab parler anmenn bann presyon ek leprev sever.—Akt 15:29; 1 Korentyen 7:39; Efezyen 6:4; 1 Pyer 3:1, 2.

18. Ki lasirans nou annan ki nou kapab andir menm sa leprev pli terib?

¹⁸ Me nenport ki kalite leprev ki nou rankontre, nou konnen ki nou soufer akoz nou met Zeova ek son Rwayonm premye, e nou konsider li en gran privilez ek lazwa pour fer sa. Nou ganny kouraz dan parol rekonfortan Pyer: “Si zot ganny maltrete pour non Kris, zot ere, parski Lespri laglwar, Lespri Bondye i repoz lo zot.” (1 Pyer 4:14) Avek pouvwar lespri Zeova, nou ganny sa lafors pour andir menm sa leprev pli difisil, tousala pour son laglwar ek louanz.—2 Korentyen 4:7; Efezyen 3:16; Filipyen 4:13.

[Not anba lo paz]

Eski ou kapab eksplike?

• Konman bann Kretyen i vwar soufrans ek persekisyon?

• Ki nou kapab aprann avek lafason ki Zezi ek lezot dimoun fidel ti reazir kan zot ti pas atraver leprev?

• Akoz i pli bon pour pa revanze kan nou ganny persekite?

• Ki sa lazwa ki ti soutenir Zezi atraver son bann leprev, e ki nou kapab aprann avek sa?

[Kestyon]

[Bwat/Portre lo paz 27]

Konman zot ti fer fas avek Persekisyon

• Avan ki bann solda Erod ti ariv Betleenm pour touy tou bann pti garson de an e mwens, anba direksyon en lanz, Zozef ek Mari ti pran Zezi e sov Lezip.—Matye 2:13-16.

• Plizyer fwa pandan minister Zezi, son bann lennmi ti esey rod fason pour touy li akoz son bon temwannyaz pwisan. Sak fwa Zezi ti reisi sov zot.—Matye 21:45, 46; Lik 4:28-30; Zan 8:57-59.

• Kan bann solda ek zofisye ti vin dan zarden Zetsemane pour aret Zezi, i ti idantifye li ouvertman, de fwa i ti dir zot: “Mwanmenm mwan.” I ti menm anpes son bann disip defann li e les sa group bandi pran li.—Zan 18:3-12.

• An Zerizalenm, Pyer ek lezot ti ganny arete, fwete, e menm ganny ordonnen pour aret koz lo Zezi. Pourtan, ler zot ti ganny large zot ti ale e “toulezour zot ti kontinyen prese dan Tanp ek dan bann lakaz e anons Zezi konman Mesi.”—Akt 5:40-42.

• Kan Sol, ki ti plitar vin zapot Pol, ti aprann konplo bann Zwif an Damas pour touy li, bann frer ti met li dan en pannyen e aswar fer li desann par en trou dan miray lavil, e i ti sove.—Akt 9:22-25.

• Bokou lannen plitar, Pol ti swazir pour fer rapel avek Sezar, menm si Gouverner Festis ek Lerwa Agripa pa ti vwar “okenn keksoz ki merit lanmor ou prizon” dan li.—Akt 25:10-12, 24-27; 26:30-32.

[Portre lo paz 28]

Menm si persekisyon sever ti fors zot pour sove, plizyer milye Temwen fidel an Malawi ti kontiny zot servis Rwayonm avek lazwa

[Portre lo paz 29]

Lazwa pour sangtifye non Zeova ti soutenir bann frer ek ser fidel atraver sa lamars ki ti anmenn lanmor bokou dimoun dan lepok Nazi e dan bann kan konsantrasyon

[Portre lo paz 29]

Lamars lanmor: KZ-Gedenkstätte Dachau, courtesy of the USHMM Photo Archives

[Portre lo paz 31]

Leprev ek presyon i kapab vin dan diferan fason