Bann Konversasyon Spirityel I Batir Lezot

“Pa les bann move parol sorti dan zot labous, me koz zis bann parol itil ki kapab ed lezot pour progrese dan zot lafwa e kan i neseser pour fer dibyen sa ki ekoute.”—EFEZYEN 4:29.

1, 2. (a) Ki kantite presye langaz imen i ete? (b) Dan ki fason serviter Zeova i anvi servi zot lalang?

“LANGAZ imen i en mister; i en don sorti kot Bondye, i en mirak.” Sa i sa ki en leksikograf, Ludwig Koehler, ti ekrir. Petet nou pran sa don presye sorti kot Bondye alalezer. (Zak 1:17) Me reflesir ki gran trezor nou perdi kan en dimoun ki nou pros avek i ganny en latak e perdi son abilite pour koz byen. Joan ki son msye ti ganny en latak resaman, i eksplike: “Nou ti kominik tre byen e sa ti fer nou vreman pros avek kanmarad. Pa mon mank sa bann konversasyon ki nou ti fer!”

² Konversasyon i kapab fer lanmitye pli solid, koriz bann malantandi, ankouraz bann ki demoralize, fortifye lafwa e anrisir nou lavi. Me sa pa ariv otomatikman. Lerwa Salomon ti fer sa remark: “I annan ki koz san reflesir konmsi bann kou lepe, me lalang bann ki saz i en gerizon.” (Proverb 12:18) Nou ki serviter Zeova, nou anvi ki nou konversasyon i geri e batir lezot olye bles zot e fer zot tonbe. Nou osi anvi servi nou lalang pour loue Zeova dan nou minister piblik ensi ki dan nou konversasyon personnel. En psalmis ti sante: “Nou pou loue Bondye toudilon lazournen. Pour letan endefini nou pou loue ou non.”—Psonm 44:8.

3, 4. (a) Ki problenm nou tou nou fer fas avek an rapor avek nou parol? (b) Akoz sa ki nou dir i enportan?

³ Disip Zak ti averti: “Personn pa kapab dont lalang.” I rapel nou: “Nou komet lerer dan plizyer mannyer. Si en dimoun pa komet lerer dan sa ki i dir i en dimoun parfe ki kapab met en labrid avek son lekor an antye.” (Zak 3:2, 8) Napa personn ki parfe. Kantmenm nou kapab vreman anvi byen servi nou lalang, nou parol pa touzour batir lezot oubyen loue nou Kreater. Alors, nou bezwen vey byen sa ki nou dir. Deplis, Zezi ti dir: “Mon dir zot, zour zizman tou dimoun pou rann kont sak parol an plis ki i’n dir. Annefe, se par zot parol ki zot pou ganny zistifye, e se par zot parol ki zot pou ganny kondannen.” (Matye 12:36, 37) Wi, vre Bondye i vwar nou responsab pour sa ki nou dir.

⁴ Enn bann pli bon fason pour evite malparl lezot, se par devlop labitid pour fer bann konversasyon spirityel. Sa lartik pou diskite konman nou kapab fer sa, ki kalite topik nou kapab koz lo la, e ki byenfe nou kapab gannyen atraver bann konversasyon ki batir.

Egzamin nou Leker

5. Konman leker i zwe en rol enportan pour promot bann konversasyon ki batir lezot?

⁵ Letan nou pe devlop labitid pour fer konversasyon ki batir lezot, nou bezwen premyerman rekonnet ki nou parol i reflekte sa ki dan nou leker. Zezi ti dir: “Labous i koz sa ki deborde dan leker.” (Matye 12:34) Andotmo, nou kontan koz lo keksoz ki enportan pour nou. Alors, nou bezwen demann nou lekor: ‘Ki  mon konversasyon i revele lo sa ki dan mon leker? Kan mon avek mon fanmiy oubyen konpanyon Kretyen, eski mon konversasyon i deroul lo keksoz spirityel oubyen i toultan lo sport, lenz, film, manze, sa ki mon fek aste, oubyen lezot keksoz ki pa sitan enportan?’ Petet, san realize, nou lavi ek nou panse i konsantre plis lo bann keksoz ki pa sitan enportan. Aziste nou priyorite pou amelyor nou konversasyon osi byen ki nou lavi.—Filipyen 1:10.

6. Ki rol refleksyon i annan an rapor avek nou konversasyon?

⁶ Reflesir seryezman i en lot fason pour nou amelyor nou konversasyon. Si nou fer en zefor pour mazin bann keksoz spirityel, nou pou vwar nou pe fer konversasyon spirityel natirelman. Lerwa David ti remarke ki sa de keksoz i relye avek kanmarad. I ti sante: “Les bann parol ki sorti dan mon labous ek refleksyon ki sorti dan mon leker vin en keksoz agreab pour ou, O Zeova.” (Psonm 19:14) Psalmis Azaf ti dir: “Mon pou sirman reflesir lo tou ou aktivite [aktivite Bondye], e mon pou enterese avek ou mannyer azir.” (Psonm 77:12) En leker ek lespri ki vreman enterese avek laverite dan Parol Bondye, pou natirelman deborde avek parol ki merit felisitasyon. Zeremi pa ti kapab aret koz lo bann keksoz ki Zeova ti’n ansenny li. (Zeremi 20:9) Sa i kapab arive avek nou osi si nou toultan reflesir lo bann keksoz spirityel.—1 Timote 4:15, NW.

7, 8. Ki bann bon topik pour fer bann konversasyon ki batir lezot?

⁷ En bon progranm spirityel i donn nou bokou topik pour nou kapab fer konversasyon ki batir lezot. (Filipyen 3:16) Bann lasanble, renyon, nouvo piblikasyon, ek nou teks Labib ek son komanter sak zour, tousala i donn nou bann trezor spirityel ki nou kapab partaz avek lezot. (Matye 13:52) Deplis, bann leksperyans ki nou gannyen dan predikasyon i vreman ankourazan pour koz lo la!

⁸ Lerwa Salomon ti vreman admir sa gran varyete pye dibwa, zannimo, zwazo, ek pwason ki i ti obzerve an Izrael. (1 Lerwa 4:33) I ti kontan koz lo travay kreasyon Bondye. Nou osi nou kapab fer parey. Bann serviter Zeova i kontan koz lo diferan size, me bann topik spirityel i kapab toultan azout bon gou avek konversasyon bann dimoun ki annan lentere pour keksoz spirityel.—1 Korentyen 2:13.

Kontinyen “mazin tou sa bann Keksoz”

9. Ki konsey Pol ti donn bann Filipyen?

⁹ Nenport ki topik ki nou koz lo la, nou konversasyon pou batir lezot si zot an akor avek sa konsey ki zapot Pol ti donn kongregasyon Filip. I ti ekrir: “Mon konsey zot, atas zot avek tou sa ki vre, tou sa ki onorab, sa ki zis, sa ki pir, sa ki bon, sa ki agreab, sa ki ekselan, tou sa ki merit felisitasyon; mazin tou sa bann keksoz.” (Filipyen 4:8) Sa bann keksoz ki Pol i mansyonnen i sitan enportan ki i dir kontinyen “mazin tou sa bann keksoz.” Nou devret gard zot dan nou lespri e dan nou leker. Alors, annou vwar konman ki donn nou latansyon sa wit keksoz ki Pol ti mansyonnen i kapab ed nou dan nou konversasyon.

10. Ki mannyer nou konversasyon i kapab enkli bann keksoz ki vre?

¹⁰ En lenformasyon pa bezwen zis egzakt oubyen pa fo pour li ganny dekrir konman vre. Vre i osi refer avek en keksoz ki drwat e diny konfyans, parey sa laverite dan Parol Bondye. Alors kan nou koz avek lezot konsernan serten laverite dan Labib ki’n fer en gran lefe lo nou, serten diskour ki’n lev nou moral, oubyen serten konsey baze lo Labib ki’n ed nou, nou pe mazin bann keksoz ki vre. De lot kote, nou rezet “bann fo largiman ki zot apel konnesans” ki annan zis laparans laverite. (1 Timote 6:20) Nou osi evite repet rimer oubyen rakont serten leksperyans ki nou pa asire i vre e ki pa kapab ganny prouve.

11. Ki bann keksoz onorab nou kapab enkli dan nou konversasyon?

¹¹ Bann keksoz onorab i bann size respektab e enportan, pa bann size ki napa valer. Sa i enkli bann laspe enportan nou minister Kretyen, sa letan difisil ki nou pe viv ladan, e nesesite pour nou kontinyen annan  en bon kondwit. Letan nou diskit bann size serye koumsa, nou ranforsi nou determinasyon pour reste reveye lo plan spirityel, pour kontinyen fer sa ki byen, e pour kontinyen pres sa bon nouvel. Anfet, bann fe enteresan dan predikasyon ek bann laktyalite ki rapel nou ki nou pe viv dan bann dernyen zour, i donn nou plizyer keksoz ki nou kapab fer konversasyon lo la.—Akt 14:27; 2 Timote 3:1-5.

12. Ki nou devret evite si nou oule swiv konsey Pol pour mazin bann keksoz ki zis e pir?

¹² Sa mo zis i vedir drwat dan lizye Bondye, satisfer son standar. Pir i donn lide prop dan nou panse ensi ki dan nou kondwit. Nou pa devret fer kalonmni, dyok sal, oubyen koz bann parol visye ki annan de sans. (Efezyen 5:3; Kolosyen 3:8) Bann Kretyen i servi zot bon zizman pour pa ekoute letan bann konversasyon koumsa i konmanse swa dan travay oubyen kot lekol.

13. Donn serten legzanp bann konversasyon ki konsantre lo bann keksoz agreab e ekselan.

¹³ Letan Pol i konsey nou pour mazin sa ki agreab, i refer avek bann keksoz ki fer plezir  pour ekoute oubyen ki promot lanmour, kontrerman avek bann keksoz ki ensit laenn, lakoler, oubyen dispit. Sa ki ekselan i refer avek lenformasyon ki ganny konsidere konman bann bon rapor. Sa i enkli bann resi lo lavi bann frer ek ser fidel, ki souvan aparet dan magazin Latour Veyer ek Réveillez-vous! Akoz ou pa partaz ou santiman avek lezot apre ki ou’n lir sa bann lartik ki vreman fortifye lafwa? Deplis, pa i ankourazan pour tann sa ki lezot in akonpli spirityelman! Bann konversasyon koumsa pou promot lanmour ek linite dan kongregasyon.

14. (a) Ki nou bezwen fer pour nou koz lo sa ki bon? (b) Ki mannyer nou konversasyon i kapab enkli bann keksoz ki merit felisitasyon?

¹⁴ Pol i koz lo “sa ki bon.” Labonte i refer avek tou sa ki bon. Nou bezwen veye ki nou lalang i ganny gide par bann prensip Labib e ki i pa elwannyen avek sa ki zis, sa ki pir e sa ki bon. Tou sa ki merit felisitasyon se bann keksoz ki ou’n kontan e admire. Si ou tann en zoli diskour oubyen remark en dimoun ki demontre en bon legzanp dan kongregasyon, koz lo la. Koz lo la avek sa dimoun e osi avek lezot. Souvan zapot Pol ti felisit son bann konpanyon Kretyen pour zot bann bon kalite. (Romen 16:12; Filipyen 2:19-22; Filemon 4-7) Deplis, bann keksoz ki nou Kreater in kree i vreman merit felisitasyon. Nou kapab trouv en bon pe keksoz konsernan kreasyon pour fer bann konversasyon ki batir lezot.—Proverb 6:6-8; 20:12; 26:2.

Fer bann Konversasyon ki batir Lezot

15. Ki teks Labib ki montre responsabilite bann paran pour fer bann konversasyon enteresan avek zot zanfan?

¹⁵ Deterononm 6:6, 7 i dir: “Sa bann parol ki mon pe konmann ou ozordi i bezwen dan ou leker. Ou bezwen fer zot antre dan ou garson e koz lo la ler ou pe asize dan ou lakaz, ler ou pe marse lo semen, ler ou pe alonze, e ler ou leve.” Dapre sa parol, i kler ki bann paran i ganny demande pour fer bann konversasyon spirityel ki enteresan avek zot zanfan.

16, 17. Ki bann paran Kretyen i kapab aprann atraver legzanp Zeova ek Abraam?

¹⁶ Nou kapab imazin bann gran konversasyon ki Zezi ti’n bezwen fer zot de son Papa dan lesyel, kan zot ti pe diskit konsernan son misyon lo later. Zezi ti dir son bann disip: “Mon Papa ki’n anvoy mwan in donn mwan lord sa ki mon pou dir e ansennyen.” (Zan 12:49; Deterononm 18:18) Patrias Abraam ti’n bezwen pran bokou letan pour koz avek son garson Izaak konsernan konman Zeova ti beni zot ek zot zanset. Bann tel konversasyon ti sirman ed Zezi ek Izaak pour fer lavolonte Bondye avek limilite.—Zenez 22:7-9; Matye 26:39.

¹⁷ Nou bann zanfan osi i bezwen bann konversasyon ki pou batir zot. Bann paran i devret fer letan, menm si zot tre okipe, pour koz avek zot zanfan. Akoz zot pa aranze pour manz an fanmiy omwen enn fwa dan lazournen, si i posib? Pandan e apre repa, zot kapab ganny loportinite pour fer bann konversasyon ki  kontribye bokou pour gard lafanmiy an bonn sante spirityelman.

18. Rakont en leksperyans ki montre bann byenfe ki bon kominikasyon ant paran ek zanfan i anmennen.

¹⁸ Alejandro, ki en pionye dan son 20 an an montan, i mazin bann dout ki i ti annan letan i ti dan son 14 an. I rakonte: “Lenfliyans mon bann kanmarad lekol ek mon bann ansennyan, ti fer mwan dout legzistans Bondye e sa ki Labib i dir. Mon paran ti pran bokou letan ek pasyans pour rezonn avek mwan. Sa bann konversasyon pa ti zis ed mwan pour sirmont mon bann doutans pandan sa moman difisil, me i ti osi fer mwan fer bann bon desizyon dan mon lavi.” Ki son sitiasyon konmela? Alejandro i kontinyen: “Mon ankor reste dan lakour. Me akoz nou progranm i sere, i difisil pour mwan ek mon papa fer bann konversasyon personnel. Alors, nou manz ansanm kot son landrwa travay enn fwa par semenn. Mon vreman apresye sa bann konversasyon ki nou fer.”

19. Akoz nou tou nou bezwen bann konversasyon spirityel?

¹⁹ Eski pa nou osi apresye bann loportinite ki nou gannyen pour fer bann konversasyon spirityel avek nou bann konpanyon Kretyen? Nou ganny sa bann loportinite dan bann renyon, kan nou dan predikasyon ek dan bann rankont sosyal e kan nou pe vwayaze. Pol ti esper avek enpasyans sa moman pour li koz avek bann Kretyen an Ronm. I ti ekrir: “Mon annan en gran dezir war zot . . . pour ki nou kapab ansanm benefisye lankourazman: mwan par zot lafwa e zot par mon lafwa.” (Romen 1:11, 12) En ansyen ki apel Johannes ti fer sa remark swivan: “Konversasyon spirityel avek bann konpanyon Kretyen i konble en bezwen tre esansyel. Zot rekonfort leker e fer nou fardo sak zour pli leze. Souvan mon demann bann ki pli aze pour rakont mwan zot lavi e dir mwan kwa ki’n ed zot reste fidel. Pandan bann lannen ki’n pase, mon’n koz avek bokou. Zot tou zot in donn mwan serten lasazes ek leklersisman ki’n anrisir mon lavi.”

20. Ki nou pou fer si nou rankontre en dimoun ki en pe timid?

²⁰ Ki ou pou fer si en dimoun pa montre lentere kan ou konmans koz lo keksoz spirityel? Pa dekouraze. Petet plitar ou pou trouv en pli bon moman pour fer li. Salomon ti dir: “En parol ki ganny dir dan son moman apropriye, i parey ponm lor dan bann skilptir an larzan.” (Proverb 25:11) Montre konsiderasyon pour bann ki en pe timid. “Konsey dan leker en zonm i parey delo profon, me sa zonm avek disernman i sa enn ki pou retir li.” * (Proverb 20:5) Sirtou, pa zanmen les latitid lezot anpes ou koz lo bann keksoz ki’n tous ou.

Konversasyon spirityel i anmenn bokou Byenfe

21, 22. Ki bann byenfe nou gannyen kan nou partisip dan bann konversasyon spirityel?

²¹ Pol ti donn sa konsey: “Pa les bann move parol sorti dan zot labous, me koz zis bann parol itil ki kapab ed lezot pour progrese dan zot lafwa e kan i neseser pour fer dibyen sa ki ekoute.” (Efezyen 4:29; Romen 10:10) I demann zefor pour fer konversasyon al dan en bon direksyon. Me i anmenn bokou byenfe.  Bann konversasyon spirityel i permet nou partaz nou lafwa avek lezot e batir nou bann frer ek ser.

²² Alors, annou servi sa don ki nou’n gannyen pour kominike dan en fason ki pou fortifye lezot e loue Bondye. Bann konversasyon koumsa, pou donn nou bokou satisfaksyon e pou vreman ankouraz lezot. Pli enportan, sa bann konversasyon i fer Zeova kontan akoz i ekout nou konversasyon e i kontan ler nou servi nou lalang dan en bon fason. (Psonm 139:4; Proverb 27:11) Kan nou fer bann konversasyon spirityel, nou kapab annan lasirans ki Zeova pa pou oubliy nou. Labib pe refer avek bann ki servi Zeova dan nou letan, kan i dir: “Sa letan, bann ki annan lakrent pour Zeova ti koz avek kanmarad, sakenn avek son konpanyon, e Zeova ti kontinyen port latansyon e ekoute. En liv souvenir ti konmans ganny ekrir devan li pour bann ki annan lakrent pour Zeova e pour bann ki pans lo son non.” (Malaki 3:16; 4:5) Wi, i vreman enportan pour nou fer bann konversasyon spirityel ki batir lezot!

[Not anba lo paz]

Ki ou pou reponn?

• Ki nou konversasyon i revele lo nou?

• Ki bann keksoz nou kapab koz lo la ki batir lezot?

• Ki rol enportan konversasyon i annan dan lafanmiy e dan kongregasyon Kretyen?

• Ki byenfe bann konversasyon spirityel i anmennen?

[Kestyon]

[Portre lo paz 12]

Konversasyon ki batir lezot i baze lo . . .

“sa ki vre”

“sa ki onorab”

“sa ki merit felisitasyon”

“sa ki ekselan”

[Portre]

Kouvertir Kaset video, Stalin: U.S. Army photo; kouvertir liv Creator, Eagle Nebula: J. Hester and P. Scowen (AZ State Univ.), NASA

[Portre lo paz 13]

Pandan repa nou ganny bann bon loportinite pour fer bann konversasyon spirityel