Labib i kapab ed ou Lavi Maryaz
Labib i kapab ed ou Lavi Maryaz
POUR serten dimoun, sa mo maryaz i fer zot rapel bann bon souvenir. Pour lezot, i anmenn latet fer mal. Avek latristes, en madanm ti dir: “Mon santi mwan elwannyen avek mon mari. Mon santi mwan ganny neglize e toultan tousel.”
Kwa ki fer de dimoun ki’n fer en ve pour kontan e seri kanmarad, elwannyen avek kanmarad? En keksoz ki kontribye pour sa arive i akoz bokou dimoun pa konnen kwa ki enplike dan lavi maryaz. En zournalis medikal i dir ki dimoun i “marye san ganny okenn formasyon.”
Liniversite Rutgers an New Jersey, Letazini, ti fer en resers apele Proze Maryaz Nasyonal. Sa ti revele ki napa bokou dimoun ki konnen ki mannyer pour viv en lavi maryaz. Direkter sa proze i dir: “Bokou dimoun dan sa letid in grandi avek bann paran ki zot maryaz pa ti ere oubyen ki’n divorse. Zot konn byen kwa sa en move maryaz, me zot pa sir ki mannyer en bon maryaz i devret ete. Serten i selman kapab dekrir en bon maryaz konman ‘enn ki diferan avek sa ki pour mon paran.’ ”
Eski bann Kretyen pa ganny afekte par bann problenm maryaz? Non. Annefe, serten Kretyen dan premye syek ti bezwen bann konsey fran pour aret “rod divors.” (1 Korentyen 7:27) Definitivman, de dimoun enparfe ki’n marye pou rankontre problenm tanzantan, me nou annan led. Bann msye ek madanm i kapab amelyor zot relasyon par aplik bann prensip Labib.
I vre ki Labib pa en liv ki zis donn konsey lo maryaz. Me vi ki Labib in ganny enspire par sa Enn ki’n fer sa laranzman maryaz, nou kapab ekspekte ki son bann prensip i itil. Atraver profet Izai, Zeova ti dir: “Mwan, Zeova, mon ou Bondye, sa Enn ki pe ansenny ou pour ou prop profi, sa Enn ki pe fer ou mars lo sa semen lo ki ou devret marse. Si selman ou atantif anver mon bann komannman! Alor ou lape pou vin zis parey en larivyer e ou lazistis parey bann laroul dan lanmer.”—Izai 48:17, 18.
Eski sa lanmour ki ti egziste ant ou ek ou msye oubyen ou madanm pe konmans diminyen? Eski ou santi ou pri dan en maryaz kot napa lanmour? En madanm ki’n marye pour 26 an ti dir: “I tre difisil pour dekrir sa douler ki egziste dan sa kalite relasyon. I pa zanmen fini, i toultan la.” Olye bes lebra e aksepte en maryaz ki pa reisi, akoz ou pa determinen pour fer keksoz pour aranz sa sitiasyon? Sa lartik swivan pou montre bann msye ek madanm konman bann prensip Labib i kapab ed zot maryaz dan en laspe spesifik. Sa i langazman.