Ler bann Promes i en Garanti

LISTWAR i ranpli avek bann promes ki pa’n ganny akonpli. Bokou nasyon in kas bann lagreman ki zot in fer pour evit konfli avek lezot nasyon. Sa in anmenn zot pep dan bann lager terib. Napoleon ti fer sa remark: “Bann gouvernman i gard zot promes zis ler zot ganny forse pour fer li, ouswa ler i pou dan zot lavantaz.”

Ki nou pou dir konsernan bann promes ki ganny fer par bann endividi? Pa i dekourazan ler en dimoun pa gard son parol! Sirtou si i en dimoun ki ou konnen e annan konfyans ladan. Byensir, i kapab ki dimoun i swa pa kapab oubyen pa anvi akonpli zot promes.

I vreman annan en gran diferans ant bann promes imen ek bann promes Bondye! Nou kapab annan konfyans e depan antyerman lo bann promes Bondye. Okenn promes ki Zeova Bondye i fer i en garanti. I pou sirman ganny akonpli. Par refer avek Parol Bondye ki toultan ganny akonpli, Izai 55:11 i dir: “Demenm mon parol ki sorti dan mon labous pou vin vre. I pa pou retourn ver mwan san rezilta, me i pou sertennman fer sa ki mon’n pran plezir ladan, e i pou annan en sikse serten dan sa ki mon’n anvoy li.”

Alors, ki mannyer nou devret vwar bann promes Bondye ki’n ganny rikorde dan Labib? Definitivman nou kapab depan lo zot. Par egzanp, zapot Zan ti ekrir: “La aprezan Bondye in fer son demer parmi zonm. I pou reste avek zot. Zot pou vin son pep, e i pou vin zot Bondye. I pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.” (Revelasyon 21:3, 4) Ou kapab rezwir bann tel benediksyon si ou azir an armoni avek parol Zezi: “Ou’n donn li pouvwar lo tou dimoun pour donn lavi eternel tou bann ki ou’n donn li. Savedir ki zot konn ou konman sel vre Bondye, ek Zezi-Kri ki ou’n anvoye.”—Zan 17:2, 3.