Azout avek zot Konnesans, Kontrol lo zot Lekor

“Azout avek zot . . . konnesans, [kontrol, NW] lo zot lekor.”—2 PYER 1:5-8.

1. Ki bokou dimoun pa kapab fer ki fer zot ganny bokou problenm?

PANDAN en gran kanpanny kont labi drog, bann zenn dan Letazini ti ganny konseye pour: “Zis dir non.” Keksoz ti pou bokou pli meyer si tou dimoun pa ti zis dir non anver labi drog, me osi anver bwar an ekse, move lavi, bann tranzaksyon biznes malonnet, e osi “bann dezir” natir imen. (Romen 13:14) Pourtan, lekel ki pou dir ki dir non i touzour fasil?

2. (a) Ki bann legzanp dan Labib ki montre ki sa difikilte pour dir non i pa nouvo? (b) Ki sa bann legzanp i devret ankouraz nou pour fer?

² Vi ki tou imen enparfe i ganny difikilte pour demontre kontrol lo zot lekor, nou devret enterese pour aprann konman nou kapab ganny laviktwar lo okenn batay personnel ki nou rankontre. Labib i koz lo bann dimoun dan lepase ki ti fer zot mye pour servi Bondye, me parfwa zot ti ganny difikilte zis pour dir non. Rapel David ki ti komet ladilter avek Batseba. Sa ti anmenn lanmor zot zanfan ki ti’n ganny konsevwar dan ladilter ek lanmor msye Batseba, ki tou le de ti inosan. (2 Samyel 11:1-27; 12:15-18) Oubyen mazin zapot Pol ki ti konfese ouvertman: “Mon pa fer sa ki byen ki mon anvi fer, me mon fer sa ki mal, ki mon pa anvi fer.” (Romen 7:19) Eski parler ou santi sa menm kalite dezapwentman? Pol ti kontinyen: “Dan mwan menm, mon ganny plezir dan lalwa Bondye. Me mon trouv en lot lalwa dan mwan ki lit kont lalwa ki mon lespri i aprouve e ki fer mwan prizonnyen lalwa pese ki dan mwan. Malere! La sa ki mon ete! Lekel ki pou delivre mwan avek sa lekor lanmor?” (Romen 7:22-24) Bann legzanp dan Labib i devret ranforsi nou determinasyon pour pa zanmen bes lebra dan nou lalit pour annan plis kontrol lo nou lekor.

Kontrol lo nou Lekor, en Leson ki nou bezwen aprann

3. Eksplike akoz nou pa devret ekspekte li fasil pour demontre kontrol lo nou lekor.

³ Kontrol lo nou lekor, ki enkli sa abilite pour dir non, i ganny mansyonnen dan 2 Pyer 1:5-7 ansanm avek lafwa, bonn kondwit, konnesans, perseverans, latasman pour Bondye, lafeksyon fraternel, ek lanmour. Napa enn sa bann kalite ki nou’n ne avek. Zot bezwen ganny devlope. Pour demontre zot dan en bon degre i demann determinasyon ek zefor. Alor, eski nou devret krwar ki devlop kontrol lo nou lekor pou pli fasil ki devlop lezot kalite?

4. Akoz bokou dimoun i santi ki zot napa problenm avek kontrol lo zot lekor, me ki sa i endike?

⁴ I vre ki plizyer milyon dimoun i kapab santi ki zot napa okenn problenm avek kontrol lo zot lekor. Zot viv zot lavi mannyer zot anvi. Ki swa zot konsyan oubyen non, zot kondwir zot dapre fason ki zot laser enparfe i dir zot e zot pa mazin preski ditou lo konsekans ki zot aksyon i anmennen lo zot menm oubyen lo lezot dimoun. (Zid 10) I pli evidan konmela ki zanmen oparavan ki dimoun pa kapab e pa anvi dir non. Sa i en lendikasyon ki nou pe vreman viv dan “bann dernyen zour” ki Pol ti koz lo la kan i ti predir: “Pou annan letan difisil. Parski zonm pou vin egois, kontan larzan, vantar, arogan zot pou koz kont Bondye, . . . [napa kontrol lo zot menm, NW ].”—2 Timote 3:1-3.

5. Akoz bann Temwen Zeova i enterese lo sa size kontrol lo zot lekor, e ki konsey ki ankor annan valer?

⁵ Bann Temwen Zeova i konn tre byen ki i difisil pour annan kontrol lo nou lekor. Parey  Pol, zot konsyan ki i annan en lalit ant sa dezir pour fer plezir Bondye par viv an akor avek son bann standar e sa fason ki zot laser enparfe i anvi zot viv. Pour sa rezon ki pour en bon pe letan zot in enterese pour konnen ki mannyer pour ganny sa batay. An 1916, en nimero sa magazin ki ou pe lir la konmela ti koz lo “sa bon fason pour nou swiv pour kapab ganny kontrol lo nou menm, nou panse, nou parol ek nou kondwit.” Sa lartik ti sizere ki nou gard Filipyen 4:8 antet. Sa konsey dan sa teks ki sorti kot Bondye i ankor annan valer, menm si i ti ganny ofer apepre 2,000 an pase. I probab ki i pli difisil pour swiv sa konsey konmela ki dan sa letan oubyen dan lannen 1916. Kantmenm sa, bann Kretyen i fer tou sa ki zot kapab pour dir non avek bann dezir sa lemonn. Zot konnen ki letan zot fer sa, zot pe dir wi avek zot Kreater.

6. Akoz nou napa okenn rezon pour dezespere anmezir ki nou pe devlop kontrol lo nou lekor?

⁶ Kontrol lo nou lekor i ganny mansyonnen dan Galat 5:22, 23 konman parti “fri Lespri [sen].” Si nou demontre sa kalite ansanm avek “lanmour, lazwa, lape, pasyans, labonte, fidelite, ladouser,” nou pou benefisye en kantite. Parey Pyer ti eksplike, si nou fer sa i ava rann nou “aktif e prodiktif” dan nou servis pour Bondye. (2 Pyer 1:8) Me nou pa devret dezespere oubyen kondann nou lekor si nou pa arive demontre sa bann kalite vitman e parey nou ti ava anvi. Petet ou’n deza obzerve ki dan lekol en etidyan i aprann pli vit ki en lot. Oubyen dan travay en dimoun i aprann en nouvo louvraz pli vitman ki lezot koleg travay. Pareyman, serten dimoun i aprann demontre bann kalite Kretyen pli vitman ki lezot. Sa ki enportan se ki nou kontinyen devlop sa bann kalite dan pli bon fason ki nou kapab. Nou kapab fer sa si nou profit plennman sa led ki Zeova i fourni atraver son Parol ek kongregasyon. Keksoz pli enportan se nou bann zefor ki nou fer avek determinasyon pour kontinyen fer progre, non pa akonpli nou bann lobzektif vitman.

7. Kwa ki endike ki kontrol lo nou lekor i enportan?

⁷ Kantmenm i’n ganny mansyonnen dernyen dan bann kalite ki lespri i prodwi, i pa vedir ki kontrol lo nou lekor i mwen enportan ki lezot kalite. I toutafe lekontrer. Nou devret gard antet ki tou “bann aktivite natir imen” ti’n kapab ganny evite si nou ti’n annan kontrol total lo nou lekor. Me bann imen enparfe i annan sa tandans pour les “bann aktivite natir imen: aksyon imoral, lenpirte, vis, ladorasyon zidol, siperstisyon, laenn, diskord, zalouzi, lakoler, egois, divizyon” domin zot. (Galat 5:19, 20) Alor nou bezwen pe toultan lalit, determinen pour derasin tou bann tandans negatif dan nou leker osi byen ki dan nou lespri.

Serten i annan en Lalit spesyal

8. Ki bann fakter ki fer li sirtou difisil pour serten dimoun demontre kontrol lo zot lekor?

⁸ Serten Kretyen i annan plis difikilte ki lezot pour demontre kontrol lo zot lekor. Akoz? Formasyon ki paran i donnen oubyen bann leksperyans dan lepase i kapab kontribye anver sa. Si nou napa okenn problenm pour devlop e demontre kontrol lo nou lekor, sa i en rezon pour rezwir. Me nou devret sirman montre konpasyon ek konprenezon anver bann ki annan plis difikilte pour demontre li, menm si sa mank kontrol lo zot lekor i koz serten lenkonvenyans pour nou personnelman. Vi ki nou tou nou enparfe, lekel parmi nou ki annan okenn rezon pour montre en latitid kot i krwar i pli byen ki lezot?—Romen 3:23; Efezyen 4:2.

9. Ki febles serten i annan, e kan ki zot pou ganny laviktwar total lo sa bann febles?

⁹ Pour donn en legzanp: Nou kapab konn serten konpanyon Kretyen ki’n aret servi sigaret oubyen drog me ki parfwa zot ankor annan sa lanvi pour servi zot. Oubyen serten i vwar li difisil pour limit zot konsonmasyon manze oubyen labwason alkolik. Lezot i vwar li en problenm pour vey zot lalang, alor souvan zot fer bann fot par sa ki zot dir. Pour fer fas avek sa bann defo i demann bokou zefor pour devlop kontrol lo nou lekor. Akoz? Zak 3:2 i admet klerman: “Nou komet lerer dan plizyer mannyer. Si en dimoun pa komet lerer dan sa ki i  dir i en dimoun parfe ki kapab met en labrid avek son lekor an antye.” I annan lezot ankor ki annan en gran dezir pour zwe larzan. Oubyen zot kapab vwar li difisil pour kontrol zot tanperaman. I kapab pran letan pour aprann pli byen fer fas avek sa bann febles ek lezot parey. Menm si nou kapab fer progre remarkab la konmela, bann move dezir pou ganny retire konpletman letan nou’n ariv dan en leta parfe. Antretan, si nou fer nou mye pour demontre kontrol lo nou lekor, sa pou ed nou evite tonm ankor dan en move lavi. Anmezir ki nou kontinyen lalit, annou ed kanmarad pour pa zanmen abandonnen.—Akt 14:21, 22.

10. (a) Akoz i sirtou difisil pour serten dimoun demontre kontrol lo zot lekor dan domenn seksyalite? (b) Ki sa gran sanzman ki en frer ti fer? (Vwar bwat lo paz 16.)

¹⁰ En lot domenn kot i difisil pour serten demontre kontrol lo zot lekor se dan domenn seksyalite. Dan li menm, sa dezir pour fer sèks i form parti lafason ki Zeova Bondye in fer nou. Me serten i vwar li sirtou difisil pour annan relasyon seksyel zis dan maryaz, an armoni avek bann standar Bondye. Zot difikilte i kapab vin pli pir parski zot annan en tre gran dezir pour annan relasyon seksyel. Nou viv dan en lemonn kot dimoun i mazin zis sèks ki tant pour ogmant sa pasyon dan zot dan plizyer fason. Sa i kapab kree en problenm pour bann Kretyen ki anvi reste selibater—omwen pour en pe letan—pour kapab servi Bondye san okenn distraksyon lavi maryaz. (1 Korentyen 7:32, 33, 37, 38) Me an akor avek sa komannman dan Labib, ki dir “vomye zot marye ki zot brile avek pasyon,” zot kapab deside pour marye, ki sirman onorab. Anmenmtan, zot determinen pour marye “selon Senyer,” parey Labib i konseye. (1 Korentyen 7:9, 39) Nou kapab asire ki Zeova i kontan ler zot montre lentere pour kontinyen soutenir son bann prensip drwat. Zot bann konpanyon Kretyen i vwar li en lazwa pour asosye avek bann vre adorater ki annan bann standar moral onivo e ki fidel.

11. Ki mannyer nou kapab vin en led pour en frer oubyen en ser ki anvi marye me ki pa ankor kapab fer li?

¹¹ Me si sa dimoun pa kapab trouv en partner ki apropriye? Imazin dezapwentman en dimoun ki annan sa lanvi pour marye me ki pa ankor kapab fer li! I kapab vwar son bann zanmi marye e trouv boner, kan li i ankor pe sers en partner apropriye. Pour serten dimoun ki dan sa sitiasyon, sa pratik enpir mastibasyon i kapab vin en problenm kontinyel. Dan okenn ka, napa en Kretyen ki pou anvi fer par ekspre pour dekouraz en lot ki pe lalit pour reste pir. Nou kapab envolonterman fer en dimoun dekouraze si nou fer bann komanter ki pa montre konsiderasyon parey, “Kan ou pou marye?” Sa i kapab ganny dir san okenn lentansyon pour fer ditor, me i ti pou bokou pli meyer si nou ti demontre kontrol lo nou lekor dan le sans ki nou vey nou lalang! (Psonm 39:1) Bann parmi nou ki pe reste pir ler zot ankor selibater i merit nou felisitasyon. Olye dir bann keksoz ki dekourazan, nou kapab fer zefor pour ankouraz sa dimoun. Par egzanp, nou kapab fer en zefor pour enkli bann selibater kan en group dimoun matir i rankontre pour en repa oubyen en rankont antre bann Kretyen.

Kontrol lo nou Lekor dan Maryaz

12. Akoz menm bann ki’n marye i bezwen demontre en serten kontrol lo zot lekor?

¹² Menm si de dimoun in marye i pa otomatikman vedir ki zot pa devret montre kontrol lo zot lekor an sa ki konsern sèks. Par egzanp, bezwen seksyel en mari ek en fanm i kapab vreman diferan. Oubyen kondisyon fizik enn ant zot i kapab parfwa fer bann relasyon seksyel ki normal vin difisil oubyen menm enposib. Petet akoz bann leksperyans dan lepase, enn ant zot i kapab vwar li difisil pour obeir sa komannman: “En mari i devre ranpli son devwar konman mari anver son madanm e demenm en madanm i devre fer parey anver son mari.” Dan en tel sitiasyon, petet sa lot i bezwen demontre kontrol lo son lekor plis ankor.  Me tou le de i kapab gard antet konsey Pol ranpli avek lanmour pour bann Kretyen marye: “Pa bezwen priv kanmarad amwen ki par konsantman kanmarad pour ganny letan pour lapriyer. Apre retourn ansanm pour ki satan pa profite pour tant zot e fer zot mank kontrol.”—1 Korentyen 7:3, 5.

13. Ki nou kapab fer pour bann ki pe lalit pour demontre kontrol lo zot lekor?

¹³ Bann koup marye pou vreman rekonesan si tou le de in aprann pour demontre kontrol apropriye lo zot lekor dan sa relasyon pli entim. Anmenmtan, zot devret montre konprenezon anver lezot adorater ki ankor pe lite pour demontre kontrol dan sa domenn. Nou pa devret zanmen oubliye pour priye ki Zeova i donn nou bann frer ek ser spirityel konprenezon, kouraz, ek determinasyon pour kontinyen zot lalit pour demontre kontrol lo zot lekor e pour pran bann pa pour sirmont bann dezir ki pa apropriye.—Filipyen 4:6, 7.

Kontinyen ed Kanmarad

14. Akoz nou devret annan konpasyon ek konprenezon anver nou bann konpanyon Kretyen?

¹⁴ Parfwa, nou kapab vwar li difisil pour konpran nou bann konpanyon Kretyen ki pe lalit pour montre kontrol lo zot lekor dan en domenn ki nou nou pa vwar li en problenm. Me sak dimoun i diferan. Serten i fasilman ganny dominen par santiman; me lezot non. Serten i vwar li ase fasil pour kontrol zot. Alors kontrol lo zot lekor pa en gran problenm pour zot. Lezot i ganny plis difikilte. Me rapel, ki en dimoun ki pe lalit i pa en move dimoun. Nou bann konpanyon Kretyen i bezwen nou konprenezon ek konpasyon. Anmezir ki nou kontinyen montre mizerikord anver bann ki ankor pe lalit pour pli kapab annan kontrol lo zot lekor, nou pou pli zwaye. Nou kapab vwar sa dan parol Zezi ki ganny rikorde dan Matye 5:7.

15. Akoz sa parol dan Psonm 130:3 i rekonfortan an sa ki konsern kontrol lo nou lekor?

 ¹⁵ Nou pa devret zanmen mal ziz en konpanyon Kretyen ki kapab parler pa arive demontre personnalite Kretyen. Pa i ankourazan pour konnen ki Zeova pa zis vwar sa enn fwa ki nou pa’n demontre kontrol, me i vwar sa plizyer fwa kot nou’n arive demontre li, menm si nou bann konpanyon Kretyen pa’n remark tousala! I vreman rekonfortan pour gard antet sa parol dan Psonm 130:3: “Si ou ti vey bann fot, O Ya, O Zeova, lekel ki ti pou kapab debout devan ou?”

16, 17. (a) Konman nou kapab aplik Galat 6:2, 5 an sa ki konsern kontrol lo nou lekor? (b) Ki nou pou egzaminen konsernan kontrol lo nou lekor?

¹⁶ Pour fer plezir Zeova, sakenn ant nou i devret devlop kontrol lo son lekor, me nou kapab asire ki nou pou ganny led nou bann frer ek ser Kretyen. Menm si sakenn ant nou i devret anmenn son prop fardo, kantmenm sa, nou ganny ankouraze pour ed kanmarad fer fas avek zot febles. (Galat 6:2, 5) Nou apresye sa paran, sa msye ouswa sa madanm, oubyen sa zanmi ki anpes nou al dan bann landrwa ki nou pa devret ale, vwar bann keksoz ki nou pa devret vwar, oubyen fer keksoz ki nou pa devret fer. I pe ed nou pour demontre kontrol lo nou lekor, sa abilite pour dir non e fer sir ki nou non se non!

¹⁷ Bokou Kretyen i kapab pe viv an akor avek sa ki nou’n egzaminen ziska prezan konsernan kontrol lo zot lekor. Me zot kapab santi ki zot personnelman annan ankor bokou amelyorasyon pour fer. Zot ti pou kontan demontre plis kontrol lo zot lekor, a en degre ki zot krwar i rezonnab pour en imen enparfe demontre. Eski ou santi koumsa? Alor, ki ou kapab fer pour devlop sa laspe fri lespri Bondye? Ler ou fer sa, konman i kapab ed ou pour akonpli ou bann lobzektif Kretyen pour lavenir? Annou vwar larepons pour sa kestyon dan prosenn lartik.

Eski ou rapel?

Akoz Kontrol lo nou Lekor i . . .

• enportan pour Kretyen devlope?

• sirtou en difikilte pour serten?

• neseser dan lavi maryaz?

• en kalite ki nou kapab ed kanmarad pour devlope?

[Kestyon]

[Bwat/Portre lo paz 16]

I ti aprann pour dir Non

En Temwen Zeova ki reste Lalmanny ti anploye konman en klark dan domenn kominikasyon. Son travay ti enkli verifye apepre 30 diferan progranm radyo ek televizyon. Kan ti annan bann lenterferans, i ti bezwen donn latansyon sa progranm pour li kapab detekte sa problenm. I dir: “Bann lenterferans i ariv preski toultan dan move moman, zis ler pe montre bann senn vyolans oubyen sèks. Sa bann move senn ti paret reste dan mon lespri pour plizyer zour parfwa plizyer semenn, konmsi zot ti’n ganny grave dan mon lespri.” I admet ki sa ti annan en lefe negatif lo son spirityalite: “Mon tant pour ankoler vitman, alors bann senn vyolans ti fer li difisil pour mwan demontre kontrol lo mon lekor. Bann senn ki ti annan sèks ladan ti pe koz problenm ant mwan ek mon madanm. Mon ti bezwen lalit toulezour. Pour mwan pa perdi sa batay, mon ti deside pour rod en lot travay, menm si sa ti vedir ganny mwens larzan. Pa bokou letan pase mon’n reisi trouv enn. Mon’n ganny sa ki mon ti anvi.”

[Portre lo paz 15]

Konnesans ki nou gannyen dan letid Labib i ed nou pour demontre kontrol lo nou lekor