Bann Fanm Kretyen fidel i bann Adorater Bondye ki presye

“Sarm i kapab fo, e labote i kapab anven; me sa fanm ki annan lakrent pour Zeova i sa enn ki pou ganny felisite.”—PROVERB 31:30.

1. Ki mannyer pwennvi Zeova lo labote i diferan avek sa ki pour lemonn?

LEMONN i met bokou lanfaz lo laparans an deor, sirtou an rapor avek bann fanm. Me Zeova i pli enterese avek sa ki sa dimoun i ete anndan, ki kapab vin pli zoli anmezir ki laz sa dimoun i avanse. (Proverb 16:31) Pour sa rezon Labib i ankouraz bann fanm: “Zot pa devre rod montre zot labote par zot laparans: avek seve trese, bann bizou an-or, zoli lenz ki kout ser. Me zot labote i devret en labote enteryer, dan leker e ki pa kapab disparet, labote en lespri bon e trankil ki annan en gran valer devan Bondye.”—1 Pyer 3:3, 4.

2, 3. Ki mannyer bann fanm ti kontribye pour sa bon nouvel ganny propaze dan premye syek, e konman sa ti ganny predir?

² En tel leta lespri ki merit felisitasyon ti ganny demontre par bokou fanm ki ganny mansyonnen dan Labib. Dan premye syek, serten sa bann fanm ti annan privilez pour servi Zezi ek son bann zapot. (Lik 8:1-3) Plitar, bann fanm Kretyen ti vin bann proklanmater devoue; lezot ti donn en bon sipor bann zonm Kretyen ki ti pe dirize, enkli zapot Pol. Serten ti montre lospitalite remarkab, menm fer zot lakour disponib pour bann renyon Kretyen.

³ I ti’n ganny predir dan Labib ki Zeova ti pou servi bann fanm dan en fason remarkab pour akonpli son plan. Par egzanp, Yoel 2:28, 29 ti predir ki zonm ek fanm, zenn konman vye, ti pou resevwar lespri sen e partisip ansanm pour propaz sa bon nouvel Rwayonm. Sa profesi ti konmans ganny akonpli zour Lapannkot lannen 33 N.L. (Akt 2:1-4, 16-18) Serten fanm ki ti ganny swazir par lespri sen ti ganny bann don mirakile, tel parey don pour profetize. (Akt 21:8, 9) Par zot devouman dan predikasyon, sa gran larme ser spirityel e fidel ti kontribye pour propaz vre larelizyon Kretyen vitman dan premye syek. Annefe, apepre lannen 60 N.L., zapot Pol ti ekrir ki sa bon nouvel ti’n ganny “anonse avek tou dimoun dan lemonn antye.”—Kolosyen 1:23.

 Ganny felisite pour zot Kouraz, Devouman, ek Lospitalite

4. Akoz Pol ti annan bon rezon pour felisit serten fanm dan kongregasyon premye syek?

⁴ Zapot Pol ti enn sa bann dimoun ki ti apresye minister ki serten sa bann fanm ti fer—zis parey bann sirveyan Kretyen ozordi i apresye minister bann fanm devoue. Parmi sa bann fanm ki Pol ti mansyonn zot par non ti “Trifenn ek Trifoz” ek ‘son bon zanmi Persid’ ki’n travay dir pour Senyer. (Romen 16:12) Pol ti ekrir ki Evodi ek Sentis ti’n “konbat akote [li] pour fer konn levanzil.” (Filipyen 4:2, 3) Prisil, ansanm avek son mari, Akilas, ti osi servi akote Pol. Li avek Akilas, ti menm “riske zot prop lavi” pour Pol, ki ti pous li pour ekrir: “Pa zis mwan tousel ki rekonnesan avek zot me osi tou bann legliz dan lemonn non-Zwif.”—Romen 16:3, 4; Akt 18:2.

5, 6. Dan ki fason Prisil in demontre en bon legzanp pour bann ser ozordi?

⁵ Kwa ki ti fer Prisil annan sa devouman ek kouraz? Nou kapab trouv en lide dan Akt 18:24-26, kot nou lir ki i ti soutenir son msye pour ed Apolos, en bon orater, pour vin azour avek bann laverite ki’n ganny revele. Alor, i evidan ki Prisil ti en bon etidyan Parol Bondye ek lansennyman bann zapot. Alors, i ti devlop bann bon kalite ki ti fer li annan valer devan Bondye e devan son mari e en manm itil dan kongregasyon premye syek. Bann ser Kretyen ozordi ki travay dir, etidye seryezman Labib, e osi pran nouritir spirityel ki Zeova i fourni atraver “serviter fidel” i osi annan valer.—Lik 12:42.

⁶ Akilas ek Prisil ti montre lospitalite dan en fason remarkab. Pol ti reste dan zot lakaz kan i ti travay avek zot dan zot biznes fabrik latant an Korent. (Akt 18:1-3) Kan sa koup ti al reste Efez e plitar Ronm, zot ti kontinyen montre lospitalite Kretyen, menm fer zot lakaz disponib pour bann renyon Kretyen. (Akt 18:18, 19; 1 Korentyen 16:8, 19) Nenfa ek Mari manman Zan Mark, ti osi fer zot lakaz disponib pour bann renyon kongregasyon.—Akt 12:12; Kolosyen 4:15.

Bann Fanm i en Eleman presye ozordi

7, 8. Ki repitasyon dan servis sakre ki bann fanm Kretyen denozour i annan ki merit felisitasyon, e ki lasirans zot annan?

⁷ Parey dan premye syek, bann fanm Kretyen ozordi i zwe en rol enportan dan lakonplisman plan Bondye, sirtou dan travay predikasyon. Zot in etablir en bon repitasyon! Konsider legzanp Gwen, ki’n servi Zeova fidelman pour plis ki 50 an ziska son lanmor an 2002. Son msye i dir: “Tou dimoun dan nou lavil ti konn devouman Gwen konman en predikater. I ti vwar tou dimoun konmkwa zot annan sa potansyel pour resevwar lanmour ek promes Zeova. Son fidelite anver Bondye, son lorganizasyon, ek nou fanmiy—san kont son lankourazman ranpli avek lanmour ler nou ti santi nou dekouraze—ti en gran sipor pour mwan ek nou zanfan toudilon nou lavi byen okipe e satisfezan ki nou’n pase ansanm. Nou mank li en kantite.” Gwen ek son mari ti’n marye pour 61 an.

⁸ Plizyer milyon fanm Kretyen, selibater oubyen marye, i servi konman bann pionye ek misyonner. Zot kontant zot avek bann nesesite debaz dan lavi anmezir ki zot propaz sa mesaz Rwayonm dan tou kalite teritwar, depi bann gran lavil ziska bann rezyon izole. (Akt 1:8) Bokou in met dekote sa dezir pour posed  en lakaz oubyen pour annan zanfan pour zot kapab servi Zeova pli plennman. I annan bann ki fidelman siport zot mari ki servi konman sirveyan, tandis ki plizyer milye ser i servi dan bann Betel partou dan lemonn. San dout, sa bann fanm ki fer bokou sakrifis i parmi “bann keksoz dezirab sorti dan tou nasyon” ki ranpli lakaz Zeova avek laglwar.—Agai 2:7.

9, 10. Konman serten manm fanmiy in eksprim zot lapresyasyon pour bon legzanp ki zot madanm oubyen manman Kretyen in demontre?

⁹ Byensir, bokou ser i annan zot responsabilite familyal pour desarze. Kantmenm sa, zot met lentere Rwayonm premye. (Matye 6:33) En ser pionye selibater ti ekrir: “Mon manman, akoz son lafwa solid ek bon legzanp, ti zwe en rol enportan pour fer mwan pran servis pionye ordiner. Annefe, i ti enn mon pli bon konpanyon pionye.” En mari i dir sa lo son madanm, ki en manman senk gran fiy: “Nou lakour ti touzour prop e annord. Bonnie ti gard li senp pour ki nou fanmiy ti kapab konsantre lo bann lobzektif spirityel. Lafason ki i ti kontribye pour fer sir ki larzan i ganny byen depanse ti fer li posib pour mwan travay amitan pour 32 an. Sa ti permet mwan dedye plis letan pour mon fanmiy ek bann keksoz spirityel. Mon madanm ti osi ansenny bann zanfan lenportans pour travay dir. I merit tou mon felisitasyon.” Ozordi, tou le de msye ek madanm i servi dan biro brans prensipal Temwen Zeova.

¹⁰ En mari i ekrir sa konsernan son madanm, en manman ki son bann zanfan in fini vin adilt: “Kalite ki mon admir plis dan Susan se son lanmour profon pour Bondye e pour dimoun, osi byen ki son konprenezon, lonnekte, e lafason ki i konpran santiman lezot. I’n toultan annan sa pwennvi ki nou merit donn Zeova pli bon keksoz ki nou kapab—en prensip ki i aplik lo li menm konman en serviter Bondye e osi konman en manman.” Avek sipor son madanm, sa msye in kapab aksepte plizyer privilez spirityel, ki enkli servi konman en ansyen, pionye, ranplas sirveyan rezyonal, ek manm Komite Lyezon Lopital. Sa bann fanm i vreman presye pour zot msye, konpanyon Kretyen, e sirtou pour Zeova!—Proverb 31:28, 30.

Bann Fanm presye ki napa en Mari

11. (a) Konman ki Zeova in montre son konsern pour bann fanm fidel, sirtou bann vev? (b) Ki lasirans bann vev Kretyen ek lezot ser fidel ki napa en mari i annan?

¹¹ Zeova ti souvan eksprim son konsern pour byennet bann vev. (Deterononm 27:19; Psonm 68:5; Izai 10:1, 2) I pa’n sanze. I ankor touzour annan en lentere senser, pa selman dan bann vev, me osi dan bann manman tousel. I osi annan en lentere senser dan bann fanm ki swazir pour reste selibater oubyen ki pa ankor trouv en mari Kretyen ki apropriye. (Malaki 3:6; Zak 1:27) Si ou parmi sa bann ki servi Zeova fidelman san sipor en konpanyon Kretyen, ou kapab asire ki ou presye dan lizye Bondye.

12. (a) Konman ki serten ser Kretyen i demontre zot fidelite anver Zeova? (b) Ki santiman serten nou bann ser pe fer fas avek?

¹² Pran par egzanp, nou bann ser Kretyen ki pa’n marye akoz zot pe fidelman obeir  konsey Zeova pour marye “selon Senyer.” (1 Korentyen 7:39; Proverb 3:1) Parol Bondye i asir zot: “Avek en dimoun fidel [Zeova] pou azir avek fidelite.” (2 Samyel 22:26) Pourtan, pour bokou zot, i pa fasil reste selibater. En ser i dir: “Mon determinen pour marye dan Senyer, me mon’n plere plizyer fwa ler mon vwar mon bann zanmi pe marye avek bann zonm Kretyen tandis ki mwan mon kontinyen reste tousel.” En lot ser i fer resorti: “Mon’n servi Zeova pour 25 an. Mon determinen pour reste fidel avek li, me souvan mon santi mwan tris akoz mon santi mwan tousel.” I azoute: “Bann ser parey mwan i vreman bezwen lankourazman.” Konman nou kapab ed sa bann ser fidel?

13. (a) Ki nou aprann atraver legzanp bann ki ti vizit fiy Yifta? (b) Ki lezot fason ki nou kapab montre lentere pour bann ser selibater dan nou kongregasyon?

¹³ Nou kapab vwar en fason pour ede atraver en legzanp dan letan ansyen. Kan fiy Yifta ti les pase son loportinite pour marye, lepep ti realize ki i ti pe fer en sakrifis. Kwa ki ti ganny fer pour ankouraz li? “Lannen apre lannen, bann fiy Izrael ti al felisit fiy Yifta, sa Gileadit, kat zour dan en lannen.” (Ziz 11:30-40) Pareyman, nou devret senserman felisit bann ser selibater ki fidelman obeir lalwa Bondye. * Ki sa lot fason nou kapab montre nou lentere pour zot? Dan nou lapriyer nou kapab sipliy Zeova pour siport sa bann ser fidel pour kontiny zot servis fidelman. Zot merite ganny sa lasirans ki Zeova ek kongregasyon Kretyen an antye i senserman kontan zot e apresye zot en kantite.—Psonm 37:28.

Konman bann Paran tousel i reisi

14, 15. (a) Nonm serten sitiasyon kot bann manman tousel i kapab demann Zeova son led. (b) Konman bann paran tousel i kapab azir an armoni avek zot lapriyer?

¹⁴ Bann fanm Kretyen ki osi bann paran tousel i rankontre plizyer difikilte zot osi. Me zot kapab tourn ver Zeova pour ed zot elve zot zanfan an armoni avek bann prensip Labib. I vre ki si ou en paran tousel, ou pa kapab vin manman osi byen ki papa dan tou laspe. Kantmenm sa, Zeova pou ed ou desarz tou ou responsabilite si ou demann li son led avek lafwa. Pour donn en legzanp: Meton ou annan en sak lour avek konmisyon pour anmenn dan ou flat ki anler dan en batiman ki annan plizyer letaz. Eski ou ti pou fatig ou pour al mont tou sa peron kan i annan en lift lanmenm obor ou? Byensir ki non! Pareyman, pa esey anmenn ou bann fardo emosyonnel ou tousel kan ou kapab demann Zeova pour ed ou. Annefe, i envit ou pour apel li. Psonm 68:19 i dir: “Beni Zeova, ki anmenn nou fardo sak zour.”  Pareyman, 1 Pyer 5:7 i envit ou pour desarz tou ou sousi lo Zeova, ‘parski limenm ki pran swen avek nou.’ Alors kan problenm ek lenkyetid i met presyon lo ou, desarz tou lo ou Papa dan lesyel. Fer sa “tou letan!”—1 Tesalonisyen 5:17; Psonm 18:6; 55:22.

¹⁵ Par egzanp, si ou en manman, san dout ou trakase konsernan lenfliyans ki lezot zanfan lekol i kapab annan lo ou zanfan oubyen bann leprev fidelite ki zot kapab rankontre. (1 Korentyen 15:33) Sa i bann konsern apropriye pour en paran. Me zot osi bann keksoz ki ou kapab adres Zeova dan lapriyer. Annefe, akoz ou pa priy konsernan sa bann keksoz avek ou zanfan avan zot al lekol, petet apre ki zot in egzamin teks pour lazournen ansanm? Bann lapriyer spesifik ki sorti dan fon ou leker i kapab annan en gran lefe lo lespri ou zanfan. Pli enportan, ou met ou dan en pozisyon pour resevwar benediksyon Zeova kan avek bokou pasyans ou esey enkilke son Parol dan leker ou zanfan. (Deterononm 6:6, 7; Proverb 22:6) Pa oubliye ki “lizye Senyer i fikse lo bann zis, e son zorey i ouver pour ekout zot lapriyer.”—1 Pyer 3:12; Filipyen 4:6, 7.

16, 17. (a) Ki en garson ti dir konsernan lanmour ki son manman ti demontre? (b) Ki lefe pwennvi spirityel sa manman ti annan lo son zanfan?

¹⁶ Konsider legzanp Olivia, en manman sis zanfan. Son mari ki pa Temwen ti abandonn zot zis apre ki dernyen zanfan ti ne, me Olivia ti pare pour aksepte sa responsabilite pour enstri son zanfan dan semen Bondye. Garson Olivia, Darren, ki annan 31 an konmela e ki pe servi konman en ansyen e pionye, ti annan apepre 5 an sa letan. Traka Olivia ti ogmante kan Darren ti devlop en problenm lasante grav ki ankor trouble li ziska konmela. Ler i reflesir lo son lanfans, Darren i ekrir: “Mon ankor mazin sa letan kot mon pe asize lo lili dan lopital pe esper manman avek enpasyans. I ti pou asiz akote mwan e lir Labib avek mwan toulezour. Apre i ti pou sant kantik ‘Merci, ô Jéhovah!’ * Ziska ozordi, sa i mon kantik prefere.”

¹⁷ Konfyans ek lanmour ki Olivia i annan pour Zeova ti ed li reisi konman en manman tousel. (Proverb 3:5, 6) Son bon latitid ti reflekte dan bann lobzektif ki i ti met devan son zanfan. Darren i dir: “Manman ti toultan ankouraz nou pour met servis aplentan konman en lobzektif. An rezilta, kat dan mon senk ser ek mwan ti antre dan servis aplentan. Me manman pa ti zanmen vant son lekor avek lezot. Mon esey fer bokou zefor pour imit son bann kalite merveye.” I vre ki pa tou zanfan ki  grandi pour servi Zeova parey bann zanfan Olivia ti fer. Me kan en manman i fer son mye pour viv an akor avek bann prensip Labib, i kapab asire ki i pou ganny gidans Zeova e osi son sipor ranpli avek lanmour.—Psonm 32:8.

18. Konman nou kapab montre ki nou apresye kongregasyon Kretyen konman en provizyon Zeova?

¹⁸ Laplipar sipor ki Bondye i fourni se par mwayen kongregasyon Kretyen, avek son progranm nouritir spirityel regilye, son lasosyasyon frer Kretyen, ek son “bann don an zonm” ki matir spirityelman. (Efezyen 4:8, NW ) Bann ansyen fidel i travay dir pour batir kongregasyon, par donn en latansyon spesyal anver bezwen “bann orflen ek bann vev dan zot soufrans.” (Zak 1:27) Alor reste pros avek pep Bondye, pa zanmen izol ou lekor.—Proverb 18:1; Romen 14:7.

Labote Soumisyon

19. Akoz soumisyon en fanm pa vedir ki i enferyer, e ki legzanp Labib ki siport sa pwen?

¹⁹ Zeova ti kree fanm konman en led siplemanter pour zonm. (Zenez 2:18) Alors, soumisyon en madanm anver son mari pa dan okenn sans vedir ki i enferyer. Okontrer i onor en fanm, ki permet li pour servi son bann don ek talan an armoni avek lavolonte Bondye. Proverb sapit 31 i dekrir sa kantite travay ki en fanm debouryer dan ansyen Izrael ti fer. I ti ed bann ki dan bezwen, plant bann pye rezen, e aste propriyete. Wi, “leker son propriyeter in met konfyans dan li, e i [ti] benefisye.”—Verse 11, 16, 20.

20. (a) Konman en fanm Kretyen i devret konsider son bann abilite oubyen don ki sorti kot Bondye? (b) Ki bon kalite ki Ester ti demontre, e konman Zeova ti kapab servi li?

²⁰ En fanm modes ki annan lakrent pour Bondye pa elev son lekor oubyen fer konpetisyon avek son mari. (Proverb 16:18) I pa tay deryer bann keksoz materyel zis pour fer plezir son prop lekor me i plito servi son bann don ki sorti kot Bondye sirtou pour servi lezot—son fanmiy, konpanyon Kretyen, vwazen, e pli enportan ki tou, Zeova. (Galat 6:10; Tit 2:3-5) Konsider legzanp Larenn Ester dan Labib. Menm si i ti zoli fizikman, i ti modes e demontre soumisyon. (Ester 2:13, 15) Kan i ti marye, i ti montre profon respe pour son mari, Lerwa Asweris, konpare avek Vasti ki ti madanm sa lerwa avan. (Ester 1:10-12; 2:16, 17) Avek respe, Ester ti osi soumet avek lopinyon Mordekai, son kouzen ki ti pli vye ki li, lo bann size apropriye—menm apre ki i ti’n vin larenn. Me i ti en fanm kouraze! San okenn lafreyer, i ti devwal Amann, en zonm pwisan e kriyel ki ti fer konplo pour detrir bann Zwif. Zeova ti servi Ester dan en fason remarkab, pour prezerv son pep.—Ester 3:8-4:17; 7:1-10; 9:13.

21. Konman en fanm Kretyen i kapab vin pli presye devan Zeova?

²¹ I evidan ki dan lepase ek denozour, bann fanm ki kontan Bondye in montre zot latasman total anver Zeova ek son ladorasyon. Alors, bann fanm ki annan lakrent pour Bondye i presye dan lizye Zeova. Ser Kretyen, les Zeova servi son lespri sen pour kontinyelman moul zot pour vin en “vesel” pli dezirab, enn ki “prepare pour tou bon travay.” (2 Timote 2:21, NW; Romen 12:2) Konsernan son bann adorater ki annan valer, Parol Bondye i dir: “Donn li fri son lanmen, e ki son bann travay i fer li ganny loue dan bann baro.” (Proverb 31:31) Fotespere sa parol i vre dan zot ka.

[Not anba lo paz]

Eski ou rapel?

• Konman ki serten fanm Kretyen dan premye syek ti prouve ki zot presye dan lizye Zeova?

• Konman bokou ser dan nou letan in fer zot annan valer devan Bondye?

• Dan ki fason Zeova i soutenir bann manman tousel ek lezot ser ki napa en mari?

• Konman en fanm i kapab montre respe senser pour laranzman lotorite?

[Kestyon]

[Bwat lo paz 31]

Bann Legzanp Pour Reflesir Lo La

Eski ou ti a kontan pour egzamin serten legzanp lezot fanm fidel ki ganny mansyonnen dan Labib? Si wi, silvouple lir sa bann teks pli ba. Anmezir ki ou reflesir lo sa bann dimoun ki’n ganny site, esey rekonnet bann prensip ki ou kapab aplik pli plennman dan ou lavi.—Romen 15:4.

◆ Sara: Zenez 12:1, 5; 13:18a; 21:9-12; 1 Pyer 3:5, 6.

◆ Bann fanm Izraelit zenere: Egzod 35:5, 22, 25, 26; 36:3-7; Lik 21:1-4.

◆ Debora: Ziz 4:1–5:31.

◆ Rit: Rit 1:4, 5, 16, 17; 2:2, 3, 11-13; 4:15.

◆ Bann Fanm sorti Sounenm: 2 Lerwa 4:8-37.

◆ En Fanm sorti Fenisi: Matye 15:22-28.

◆ Mart ek Mari: Mark 14:3-9; Lik 10:38-42; Zan 11:17-29; 12:1-8.

◆ Tabita: Akt 9:36-41.

◆ Sa kat fiy Filip: Akt 21:9.

◆ Febe: Romen 16:1, 2.

[Portre lo paz 29]

Eski ou felisit bann ser ki pa marye ki pe fidelman obeir lalwa Bondye?

[Portre lo paz 30]

Ki paran i kapab demande spesifikman dan lapriyer avan zanfan i al lekol?