Bann Fanm ki ti fer Leker Zeova kontan

“Ki Zeova i rekonpans lafason ki ou azir, e ki i annan en saler parfe pour ou sorti kot Zeova.”—RIT 2:12.

1, 2. Konman nou kapab benefisye par reflesir lo bann legzanp dan Labib konsernan bann fanm ki ti fer leker Zeova kontan?

LAKRENT pour Bondye ti pous de madanm pour reziste en Faraon. Lafwa ti motiv en prostitye pour riske son lavi pour kapab protez de espyon Izraelit. Bon zizman ek limilite dan en sitiasyon kritik ti ed en madanm pour sov lavi plizyer dimoun e pour anpes sa enn ki Zeova ti’n swazir koupab pour mert. Lafwa dan Bondye, ansanm avek en leta lespri lospitalite ti pous en vev, ki ti osi en manman, pour donn son dernyen rasyon manze en profet Bondye. Sa i zis serten parmi sa plizyer legzanp dan Labib konsernan bann fanm ki ti fer leker Zeova kontan.

² Latitid Zeova anver sa bann fanm ek bann benediksyon ki i ti devers lo zot, i demontre ki sa ki fer li plis plezir se bann kalite spirityel en dimoun, me non pa si i en zonm oubyen en fanm. Dan lemonn ozordi, kot dimoun i telman preokipe avek bann keksoz fizik, i difisil pour en dimoun met keksoz spirityel premye dan son lavi. Me i posib pour met bann keksoz spirityel premye dan lavi, parey sa kantite fanm ki annan lakrent pour Bondye in demontre. Zot form en gran parti pep Bondye denozour. Sa bann fanm Kretyen i imit lafwa, bon zizman, lospitalite, ek lezot bon kalite ki bann fanm ki ti annan lakrent pour Bondye dan Labib ti demontre. Byensir, bann zonm Kretyen osi i anvi imit sa bann kalite ki bann fanm egzanpler dan letan ansyen ti montre. Pour vwar konman nou kapab fer sa pli byen, annou konsider pli an detay bann resi Labib lo sa bann fanm ki’n ganny mansyonnen okonmansman lartik.—Romen 15:4; Zak 4:8.

De Fanm ki ti reziste en Faraon

3, 4. (a) Akoz Sifra ek Poua ti refize obeir Faraon kan i ti donn lord ki tou garson nouvo ne i ganny touye? (b) Konman Zeova ti rekonpans sa de fanm saz pour zot kouraz ek lakrent pour li?

³ Pandan bann prosedir ankour ki ti ganny fer Nuremberg, Lalmanny apre Dezyenm Lager Mondyal, bokou ki ti’n ganny akize pour zenosid ti esey zistifye zot krim ki zot ti komet par pretann ki zot ti pe senpleman obeir lord. Aprezan konpar sa bann dimoun avek sa de fanm saz Izraelit, Sifra ek Poua, ki ti viv dan ansyen Lezip pandan renny en Faraon enkoni me tre move. Faraon ti donn lord sa de fanm saz pour fer sir ki tou bann garson Ebre ki fek ne i ganny touye, akoz i ti per ki popilasyon Ebre ti ava ogmant en kantite. Konman sa de madanm ti reazir anver sa lord vreman kriyel? “Zot pa ti fer parey lerwa Lezip ti’n dir zot, me zot ti prezerv lavi bann pti garson.” Akoz sa de madanm pa ti les lafreyer pour zonm domin zot? Parski zot “ti annan lakrent pour sa vre Bondye.”—Egzod 1:15, 17; Zenez 9:6.

⁴ Wi, sa de fanm saz ti pran refiz dan Zeova, e li an retour, i ti prouve ki i “en boukliye” pour zot, par protez zot kont lakoler Faraon. (2 Samyel 22:31; Egzod 1:18-20) Me benediksyon Zeova pa ti fini la. I ti rekonpans Sifra ek Poua avek zot prop fanmiy. I ti  menm onor sa de madanm par fer zot non ek zot aksyon ganny rikorde dan son Parol enspire pour fitir zenerasyon lir, tandis ki non sa Faraon in fini ganny oubliye.—Egzod 1:21; 1 Samyel 2:30b; Proverb 10:7.

5. Konman bokou fanm Kretyen denozour i montre menm latitid ki Sifra ek Poua, e konman Zeova pou rekonpans zot?

⁵ Eski i annan bann fanm ki parey Sifra ek Poua denozour? Wi, i annan! Sak lannen, plizyer milyon madanm koumsa i pres sa mesaz dan Labib ki sov lavi san okenn lafreyer. Zot fer sa dan bann pei kot “lord lerwa” i anpes prese, alor zot riske zot liberte oubyen menm zot lavi. (Ebre 11:23; Akt 5:28, 29) Sa bann fanm brav, ki ganny motive par lanmour pour Bondye ek zot prosen, pa les personn anpes zot partaz sa bon nouvel lo Rwayonm Bondye avek lezot. Se pour sa ki bokou fanm Kretyen i bezwen fer fas avek lopozisyon ek persekisyon. (Mark 12:30, 31; 13:9-13) Parey dan ka Sifra ek Poua, Zeova i konn tre byen travay sa bann fanm ekselan e kouraze, e i pou demontre son lanmour pour zot par prezerv zot non dan son “liv lavi,” osi lontan ki zot reste fidel ziska lafen.—Filipyen 4:3; Matye 24:13.

En ansyen Prostitye i fer Leker Zeova kontan

6, 7. (a) Ki Raab ti konnen lo Zeova ek son pep, e ki lefe sa konnesans ti fer lo li? (b) Konman Parol Bondye i onor Raab?

⁶ Dan lannen 1473 A.N.L., en prostitye ki ti apel Raab ti reste Zeriko, en lavil Kananeen. Aparaman, Raab ti en madanm ki ti konn bokou keksoz ki ti pe pase sa letan. Kan de espyon Izraelit ti rod refiz dan son lakaz, i ti kapab rakont zot bann detay spesifik lo sa delivrans mirakile Izrael an Lezip, menm si sa levennman ti’n ariv 40 an pase! I ti osi familye avek bann laviktwar pli resan Izrael lo sa de Lerwa Amorit, Sionn ek Og. Remarke konman sa konnesans ti fer lefe lo li. I ti dir avek sa de espyon: “Mon konnen ki Zeova pou sirman donn zot sa pei, . . . parski Zeova zot Bondye i Bondye dan lesyel anler e lo later anba.” (Zozye 2:1, 9-11) Wi, sa ki Raab ti aprann lo Zeova e sa ki i ti fer an faver Izrael ti fer li reazir dan en fason pozitif e pous li pour annan lafwa dan Zeova.—Romen 10:10.

 ⁷ Lafwa Raab ti pous li pour pran aksyon. I ti byen “resevwar” sa de espyon Izraelit, e i ti obeir zot lenstriksyon ki ti pou permet li sirviv kan Izrael ti atak Zeriko. (Ebre 11:31; Zozye 2:18-21) Nou asire ki bann aksyon ki Raab ti fer avek lafwa ti anmenn lazwa pour Zeova, parski i ti enspir disip Zak, pour met son non akote non Abraam, zanmi Bondye, konman en legzanp pour bann Kretyen imite. Zak ti ekrir: “Demenm, [Raab], sa prostitye, li osi, eski i pa ti ganny rann zis devan Bondye par son bann laksyon ler i ti resevwar bann mesaze ki i ti ede e fer zot pas par en lot semen?”—Zak 2:25.

8. Konman Zeova ti beni Raab pour son lafwa ek lobeisans?

⁸ Zeova ti rekonpans Raab dan plizyer fason. Premyerman, par mirak i ti eparnyen son lavi ek lavi tou bann ki ti rod refiz dan son lakaz—savedir “fanmiy son papa ek tou son fanmiy.” Apre Zeova ti permet sa bann dimoun pour reste “parmi Izrael,” kot zot ti devret ganny trete konman bann sitwayen Izrael. (Zozye 2:13; 6:22-25; Levitik 19:33, 34) Me pa fini la. Zeova ti osi donn Raab sa loner pour vin en zanset Zezi Kri. Pa Zeova ti demontre en gran labonte leker anver en fanm ki ti oparavan en Kananeen ki ti ador zidol! *—Psonm 130:3, 4.

9. Konman latitid Zeova anver Raab ek serten fanm Kretyen dan premye syek i kapab ankourazan pour serten fanm denozour?

⁹ Parey Raab, serten fanm Kretyen, depi premye syek ziska denozour, in abandonn en lavi imoral pour zot kapab fer plezir Bondye. (1 Korentyen 6:9-11) San dout, serten parmi zot ti grandi dan en lanvironnman parey ansyen Kanaan, kot ti annan bokou keksoz imoral ki ti menm ganny vwar konman normal. Me zot in sanz zot fason viv, pouse par lafwa baze lo en konnesans egzakt dan Labib. (Romen 10:17) Alors, nou kapab dir konsernan sa bann fanm ki “Bondye pa onte pour ganny apele zot Bondye.” (Ebre 11:16) Sa i sirman en gran loner!

Beni pour son bon Zizman

10, 11. Ki sirkonstans ki ti enplik Nabal ek David ki ti pous Abigail pour pran aksyon?

¹⁰ Bokou fanm fidel dan lepase ti demontre dan en fason remarkab sa kalite ki apel bon zizman, ki ti fer zot vin en bon eleman pour Zeova ek son pep. Enn parmi ti Abigail, madanm en propriyeter Izraelit ris ki ti apel Nabal. Bon zizman Abigail ti kontribye pour sov lavi plizyer dimoun e anpes David, ki ti pou vin lerwa Izrael dan lavenir, koupab pour mert. Akoz ou pa lir konsernan Abigail dan sa resi ki ganny rikorde dan 1 Samyel sapit 25.

¹¹ Sa resi i konmans kot ler David ek son bann zonm pe kanpe pre avek bann troupo Nabal. Lizour konman aswar, zot ti protez troupo Nabal  pour nanryen akoz zot ti annan labonte pour zot frer Izraelit Nabal. Kan bann provizyon David ti pe fini, i ti anvoy dis zennonm kot Nabal pour demann li en pe manze. Nabal ti’n ganny en loportinite pour montre son lapresyasyon pour David e pour onor li konman sa enn ki Zeova ti’n swazir. Me Nabal ti fer tou lekontrer. Avek en gran lakoler, i ti ensilte David e fer sa bann zennonm retourn lanmen vid. Kan David ti tann sa, i ti rasanble 400 zonm arme pour al revanze. Abigail ti aprann ki son mari ti’n reazir dan en fason brit. Alor i ti azir deswit e avek pridans pour apez lakoler David par anvoy en gran kantite provizyon pour li. Apre i ti al kot David li menm.—Verse 2-20.

12, 13. (a) Konman Abigail ti prouve ki i annan bon zizman osi byen ki fidelite anver Zeova ek sa enn ki i’n swazir? (b) Ki Abigail ti fer ler i ti retourn kot li, e ki mannyer keksoz ti pase pour li?

¹² Kan Abigail ti rankontre David, son siplikasyon ranpli avek limilite pour David montre mizerikord, i revel son profon respe pour sa enn ki Zeova ti’n swazir. I dir: “Zeova pou sirman fer en lakaz dirab pour mon senyer, parski mon senyer pe lager pour Zeova.” Apre i ti azoute ki Zeova pou fer David vin lider lo Izrael. (Verse 28-30) Anmenmtan, Abigail ti montre bokou kouraz par dir David ki i pou koupab pour mert si i pa kontrol son revanz ki i ti anvi fer. (Verse 26, 31) David ti retourn a larezon akoz limilite, profon respe, ek bon rezonnman Abigail. I ti reponn: “Beni Zeova Bondye ki’n anvoy ou ozordi pour rankontre mwan! Beni ou bon zizman, e beni ou ki’n anpes mwan vin koupab pour mert ozordi.”—Verse 32, 33.

¹³ Ler i ti ariv kot li, san okenn lafreyer Abigail ti esey rod en fason pour dir son mari konsernan kado ki i’n donn David. Me kan i ti trouv li, i “ti vreman sou.” Alor i ti esper li ler i azen pour dir li. Konman Nabal ti reazir? I ti ganny en gran sok ki ti afekte li. Dis zour plitar, Bondye ti fer li trouv son lanmor. Kan David ti aprann lanmor Nabal, i ti demann maryaz Abigail, ki ti en madanm ki David ti vreman admire e annan profon respe pour li. Abigail ti aksepte demann David.—Verse 34-42.

Eski ou kapab vin parey Abigail?

14. Ki bann kalite ki Abigail ti annan ki nou kapab anvi devlop plis ankor?

¹⁴ Eski ou vwar serten kalite dan Abigail ki ou—fanm osi byen ki zonm—ti pou kontan devlop plis ankor? Petet ou anvi montre plis pridans ek bon zizman ler difikilte i arive. Oubyen petet ou anvi koz dan en fason pli kalm e rezonnab kan lezot otour ou i nerve. Si i leka, akoz ou pa priy Zeova konsernan sa sitiasyon? I promet pour donn lasazes, bon konprenezon, ek abilite pour reflesir tou bann ki “demann avek lafwa.”—Zak 1:5, 6; Proverb 2:1-6, 10, 11.

15. Dan ki sirkonstans ki i sirtou enportan pour bann fanm Kretyen demontre bann kalite parey Abigail?

¹⁵ Sa bann bon kalite i sirtou enportan si ou bezwen viv avek en mari ki pa Temwen, ki pa tro antren oubyen pa enterese avek bann prensip Labib. Petet i bwar tro bokou. I kapab ki sa bann zonm koumsa pou sanz zot lavi—parey bokou in fer, souvan akoz zot madanm in azir avek ladouser, profon respe, e annan en bon kondwit.—1 Pyer 3:1, 2, 4.

16. Nenport ki sirkonstans dan lakour, konman en fanm Kretyen pou demontre ki i apresye son relasyon avek Zeova plis ki tou lezot keksoz?

¹⁶ Nenport ki difikilte ki ou bezwen andire dan lakour, rapel ki Zeova i touzour la pour siport ou. (1 Pyer 3:12) Alors, fer zefor pour vin pli for spirityelman. Priy pour lasazes ek en leker kalm. Wi, apros pli pre avek Zeova atraver letid Labib regilye, lapriyer, refleksyon, ek lasosyasyon avek bann konpanyon Kretyen. Lanmour Abigail pour Bondye ek son latitid anver son serviter ki i’n swazir pa ti ganny afekte par move pwennvi son mari. I ti azir  dapre bann prensip drwat. Menm dan en lakour kot en mari i en serviter Bondye ki egzanpler, en madanm Kretyen i realize ki i bezwen kontinyen travay dir pour batir e mentenir son prop spirityalite. I vre ki son mari i annan lobligasyon biblik pour pran swen avek li spirityelman e lo plan materyel, me finalman sa madanm i devret travay pour son prop “delivrans avek lafreyer ek reverans.”—Filipyen 2:12; 1 Timote 5:8.

I ti resevwar “Rekonpans en Profet”

17, 18. (a) Ki leprev sa vev ti fer fas avek san ekspekte konsernan lafwa? (b) Konman sa vev ti reazir anver demann Eliya, e konman Zeova ti rekonpans li pour sa?

¹⁷ Lafason ki Zeova ti pran swen avek en vev ki ti pov dan lepok profet Eliya, i montre ki i vreman apresye bann ki siport vre ladorasyon par ofer zot menm ek zot resours. Akoz en gran lasesres dan letan Eliya, lafamin ti afekte bokou dimoun, enkli en vev ek son zenn garson ki ti pe viv Sarfat. Zis ler ti reste zot en dernyen keksoz pour manze, en viziter ti arive—profet Eliya. I ti demann en keksoz ki sa madanm pa ti pe ekspekte. Menm si i ti konnen ki sa madanm ti dan en sitiasyon difisil, i ti demann li pour fer “en pti gato ron” pour li, an servan son dernyen fon delwil ek lafarin. Me i ti azoute: “Parski la sa ki Zeova, Bondye Izrael, in dir, ‘Sa gro potao lafarin pa pou epize, e sa pti potao delwil pa pou diminyen ziska zour ki Zeova i fer en lapli toransyel tonm lo sirfas later.’ ”—1 Lerwa 17:8-14.

¹⁸ Konman ou ti pou’n reazir si ou ti dan plas sa vev? Sa vev, ki ti aparaman rekonnet ki Eliya ti en profet Zeova, “ti fer parey Eliya ti’n dir.” Konman Zeova ti reazir anver son lospitalite? Dan en fason mirakile i ti fourni manze pour sa madanm, son garson, ek Eliya pandan sa lasesres. (1 Lerwa 17:15, 16) Wi, Zeova ti donn sa vev “rekonpans en profet,” menm si i pa ti en Izraelit. (Matye 10:41) Garson Bondye osi ti onor sa vev kan i ti mansyonn li konman en legzanp avek bann dimoun ki ti napa lafwa dan son vilaz, Nazaret.—Lik 4:24-26.

19. Dan ki fason bokou fanm Kretyen ozordi i reflekte leta lespri sa vev, e konman Zeova i santi anver zot?

¹⁹ Ozordi, bokou fanm Kretyen i reflekte leta lespri sa vev. Par egzanp, tou le semenn bann ser Kretyen zenere—ki bokou parmi zot i pov e annan fanmiy pour pran swen avek—i ofer zot lospitalite bann sirveyan ek zot madanm.  Lezot i partaz repa avek bann serviter aplentan dan zot prop kongregasyon, ed bann ki dan bezwen, oubyen dan lezot fason ofer zot lenerzi ek zot resours pour siport travay Rwayonm. (Lik 21:4) Eski Zeova i remark sa bann sakrifis? Byensir! “Bondye pa enzis pour li oubliy travay ki zot in fer, ni lanmour ki zot in montre pour li par servis ki zot in rann e pe kontinyen rann bann sen.”—Ebre 6:10.

20. Ki nou pou egzaminen dan prosenn lartik?

²⁰ Dan premye syek, plizyer fanm ki ti annan lakrent pour Bondye ti ganny sa privilez pour servi Zezi ek son bann zapot. Dan lot lartik, nou pou diskite konman sa bann fanm ti anmenn lazwa pour Zeova. Nou pou osi egzamin legzanp bann fanm dan nou letan ki servi Zeova avek tou zot leker, menm dan bann sitiasyon difisil.

[Not anba lo paz]

Revizyon

• Konman sa bann madanm ti fer leker Zeova kontan?

• Sifra ek Poua

• Raab

• Abigail

• Sa vev sorti Sarfat

• Konman ki reflesir lo legzanp ki sa bann fanm in kite i kapab ed nou personnelman? Donn legzanp.

[Kestyon]

[Portre lo paz 23]

Bokou fanm fidel in servi Bondye malgre “lord lerwa”

[Portre lo paz 24]

Akoz Raab i en bon legzanp konman en dimoun ki annan lafwa?

[Portre lo paz 24]

Ki bann kalite ki Abigail ti demontre ki ou anvi imite?

[Portre lo paz 26]

Bokou fanm Kretyen ozordi i reflekte leta lespri sa vev sorti Sarfat