Demontre Kontrol lo nou Lekor pour ganny sa Pri!
Demontre Kontrol lo nou Lekor pour ganny sa Pri!
“Tou dimoun ki pe pran par dan en konkour i demontre kontrol lo son lekor dan tou keksoz.”—1 KORENTYEN 9:25, NW.
1. Anliny avek Efezyen 4:22-24, konman ki plizyer milyon dimoun in dir wi avek Zeova?
SI OU’N batize konman en Temwen Zeova, ou’n fer konnen piblikman ki ou’n pare pour pran par dan en konkour ki annan lavi eternel konman son pri. Ou ti dir wi pour fer lavolonte Zeova. Avan fer en dedikasyon avek Zeova, bokou nou ti bezwen fer bann sanzman enportan pour ki nou dedikasyon i annan valer e akseptab devan Bondye. Nou ti swiv konsey ki zapot Pol ti donn bann Kretyen: “Debaras zot avek zot vye natir, ki ti zot fason viv lontan, sa vye natir ki anmenn larin par son bann tronpri. . . . Sanze e vin en dimoun konpletman nouvo, kree dan resanblans Bondye e ki dimoun i war ki zot viv dan en fason zis e sen dapre laverite.” (Efezyen 4:22-24) Andotmo, avan ki nou dir wi an sa ki konsern nou dedikasyon avek Bondye, nou bezwen dir non avek nou fason viv dan lepase ki pa akseptab.
2, 3. Konman 1 Korentyen 6:9-12 i endike ki en dimoun i bezwen fer de kalite sanzman pour ganny laprouvasyon Bondye?
2 Serten laspe sa vye personnalite ki bann ki pe vin Temwen Zeova i bezwen debaras zot avek i klerman ganny kondannen dan Parol Bondye. Pol ti fer resorti serten dan son let pour bann Korentyen, an dizan: “Ni bann ki pratik bann akt imoral, ni bann ladorater zidol, ni bann adilter, ni bann omoseksyel, ni bann voler, ni bann anvye, ni bann soular, ni bann ki fer kalomni, ni bann ki akapar byen zot prosen, pa pou erit Rwayonm Bondye.” I ti apre montre ki bann Kretyen premye syek ti fer bann sanzman neseser dan zot personnalite, par azoute: “Koumsa menm ki serten parmi zot ti ete.” Remarke, Pol i servi ti, pa i.—1 Korentyen 6:9-11.
3 Pol ti sizere ki lezot sanzman ti a kapab osi neseser, parski i ti kontinyen: “ ‘Tou i permet pour mwan,’ me pa tou ki itil.” (1 Korentyen 6:12) Alors, bokou dimoun ozordi ki annan sa dezir pour vin bann Temwen Zeova i vwar sa nesesite pour dir non avek bann keksoz ki pa itil oubyen napa gran lenportans, menm si sa bann keksoz i permet. Sa bann keksoz i kapab pran zot letan oubyen i kapab anpes zot fer bann keksoz ki annan pli gran lenportans.
4. Ki Pol ti dir, ki bann Kretyen ki’n dedye zot lavi i dakor avek?
4 Dedikasyon avek Bondye i ganny fer volonterman, pa kontreker, konmsi sa i enplik en gro sakrifis. Bann Kretyen ki’n dedye zot lavi i dakor avek Pol, ki ti dir apre ki i ti vin en disip Kris: “Akoz [Zezi] mon’n rezet tou, mon konsider tousala konman salte, pour kapab ganny Kris.” (Filipyen 3:8) Pol ti kontan pour dir non avek bann keksoz ki napa gran lenportans pour li kapab kontinyen dir wi avek Bondye.
5. Dan ki kalite lakours ki Pol ti partisip avek sikse, e konman nou kapab fer parey nou osi?
5 Pol ti demontre kontrol lo son lekor dan son lakours spirityel e finalman i ti kapab dir: “Mon’n konbat en bon konba, mon’n fini sa lakours, mon’n gard lafwa. Dezorme kouronn lazistis in rezerve pour mwan, sa ki Senyer ziz zis pou donn mwan sa zour, pa zis mwan, me osi tou bann ki kontan war li ler i aparet.” (2 Timote 4:7, 8) Eski en zour nou pou kapab dir menm keksoz? Nou pou kapab si avek lafwa nou demontre kontrol lo nou lekor dan nou lakours Kretyen e nou pa arete ziska finisyon.
Kontrol lo nou Lekor pour fer sa ki byen
6. Kisisa kontrol lo nou lekor, e dan ki de domenn ki nou bezwen demontre li?
6 Mo Ebre ek Grek ki’n ganny tradwir “kontrol lo nou lekor” dan Labib, i literalman vedir ki en dimoun i annan pouvwar ek kontrol lo li menm. Sa bann mo i souvan donn lide en dimoun ki anpes son lekor fer keksoz mal. Me i evidan ki en serten kontrol lo nou lekor i osi neseser si nou anvi servi nou lekor pour fer bann bon keksoz. Tandans natirel bann imen enparfe se pour fer sa ki mal. Alors nou annan de kalite lalit pour fer. (Eklezyast 7:29; 8:11) Anmenmtan ki nou anpes nou fer sa ki mal, nou bezwen osi pous nou lekor pour fer sa ki byen. Annefe, kontrol nou lekor pour kapab fer sa ki byen i enn bann pli bon fason pour evite fer sa ki mal.
7. (a) Parey David ti fer, lo ki nou devret priye? (b) Lo ki nou devret reflesir ki pou ed nou demontre plis kontrol lo nou lekor?
7 I kler ki kontrol lo nou lekor i enportan si nou anvi akonpli nou dedikasyon avek Bondye. Nou bezwen priye parey David ti fer: “Kree dan mwan en leker pir, O Bondye, e met dan mwan en nouvo lespri, enn ki ferm.” (Psonm 51:10) Nou kapab reflesir lo bann byenfe ki nou gannyen kan nou evit bann keksoz ki moralman mal oubyen ki afeblir nou fizikman. Mazin bann move konsekans si nou pa evit sa bann keksoz: gro problenm lasante, problenm dan relasyon, menm lanmor avan ler. De lot kote, mazin sa kantite byenfe si nou reste atase avek sa fason viv ki Zeova in demann nou pour viv. Me nou pa devret oubliye ki nou leker i tret. (Zeremi 17:9) Vi ki nou leker i kapab fer nou pa pran oserye bann standar Zeova, nou bezwen determinen pour reziste bann tandans ki nou leker i annan.
8. Ki realite ki nou leksperyans i ansenny nou? Donn en legzanp.
8 Bokou nou i konnen dapre leksperyans ki souvan sa ki nou lespri i dir nou fer, nou lekor pa anvi fer li. Pran par egzanp predikasyon Rwayonm. Zeova i pran plezir ler i vwar dimoun anvi partisip dan sa travay ki donn lavi. (Psonm 110:3; Matye 24:14) Pour bokou nou, aprann prese an piblik pa ti en keksoz fasil pour fer. I ti neseser—e petet i ankor neseser—ki nou kontrol nou lekor, ‘tret li dir’ e “gard li anba en kontrol sever,” olye les li fer nou pran semen pli fasil.—1 Korentyen 9:16, 27; 1 Tesalonisyen 2:2.
“Dan tou Keksoz”?
9, 10. Kwa ki enplike dan demontre ‘kontrol lo nou lekor dan tou keksoz’?
9 Konsey Labib pour demontre ‘kontrol lo nou lekor dan tou keksoz’ i endike ki bokou plis i enplike ki zis kontrol nou tanperaman e anpes nou annan en kondwit imoral. Petet nou santi ki nou’n arive kapab demontre kontrol lo nou lekor dan sa bann domenn. Si i leka, nou kapab vreman kontan. Me eski i leka dan lezot laspe lavi kot sa nesesite pour montre kontrol lo nou lekor pa sitan evidan? Pour donn en legzanp, sipoze nou viv dan en pei ki ase prospere e ki annan en standar lavi onivo. Pa i pou byen pour aprann dir non anver bann depans ki pa neseser? I byen pour bann paran ansenny zot zanfan pour pa aste nenport kwa ki zot vwar zis akoz i annan, i atiran, oubyen zot annan larzan pour aste. Byensir, si sa bann paran i oule ki sa lenstriksyon i vin efikas, zot bezwen zot menm montre en bon legzanp.—Lik 10:38-42.
10 Aprann viv san en keksoz i kapab ranforsi nou determinasyon. I kapab osi ogmant nou lapresyasyon pour bann keksoz materyel ki nou posede. I osi kapab fer nou annan plis konpasyon anver bann ki bezwen viv san serten keksoz akoz zot sitiasyon lavi. I vre ki viv en lavi senp i pa an akor avek bann latitid popiler parey “fer ou lekor kontan” oubyen “ou merit sa ki pli meyer.” Sa lemonn ki ranpli avek piblisite i ankouraz dimoun pour satisfer zot lanvi deswit. Me i fer sa zis pour son prop profi. Sa sitiasyon i kapab retard nou bann zefor ki nou fer pour demontre kontrol lo nou lekor. Resaman, en magazin sorti dan en pei Eropeen ki prospere ti fer remarke: “Si bann ki pe viv dan bann kondisyon terib kot i annan gran lamizer i bezwen lalit avek zot menm pour gard bann move tandans anba kontrol, pa i pli difisil pour bann dimoun ki viv dan bann pei ris ozordi!”
11. Akoz aprann viv san en keksoz i benefisye nou, me kwa ki fer li difisil?
11 Si nou ganny difikilte pour fer diferans ant sa ki nou anvi ek sa ki nou vreman bezwen, i kapab itil pour nou pran bann pa pour asire ki nou pa fer neglizans. Par egzanp, si nou anvi sirmont sa tandans pour kontan depanse, nou kapab deside pour pa pran kredi, oubyen anmenn zis en pti gin larzan avek nou kan nou pe al fer konmisyon. Rapel ki Pol ti dir ki “lafwa dan Bondye i en gran sours larises pour en dimoun si i kontant li avek sa ki i annan.” I ti rezonnen: “Nou pa’n vin avek nanryen dan lemonn e nou pa pou kapab anmenn nanryen avek nou. Alor si nou annan manze ek lenz sa i ase.” (1 Timote 6:6-8) Eski nou kontant nou avek sa ki nou annan? I demann determinasyon ek kontrol lo nou lekor pour aprann viv en lavi senp, san okenn pwa anplis ki nou gannyen letan nou oule tro satisfer nou prop dezir dan nenport ki fason. Me i en leson ki vo lapenn aprann.
12, 13. (a) Dan ki sans bann renyon Kretyen i enplik kontrol lo nou lekor? (b) Dan ki lezot domenn ki nou bezwen demontre kontrol lo nou lekor?
12 Asiste bann renyon Kretyen ek lasanble i osi enplik demontre en serten kontrol lo nou lekor. Par egzanp, sa kalite i neseser pour ki nou pa perdi konsantrasyon pandan renyon. (Proverb 1:5) I kapab demann kontrol lo nou lekor pour pa deranz lezot par koz dan zorey sa enn ki pe asiz obor nou olye donn tou nou latansyon sa orater. Aranz nou progranm pour ki nou kapab ariv boner i demann kontrol lo nou lekor. Deplis, nou bezwen annan kontrol lo nou lekor pour met en letan dekote pour prepar nou bann renyon e apre pour partisipe.
13 Demontre kontrol lo nou lekor dan bann pti keksoz i ed nou pour kapab pli byen demontre li dan bann pli gro keksoz. (Lik 16:10) Alors, i en tre bon desizyon pour disiplin nou lekor pour regilyerman lir Parol Bondye ek bann piblikasyon baze lo Labib, etidye zot e reflesir lo sa ki nou aprann! I osi vreman byen pour disiplin nou lekor an sa ki konsern bann travay, frekantasyon, latitid, ek labitid personnel ki pa apropriye. I osi byen ki nou disiplin nou lekor pour dir non avek bann aktivite ki kapab pran tou nou letan presye pour servis Bondye! Reste okipe dan servis Bondye i sirman en bon proteksyon kont bann keksoz ki kapab elwanny nou avek paradi spirityel dan kongregasyon Zeova dan lemonn antye.
Vin matir atraver Kontrol lo nou Lekor
14. (a) Konman bann zanfan i devret aprann pour demontre kontrol lo zot lekor? (b) Ki byenfe bann zanfan ki aprann sa bann leson boner dan lavi i gannyen?
14 En pti baba napa kontrol lo son lekor. En pti brosir ekrir par bann eksper dan konportman zanfan i eksplike: “Kontrol lo nou lekor pa ariv otomatikman oubyen deswit. Bann pti baba ek pti manrmay i bezwen gidans ek sipor zot paran pour konmans prosedir pour aprann annan kontrol lo zot lekor. . . . Avek paran ki pe gid sa prosedir, kontrol lo zot lekor i kontinyen toudilon bann lannen skoler.” En letid lo bann zanfan kat an ti revele ki bann ki’n aprann pour demontre en serten kontrol lo zot lekor i “normalman grandi pour vin bann adolesan ki pli stab, ki dimoun i pli kontan, ki pli brav, pli konfidan e ki ou kapab depan lo zot.” Bann ki pa’n konmans aprann sa leson “ti pli annan sans pour santi zot tousel, fasilman ankoler e antete. Zot ti les presyon domin zot e zot ti evite fer fas avek bann defi.” Evidaman, pour vin en adilt ki stab, en zanfan i bezwen aprann pour demontre kontrol lo son lekor.
15. Kontrerman avek sa lobzektif ki’n ganny prezante dan Labib, ki en mank kontrol lo nou lekor i endike?
15 Pareyman, si nou anvi vin bann Kretyen matir, nou bezwen aprann pour demontre kontrol lo nou lekor. Si nou mank sa kalite i endike ki nou ankor bann pti baba lo plan spirityel. Labib i konsey nou pour “montre matirite” dan nou rezonnman. (1 Korentyen 14:20) Nou lobzektif se pour “ansanm ariv dan linite nou lafwa ek dan konnesans Garson Bondye; nou a vin bann adilt e nou a konn en devlopman konplet parey Kris.” Akoz? Pour ki “nou pou nepli parey bann zanfan ki ganny trennen par laroul, e pouse par nenport divan lansennyman ki dimoun tronper i fannen, bann ki antrenn dimoun dan lerer par tou sort riz ki zot envante.” (Efezyen 4:13, 14) I kler ki aprann pour demontre kontrol lo nou lekor i enportan pour nou spirityalite.
Devlop Kontrol lo nou Lekor
16. Konman Zeova i fourni led?
16 Pour demontre kontrol lo nou lekor, nou bezwen led Bondye, e sa led i disponib. Parol Bondye, parey en laglas parfe, i montre nou kote nou bezwen fer bann sanzman personnel, e i fourni konsey lo konman pour fer li. (Zak 1:22-25) En lasosyasyon frer ki kontan nou i pare pour ofer led zot osi. Bann ansyen i montre konprenezon kan zot ofer zot led. Zeova li menm i donn son lespri sen volonterman si nou demann li dan lapriyer. (Lik 11:13; Romen 8:26) Alors, annou servi sa bann provizyon avek lazwa. Bann sizesyon lo paz 21 i kapab ed nou.
17. Ki lankourazman Proverb 24:16 i donn nou?
17 Pa i rekonfortan pour konnen ki Zeova i apresye nou bann zefor kan nou esey fer li plezir! Sa i devret motiv nou pour kontinyen fer zefor pour ganny plis kontrol lo nou lekor. Nenport ki kantite fwa nou kapab tonbe, nou pa devret zanmen aret fer zefor. “Sa enn ki zis i kapab tonm set fwa, me definitivman i pou releve.” (Proverb 24:16) Sak fwa ki nou ganny en laviktwar, nou annan tou rezon pour satisfe. Nou kapab osi asire ki Zeova i satisfe avek nou. En Temwen i dir ki avan i ti dedye son lavi avek Zeova, sak fwa ki i ti reisi pa fimen pour en semenn, i ti rekonpans son lekor par aste en keksoz itil avek sa larzan ki kontrol lo son lekor in ed li ramase.
18. (a) Kwa ki enplike dan nou batay pour ganny kontrol lo nou lekor? (b) Ki lasirans Zeova i fourni?
18 Sa ki pli enportan, nou devret rapel ki kontrol lo nou lekor i enplik nou lespri ek nou santiman. Nou kapab vwar sa dan parol Zezi: “En dimoun ki get madanm en lot zonm avek dezir in deza komet adilter avek li dan son leker.” (Matye 5:28; Zak 1:14, 15) Sa dimoun ki’n aprann pour kontrol son lespri ek santiman pou vwar li pli fasil pour kontrol son lekor antye. Alors annou ranforsi nou determinasyon pour pa selman evite fer sa ki mal me osi pour pa mazin lo la. Si nou ganny bann move panse, rezet zot deswit. Nou kapab elwanny nou avek bann tantasyon par kit nou lizye fikse lo Zezi atraver lapriyer. (1 Timote 6:11; 2 Timote 2:22; Ebre 4:15, 16) Anmezir ki nou fer nou mye, nou pou pe swiv sa konsey dan Psonm 55:22: “Larg ou fardo lo Zeova li menm, e li menm i pou soutenir ou. Zanmen i pou les sa enn ki drwat drive.”
Eski ou rapel?
• Dan ki de fason ki nou bezwen demontre kontrol lo nou lekor?
• Ki savedir demontre ‘kontrol lo nou lekor dan tou keksoz’?
• Ki bann sizesyon pratik pour demontre kontrol lo nou lekor ki ou’n donn en latansyon spesyal pandan nou letid?
• Kote kontrol lo nou lekor i konmanse?
[Kestyon]
[Bwat/Portre lo paz 21]
Konman devlop plis Kontrol lo nou Lekor
• Devlop li, menm dan bann pti keksoz
• Medit lo son bann byenfe la konmela e dan lavenir
• Ranplas bann keksoz ki Bondye pa oule nou fer avek bann ki i ankouraz nou fer
• Rezet bann move panse deswit
• Ranpli ou lespri avek bann panse ki batir spirityelman
• Aksepte led ki bann konpanyon Kretyen matir i kapab donnen
• Evit bann sitiasyon kot nou kapab ganny tante
• Priye pour ganny led Bondye kan nou ganny tante
[Portre lo paz 19]
Kontrol lo nou lekor i motiv nou pour fer sa ki byen