Konfyans i enportan pour en Lavi ere

LER nou ganny afekte avek en manze ki’n gate i vreman pa gou. En dimoun ki ganny sa souvan i bezwen fer plis atansyon avek son manze. Me i pa fer sans pour pa manz nanryen zis pour evite ganny afekte. Sa i kapab fer en dimoun plis ditor ki dibyen. San manze, personn pa pou kapab viv pour lontan.

Pareyman, i fer mal kan en dimoun i trai nou konfyans. Si toultan lezot pe trai nou konfyans, i kapab fer nou mazin seryezman lo dimoun ki nou swazir pour frekante. Me pour elwanny nou konpletman avek lezot dimoun, zis pour evite ki lezot i dezapwent nou, i pa sa pli bon solisyon. Akoz? Parski nou pou perdi nou lazwa letan nou mefye lezot. Pour viv en lavi satisfezan, nou bezwen bann relasyon ki baze lo konfyans.

Liv Jugend 2002 i fer sa komanter: “Konfyans i enn bann keksoz debaz ki permet dimoun azir byen avek kanmarad dan lavi toulezour.” Zournal Neue Zürcher Zeitung i raporte: “Tou dimoun i vreman anvi ki lezot i met konfyans dan zot. Konfyans i amelyor kalite lavi” a en nivo ki fer li “enportan pour kapab sirviv.” Anfet, sa zournal i kontinyen, san konfyans, “en dimoun pa kapab fer fas avek lavi.”

Vi ki nou annan sa bezwen debaz pour met nou konfyans dan en dimoun, lekel ki nou kapab annan konfyans ladan san ki nou ganny dezapwente?

Met ou Konfyans dan Zeova avek tou ou Leker

Labib i dir nou: “Met ou konfyans dan Zeova avek tou ou leker.” (Proverb 3:5) Annefe, plizyer fwa Parol Bondye i ankouraz nou pour annan konfyans dan nou Kreater, Zeova Bondye.

Akoz nou kapab met nou konfyans dan Bondye? Premyerman, parski Zeova Bondye i sen. Profet Izai ti ekrir: “Zeova . . . i sen, sen, sen.” (Izai 6:3) Eski sa lide ki Bondye i sen pa atir ou? An realite, i devret atir ou parski sentete Zeova i vedir ki i pir, retire avek tou keksoz mal, e i diny konfyans. Zeova pa kapab zanmen vin koronpi oubyen abiz lo lezot, e i enposib pour li trai nou konfyans.

Deplis, nou kapab met nou konfyans dan Bondye parski i annan abilite ek  dezir pour soutenir bann ki servi li. Par egzanp, son gran pwisans i permet li pour azir. Son lazistis ek lasazes parfe i gid lafason ki i azir. Son lanmour ekstraordiner i motiv li pour azir. Zapot Zan ti ekrir: “Bondye i lanmour.” (1 Zan 4:8) Lanmour Bondye i enfliyans tou keksoz ki i fer. Sentete Zeova ek tou lezot son bann kalite remarkab i fer li vin en Papa ideal, en dimoun ki nou kapab met tou nou konfyans ladan. Napa en keksoz oubyen en dimoun ki pli diny konfyans ki Zeova.

Met ou Konfyans dan Zeova e ou ava ere

En lot bon rezon pour met nou konfyans dan Zeova se akoz i konpran nou pli byen ki okenn lezot dimoun. I konnen ki sak dimoun i annan en bezwen debaz pour annan en relasyon avek son Kreater ki solid, dirab e ki diny konfyans. Bann ki annan en tel relasyon i santi zot pli an sekirite. Lerwa David ti fer konklizyon: “Ere sa zonm kosto ki’n met son konfyans dan Zeova.” (Psonm 40:4) Plizyer milyon dimoun ozordi i antyerman dakor avek sa ki David ti santi.

Annou konsider serten legzanp. Doris in reste dan Repiblik Dominiken, Lalmanny, Lagres, ek Letazini. I dir: “Mon vreman kontan pour met mon konfyans dan Zeova. I konnen ki mannyer pour pran swen avek mwan fizikman, spirityelman, e emosyonnelman. I sa pli bon zanmi ki en dimoun i kapab annan.” Wolfgang, en konseye legal, i eksplike: “I merveye pour kapab depan lo en dimoun ki annan ou lentere aker, en dimoun ki kapab—e ki pou vreman—fer sa ki pli bon pour ou!” Ham, ki ti ne Lazi me ki aprezan pe reste Lerop, i fer sa komanter: “Mon asire ki Zeova i annan kontrol lo tou keksoz, e ki i pa fer fot, alors mon kontan pour depan lo li.”

Byensir, sakenn ant nou pa devret met nou konfyans zis dan nou Kreater me osi dan lezot dimoun. Alors, Zeova, konman sa zanmi ki konn tou e annan leksperyans, i donn nou konsey lo ki kalite dimoun nou devret annan konfyans ladan. Par byen lir Labib, nou kapab vwar son konsey lo sa size.

Dimoun ki nou kapab annan Konfyans ladan

En psalmis ti ekrir: ‘Pa met ou konfyans dan bann dimoun enportan, ni dan zonm lo later, ki delivrans pa pour zot.’ (Psonm 146:3) Sa deklarasyon enspire i ed nou realize ki bokou dimoun pa merit nou konfyans. Menm bann ki ganny bokou respekte konman ‘bann dimoun enportan’ dan sa lemonn, tel parey bann eksper dan bann diferan laspe, pa otomatikman merit nou konfyans. Zot gidans i souvan tronp dimoun, e si nou met konfyans dan sa ‘bann dimoun enportan’ nou kapab dezapwente apre.

Byensir, sa pa devret fer nou pa annan konfyans dan tou dimoun. Me i kler ki nou bezwen fer atansyon ler nou pe swazir lekel ki nou pou met nou konfyans ladan. Ki kriter nou devret servi? En legzanp konsernan ansyen nasyon  Izrael i kapab ed nou. Kan i ti neseser pour apwent bann dimoun pour desarz bann gro responsabilite an Izrael, Moiz ti ganny konseye pour “swazir parmi tou sa dimoun bann zonm kapab, ki annan lakrent pour Bondye, bann zonm ki diny konfyans, ki ay bann profi malonnet.” (Egzod 18:21) Ki nou kapab aprann atraver sa?

Sa ti bann zonm ki ti montre serten kalite ki Bondye i aprouve avan ki zot ganny apwente dan bann pozisyon kot dimoun i kapab annan konfyans dan zot. Zot ti’n deza prouve ki zot ti annan lakrent pour Bondye; zot ti annan en respe profon pour zot Kreater e zot ti per pour depler li. I ti evidan pour tou dimoun ki sa bann zonm ti fer tou sa ki zot ti kapab pour mentenir bann standar Bondye. Zot ti ay bann profi malonnet, ki ti endike ki zot ti annan lafors moral ki ti pou anpes zot ganny koronpi par pouvwar. Zot pa ti pou abiz konfyans ki lezot i met dan zot pour zot prop lentere personnel oubyen pour lentere zot fanmiy ouswa zanmi.

Eski pa i ti pou byen si nou osi nou servi menm kriter ozordi kan nou pe swazir lekel ki nou pou met nou konfyans ladan? Eski nou konn bann dimoun ki zot kondwit i montre ki zot annan lakrent pour Bondye? Eski zot determinen pour gard son bann standar lo fason viv? Eski zot reste fidel an sa ki konsern evite fer bann keksoz ki pa byen? Eski zot annan lonnekte pour pa aranz en sitiasyon dan zot prop lavantaz ouswa pour zot kapab ganny sa ki zot anvi? Sirman bann fanm ek zonm ki demontre sa bann kalite i merit nou konfyans.

Pa dekouraze par bann Dezapwentman ki arive tanzantan

Letan nou pe deside lekel ki nou pou kapab annan konfyans ladan, nou bezwen annan pasyans, vi ki se avek letan ki nou kapab met konfyans dan en dimoun. Pli bon keksoz pour fer se met nou konfyans dan en dimoun gradyelman, pa par pa. Konman? Petet, nou kapab obzerv kondwit en dimoun pour en serten letan, e vwar konman i azir dan serten sitiasyon. Eski sa dimoun i diny konfyans dan bann pti keksoz? Par egzanp, eski i rann bann keksoz ki i’n demann prete parey i ti promet e eski i aler dan bann randevou? Si wi, alors nou kapab santi ki nou kapab met nou konfyans dan li dan bann keksoz pli enportan. Sa i an akor avek sa prensip: “Bann ki onnet dan pti keksoz, i osi onnet dan sa ki enportan.” (Lik 16:10) Si nou fer byen atansyon e annan pasyans, i kapab ed nou evit bann gro dezapwentman.

Me ki nou pou fer si en dimoun i dezapwent nou? Bann etidyan Labib pou rapel ki sa zour swar ler Zezi Kri ti ganny arete, son bann zapot ti vreman dezapwent li. Zida Iskaryot ti trai li, e lezot ti taye avek lafreyer. Pyer ti menm renye Zezi trwa fwa. Me Zezi ti rekonnet ki zis Zida ki ti’n azir volonterman. Dezapwentman ki Zezi ti eksperyanse dan sa moman kritik pa ti anpes li konfirm son konfyans ki i ti annan dan sa 11 zapot ki ti reste, zis detrwa semenn plitar. (Matye 26:45-47, 56, 69-75; 28:16-20) Pareyman, si nou santi ki nou’n ganny trai par en dimoun ki nou annan konfyans ladan, nou bezwen egzaminen si sa traizon i en levidans ki sa dimoun pa diny konfyans oubyen i zis en febles tanporer delapar sa dimoun.

Eski mon diny Konfyans?

En dimoun ki deside pour fer byen atansyon lekel ki i pou annan konfyans ladan i devret onnet e demann son lekor: ‘Eski mon diny konfyans? Ki standar rezonnab konsernan konfyans ki mon devret ekspekte avek mwan menm e avek lezot?’

Sirman en dimoun ki diny konfyans i toultan koz laverite. (Efezyen 4:25) I pa adapte son parol dapre dimoun ki i pe koz avek zis pour li ganny son lavantaz personnel. Si i fer en promes, sa dimoun ki diny konfyans pour fer tou sa ki i kapab pour gard son parol. (Matye 5:37) Si en dimoun i dir li en keksoz, sa dimoun ki diny konfyans i gard sa parol pour li e i pa fer bavardaz. En dimoun diny konfyans i fidel anver sa dimoun ki i’n marye avek. I pa get pornografi, i pa konsantre lo bann keksoz seksyel, e i pa fer zekar avek lezot. (Matye 5:27, 28) En dimoun  ki merit nou konfyans i travay dir pour ganny son lavi e pour sonny son fanmiy. I pa profit lo lezot pour ganny larzan fasilman. (1 Timote 5:8) Si nou gard antet sa bann standar Labib ki rezonnab, i pou ed nou rekonnet lekel ki nou kapab annan konfyans ladan. Deplis, si nou kontinyen viv dapre sa menm standar i pou ed sakenn ant nou pour ganny konfyans lezot.

I ti pou en plezir pour viv dan en lemonn kot tou dimoun ti diny konfyans e kot ti napa dimoun ki ti trai nou konfyans e dezapwent nou! Eski sa i zis en rev? Pa pour bann dimoun ki pran oserye bann promes Labib, akoz Parol Bondye i predir ki en zoli “nouvo later” pou ganny etablir kot pou napa riz, mansonz, ek eksplwatasyon e kot pou napa latristes, maladi, e menm lanmor! (2 Pyer 3:13; Psonm 37:11, 29; Revelasyon 21:3-5) Pa i ti pou vo lapenn pour konn plis konsernan sa lespwar? Bann Temwen Zeova pou kontan pour donn ou plis lenformasyon lo sa topik ek lezot topik enportan.

[Portre lo paz 4]

Ler nou napa konfyans dan lezot nou perdi nou lazwa

[Portre lo paz 5]

Zeova i sa enn ki pli merit nou konfyans

[Portre lo paz 7]

Nou tou nou bezwen bann relasyon ki baze lo konfyans