Zenn, viv en Lavi ki Zeova i aprouve

SERTEN zenn Kretyen i bezwen tanporerman viv lwen avek zot fanmiy ek zot kongregasyon. Serten in fer sa pour zot kapab fer plis dan predikasyon. Lezot in bezwen kit zot lakour akoz zot pozisyon anver bann zafer lemonn. (Izai 2:4; Zan 17:16) Dan serten pei, “Sezar” in kondann bann zenn ki reste fidel par anvoy zot dan prizon, ouswa fer travay kominoter. *—Mark 12:17; Tit 3:1, 2.

Ler zot pe servi zot santans prizon akoz zot pozisyon, sa bann zenn i kapab reste avek bann dimoun ki’n komet bann lofans pour en bon pe letan. Pareyman, lefe ki zot lwen avek zot lakour pour lezot rezon, bann zenn i ganny forse pour travay dan en lanvironnman imoral. Konman ki sa bann zenn Kretyen ouswa lezot ki ganny forse pour viv dan en tel sitiasyon i reisi fer fas avek bann presyon ek difikilte ki zot rankontre anmezir ki zot esey “anmenn en lavi ki Bondye i aprouve?” (1 Tesalonisyen 2:12) Ki mannyer zot paran i kapab ed zot prepar pour nenport sitiasyon ki pa agreab?—Proverb 22:3.

Difikilte ki bann Zenn i rankontre

Tákis, ki annan 21 an e ki ti oblize al viv lwen avek son lakour pour 37 mwan, i dir: “Ti difisil e enkyetan pour viv lwen avek proteksyon mon paran osi byen ki avek bon sirveyans bann ansyen ki konn mwan byen.” * I azoute: “Parler mon ti santi mwan san defans.” Pétros ki annan 20 an, ti bezwen kit lakour son paran pour plis ki 2 an. I admet: “Pour premye fwa dan mon lavi, mon ti bezwen fer bann desizyon lo divertisman ek zanmi mon tousel, e mon bann swa pa ti toultan bon.” Apre i dir: “Parfwa, mon pa ti santi mwan byen avek sa gran responsabilite ki plis liberte ti anmennen.” Tássos, en ansyen ki regilyerman gard kontak avek bann zenn Kretyen ki dan sa bann sitiasyon, ti fer sa remark: “Bann parol sal, leta lespri rebel, ek kondwit vyolan lezot ki pa Temwen i kapab enfliyans bann zenn ki pa fer atansyon e ki san defans.”

Ler zot pe viv e travay parmi bann dimoun ki mank respe pour bann prensip Labib, bann zenn Kretyen i bezwen fer atansyon ki zot pa ganny tante pour imit zot kondwit imoral ki pa baze lo Labib. (Psonm 1:1; 26:4; 119:9) Petet i pou difisil pour gard en bon progranm letid personnel, asiste renyon, ek predikasyon. (Filipyen 3:16) I kapab osi pa fasil pour etablir e akonpli bann lobzektif spirityel.

Bann zenn Kretyen fidel i sirman anvi fer plezir Zeova atraver zot kondwit ek parol. Zot fidelman esey pran aker sa lenvitasyon atiran sorti kot zot Papa seles: “Vin saz, mon garson, e rezwir mon leker, pour ki mon a kapab reponn sa enn ki pe provok mwan.” (Proverb 27:11) Zot rekonnet ki zot laparans fizik ek kondwit i annan en lenfliyans lo lafason  ki lezot i vwar Zeova ek son pep.—1 Pyer 2:12.

I en plezir pour vwar laplipar sa bann zenn pe fer zot mye pour parey zot bann frer dan premye syek ki Pol ti priy pour zot: “Pour ki zot a kapab viv, en lavi ki Bondye i aprouve e ki fer li plezir dan tou sa ki zot fer. Koumsa par zot bon travay zot ava prodwi fri, . . . pour ki zot a kapab siport tou avek pasyans.” (Kolosyen 1:9-11) Labib i fourni plizyer legzanp bann zenn ki ti annan lakrent pour Bondye, ki ti reisi viv en lavi ki Bondye i aprouve parmi bann etranze, bann dimoun agresif, e bann ki ti ador zidol.—Filipyen 2:15.

“Zeova ti avek Zozef”

Depi byen zenn, Zozef, garson Zakob ek Rasel ki zot ti byen kontan, ti trouv li lwen avek proteksyon son papa ki ti annan lakrent pour Bondye. I ti’n ganny vann konman lesklav an Lezip. Zozef ti donn en bon legzanp konman en zennonm ki travay dir, diny konfyans, e annan en bon moralite. Zozef ti lesklav Potifar ki pa ti ador Zeova. Kantmenm sa, Zozef ti konsyansye e serye, ki fer ki son met ti finalman konfye li tou bann responsabilite lakour. (Zenez 39:2-6) Zozef ti reste fidel anver Zeova, e ler i ti ganny met dan prizon, i pa ti dir: “Akfer reste fidel?” Menm dan prizon i ti demontre bann bon kalite, e pa bokou letan apre i ti pe okip bokou keksoz dan fonksyonnman prizon. (Zenez 39:17-22) Bondye ti beni li, e parey Zenez 39:23 i dir, “Zeova ti avek Zozef.”

Pa i ti pou fasil pour Zozef ki ti lwen avek son fanmiy annan menm kondwit avek bann payen otour li, e swiv fason viv imoral bann Ezipsyen! Okontrer, i ti reste atase avek bann prensip Bondye e gard son bon pozisyon menm dan bann tantasyon pli for. Ler madanm Potifar ti kontinyen ensiste pour annan relasyon avek li, son larepons ferm ti: “Konman mon kapab komet sa keksoz sitan mal e vreman fer pese kont Bondye?”—Zenez 39:7-9.

Denozour, bann zenn Temwen i bezwen pran aker lavertisman Labib konsernan bann move frekantasyon, divertisman imoral, pornografi, ek bann lanmizik degradan. Zot realize ki “lizye Zeova i partou, pe sirvey bann ki move e osi bann ki bon.”—Proverb 15:3.

Moiz ti evite “zouir Pese”

Moiz ti grandi dan lakour rwayal Faraon ki ti en lanvironnman ranpli avek zidol e kot dimoun ti rod zis plezir. Labib i dir sa lo li: “Par lafwa, Moiz . . . ti refize ganny apele garson fiy Faraon. I ti swazir ganny maltrete  ansanm avek pep Bondye, plito ki zouir pese pandan en pti pe letan.”—Ebre 11:24, 25.

Fer zanmi avek lemonn i kapab anmenn serten lavantaz, me i tanporer. Sa lanmitye i kapab dir zis pour sa pti gin letan ki reste pour sa lemonn. (1 Zan 2:15-17) Eski pa i pou pli byen pour swiv legzanp Moiz? Labib i dir ki “i ti reste ferm konmsi i ti pe war sa enn ki envizib.” (Ebre 11:27) I ti gard son lespri fikse lo leritaz spirityel son bann zanset ki ti annan lakrent pour Bondye. I ti fer plan Zeova vin son plan personnel, e fer lavolonte Bondye konman son lobzektif.—Egzod 2:11; Akt 7:23, 25.

Ler bann zenn ki annan lakrent pour Bondye i trouv zot dan en lanvironnman kot napa respe pour Bondye e ki pa favorab, zot kapab ranforsi zot relasyon personnel avek Zeova atraver letid personnel. Sa pou fer zot arive konn pli byen “sa enn ki envizib.” En bon progranm aktivite Kretyen, ki enkli asiste renyon e prese regilyerman, pou ed sa bann zenn gard zot lespri fikse lo bann keksoz spirityel. (Psonm 63:6; 77:12) Zot devret esey devlop en lafwa for ek en lesperans solid parey Moiz. Zot devret esey fikse zot panse ek aksyon lo Zeova, e kontan pour vin son zanmi.

I ti servi son Lalang pour loue Bondye

En lot zenn ki ti montre en bon legzanp ler i ti lwen avek son lakour se en pti fiy Izraelit ki ti’n ganny kaptire par bann Siryen dan lepok profet Bondye, Elisa. I ti vin servant madanm en Sef larme Siryen, Naamann, ki ti ganny lalep. Sa pti fiy ti dir avek son bourzwa: “Si zis mon senyer ti devan sa profet an Samari, son lalep ti pou geri!” Gras a son temwannyaz, Naamann ti al kot Elisa an Izrael e i ti ganny geri. Deplis, Naamann ti vin en adorater Zeova.—2 Lerwa 5:1-3, 13-19.

Legzanp sa pti fiy i montre sa lenportans pour bann zenn servi zot lalang dan en fason ki onor Bondye, menm ler zot lwen avek zot paran. Si sa pti fiy ti abitye koz “langaz obsenn” ouswa “parol grosye e vilger,” eski i ti pou santi li alez pour byen servi son lalang parey i ti fer ler i ti’n ganny loportinite? (Efezyen 5:4; Proverb 15:2) Níkos, en zennonm dan son 20 an ki ti ganny anprizonnen akoz son pozisyon konman en Kretyen i rapel: “Ler mon ti avek serten zenn frer dan en prizon lagrikiltir, lwen avek lotorite mon paran ek kongregasyon, mon ti remarke konman nou parol ti deteryore. Definitivman i pa ti anmenn louanz pour Zeova.” Erezman, Níkos ek lezot frer in ganny led pour pran aker konsey Pol lo sa size: “Konman bann sen, zot devre alor veye ki tou form aktivite seksyel imoral, lavi dezordonnen, ek lanvi pour keksoz ki lezot dimoun i posede, pa menm ganny mansyonnen parmi zot.”—Efezyen 5:3.

 Zeova ti reel pour zot

Leksperyans sa trwa Ebre ki ti konpanyon Danyel dan ansyen Babilonn, i montre ki sa prensip ki Zezi ti dir ki sa ki fidel dan bann pti keksoz pou fidel dan bann keksoz pli enportan i vre. (Lik 16:10) Ler zot ti rankontre problenm pour manz bann manze ki Lalwa Moiz ti enterdi, zot ti’n kapab rod leskiz e rezonnen ki zot prizonnyen dan en pei etranze e alor zot napa swa. Me zot ti ganny rekonpanse akoz zot ti pran oserye menm bann keksoz ki ti paret napa en gran lenportans. Zot ti vin pli an bonn sante e pli malen ki tou lezot prizonnyen ki ti manz bann bon pla lerwa. Fidelite dan sa bann pti keksoz ti san dout fortifye zot, akoz ler zot ti rankontre sa pli gran leprev pour ador en zidol, zot ti refize pour dezobei lalwa Zeova.—Danyel 1:3-21; 3:1-30.

Zeova ti vreman reel pour sa trwa zennonm. Malgre zot ti lwen avek zot lakour ek sant ladorasyon Bondye, zot ti determinen pour reste san tas dan lemonn. (2 Pyer 3:14) Zot relasyon avek Zeova ti sitan presye pour zot ki zot ti pare pour sakrifye zot lavi.

Zeova pa pou abandonn ou

Ler bann zenn i lwen avek bann dimoun ki zot kontan e annan konfyans ladan, normalman zot kapab santi zot pa an sekirite, pa tro sir lo zot menm, e enkyet. Me zot kapab fer fas avek zot bann difikilte ek leprev, avek konfyans total ki “Zeova pa pou abandonn” zot. (Psonm 94:14) Si bann tel zenn i “soufer an fezan sa ki byen,” Zeova i la pour ed zot kontinyen mars “dan santye ladrwatir.”—1 Pyer 3:14; Proverb 8:20.

Zeova ti toultan fortifye e rekonpans Zozef, Moiz, sa pti fiy Izraelit ki ti en lesklav, ek sa trwa zenn Ebre fidel en kantite. Ozordi, i pe servi son lespri sen, son Parol, ek son lorganizasyon pour soutenir bann ki “konbat sa bon konba dan lafwa,” par met devan zot rekonpans “lavi eternel.” (1 Timote 6:11, 12) Vreman, viv en lavi ki Zeova i aprouve i posib, e i sa pli bon keksoz pour fer.—Proverb 23:15, 19.

[Not anba lo paz]

[Bwat lo paz 11]

PARAN—PREPAR OU ZANFAN!

“Bann zenn garson i parey bann dart dan lanmen en zonm for.” (Psonm 127:4) En dart pa pou ariv kot son target par azar. I devret ganny byen vize. Pareyman, zanfan pa pou kapab fer fas avek bann realite lavi ler zot pe viv lwen avek zot lakour san gidans apropriye zot paran.—Proverb 22:6.

Bann zenn i tant pour reazir san ki zot reflesir ouswa fasilman soumet avek bann “pasyon lazenes.” (2 Timote 2:22) Labib i averti: “Baton ek reprimann, se san menm ki donn lasazes; me en garson ki ganny lese lo li menm pou fer son manman onte.” (Proverb 29:15) Ler paran pa arive annan serten limit lo kondwit en zanfan, sa i fer sa zanfan pa prepare pour fer fas avek bann difikilte ek presyon lavi ler i lwen avek lakour.

Dan en fason kler e responsab, bann paran Kretyen i devret fer resorti avek zot zanfan bann difikilte, presyon, ek realite lavi dan sa sistenm. San ki zot koz dan en fason negatif, zot kapab dekrir sa bann move kondisyon ki en zenn i kapab rankontre si i bezwen al viv lwen avek lakour. Sa formasyon ansanm avek lasazes ki Bondye i donnen, pou “donn bann ki napa leksperyans bon zizman, donn en zennonm konnesans ek abilite pour reflesir.”—Proverb 1:4.

Bann paran ki fer penetre bann gidans Bondye ek bann prensip moral dan leker zot zanfan i ed zot pour sirmont bann problenm lavi. Letid Labib regilye, kominikasyon fran, ek lentere senser dan zot zanfan, i kapab fer diferans ant reisi e pa reisi. Paran i devret fourni formasyon ki sorti kot Bondye dan en fason balanse, pozitif e rezonnab, ki prepar zot zanfan pour debout lo zot de lipye plitar dan lavi. Par zot legzanp, bann paran i kapab ansenny zot zanfan ki i normal pour dan lemonn me pour pa fer parti avek li.—Zan 17:15, 16.

[Portre lo paz 8]

Serten zenn Kretyen in bezwen kit lakour zot paran

[Portre lo paz 9]

Bann zenn i kapab imit Zozef par reziste tantasyon, e reste prop moralman

[Portre lo paz 10]

Imit sa pti fiy Izraelit ki ti en lesklav, ki ti servi son lalang pour glorifye Zeova