Paradi lo Later i en Realite

TOUDILON listwar, bokou dimoun in krwar ki en zour zot pou kit later e al dan lesyel. Serten ti krwar ki nou Kreater pa’n zanmen annan lentansyon pour fer nou reste lo later pour touzour. I annan serten ki’n dir plis ki sa. Pour zot, later ek tou keksoz materyel i move—en baryer kont vre lakonplisman spirityel e pour vin pros avek Bondye.

Sa bann dimoun ki ti devlop sa bann lide ti swa pa konn sa ki Bondye in dir konsernan en paradi lo later oubyen zot in volonterman inyor sa. Annefe, ozordi bokou dimoun pa enterese pour egzamin sa ki Bondye in enspir bann zonm pour ekrir lo sa size dan son Parol, Labib. (2 Timote 3:16, 17) Me pa i fer plis sans pour met konfyans dan Parol Bondye olye adopte bann lide zonm? (Romen 3:4) Annefe, i vreman enportan ki nou fer sa. Parski Labib i averti nou ki en kreatir mesan ki pwisan e osi envizib in avegle dimoun spirityelman e i pe aprezan “tronp lemonn antye.”—Revelasyon 12:9; 2 Korentyen 4:4.

Akoz Dimoun i konfize?

Plizyer lide kontradiktwar lo lanm in konfiz dimoun konsernan plan Bondye pour later. Bokou dimoun i krwar ki nou annan en lanm imortel—ki kit nou lekor e kontinyen viv apre lanmor. Lezot i krwar ki lanm ti egziste avan ki lekor ti ganny kree. En liv referans i dir ki Plato, en Filozof Grek, ti krwar ki lanm “ti ganny anprizonnen dan lekor konman en pinisyon pour pese ki i ti’n fer ler i ti ankor dan lesyel.” Profeser Origen ti annan menm pwennvi. I ti dir ki “bann lanm ti fer pese avan ki zot ti ganny mete dan en lekor” e zot ti ganny “anprizonnen konman en pinisyon pour zot pese.” Deplis, plizyer milye dimoun i krwar ki later i zis en staz dan sa vwayaz ki zonm pe fer pour al dan lesyel.

I annan plizyer kalite krwayans konsernan sa ki arive avek lanm ler en dimoun i mor. Dapre liv History of Western Philosophy, bann Ezipsyen ti devlop sa pwennvi ki “lanm bann mor i desann dan en lemonn anba later.” Plitar bann Filozof ti argimante ki lanm bann mor pa desann dan en lemonn fernwanr anba later me okontrer zot mont dan en landrwa spirityel. Zot ti dir ki filozof Grek Socrates li, i ti krwar ki ler en dimoun i mor son lanm i al dan “en rezyon envizib . . . e i pas larestan son legzistans avek bann bondye.”

Ki Labib i dir?

Dan Parol enspire Bondye, Labib, napa okenn landrwa ki dir ki dimoun i annan en lanm imortel. Lir sa resi dan Zenez 2:7 pour ou menm. I dir: “Zeova Bondye ti alor form zonm avek lapousyer, tire dan sirfas later e i ti soufle souf lavi dan son nennen, e sa zonm ti vin en lanm vivan.” I enposib pour pa byen konpran ki sa verse pe dir. Ler Bondye ti kree sa premye zonm, Adan, i pa ti met serten keksoz envizib dan li. Sa i pa leka, akoz Labib i dir ki “sa zonm ti vin en lanm vivan.” Ti napa en lanm dan sa zonm, sa zonm li menm ti en lanm.

Ler Zeova ti kree later ek imen, i pa ti dan son plan ki zonm i mor. Bondye ti oule ki imen i viv pour touzour dan paradi lo later.  Adan ti mor akoz i ti dezobei lalwa Bondye. (Zenez 2:8, 15-17; 3:1-6; Izai 45:18) Ler sa premye zonm ti mor, eski i ti al dan en landrwa spirityel? Non! Sa lanm, savedir Adan li menm, ti retourn an pousyer, avek ki i ti ganny fer.—Zenez 3:17-19.

Nou tou nou’n erit pese ek lanmor avek nou zanset Adan. (Romen 5:12) Parey Adan, ler nou mor nou aret egziste. (Psonm 146:3, 4) Annefe, dan son 66 liv, Labib pa zanmen asosye term “imortel” oubyen “eternel” avek sa mo “lanm.” Okontrer, Labib i dir klerman ki lanm—savedir sa dimoun—i mortel. Lanm i mor.—Eklezyast 9:5, 10; Ezekyel 18:4.

Eski bann Keksoz materyel i vreman move?

Aprezan, eski i vre ki keksoz materyel, enkli later i move? Serten dimoun ti krwar ki tou keksoz materyel pa bon. Sa ti leka avek dimoun dan en mouvman relizye ki ti ganny kree an Pers pandan trwazyenm syek Nou Lepok par en dimoun apele Mani. New Encyclopædia Britannica i dir ki sa krwayans ki apel Manichaeism ti devlope akoz sa kondisyon penib ki imen i ladan. Mani ti krwar ki vin en imen i en keksoz ki “pa natirel, ki ensiportab e pa bon ditou.” I ti osi krwar ki sel fason pour sorti dan sa kondisyon penib i ki lanm i sorti dan sa lekor, kit later, e ganny en legzistans spirityel dan en lot lemonn.

Parkont Labib i dir nou ki dapre pwennvi Bondye “tou keksoz ki i ti’n fer” ler i ti pe kree later ek imen ti “tre bon.” (Zenez 1:31) Sa letan, ti napa okenn baryer ant imen ek Bondye. Adan ek Ev ti rezwir en relasyon tre pros avek Zeova, zis parey Zezi Kri, sa zonm parfe, ti rezwir en relasyon entim avek son Papa dan lesyel.—Matye 3:17.

Si nou premye paran, Adan ek Ev, pa ti’n fer pese, zot ti pou’n annan en relasyon pros avek Zeova pour touzour dan en paradi lo later. Zot lavi ti konmans dan Paradi, akoz Labib i dir nou: “Zeova Bondye ti fer en zarden an Edenn, ver les, e se la ki i ti met sa zonm ki i ti’n kree.” (Zenez 2:8) Ev ti ganny kree dan sa zarden. Si Adan ek Ev pa ti’n fer pese, zot ansanm avek zot zanfan parfe ti pou’n travay ansanm dan lazwa ziska ki later antye i vin en paradi. (Zenez 2:21; 3:23, 24) Sa paradi lo later ti pou’n vin landrwa pour imen reste lo la pour touzour.

Akoz serten i al dan Lesyel?

Petet ou kapab dir: ‘Me pa Labib i koz konsernan dimoun ki pe al dan lesyel?’ I vre. Apre ki Adan ti fer pese, Zeova ti deside pour etablir en Rwayonm dan lesyel. Dan sa Rwayonm, serten desandans Adan ti pou “rennyen lo later” ansanm avek Zezi Kri. (Revelasyon 5:10; Romen 8:17) Zot ti pou ganny resisite pour kontinyen al viv dan lesyel. An tou i annan 144,000 zot e bann disip fidel Zezi dan premye syek ti bann premye parmi sa group.—Lik 12:32; 1 Korentyen 15:42-44; Revelasyon 14:1-5.

Me i pa ti plan Bondye okonmansman pour bann imen obeisan kit later e al dan lesyel. Annefe, ler Zezi ti lo later, i ti dir: “Personn pa’n deza mont dan lesyel, eksepte Fis-de-Lonm ki’n desann sorti dan lesyel.” (Zan 3:13) Bondye ti fourni “Fis-de-Lonm,” setadir Zezi Kri, konman en sakrifis ki fer lavi eternel posib pour bann ki demontre lafwa dan sa sakrifis. (Romen 5:8) Me kote ki plizyer milyon imen pou viv pour touzour?

Plan orizinal Bondye pour Later pou ganny akonpli

Menm si Bondye ti deside pran serten dimoun pour diriz ansanm avek Zezi Kri dan Rwayonm lesyel, sa pa vedir ki tou bon dimoun pou al dan lesyel. Zeova ti kree later pour ki i vin en Paradi pour imen reste  ladan. Tre byento, Bondye pou fer sa plan orizinal ganny akonpli.—Matye 6:9, 10.

Ler Zezi Kri ek sa group dimoun dan lesyel pou dirize, lape ek lazwa pou egziste dan lemonn antye. (Psonm 37:9-11) Bann dimoun ki dan memwar Bondye pou ganny resisite e pou rezwir lasante parfe. (Akt 24:15) Par zot fidelite anver Bondye, imen obeisan pou ganny sa ki nou premye paran ti perdi—lavi parfe e eternel lo en later ki pou’n vin paradi.—Revelasyon 21:3, 4.

Zeova Bondye i toultan akonpli sa ki i plàn pour fer. Atraver son profet Izai, i ti dir: “Zis parey lapli toransyel ek lanez i desann sorti dan lesyel e i pa retournen, san ki i aroz later, fer li fertil, donn legren sa enn ki senmen e dipen sa enn ki manze, demenm mon parol ki sorti dan mon labous pou vin vre. I pa pou retourn ver mwan san rezilta, me i pou sirman akonpli sa ki mon’n pran plezir ladan, e i pou annan en sikse serten dan sa ki mon’n anvoy li.”—Izai 55:10, 11.

Dan Izai, en liv dan Labib, nou ganny en apersi lo ki mannyer lavi pou ete dan Paradi lo later. I pou napa personn ki pou dir, “mon malad.” (Izai 33:24) Bann zannimo pa pou en danze pour imen. (Izai 11:6-9) Dimoun pou konstri bann zoli lakaz e reste ladan. Zot pou plant manze e manz byen. (Izai 65:21-25) Deplis, Bondye “pou vreman anval lanmor pour touzour, e Souvren Senyer Zeova pou sirman eswiy larm lo tou figir.”—Izai 25:8.

Byento, limanite obeisan pou viv dan sa bann kondisyon ekselan. Zot “pou ganny libere en zour avek pouvwar destrikter ki pe gard li dan lesklavaz, pour partisip dan laliberte ek laglwar bann zanfan Bondye.” (Romen 8:21) Pa i pou vreman gou pour viv pour touzour dan sa paradi promiz lo later! (Lik 23:43) Si depi konmela menm ou azir an armoni avek konnesans egzakt dan Labib e demontre lafwa dan Zeova Bondye ek Zezi Kri, ou pou kapab viv dan sa Paradi. Deplis ou kapab annan konfyans ki i fer sans pour krwar dan en paradi lo later.

[Portre lo paz 3]

U.S. Fish & Wildlife Service, Washington, D.C./NASA

[Portre lo paz 5]

Adan ek Ev ti ganny kree pour viv pour touzour dan en paradi lo later

 [Portre lo paz 6]

Dan Paradi lo later . . .

zot pou konstri lakaz

zot pou plant pye rezen

zot pou ganny beni avek Zeova