“Pran Bokou Plezir Dan Zeova”

“Pran bokou plezir dan Zeova, e i pou donn ou sa ki ou leker i demande.” —PSONM 37:4.

1, 2. Kote sa vre boner i sorti, e konman Lerwa David ti montre sa?

“BYENNERE bann ki pov an-espri, . . . byennere bann ki pran pitye pour lezot, . . . byennere bann ki fer lape.” Sa bann deklarasyon, ansanm avek sis lezot deskripsyon bann dimoun ki byennere, i form par lentrodiksyon sermon Zezi lo montanny, ki’n ganny rikorde par Matye. (Matye 5:3-11) Parol Zezi i donn nou lasirans ki i posib pour nou viv en lavi ere.

² En sanson sakre ki Lerwa David dan ansyen Izrael ti konpoze, i montre ki sa vre boner i sorti kot Zeova. David ti dir: “Pran bokou plezir dan Zeova, e i pou donn ou sa ki ou leker i demande.” (Psonm 37:4) Me konman ki konn Zeova ek plizyer laspe son personnalite i anmenn “bokou plezir”? Konman ki egzamin sa ki i’n fer e sa ki i pou fer pour akonpli son plan i donn lespwar pour resevwar “sa ki ou leker i demande”? Nou pou trouv larepons par egzamin Psonm 37, verse 1 ziska 11.

“Pa zalou”

3, 4. Parey i’n ganny rikorde dan Psonm 37:1, ki konsey David ti donnen, e akoz i apropriye pour nou ekout sa konsey ozordi?

³ Nou pe viv dan “letan difisil” e mesanste i partou. Nou’n vwar parol zapot Pol vin vre: “Bann move dimoun ek bann anbeter, zot pou fer touzour plis progre dan sa ki mal, zot pou anbet lezot e zot osi zot pou ganny anbete.” (2 Timote 3:1, 13) I vreman fasil pour nou ganny afekte par sikse ek prosperite ki bann dimoun mesan i paret pe rezwir! Tousala i kapab fer nou perdi nou lekilib spirityel. Remarke konman sa parol okonmansman Psonm 37 i fer nou konsyan sa danze: “Pa bezwen ankoler akoz bann move dimoun. Pa zalou bann ki pe komet lenzistis.”

⁴ Toulezour nou ganny bonbarde avek nouvel konsernan sa kantite lenzistis ki pe arive. Bann biznesmenn malonnet pe fer frod san ki zot ganny okenn problenm. Bann kriminel i eksplwat bann ki pa kapab defann zot lekor. Bann ki komet mert pa ganny detekte oubyen zot pa ganny pini. Tou sa bann legzanp i montre ki lazistis in ganny koronpi e sa i kapab fer nou ankoler e menas nou lape lespri. Sikse ki bann mesan i paret pe rezwir i kapab menm konmans fer nou annan bann pti zalouzi. Me eski sitiasyon pou amelyore letan nou ankoler? Eski letan nou zalou benefis ki bann mesan i paret pe gannyen, sa pou sanz konsekans ki zot pou rekolte apre? Non, pa ditou! Vreman, napa okenn rezon pour nou “ankoler.” Akoz?

5. Akoz bann move dimoun i parey bann zerb?

⁵ Sa psalmis ti reponn: “Parski, zot pou fletri vitman parey zerb, e parey sa nouvo zerb ver zot pou mor.” (Psonm 37:2) Bann nouvo zerb ver i kapab paret zoli, me en pti moman zot konmans sek e zot mor. Se egzakteman sanmenm ki arive avek bann mesan. Zot prosperite pa pou dire. Ler zot mor, zot bann byen ki zot in gannyen dan en fason malonnet pa pou ni kapab ed zot. Finalman tou dimoun pou bezwen fer fas avek lazistis. Pol ti ekrir: “Rekonpans pour pese i lanmor.” (Romen 6:23) Bann dimoun mesan ek tou bann  ki pa fer sa ki byen pou finalman ganny zot “rekonpans” ki zot merite. Sa kalite lavi ki zot pe viv pa pou abouti dan nanryen!—Psonm 37:35, 36; 49:16, 17.

6. Ki leson nou kapab tire atraver Psonm 37:1, 2?

⁶ Alors, eski nou devret fatig nou avek prosperite bann dimoun mesan ki zis tanporer? Leson ki nou tire dan sa de premye verse Psonm 37 i sa: Pa les zot sikse fer ou sanz ou desizyon ki ou’n fer pour servi Zeova. Plito kontinyen konsantre lo bann rekonpans ek lobzektif spirityel.—Proverb 23:17.

“Met ou Konfyans dan Zeova e fer sa ki byen”

7. Akoz nou devret annan konfyans dan Zeova?

⁷ Sa psalmis i konsey nou: “Met ou konfyans dan Zeova e fer sa ki byen.” (Psonm 37:3a) Kan nou dan traka oubyen menm dan dout, nou bezwen definitivman met nou konfyans dan Zeova. Se li ki ofer sekirite spirityel total. Moiz ti ekrir: “Nenport dimoun ki reste dan landrwa sekre sa enn Tre O pou reste anba lonbraz sa Enn Tou Pwisan.” (Psonm 91:1) Kan nou vwar dimoun deplizanpli mepriz lalwa e sa i fatig nou, nou bezwen pli depan lo Zeova ankor. Kan nou’n foul nou lipye, nou byen kontan si nou kapab apiy lo en zanmi pour ganny sipor. Pareyman, kan nou fer zefor pour reste fidel, nou bezwen sipor Zeova.—Izai 50:10.

8. Konman ki partisip dan minister Kretyen i ed nou pour pa les prosperite bann mesan tro fatig nou?

⁸ En remed pour pa les prosperite bann mesan fatig nou se pour konsantre lo rod bann dimoun senser e ed zot ganny en konnesans egzakt lo plan Bondye. Vi ki mesanste pe ogmante, nou bezwen pli preokip nou avek ed lezot. Zapot Pol ti dir: “Pa manke fer dibyen e ed kanmarad, parski se bann sakrifis koumsa ki fer plezir Bondye.” Pli gran “dibyen” ki nou kapab fer se partaz sa bon nouvel Rwayonm avek lezot. Nou predikasyon i en fason ki nou vreman “rann glwar Bondye.”—Ebre 13:15, 16; Galat 6:10.

9. Eksplik lankourazman David pour “reste lo later.”

⁹ David i kontinyen: “Reste lo later, e azir avek fidelite.” (Psonm 37:3b) Dan letan David, “later” pour li ti sa teritwar ki Zeova ti’n donn Izrael, Later Promiz. Pandan renny Salomon, son bann frontyer ti konmans depi Dann dan nor ziska Ber-Seba dan sid. Sa ti later Izrael. (1 Lerwa 4:25) Ozordi, nenport landrwa kot nou reste, nou pe esper avek enpasyans sa letan kot later antye pou vin en paradi dan nouvo lemonn kot pou annan ladrwatir. Antretan, nou pe reste dan sekirite spirityel.—Izai 65:13, 14.

10. Ki rezilta nou gannyen kan nou “azir avek fidelite”?

¹⁰ Ki rezilta nou pou gannyen kan nou “azir avek fidelite”? En proverb enspire i rapel nou: “En zonm ki annan bann aksyon fidel pou ganny benediksyon an abondans.” (Proverb 28:20) Kan nou fidelman persevere pour pres sa bon nouvel nenport landrwa kot nou reste e avek nenport ki, sirman Zeova i rekonpans nou. Par egzanp, Frank ek son madanm, Rose, ti pran en teritwar pour travay konman pionye  40 an pase dan en lavil dan nor Lekos. Sa pti gin dimoun ki ti’n montre lentere dan laverite laba ti’n elwannyen avek laverite. Sa koup pionye pa ti les sa dekouraz zot. Zot ti konmans prese e fer disip. Ozordi i annan en kongregasyon ki pe progrese dan sa lavil. Fidelite sa koup in vreman anmenn benediksyon Zeova. Avek limilite, Frank i eksplike: “Pli gran benediksyon se ki nou ankor dan laverite e itil pour Zeova.” Wi, kan nou “azir avek fidelite,” nou ganny e apresye bokou benediksyon.

“Pran bokou Plezir dan Zeova”

11, 12. (a) Ki mannyer nou kapab “pran bokou plezir dan Zeova”? (b) Ki lobzektif ou kapab etablir an rapor avek letid personnel, e ki rezilta ou kapab gannyen?

¹¹ Pour fortifye nou relasyon avek Zeova e pour kontinyen annan konfyans dan li, nou bezwen “pran bokou plezir dan Zeova.” (Psonm 37:4a) Ki mannyer nou fer sa? Olye preokip nou avek nou prop sitiasyon, kantmenm i kapab difisil, nou fer Zeova vin nou konsern. En fason pour fer sa se pour pran letan pour lir son Parol. (Psonm 1:1, 2) Eski ou lektir Labib i donn ou bokou plezir? I pou donn ou plezir si ou lir avek en bi pour aprann plis konsernan Zeova. Akoz ou pa arete apre ki ou’n lir en porsyon e demann ou lekor, ‘Ki sa pasaz i ansenny mwan konsernan Zeova?’ Ler ou lir Labib, ou kapab vwar li itil pour gard en pti kaye oubyen en papye obor ou. Sak fwa ou arete pour reflesir lo sinifikasyon sa ki ou pe lir, ekrir en fraz pour rapel ou enn bann kalite Bondye ki ou’n apresye. Dan en lot psonm, David ti sante: “Les bann parol ki sorti dan mon labous ek refleksyon ki sorti dan mon leker vin en keksoz agreab pour ou, O Zeova mon Ros ek mon Liberater.” (Psonm 19:14) Konsantre nou latansyon lo Parol Bondye i en “plezir” pour Zeova e i osi agreab pour nou.

¹² Ki mannyer nou kapab trouv lazwa atraver nou letid ek refleksyon? Nou kapab fer li nou lobzektif pour aprann otan ki nou kapab lo Zeova ek son bann fason fer keksoz. Bann piblikasyon parey Le plus grand homme de tous les temps ek Approchez-vous de Jéhovah * i donn nou ase lenformasyon ki nou kapab reflesir lo la avek lapresyasyon. An retour, David i asir bann dimoun drwat: Zeova “pou donn ou sa ki ou leker i demande.” (Psonm 37:4b) Sanmenm sa kalite konfyans ki ti’n bezwen pous zapot Zan pour ekrir sa parol: “Sa se lasirans ki nou annan dan li: si nou demann keksoz dapre son lavolonte, i pou ekout nou. Alor, si nou konnen ki i ekout nou dan nenport kwa ki nou demande, nou konnen ki nou posed deza sa ki nou’n demande.”—1 Zan 5:14, 15.

13. Ki devlopman dan travay predikasyon ki’n arive dan bokou pei resaman?

¹³ Nou ki anvi reste fidel, nou pli gran lazwa se pour vwar drwa Zeova pour dirize ganny zistifye. (Proverb 27:11) Eski nou leker pa deborde avek lazwa kan nou aprann konsernan travay predikasyon ki nou bann frer pe fer dan bann pei ki ti ganny dominen par en gouvernman diktater? Nou esper avek enpasyans pour vwar lezot devlopman dan bann pei restrikte avan lafen sa sistenm. Bokou serviter Zeova i reste dan bann pei kot aktivite Kretyen i ganny fer san restriksyon. Zot pres bokou avek bann etidyan, refizye, ek lezot ki pe viv tanporerman dan sa bann pei kot zot benefisye avek laliberte relizye. Nou vreman swete ki ler sa bann dimoun i retourn se zot, zot kontinyen les lalimyer laverite klere dan sa fernwanr ki paret enposib pour penetre.—Matye 5:14-16.

“Met ou Lavi dan Lanmen Zeova”

14. Ki levidans i annan ki nou kapab depan lo Zeova?

¹⁴ Pa i soulaz nou pour konnen ki nou bann traka e sa ki paret bann fardo pour nou i kapab ganny tire! Konman? Lerwa David i  eksplike: “Met ou lavi dan lanmen Zeova, depan lo li e li i pou azir.” (Psonm 37:5) Dan nou bann kongregasyon nou annan ase levidans ki nou kapab depan lo Zeova pour sipor. (Psonm 55:22) Bann serviter aplentan parey bann pionye, sirveyan, misyonner, oubyen bann volonter ki servi dan Betel, zot tou zot kapab konfirmen ki nou kapab depan lo Zeova. Akoz ou pa koz avek enn ki ou konnen e demann li konman Zeova in ed li. San dout, ou pou tann bokou leksperyans ki montre ki menm dan bann letan difisil, lanmen Zeova pa zanmen kourt. I toultan fourni bann nesesite lavi.—Psonm 37:25; Matye 6:25-34.

15. Konman ladrwatir pep Bondye i briye?

¹⁵ Kan nou fer Zeova konfyans e vreman met tou nou konfyans dan li, nou kapab eksperyans sa ki sa psalmis i annan pour dir ankor: “I pou sirman fer ou ladrwatir aparet parey lalimyer, e ou lazistis parey [soley] midi.” (Psonm 37:6) Souvan nou ganny mal reprezante konman Temwen Zeova. Me Zeova i ouver lizye bann dimoun ki senser pour ed zot realize ki nou predikasyon i ganny fer akoz lanmour ki nou annan pour Zeova e pour nou prosen. Anmenmtan, kantmenm bokou i mal reprezant nou, nou bon kondwit i vreman evidan. Zeova i soutenir nou dan tou kalite lopozisyon ek persekisyon. An rezilta, ladrwatir pep Bondye i briye parey soley midi.—1 Pyer 2:12.

‘Reste trankil . . . esper avek en gran Dezir’

16, 17. An armoni avek Psonm 37:7, la i letan pour fer kwa, e akoz?

¹⁶ Sa psalmis i kontinyen: “Reste trankil devan Zeova e esper li avek en gran dezir. Pa bezwen ankoler avek okenn dimoun ki pe rod lareisit, avek en dimoun ki pe realiz son bann proze.” (Psonm 37:7) La David pe met lanfaz lo nesesite pour nou esper avek pasyans ziska ki Zeova i azir. Kantmenm lafen sa sistenm pa ankor arive, sa pa en rezon pour nou konplent. Eski nou pa’n vwar ki mizerikord ek pasyans Zeova i pli gran ki nou ti krwar avan? Eski aprezan nou osi nou kapab pran pasyans e gard nou okipe dan sa travay predikasyon avan lafen i arive? (Mark 13:10) La i letan pour nou evite fer keksoz san reflesir, ki kapab priv nou nou lazwa ek nou sekirite spirityel. La i letan pour nou reziste lenfliyans koronpi lemonn Satan plis ankor. La i  osi letan pour nou gard nou prop moralman e pour pa zanmen fer en keksoz ki pou anpes Zeova konsider nou konman en dimoun drwat. Annou kontinyen rezet okenn panse imoral ki vin dan nou lespri e evite konport nou dan en fason ki pa apropriye anver bann dimoun lot sèks, oubyen menm anver bann dimoun menm sèks avek nou.—Kolosyen 3:5.

¹⁷ David i donn nou sa konsey: “Met lakoler dekote e rezet firer; pa bezwen ankoler zis pour fer sa ki mal. Bann malfeter pou ganny retire, me bann ki met lespwar dan Zeova, i sa bann ki pou posed later.” (Psonm 37:8, 9) Wi, avek konfyans nou kapab esper sa letan, ki vreman pros, kot Zeova pou debaras later avek tou koripsyon ek bann ki responsab pour sa bann koripsyon.

“En pti pe Letan ankor”

18, 19. Ki lankourazman ou gannyen dan Psonm 37:10?

¹⁸ “En pti pe letan ankor, sa enn mesan pou nepli la. Wi ou pou egzamin son landrwa, e i pa pou egziste.” (Psonm 37:10) Pa sa parol i ankouraz nou anmezir ki nou apros lafen sa sistenm e lafen lendepandans avek Zeova ki’n zis anmenn maler! Tou kalite gouvernman oubyen lotorite ki zonm in kapab mazinen in konpletman fel. Aprezan nou pe apros sa letan kot nou pou reganny dirize par Bondye. Son Rwayonm pou ganny plase dan lanmen Zezi Kri. I pou pran kontrol total lo bann zafer lemonn e i pou retir tou lennmi Rwayonm Bondye.—Danyel 2:44.

¹⁹ Dan sa nouvo lemonn anba Rwayonm Bondye, rode ki mannyer ou oule, ou pa pou trouv en dimoun “mesan.” Anfet, tou sa ki rebel kont Zeova sa letan, pou ganny retire deswit. Tou sa ki atak son drwa pour dirize oubyen pa oule soumet avek son lotorite pa pou reste lo later. Tou ou vwazen pou annan menm dezir pour fer Zeova plezir. Pa sa pou en vre sekirite! Pou nepli annan lok, ni baro sekirite, ni okenn lezot keksoz ki pou detri konfyans ek boner total!—Izai 65:20; Mika 4:4; 2 Pyer 3:13.

20, 21. (a) Lekel sa bann “ki annan limilite” parey dan Psonm 37:11 i dir, e kote zot trouv “labondans lape”? (b) Ki benediksyon nou pou gannyen si nou imit pli Gran David?

²⁰ Sa letan, “bann ki annan limilite pou posed later.” (Psonm 37:11a) Wi, “bann ki annan limilite” se sa bann ki esper Zeova pour koriz tou sa bann lenzistis ki’n ganny enpoze lo zot. “Zot pou vreman rezwir dan labondans lape.” (Psonm 37:11b) Konmela menm, nou kapab trouv labondans lape dan sa paradi spirityel ki nou gannyen dan vre kongregasyon Kretyen.

²¹ Kantmenm nou pa ankor ganny soulaze avek soufrans, nou soutenir kanmarad e rekonfort bann ki dan depresyon. An rezilta, pep Zeova i trouv vre satisfaksyon. Bann frer ki’n ganny apwente konman berze i pran swen avek nou bezwen spirityel, menm parler nou bezwen fizik, ki ed nou pour andir difikilte akoz nou anvi reste drwat dan lizye Bondye. (1 Tesalonisyen 2:7, 11; 1 Pyer 5:2, 3) Sa lape ki nou annan i en keksoz vreman presye! Nou osi annan lespwar pour viv pour touzour dan sa fitir Paradi kot pou annan lape. Alors, annou imit pli Gran David, Zezi Kri, ki son devouman pour Zeova ti motiv li pour servi fidelman ziska lafen. (1 Pyer 2:21) An fezan sa, nou pou kontinyen trouv lazwa e loue sa enn ki nou pran bokou plezir ladan, Zeova, nou Bondye.

[Not anba lo paz]

Eski ou kapab reponn?

• Ki leson ou’n aprann dan Psonm 37:1, 2?

• Ki mannyer ou kapab “pran bokou plezir dan Zeova”?

• Ki levidans i annan pour montre ki nou kapab depan lo Zeova?

[Kestyon]

[Portre lo paz 23]

“Met ou konfyans dan Zeova e fer sa ki byen”

[Portre lo paz 25]

“Bann ki annan limilite pou posed later”