En Lafen avek Lager

‘Nou annan selman 12 an. Nou napa pouvwar lo politik ek lager, me nou anvi viv! Nou pe esper lape. Eski en zour nou pou vwar lape?’—En group marmay lekol dan senkyenm

‘Nou anvi al lekol, al vwar nou bann zanmi ek fanmiy san ki nou per ki nou ganny kidnap. Mon swete ki gouvernman pou ekoute. Nou anvi en pli bon lavi. Nou anvi lape.’—Alhaji, aze 14

SA BANN parol tousan i fer resorti lespwar bann zenn ki’n soufer pour plizyer lannen akoz lager sivil. Zot zis anvi viv en lavi normal. Me fer lespwar vin en realite i pa en keksoz fasil. Eski en zour nou pou vwar en lemonn kot napa lager?

Diran sa bann dernyen lannen, i’n annan zefor enternasyonal ki’n ganny fer pour esey rezourd serten lager sivil. Sa in ganny fer par met presyon lo bann group ki pe lager pour siny en trete lape. I annan osi serten pei ki’n anvoy solda dan sa bann landrwa pour gard lape, afen ki sa bann lagreman i kapab ganny obzerve. Me napa bokou pei ki annan sa larzan ek lanvi pour vey bann pei kot laenn profon ek mefyans i fer sa bann lagreman lape frazil. Souvan zis apre detrwa semenn ki en lagreman seselfe in ganny sinyen, lager i rekonmans ankor. Parey Lenstiti Resers pour Lape Enternasyonal Stockholm i fer resorti, “i pa fasil pour annan lape ler bann konbatan i annan sa lanvi ek abilite pour kontinyen lager.”

Anmenmtan, sa bann konfli troublan ki pe ravaz sitan en kantite rezyon lo later, i fer bann Kretyen mazin en profesi Labib. Liv Revelasyon i koz konsernan en letan kritik dan listwar imen. I dekrir en seval senbolik e “sa ki ti pe mont li ti ganny pouvwar fer disparet lape lo later.” (Revelasyon 6:4) Sa lager kontinyel ki sa verse pe reprezante i form parti avek lezot siny. Tou sa bann siny ansanm i endike ki nou pe viv dan en letan ki Labib i apel “bann dernyen zour.” * (2 Timote 3:1) Me Parol Bondye i asir nou ki apre ki sa bann dernyen zour in fini, i pou annan lape.

Labib i eksplike dan Psonm 46:9 ki pour kapab annan vre lape, fodre ki lager i arete pa zis dan en rezyon later, me partou lo later. Deplis, sa menm psonm i klerman mansyonn destriksyon bann zarm ki ti ganny servi dan letan Labib. Par egzanp i mansyonn lark, lans ek saret lager. Pareyman ozordi, pour ki lape i egziste, fodre ki bann zarm ki pe ganny prodwir an gran kantite i ganny detri.

Me an realite i pa fizi ek bal ki ankouraz lager me se laenn ek legois. Legois oubyen zalouzi i lakoz prensipal lager, e souvannfwa  laenn i anmenn vyolans. Pour kapab retir sa bann move santiman, fodre ki dimoun i sanz zot fason panse. Zot bezwen ganny edike konman pour viv anpe avek lezot. Pour sa rezon, profet Izai ti byen dir ki lager pou arete selman apre ki dimoun i a “nepli aprann lager.”—Izai 2:4.

Me ozordi nou pe viv dan en lemonn ki pa edik ni adilt ni zanfan valer lape me lenportans lager. I fer lapenn pour vwar ki menm bann zanfan pe aprann touye.

Zot aprann touye

Alaz 14 an, Alhaji ti nepli dan servis militer konman en solda. I ti annan zis dis an ler bann troup rebel ti tyonbo li e montre li ki mannyer pour servi en fizi AK-47. Apre ki i ti’n ganny forse pour vin en solda, i ti al atak bann landrwa pour ganny manze e bril bann lakaz. I ti osi touy e fer bokou ditor lezot dimoun. Ozordi, i difisil pour Alhaji oubliy son leksperyans dan lager e pour viv en lavi normal. Abraham i en lot zanfan ki ti en solda. I ti osi aprann touye e i pa ti oule rann son zarm. I ti dir: “Si zot dir mwan ale san mon fizi, mon pa konnen ki mon pou fer, ki mannyer mon pou siport mon lekor.”

I annan plis ki 300,000 zanfan, garson konman fiy, ki pe lager e mor konman bann solda dan bann konfli sivil ki pe kontinyen ravaz nou plannet. En sef rebel ti dir sa konsernan sa bann zanfan: “Zot obeir lord, zot pa trakase si zot pou retourn kot zot madanm oubyen fanmiy; e zot pa per.” Toudmenm, sa bann zanfan i anvi e merit en pli bon lavi.

Pour bann dimoun ki viv dan bann pei devlope, i paret difisil pour zot imazin sitiasyon terib sa bann zanfan ki pe lager. Kantmenm sa, bokou zanfan dan bann pei devlope pe aprann lager dan zot prop lakour. Dan ki fason?

Annou konsider legzanp José ki reste dan sid les Lespanny. I ti en adolesan ki ti kontan fer bann sport parey karate. Keksoz ki i ti pli kontan, ti son gran sab Zaponnen ki son papa ti’n aste pour li pour Nwel. I ti osi kontan bann zwe video, sirtou bann ki vyolan. Le 1 Avril, 2000, i ti kopye aksyon vyolan son ero dan bann zwe video. San okenn kontrol, i ti vyolanman touy son papa, son manman, ek son ser avek sa menm sab ki son papa ti’n donn li. Plitar i ti eksplik avek lapolis: “Mon ti anvi viv mon tousel dan lemonn; mon pa ti anvi mon paran pe rod mwan.”

Plizyer komanter in ganny fer lo lefe bann divertisman vyolan. Dave Grossman ki en ekriven e en zofisye militer ti fer resorti: “Nou pe ariv sa staz kot nou nepli sansib, kot fer soufer lezot in vin en sours divertisman: kot dimoun i vwar li gou pour imazinen ki se zot ki pe fer sa bann aksyon, olye annan en degou. Nou pe aprann touye, e nou pe aprann kontan touye.”

Alhaji ek José ti tou le de aprann touye. Zot ti napa lentansyon pour vin bann kriminel. Me formasyon ki zot in gannyen in sanz zot fason panse. Bann tel formasyon—ki swa pour zanfan oubyen adilt—i bann premye pa ki fer en dimoun enplike dan vyolans ek lager.

Aprann viv anpe olye Lager

Lape dirab pa pou zanmen posib si dimoun pe aprann touye. Plis ki 2,700 an pase, profet Izai ti ekrir: “Si selman ou atantif anver mon bann komannman! Alor ou lape pou vin zis parey en larivyer.” (Izai 48:17, 18) Ler dimoun i ganny sa konnesans egzakt lo Parol Bondye e aprann kontan lalwa Bondye, zot rezet e ay vyolans ek lager. Konmela menm, bann paran i kapab fer sir ki bann zwe ki zot zanfan i zwe pa ankouraz vyolans. Bann adilt i kapab aprann sirmont laenn ek legois. Atraver bokou legzanp, Temwen Zeova in dekouver ki Parol Bondye i annan sa pouvwar pour sanz personnalite bann dimoun.—Ebre 4:12

 Annou get legzanp Hortêncio. I ti en zennonm ler i ti ganny forse pour vin en solda. I ti eksplike: “Formasyon militer ti annan pour bi fer nou ganny sa dezir pour touy lezot dimoun e pour pa per pour touye.” I ti konbat dan en lager sivil Lafrik ki ti dir pour lontan. I dir: “Sa lager ti afekte mon personnalite. Ziska ozordi mon ankor mazin tou keksoz ki mon ti fer. Mon regret en kantite tou sa bann keksoz ki mon ti ganny forse pour fer.”

Ler en kanmarad solda ti koz avek Hortêncio lo Labib, sa ti tous son leker. Promes Bondye dan Psonm 46:9 pour met en lafen avek tou kalite lager ti enpresyonn li. Pli i ti etidye Labib, pli i pa ti anvi lager. Pa bokou letan apre, li ek de son kanmarad ti ganny pouse dan larme, e zot ti dedye zot lavi avek Zeova Bondye. Hortêncio i eksplike: “Laverite dan Labib ti ed mwan pour annan lanmour pour mon lennmi. Mon ti realize ki vi ki mon ti pe lager, mon ti pe fer pese kont Zeova, akoz Bondye i dir ki nou pa devret touy nou prosen. Pour montre sa kalite lanmour, mon ti bezwen sanz mon fason panse e pa konsider dimoun konman nou bann lennmi.”

Sa bann leksperyans koumsa i montre ki lansennyman Labib i vreman promot lape. Sa i pa sirprenan. Profet Izai ti deklare ki i annan en relasyon direk ant lansennyman Bondye ek lape. I ti predir: “Tou ou garson pou bann dimoun ki pou ganny ansennyen par Zeova, e lape ou bann garson pou an abondans.” (Izai 54:13) Sa menm profet ti predir en letan ler dimoun sorti dan tou nasyon pou al ver vre ladorasyon Zeova Bondye pour aprann son bann prensip. Ki rezilta sa pou anmennen? “Zot pou bezwen forz zot lepe an pyos e zot lans an sizay. Nasyon pa pou lev lepe kont nasyon e zot pou nepli aprann lager.”—Izai 2:2-4.

An armoni avek sa profesi, Temwen Zeova pe fer en travay edikasyonnel dan lemonn antye. Atraver sa travay, plizyer milyon dimoun in ganny ede pour sirmont laenn ki rasin lager antre imen.

En Garanti pour Lape dan Lemonn

Apard ki fourni ledikasyon, Bondye in etablir en gouvernman, oubyen “Rwayonm,” ki kapab anmenn lape dan lemonn antye. Pour sa menm rezon ki Labib i dekrir sa Dirizan ki Bondye in swazir, Zezi Kri, konman “Prens Lape.” I osi asir nou ki “pou napa en lafen avek renny sa prens e avek lape.”—Izai 9:6, 7.

Ki garanti nou annan ki dominasyon Kris pou reisi elimin tou kalite lager? Profet Izai i azoute: “Se avek devouman ki Zeova pou fer sa.” (Izai 9:7) Bondye i anvi e annan sa mwayen pour prezerv lape pour touzour. Zezi i annan konfyans total dan sa promes. Pour sa rezon ki i ti ansenny son bann disip pour priye ki Rwayonm Bondye i vini e ki lavolonte Bondye i ganny akonpli lo later. (Matye 6:9, 10) Ler sa demann senser i finalman ganny reponn, lager pa pou zanmen devaste later ankor.

[Not anba lo paz]

[Portre lo paz 5]

Lenstriksyon Labib i promot vre lape