Fodre ki tou Kreasyon i deklar Laglwar Zeova

“Donn Zeova laglwar ek lafors. Donn Zeova sa laglwar ki pour son non.”—PSONM 96:7, 8.

1, 2. Kote louanz pour Bondye i sorti, e lekel ki ganny ankouraze pour zwenn ansanm?

DAVID, garson Zese, ti grandi konman en berze dan rezyon Betleenm. Souvan ler i ti pe vey bann troupo son papa dan sa bann laplenn dezerte, i ti’n bezwen obzerv sa lesyel ranpli avek zetwal aswar kan tou keksoz i trankil. San dout, sa bann souvenir vivan ti revin dan son lespri kan, anba lenspirasyon lespri sen Bondye, i ti konpoz e sant sa bann zoli parol dan diznevyenm Psonm: “Lesyel pe deklar laglwar Bondye; e letandi pe anons travay son lanmen. Zot lavwa in rezonnen lo later antye e zot parol in fer letour lemonn.”—Psonm 19:1, 4.

² San okenn parol ek lavwa, sa lesyel ekstraordiner ki Zeova in kree i deklar son laglwar, zour apre zour, lannwit apre lannwit. Kreasyon pa zanmen arete deklar laglwar Bondye. Ler nou reflesir lo sa temwannyaz silansye ki kreasyon pe donnen “partou lo later” pour tou son zabitan trouve, nou santi nou pti pti. Me sa temwannyaz silansye ki kreasyon i donnen pa ase. Bann imen fidel i ganny ankouraze pour zot osi donn en temwannyaz par zot parol. En psalmis ki nou pa konn son non ti adres bann adorater fidel avek sa parol enspire: “Donn Zeova laglwar ek lafors. Donn Zeova sa laglwar ki pour son non.” (Psonm 96:7, 8) Bann ki annan en relasyon pros avek Zeova i byen kontan pour reponn sa lapel. Me kwa ki enplike dan donn Bondye laglwar?

3. Dan ki fason bann imen i donn Bondye laglwar?

³ I demann plis ki zis parol pour glorifye Bondye. Bann Izraelit dan lepok Izai ti glorifye Bondye avek zot lalev, me laplipar zot ti mank senserite. Atraver Izai, Zeova ti dir: “Sa pep in dir avek zot labous ki zot pros avek mwan, e zot in glorifye mwan zis avek zot lalev, e zot in elwanny zot leker avek mwan.” (Izai 29:13) Nenport louanz ki sa bann dimoun ti pe donnen ti napa valer. Pour ki nou louanz i annan valer i devret sorti dan en leker ki ranpli avek lanmour pour Zeova ek en  lapresyasyon senser pour son laglwar inik. Zis Zeova tousel ki Kreater. I Tou Pwisan, i sa Enn ki drwat, e i legzanp parfe lanmour. Li tousel ki kapab delivre nou e sa enn ki annan tou drwa pour dirize. Tou kreatir spirityel ek imen i devret soumet avek li. (Revelasyon 4:11; 19:1) Si nou vreman krwar sa bann keksoz, annou glorifye li avek tou nou leker.

4. Ki lenstriksyon Zezi ti donnen konsernan konman pour glorifye Bondye, e ki mannyer nou kapab akonpli zot?

⁴ Zezi Kri ti dir nou konman pour glorifye Bondye. I ti dir: “Mon Papa i ganny glorifye ler zot raport bokou fri e par sa zot montre ki zot mon bann disip.” (Zan 15:8) Konman ki nou raport bokou fri? Premyerman, par partisip plennman dan predikasyon sa “Bonn Nouvel Rwayonm” e dan sa fason zwenn ansanm avek tou kreasyon pour ‘anons’ “bann kalite envizib” Bondye. (Matye 24:14; Romen 1:20) Deplis, dan sa fason nou tou nou annan en partisipasyon—direk oubyen endirek—pour fer bann nouvo disip ki zwenn avek nou pour fer Zeova ganny plis louanz. Dezyenmman, nou devlop bann fri ki ganny prodwir dan nou par lespri sen e fer tou nou mye pour imit bann kalite remarkab Bondye. (Galat 5:22, 23; Efezyen 5:1; Kolosyen 3:10) Alors, nou kondwit toulezour i glorifye Bondye.

“Lo Later antye”

5. Eksplike konman Pol ti met lanfaz lo responsabilite bann Kretyen pour glorifye Bondye par partaz zot lafwa avek lezot.

⁵ Dan son let pour bann Romen, Pol ti met lanfaz lo responsabilite bann Kretyen pour glorifye Bondye par partaz zot lafwa avek lezot. En tenm prensipal dan Romen se ki selman bann ki demontre lafwa dan Zezi Kri ki kapab ganny sove. Dan Romen sapit 10, Pol ti montre ki bann Zwif dan son letan ti ankor pe sey vin bann dimoun drwat par swiv Lalwa Moiz, kan sa ler “Kris [ti] lafen lalwa.” Alor, Pol ti dir, “si par ou labous ou dir devan tou dimoun ki Zezi i limenm Senyer, e si ou [demontre lafwa, NW ] ki Bondye in resisit li parmi bann mor, ou pou ganny sove.” Depi sa letan, i’n “napa okenn distenksyon ant Zwif ek Grek; zot tou zot annan menm Senyer ki donn son benediksyon tou sa ki apel li. Parski parey Lekritir i dir: ‘Tou sa ki envok non Senyer pou ganny sove.’ ”—Romen 10:4, 9-13.

6. Konman Pol ti aplik Psonm 19:4?

⁶ Apre sa, Pol ti bezwen demande: “Ki mannyer zot pou envok li si zot pa [annan lafwa, NW ] dan li? E ki mannyer zot pou [annan lafwa, NW ] dan li san ki zot in tann koz lo li? E ki mannyer zot pou tann koz lo li si personn pa anons li?” (Romen 10:14, 15) Pol i dir sa konsernan Izrael: “Pa tou ki’n aksepte Levanzil.” Akoz Izrael pa ti obeir oubyen aksepte Levanzil? Zot pa ti obeir akoz zot ti mank lafwa, non pa akoz zot ti mank loportinite. Pol i montre sa par sit Psonm 19:4 e aplik li avek travay predikasyon olye ki avek temwannyaz silansye kreasyon. I dir: “Lekritir i dir: ‘Zot lavwa in rezonnen lo later antye, e zot parol in fer letour lemonn.’ ” (Romen 10:16, 18) Wi, zis parey bann kreasyon ki napa lavi i glorifye Zeova, bann Kretyen premye syek ti pres sa bon nouvel delivrans partou kote e alor loue Bondye “lo later antye.” Dan son let pour bann Kolosyen, Pol ti osi dekrir ziska ki degre sa bon nouvel ti’n propaze. I ti dir ki sa bon nouvel ti’n ganny prese “avek tou dimoun dan lemonn antye.”—Kolosyen 1:23.

 Bann Temwen devoue

7. Dapre Zezi, ki responsabilite bann Kretyen i annan?

⁷ I tre probab ki Pol ti ekrir son let pour bann Kolosyen apepre 27 an apre lanmor Zezi Kri. Konman ki travay predikasyon ti’n kapab propaz ziska Kolos dan zis en pti gin letan koumsa? Sa ti arive akoz bann Kretyen premye syek ti devoue, e Zeova ti beni zot devouman. Zezi ti’n predir ki son bann disip ti pou bann proklanmater aktif kan i ti dir: “Me avan, Bonn Nouvel i bezwen ganny anonse avek tou bann nasyon.” (Mark 13:10) Avek sa profesi, Zezi ti azout sa komannman ki ganny rikorde dan bann dernyen verse Levanzil Matye: “Ale e fer tou pep vin mon bann disip. Batiz zot o non di-Per, di-Fis e di-Sent-Espri. Ansenny zot pour obei tou sa ki mon’n konmande.” (Matye 28:19, 20) Pa bokou letan apre ki Zezi ti’n mont dan lesyel, son bann disip ti konmans akonpli sa parol.

8, 9. Dapre Akt, konman bann Kretyen ti reazir anver komannman Zezi?

⁸ Apre ki lespri sen ti’n ganny verse zour Lapannkot lannen 33 N.L., premye keksoz ki bann disip fidel Zezi ti fer se ale e prese. Zot ti koz avek sa lafoul an Zerizalenm konsernan “bann mervey ki Bondye in fer.” Zot predikasyon ti byen efikas, e “anviron 3000 dimoun” ti batize. Bann disip ti kontinyen loue Bondye piblikman e avek devouman, e zot ti ganny bann bon rezilta.—Akt 2:4, 11, 41, 46, 47.

⁹ Bann sef relizye ti deswit konmans remark aktivite sa bann Kretyen. Zot ti donn lord pour Pyer ek Zan aret prese, vi ki sa de zapot ti pe koz avek fransiz e sa ti trouble zot. Bann zapot ti reponn: “[Nou] pa kapab aret koz lo keksoz ki nou’n war e tande.” Apre ki zot ti’n ganny menase e large, Pyer ek Zan ti retourn kot zot bann frer, e zot tou zot ti priy Zeova ansanm. Avek kouraz, zot ti demann Zeova: “Permet ou bann serviter anons ou mesaz avek lasirans san okenn lafreyer.”—Akt 4:13, 20, 29.

10. Ki kalite lopozisyon ki bann vre Kretyen ti konmans gannyen, e konman zot ti reazir?

¹⁰ Sa lapriyer ti an armoni avek lavolonte Zeova, parey levidans ti montre en pe letan plitar. Bann zapot ti ganny arete e apre ganny large dan en fason mirakile par en lanz. Sa lanz ti dir zot: “Ale, met zot debout dan Tanp e anons lepep sa mesaz konsernan sa nouvo Lavi.” (Akt 5:18-20) Parski bann zapot ti obeir, Zeova ti kontinyen beni zot. Alors, “toulezour zot ti kontinyen prese dan Tanp ek dan bann lakaz e anons Zezi konman Mesi.” (Akt 5:42) I kler ki lopozisyon sever pa ti zanmen kapab aret bann disip Zezi pour donn Bondye laglwar an piblik.

11. Ki latitid bann premye Kretyen ti annan anver travay predikasyon?

¹¹ Pa bokou letan apre, Etyenn ti ganny arete e ganny saboule avek ros ziska i mor. Apre ki Etyenn ti’n ganny touye, i ti annan persekisyon sever ki ti swiv an Zerizalenm. Tou bann disip eksepte bann zapot ti forse sov lwen avek Zerizalenm. Eski zot ti dekouraze par sa persekisyon? Pa ditou. Nou lir: “Bann krwaryan ki ti’n disperse ti al partou pour anons Levanzil.” (Akt 8:1, 4) Dimoun ti kontinyen vwar sa devouman pour anons laglwar Bondye. Dan Akt sapit 9, nou lir ki kan Sol, sa Farizyen ki sorti Tars, ti pe vwayaze pour al Damas pour konmans persekit bann disip Zezi laba, i ti vwar Zezi dan en vizyon e i ti vin aveg. Ler i ti ariv Damas, Ananyas ti geri Sol dan en fason mirakile. Ki premye keksoz ki Sol—plitar koni konman zapot Pol—ti fer? Resi i dir: “[I] ti konmans prese deswit dan bann sinagog e i ti anonse ki Zezi i Garson Bondye.”—Akt 9:20.

Tou Dimoun ti partisip dan Predikasyon

12, 13. (a) Dapre bann istoryen, kwa ki ti remarkab konsernan premye kongregasyon Kretyen? (b) Konman liv Akt ek parol Pol i an armoni avek deklarasyon sa bann istoryen?

¹² Partou dimoun i rekonnet ki dan  kongregasyon Kretyen premye syek tou dimoun ti partisip dan travay predikasyon. Philip Schaff i ekrir sa lo bann Kretyen dan sa letan: “Tou kongregasyon ti en kominote misyonner, e tou Kretyen ti en misyonner.” (History of the Christian Church) Dan son liv The Glorious Ministry of the Laity, W. S. Williams i fer resorti: “Levidans zeneral se ki tou Kretyen dan Legliz premye syek, sirtou bann ki ti annan don spirityel ekstraordiner [bann don lespri], ti pres levanzil.” I osi fer resorti avek lasirans: “I pa ti zanmen lentansyon Zezi Kri ki predikasyon i vin en privilez ki ganny rezerve zis pour en serten group dimoun.” Menm Celsus, en lennmi bann vre Kretyen dan lepase, ti ekrir: “Bann ki fer lalenn, bann kordonnyen, bann ki fer kwir avek lapo zannimo, bann senp dimoun san gran ledikasyon, ti bann predikater levanzil ki devoue.”

¹³ Bann rikord istorik dan liv Akt i montre ki sa bann deklarasyon i vre. Zour Lapannkot lannen 33 N.L., apre ki lespri sen ti ganny verse, tou bann disip, zonm konman fanm, ti anons piblikman bann mervey ki Bondye in fer. Apre persekisyon ki ti vin apre lanmor Etyenn, tou Kretyen ki ti’n disperse dan lezot landrwa ti pres sa bon nouvel partou. Apepre 28 an plitar, Pol ti pe ekrir tou bann Kretyen Ebre, pa zis en pti group klerze, kan i ti dir: “Alor, atraver li, annou touzour rann glwar Bondye, setadir, annou toultan loue son non par nou labous.” (Ebre 13:15) Pol ti donn son prop pwennvi lo travay predikasyon, an dizan: “Pa akoz mon anons Levanzil ki mon annan rezon vant mon lekor. Mon trouv mwan dan lobligasyon. Maler pour mwan si mon pa anons Levanzil!” (1 Korentyen 9:16) I kler ki tou Kretyen dan premye syek ti santi menm parey.

14. Ki mannyer lafwa ek predikasyon i relye avek kanmarad?

¹⁴ Annefe, en vre Kretyen i devret partisip dan travay predikasyon parski i relye etrwatman avek son lafwa. Pol ti dir: “Dimoun ki [annan lafwa, NW ] dan son leker, i ganny zistifye, e sa ki anons avek son labous pou ganny sove.” (Romen 10:10) Eski se zis en pti group dan kongregasyon—parey en group klerze—ki demontre lafwa e alor annan sa responsabilite pour prese? * Byensir ki non! Tou vre Kretyen i devlop en lafwa solid dan Senyer Zezi Kri e zot ganny motive pour  anons piblikman zot lafwa avek lezot. Sankwa, zot lafwa i mor. (Zak 2:26) Parski tou Kretyen fidel dan premye syek Nou Lepok ti demontre lafwa dan sa fason, Zeova ti ganny loue en kantite.

15, 16. Donn bann legzanp pour montre ki travay predikasyon ti progrese malgre bann problenm.

¹⁵ Dan premye syek, Zeova ti beni son pep avek ogmantasyon malgre problenm anndan e an deor kongregasyon. Par egzanp, Akt sapit 6 i rikord en dezakor ant bann dimoun ki ti koz Ebre ek bann ki ti koz Grek ki ti’n konverti. Sa problenm ti ganny trete par bann zapot. An rezilta, nou lir: “Parol Bondye ti kontinyen fannen; lakantite bann ki ti krwar dan Zezi ti ogmant bokou dan Zerizalenm. En gran kantite pret ti aksepte lafwa.”—Akt 6:7.

¹⁶ Plitar, bann presyon politik ti devlope ant Lerwa Zide, Erod Agripa, ek bann dimoun Tir ek Sidon. Zabitan sa bann lavil ti fer bann propozisyon lape pour flat Erod Agripa, e an repons Erod ti donn en diskour piblik. Sa lafoul ki ti’n rasanble ti konmans kriye: “Sa pa en zonm ki pe koze la, me en bondye!” Dan sa menm moman, lanz Zeova ti frap Erod Agripa, e i ti mor “parski i ti gard loner ki pour Bondye pour limenm.” (Akt 12:20-23) Sa ti en sok pour bann dimoun ki ti’n met zot lespwar dan bann dirizan imen! (Psonm 146:3, 4) Me bann Kretyen ti kontinyen glorifye Zeova. An rezilta, “mesaz Parol Bondye ti fannen e miltipliye plis ankor” malgre sa bann problenm politik.—Akt 12:24.

Dan premye Syek ek konmela

17. Dan premye syek, ki en group dimoun ki ti kontinyen agrandi ti zwenn ansanm pour fer?

¹⁷ Wi, dan bann kongregasyon Kretyen dan premye syek ti annan bann dimoun ki ti loue Zeova aktivman e avek devouman. Tou bann Kretyen fidel ti partisipe pour pres sa bon nouvel. Serten ti zwenn bann ki ti pare pour ekoute e, parey Zezi ti dir, bann disip ti ansenny zot tou bann keksoz ki i’n komande. (Matye 28:19) An rezilta, kongregasyon ti agrandi, e bokou plis dimoun ti donn Zeova louanz parey Lerwa David dan letan ansyen ti fer. Zot tou zot ti fer rezonnen sa parol enspire: “Mon loue ou, O Zeova mon Bondye, avek tou mon leker, e mon pou glorifye ou non pour touzour, akoz ou annan en gran labonte leker anver mwan.”—Psonm 86:12, 13.

18. (a) Ki diferans ki ganny fer resorti ant bann kongregasyon Kretyen premye syek ek Kretyente ozordi? (b) Ki nou pou vwar dan nou prosen lartik?

¹⁸ Alors, parol sa profeser larelizyon Allison A. Trites i fer reflesir bokou. Par konpar Kretyente dan nou letan avek vre larelizyon Kretyen dan premye syek, i ti dir: “Bann legliz denozour i normalman ogmante par ogmantasyon natirel (kan en zanfan i aksepte larelizyon son fanmiy) oubyen par transfer (kan manm en larelizyon i transfer dan en lot legliz dan sa menm larelizyon). Me dan Akt, sa ogmantasyon ti refer avek bann nouvo dimoun ki ti konverti pour vin Kretyen, parski kongregasyon ti’n fek konmans son travay.” Eski sa i vedir ki larelizyon vre Kretyen pe nepli ogmante dan sa fason ki Zezi ti dir i devret ogmante? Byensir ki non. Zis parey bann Kretyen dan premye syek, bann vre Kretyen ozordi i osi devoue pour donn Bondye louanz an piblik. Nou pou vwar sa dan nou prosen lartik.

[Not anba lo paz]

Eski ou kapab eksplike?

• Dan ki fason nou glorifye Bondye?

• Ki laplikasyon Pol ti fer lo Psonm 19:4?

• Ki mannyer lafwa ek predikasyon i relye avek kanmarad?

• Kwa ki ti remarkab avek kongregasyon Kretyen dan premye syek?

[Kestyon]

[Portre lo paz 20]

Courtesy of Anglo-Australian Observatory, photograph by David Malin

[Portre lo paz 21]

Lesyel pe konstaman donn levidans laglwar Zeova

[Portre lo paz 23]

Travay predikasyon ek lapriyer i relye etrwatman avek kanmarad