I pli irzan aprezan pour nou veye
I pli irzan aprezan pour nou veye
“[Kontinyen, NW ] veye alor, akoz zot pa konnen ki zour zot Senyer pou arive.”—MATYE 24:42.
1, 2. Kwa ki montre ki nou pe viv dan letan lafen sa sistenm?
“PLIS ki tou lezot keksoz, ventyenm syek in ganny marke par lager.” Sa i sa ki ekriven Bill Emmott in dir. Emmott i rekonnet ki toudilon listwar, imen in santi lefe lager ek vyolans, me i azoute: “Ventyenm syek ti diferan, pa dan lesans ki nou’n eksperyans lager, me an rapor avek lentansite sa bann lager. I ti sa premye syek ki nou’n vreman eksperyans en konfli mondyal . . . Deplis, pour aksantye sa pwen, ti napa zis enn sa konfli mondyal, me de.”
2 Zezi Kri ti predir ki pou annan lager ant ‘nasyon kont nasyon e rwayonm kont rwayonm.’ Me sa i zis en laspe sa ‘siny ki pou endik prezans Kris ek lafen sa sistenm.’ Dan sa fame profesi, Zezi ti osi mansyonn lafanmin, lepidemi, tranbleman-de-ter. (Matye 24:3, 7, 8; Lik 21:6, 7, 10, 11) Sa bann maler in ogmante e vin pli pir dan plizyer laspe. Partou kote, zonm in vin move. Sa nou kapab vwar dan zot latitid anver Bondye e anver zot prosen. I kler ki moralite in degrade e krim ek vyolans in ogmante. Zonm i kontan larzan olye kontan Bondye, zot preokip zot zis avek lanmizman. Tousala i montre ki nou pe viv dan “letan difisil.”—2 Timote 3:1-5.
3. Ki lefe “bann siny ki konsern sa letan ki nou pe viv ladan” i devret annan lo nou?
3 Ki mannyer ou pe get sa deteryorasyon dan bann zafer imen? Bokou dimoun pa fatig zot, serten pa ni menm ganny touse letan zot vwar sa bann keksoz enkyetan ki pe arive. Bann dimoun ki annan pouvwar ek bann savan dan sa lemonn pa kapab konpran sinifikasyon “bann siny ki konsern sa letan ki nou pe viv ladan.” Ni bann sef relizye pa’n kapab donn en bon gidans dan sa domenn. (Matye 16:1-3) Me Zezi ti averti son bann disip: “[Kontinyen, NW ] veye alor, akoz zot pa konnen ki zour zot Senyer pou arive.” (Matye 24:42) La Zezi pa pe zis ankouraz nou pour veye me pour ‘kontinyen veye.’ Pour kontinyen veye, nou bezwen reste lo nou gard e reste vizilan. Sa pa zis vedir ki nou admet nou pe viv dan bann dernyen zour, e ki nou rekonnet nou pe viv dan letan difisil. Nou bezwen annan en konviksyon ferm ki “lafen tou keksoz i pros.” (1 Pyer 4:7) Se la ki nou pou vey avek plis vizilans. Alors, kestyon ki nou bezwen reflesir lo la se: ‘Kwa ki pou ed nou ranforsi nou konviksyon ki lafen i pros?’
4, 5. (a) Kwa ki pou ranforsi nou konviksyon ki lafen sa sistenm mesan i pros, e akoz? (b) Nonm en fason ki letan Noe ek prezans Fis-de-Lonm i parey.
4 Annou vwar sitiasyon lo later zis avan en levennman inik dan listwar imen ti arive—sa gran Deliz dan letan Noe. Dimoun ti sitan move ki sa ti ‘fer leker Zeova fer mal.’ I ti dir: “Mon pe al efas zonm ki mon’n kree lo sirfas later.” (Zenez 6:6, 7) I ti fer egzakteman sanmenm. Zezi ti montre ki sa letan ek nou letan i parey, an dizan: “Larive Fis-de-Lonm pou parey sa ki ti arive dan letan Noe.”—Matye 24:37.
5 I fer sans pour dir ki Zeova i santi parey i ti santi avan Deliz konsernan sa lemonn ki nou pe viv ladan. Vi ki i ti anmenn en lafen avek sa lemonn mesan dan letan Noe, sirman i pou detri sa lemonn mesan dan nou letan. Ler nou konpran pli byen konman sa letan ek nou letan i parey, sa i merit ranforsi nou konviksyon ki lafen sa sistenm i pros. Alor, dan ki fason zot parey? I annan omwen senk fason. Premye fason se ki en lavertisman ti klerman ganny donnen konsernan destriksyon.
Averti “konsernan Keksoz ki ziska prezan Personn pa ti ankor war”
6. Ki Zeova ti determinen pour fer dan letan Noe?
6 Dan letan Noe, Zeova ti fer sa deklarasyon swivan: “Mon pa pou kontinyen toler zonm pour touzour, parski i laser li osi. Alor son bann zour pou ariv ziska san ven an.” (Zenez 6:3) Ler sa desizyon ti ganny fer an 2490 A.N.L., sa ti mark konmansman lafen sa lemonn mesan. Zis mazinen ki sa ti vedir pour bann ki ti pe viv sa letan! Dan ankor zis 120 an, Zeova ti pou anmenn “en deliz delo lo later pour detri tou laser anba lesyel ki annan lafors lavi dan zot.”—Zenez 6:17.
7. (a) Ki mannyer Noe ti reazir letan i ti ganny averti ki en Deliz ti pou vini? (b) Ki mannyer nou devret reazir anver bann lavertisman konsernan lafen sa sistenm?
7 Noe ti ganny averti konsernan sa katastrof ki ti pe al arive plizyer lannen avan. I ti byen servi letan pour prepar li pour kapab sirviv. Zapot Pol ti dir: “Noe ti ekout lavertisman ki Bondye ti donn li konsernan keksoz ki ziska prezan personn pa ti ankor war. Noe ti obei e konstri en lars pour sov son fanmir.” (Ebre 11:7) Me ki nou pou dir lo nou? Apepre 90 lannen in pase depi ki bann dernyen zour sa sistenm in konmanse an 1914. Definitivman nou dan “letan lafen.” (Danyel 12:4) Ki mannyer nou devret reakte anver bann lavertisman ki nou’n gannyen? Labib i dir: “Sa ki fer lavolonte Bondye i reste eternelman.” (1 Zan 2:17) Alor, la i letan pour fer lavolonte Zeova an gardan antet ki letan i vreman kourt.
8, 9. Ki lavertisman ki’n ganny donnen dan nou letan, e konman sa bann lavertisman pe ganny donnen?
8 Dan nou letan, bann etidyan Labib senser in aprann dan Lekritir enspire ki sa sistenm pou ganny detrir. Eski nou krwar sa? Remarke ki Zezi Kri ti dir klerman: “Sa pou en lepok gran [ladetres, NW ], pli terib ki tou sa ki’n deza annan avan, depi konmansman lemonn ziska konmela, e pa pou zanmen ariv ankor.” (Matye 24:21) Zezi ti dir osi ki i pou vin konman sa Ziz ki Bondye pou apwente e i pou separ bann dimoun parey en berze i separ mouton avek kabri. Bann ki pa ganny trouve diny pou ganny “pinisyon eternel, me bann bon pou ganny lavi eternel.”—Matye 25:31-33, 46.
9 Zeova in kontinyen atir latansyon son pep lo sa bann lavertisman an servan bann rapel atan. Sa in vin atraver nouritir spirityel ki ‘lesklav fidel e pridan’ in fourni. (Matye 24:45-47) Deplis, tou nasyon, tribi, lalang, ek pep pe ganny demande pour “donn Bondye loner e rann li glwar, parski ler son zizman in arive.” (Revelasyon 14:6, 7) En par enportan sa mesaz ki Temwen Zeova pe prese partou lo later i sa lavertisman ki Rwayonm Bondye pou byento retir sa bann gouvernman imen. (Danyel 2:44) Nou pa devret pran sa lavertisman alalezer. Bondye Tou Pwisan i touzour gard son parol. (Izai 55:10, 11) I ti fer li dan letan Noe, e i pou fer li dan nou letan.—2 Pyer 3:3-7.
Vis seksyel i partou kote
10. Ki nou kapab dir konsernan vis seksyel dan letan Noe?
10 Nou letan i koresponn avek letan Noe dan en lot fason. Zeova ti demann sa premye zonm ek madanm pour “ranpli later” avek imen, an servan zot abilite ki Bondye ti’n donn zot pour annan relasyon dan laranzman maryaz. (Zenez 1:28) Dan letan Noe, bann lanz dezobeisan ti sali bann imen avek zot kontak seksyel ki ti kont natir. Zot ti desann lo later, pran lekor en imen, e reste avek bann zoli madanm. Zot ti prodwir bann zanfan ki lanmwatye imen e lanmwatye demon—bann Nefilim. (Zenez 6:2, 4) Pese sa bann lanz visye in ganny konpare avek bann relasyon seksyel kont natir ki ti pe arive Sodonm ek Gomor. (Zid 6, 7) An rezilta, vis seksyel ti partou dan sa letan.
11. Ki sitiasyon ozordi konsernan moralite ki parey avek letan Noe?
11 Ki sitiasyon ozordi lo moralite? Dan sa bann dernyen zour, lavi bokou dimoun i depan lo sèks. Zapot Pol i byen dekrir sa bann dimoun konman bann ki’n “perdi tou pider.” Bokou zot in “abandonn zot lekor dan tou sort vis e zot fer tou sort move keksoz san okenn kontrol.” (Efezyen 4:19) Pornografi, sèks avan maryaz, labi zanfan, ek omoseksyalite i partou. Serten pe deza “ganny pini” par bann maladi ki ganny transmet par sèks, bann fanmiy kase, ek lezot problenm sosyal.—Romen 1:26, 27.
12. Akoz nou devret devlop laenn pour sa ki mal?
12 Dan letan Noe, Zeova ti anmenn en gro Deliz e met en lafen avek sa lemonn kot dimoun ti mazin zis sèks. Nou pa devret zanmen oubliye ki nou letan i vreman parey letan Noe. Sa ‘gran ladetres’ ki pe vini pou tir tou ‘bann ki pratik bann akt imoral, bann adilter, ek bann omoseksyel’ lo later. (Matye 24:21; 1 Korentyen 6:9, 10; Revelasyon 21:8) Alor, i vreman irzan pour nou devlop en laenn pour sa ki mal konmela menm e evit bann sitiasyon ki ti a fer nou tonm dan limoralite!—Psonm 97:10; 1 Korentyen 6:18.
Later i “ranpli avek Vyolans”
13. Akoz later ti “ranpli avek vyolans” dan letan Noe?
13 Par refer avek en lot karakteristik letan Noe, Labib i dir: “Later ti vin koronpi dan lizye sa vre Bondye, e later ti ranpli avek vyolans.” (Zenez 6:11) An realite, vyolans pa ti en nouvo keksoz. Garson Adan, Kaen, ti touy son frer ki ti en bon dimoun. (Zenez 4:8) Lamek ti konpoz en poenm ki ti reflekte leta lespri vyolan ki ti annan dan son letan. Dan sa poenm i ti vant son lekor konsernan en zennonm ki i ti’n touye, swadizan pour defann son lekor. (Zenez 4:23, 24) Se sa nivo ki vyolans ti’n arive dan letan Noe ki ti fer li diferan. Ler bann lanz dezobeisan Bondye ti marye avek bann madanm lo later e prodwir bann zanfan zean, vyolans ti ariv lo en nivo ki i pa ti’n zanmen arive avan. Traduction du monde nouveau i montre ki mo orizinal an Ebre ki refer avek sa bann zean vyolan i vedir “bann ki fer tonbe lezot.” (Zenez 6:4, not anba lo paz) An rezilta, later ti “ranpli avek vyolans.” (Zenez 6:13) Mazin problenm ki Noe ti’n bezwen rankontre pour elve son fanmiy dan en tel lanvironnman! Pourtan, Noe ti reste konman “en zonm drwat parmi sa zenerasyon.”—Zenez 7:1.
14. Konman sa lemonn ozordi in arive “ranpli avek vyolans”?
14 Vyolans in egziste toudilon listwar imen. Me parey dan letan Noe, dan nou letan nou’n vwar vyolans ariv lo en nivo ki i pa’n zanmen arive avan. Nou pe toultan tann konsernan vyolans domestik, terorism, kanpanny zenosid, ek bann dimoun ki fiziye en lafoul dimoun san okenn rezon. Deplis, i annan versman disan koze par lager. Later in ranpli ankor avek vyolans. Akoz? Kwa ki’n anmenn sa ogmantasyon? Larepons pour sa i montre en lot fason ki nou letan i parey letan Noe.
15. (a) Kwa ki’n kontribye pour fer vyolans ogmante dan sa bann dernyen zour? (b) Ki konfyans nou annan konsernan son rezilta?
15 Kan Rwayonm Bondye ti ganny etabli an 1914, Zezi Kri, Lerwa ki ti ganny kouronnen, ti pran bann aksyon ki’n mark listwar imen. Satan ek son bann demon ti ganny pouse dan lesyel e ganny zete lo later. (Revelasyon 12:9-12) Avan Deliz, bann lanz dezobeisan ti volonterman abandonn zot pozisyon dan lesyel. Me dan nou letan, zot in ganny pouse dan lesyel. Deplis, aprezan zot pa kapab pran lekor imen pour zot rezwir bann plezir imoral. Alor, akoz zot dezapwentman, lakoler, ek lafreyer zot zizman ki pe aprose, zot enfliyans bann zonm ek lorganizasyon pour fer bann krim vreman kriyel e anmenn vyolans lo en pli o nivo ki letan Noe. Zeova ti detrir sa lemonn dan letan Noe apre ki bann lanz dezobeisan ek zot desandans ti ranpli later avek mesanste. Nou annan lasirans ki i pou fer parey dan nou letan! (Psonm 37:10) Me bann ki kontinyen veye ozordi i konnen ki zot delivrans i pros.
Mesaz i ganny prese
16, 17. Ki sa katriyenm fason ki letan Noe i parey nou letan?
16 Sa travay ki Noe ti gannyen i endik nou sa katriyenm fason ki nou letan i parey avek letan Noe. Noe ti konstri en gran lars. I ti osi “en predikater lazistis.” (2 Pyer 2:5) Ki mesaz i ti prese? Predikasyon Noe ti enkli en lapel pour repantir e en lavertisman ki destriksyon pe vini. Zezi ti dir ki bann dimoun dan letan Noe “pa ti pran kont nanryen ziska deliz ti vini e balye zot tou.”—Matye 24:38, 39.
17 Pareyman, anmezir ki bann Temwen Zeova i travay dir pour akonpli zot misyon pour prese, mesaz konsernan Rwayonm Bondye pe ganny anonse dan lemonn antye. Dan preski tou landrwa lo later, dimoun i kapab tann e lir sa mesaz Rwayonm dan zot prop langaz. Magazin Latour Veyer, ki anons Rwayonm Zeova, i ganny enprimen dan plis ki 140 langaz e en total 25,000,000 i ganny enprimen. San dout, sa bon nouvel Rwayonm pe ganny prese “partou dan lemonn.” Kan Bondye pou satisfe avek degre ki sa travay in ganny fer, lafen pou sirman arive.—Matye 24:14.
18. Konman bokou dimoun dan nou letan i reazir parey laplipar dimoun dan letan Noe anver nou predikasyon?
18 Sa letan avan Deliz, dimoun pa ti enterese avek keksoz spirityel ek bann prensip moral. Alor, i pa difisil pour mazinen konman ki fanmiy Noe ti ganny riye, sikannen, e boufonnen avek zot vwazen. Me parey ti’n predir, lafen ti vreman arive. Pareyman dan sa bann dernyen zour, i annan en kantite ‘monker ki sikann nou.’ Pourtan, Labib i dir ki “Zour Senyer pou ariv konman en voler.” (2 Pyer 3:3, 4, 10) Definitivman i pou vini dan son letan fikse. I pa pou an retar. (Abakouk 2:3) Pa i saz pour nou kontinyen veye!
Zis en pti Gin ki ti sirviv
19, 20. Ki similarite nou vwar ant Deliz ek destriksyon sa sistenm?
19 Nou letan ek letan Noe pa parey zis dan lesans ki i annan move dimoun e zot ganny detrir. Zis parey ti annan dimoun ki ti sirviv kan Deliz ti vini, pou annan bann ki pou sirviv kan lafen sa sistenm i arive. Bann ki ti sirviv kan Deliz ti vini, ti bann dimoun ki ti annan limilite e ki pa ti pe viv parey laplipar dimoun ti pe viv. Zot ti pran kont lavertisman Bondye e zot ti reste separe avek sa lemonn mesan pandan sa letan. Labib i dir: “Noe ti ganny laprouvasyon Zeova . . . I ti montre li san defo parmi son bann kontanporen.” (Zenez 6:8, 9) Parmi tou sa dimoun, en fanmiy, “en pti group dimoun, ywit an tou, ti ganny sove atraver delo.” (1 Pyer 3:20) Zeova ti donn zot en latas, an dizan: “Fer zanfan, e vin bokou, ranpli later.”—Zenez 9:1.
20 Parol Bondye i asir nou ki “en gran lafoul” pou ‘pas par sa gran ladetres.’ (Revelasyon 7:9, 14) Ki kantite dimoun pou annan dan sa gran lafoul? Zezi ti dir: “Laport i etrwat, e semen i difisil ki anmenn dan lavi, napa bokou ki trouv li.” (Matye 7:13, 14) Konpare avek sa apepre sis bilyon dimoun lo later, pou annan en pti gin ki pou sirviv sa gran ladetres ki pe vini. Me petet zot pou ganny en privilez parey sa bann ki ti sirviv dan Deliz ti gannyen. Pour en pe letan, petet zot pou kapab fer zanfan pour form parti sa nouvo sosyete lo later.—Izai 65:23.
Kontinyen “veye”
21, 22. (a) Konman ki etidye sa resi lo Deliz in benefisye ou? (b) Ki nou teks pour lannen 2004, e akoz nou bezwen ekout sa konsey ki i pe donnen?
21 Kantmenm Deliz i paret byen byen lwen avek nou letan, i kler ki i servi konman en lavertisman ki nou pa devret inyore. (Romen 15:4) Similarite ant letan Noe ek nou letan i devret fer nou deplizanpli pli konsyan sinifikasyon sa ki pe arive. I devret osi fer nou vey larive Zezi, ki pou vin parey en voler, pour egzekit son zizman lo bann mesan.
22 Ozordi, Zezi Kri pe diriz en tre gran travay konstriksyon spirityel. I annan en paradi spirityel ki parey en lars, pour sekirite ek sirvivans bann vre adorater. (2 Korentyen 12:3, 4) Pour nou lavi ganny prezerve pandan sa gran ladetres, nou bezwen reste dan sa paradi. Sa paradi spirityel i antoure avek lemonn Satan ki pare pour devor tou sa ki sonmey spirityelman. I vreman enportan pour nou kontinyen “veye” e montre ki nou pare pour gran zour Zeova.—Matye 24:42, 44.
Eski ou rapel?
• Ki konsey Zezi ti donnen konsernan son larive?
• Avek ki Zezi i konpar son prezans?
• Dan ki fason nou letan ek letan Noe i parey?
• Ki lefe reflesir lo similarite ant letan Noe ek nou letan i fer lo nou vizilans?
[Kestyon]
[Ekstre lo paz 14]
Teks pour lannen 2004 i: ‘Kontinyen veye . . . Met zot pare.’—Matye 24:42, 44.