Met ou pare pour Zour Zeova
Met ou pare pour Zour Zeova
“Met zot pare, akoz Fis-de-Lonm pou vini ler ki zot pa pe ekspekte li.”—MATYE 24:44.
1. Akoz nou devret santi nou konsernen avek zour Zeova?
I POU en zour batay ek firer, en zour langwas ek ladetres, e en zour fernwanr ek dezolasyon. “Sa gran zour efreyan Zeova” pou sirman ariv lo sa sistenm mesan, zis parey Deliz ti noy sa lemonn mesan dan letan Noe. Personn pa pou kapab anpes sa zour arive. Pourtan, “tou sa ki apel lo non Zeova pou sorti sen e sof.” (Yoel 2:30-32; Amos 5:18-20) Bondye pou detri son bann lennmi e sov son pep. Profet Tsefanya i montre ki letan i kourt, an dizan: “Sa gran zour Zeova i pros. I pros, e i pe depes bokou.” (Tsefanya 1:14) Me kan Bondye pou vin pas sa zizman?
2, 3. Akoz i enportan pour nou prepar nou pour zour Zeova?
2 Zezi ti dir: “Konsernan sa zour e sa ler personn pa konnen kan i pou arive, pa menm bann lanz dan lesyel, ni menm Garson Bondye, me Papa tousel ki konnen.” (Matye 24:36) Vi ki nou pa konnen ki zour egzakteman i pou vini, i tre enportan ki nou pran aker sa parol dan nou teks pour lannen 2004: ‘Kontinyen veye . . . Met zot pare.’—Matye 24:42, 44.
3 Zezi i montre konman ki en sel kou bann ki pou’n pare pou ganny proteze tandis ki lezot pou ganny abandonnen. I dir: “Lo de zonm ki pe travay dan plantasyon, enn pou ganny anmennen, lot kite. Lo de madanm ki pe travay ansanm lo moulen, enn pou ganny anmennen e lot kite.” (Matye 24:40, 41) Ki sitiasyon nou pou ladan personnelman dan sa letan kritik? Eski nou pou’n pare, oubyen sa zour pou pran nou par sirpriz? Bokou i depan lo bann pa ki nou pran la konmela. Pour montre ki nou pare pour zour Zeova, nou bezwen evit en kalite latitid ki komen denozour. Nou bezwen osi pa les nou tonm dan en serten kondisyon spirityel, e rezet serten fason viv.
Evit sa Latitid pour pran tou Keksoz fasil
4. Ki kalite latitid bann dimoun dan letan Noe ti annan?
4 Reflesir lo letan Noe. Labib i dir: “Par lafwa, Noe ti ekout lavertisman ki Bondye ti donn li konsernan keksoz ki ziska prezan personn pa ti ankor war. Noe ti obei e konstri en lars pour sov son fanmir.” (Ebre 11:7) Pa ti fasil pour dimoun pa vwar sa lars e i ti pou en keksoz en pe drol pour zot. Deplis, Noe ti “en predikater lazistis.” (2 Pyer 2:5) Ni sa proze konstriksyon ki Noe ti pe fer, ni son predikasyon pa ti ankouraz bann dimoun dan son letan pour sanz zot lavi. Akoz? Parski zot ti pe “manze e bwar, dimoun ti pe marye e zot ti pe fer marye zot fiy.” Bann dimoun ki Noe ti pres avek ti sitan preokipe avek zot bann zafer personnel ek plezir ki “zot pa ti pran kont nanryen ziska deliz ti vini e balye zot tou.”—Matye 24:38, 39.
5. Ki latitid bann zabitan Sodonm dan letan Lot ti annan?
5 Ti menm zafer dan letan Lot. Labib i dir: “I pou parey konman i ti ete dan lepok Lot. Dimoun ti pe manze, bwar, aste, vann, plante, konstri. Me zour Lot ti kit lavil Sodonm, dife ek souf ti sorti dan lesyel e tonm parey lapli e detri tou dimoun.” (Lik 17:28, 29) Ler sa de lanz ti’n averti Lot ki destriksyon ti pe vini, i ti fer konnen son de zann sa ki ti pe al arive. Me pour zot, “i ti parey en zonm ki ti pe fer fars.”—Zenez 19:14.
6. Ki kalite latitid nou bezwen evite?
6 Zezi ti dir ki prezans Fis-de-Lonm pou parey dan letan Noe ek Lot. (Matye 24:39; Lik 17:30) Vreman, ozordi bokou dimoun i pran tou keksoz fasil. Nou bezwen veye ki nou pa ganny enfliyanse avek sa kalite latitid. I pa mal pour nou apresye en bon manze e bwar en pti gin. Pareyman, maryaz i en laranzman ki Bondye li menm in etabli. Me si sa bann keksoz i vin pli enportan dan nou lavi e keksoz spirityel i ganny neglize, eski nou’n pare pour sa zour efreyan Zeova?
7. Ki kestyon enportan nou devret demann nou lekor avan angaz nou dan okenn aktivite, e akoz?
7 Zapot Pol ti dir: “Letan i kourt, fodre ki aprezan bann zonm ki annan madanm, i viv konmsi i napa.” (1 Korentyen 7:29-31) I reste zis en pti gin letan pour nou fini nou travay predikasyon ki Bondye in donn nou. (Matye 24:14) Pol i menm konsey bann ki’n marye pour pa donn tou zot latansyon ek letan zot madanm oubyen msye, ki fer ki lentere Rwayonm i vin dezyenm dan zot lavi. I kler ki Pol pa ti pe konsey nou pour pran lavi fasil. Zezi ti dir: “Rod plito Rwayonm Bondye ek son lazistis.” (Matye 6:33) Kan nou pe pran nenport desizyon oubyen avan angaz nou dan okenn aktivite, en kestyon enportan ki nou kapab demande se, ‘Ki mannyer sa i kapab anpes mwan met lentere Rwayonm premye dan mon lavi?’
8. Si bann keksoz dan lavi toulezour in vin nou preokipasyon prensipal, ki nou bezwen fer?
8 Ki nou pou fer si nou realize ki nou pe deza preokip nou avek bann keksoz dan lavi toulezour ki fer ki napa plas pour keksoz spirityel? Eski napa gran diferans ant nou fason viv ek fason viv nou vwazen ki napa konnesans egzakt lo Labib e ki pa proklanmater Rwayonm? Si sa i leka, alors nou bezwen priy lo sa size. Zeova i kapab ed nou pour annan sa bon leta lespri. (Romen 15:5; Filipyen 3:15) I kapab ed nou pour gard lentere Rwayonm premye, fer sa ki byen, e ranpli nou devwar anver li.—Romen 12:2; 2 Korentyen 13:7.
Evite tonm dormi spirityelman
9. Dapre Revelasyon 16:14-16, akoz i enportan pour nou lalit kont sonmey spirityel?
9 Sa menm profesi ki koz lo “sa gran zour Bondye Toupisan” i fer vwar ki serten i kapab pa reste eveye. Senyer Zezi Kri i dir: “La, mon pe vini konman en voler! Byennere sa ki reste vizilan, e ki gard son lenz lo li pour li pa al touni e ensi pa les war son laont.” (Revelasyon 16:14-16) Sa lenz ki ganny mansyonnen la pe refer avek sa ki idantifye nou konman Temwen Zeova. Sa i enkli nou travay konman proklanmater Rwayonm e osi nou kondwit konman Kretyen. Si nou vin inaktif, dan en sans pe dormi, nou kapab ganny arase nou lidantite Kretyen. Sa i en laont e i danzere. Nou bezwen lite pour nou pa ganny sonmey oubyen fatige spirityelman. Ki mannyer nou kapab reziste sa tandans?
10. Akoz lir Labib toulezour i ed nou pour reste vizilan spirityelman?
10 Souvan Labib i met lanfaz lo nesesite pour nou reste vizilan e azen. Par egzanp, bann Levanzil i dir nou: ‘Kontinyen Veye’ (Matye 24:42; 25:13; Mark 13:35, 37), “met zot pare” (Matye 24:44), “fer atansyon, veye” (Mark 13:33), “zot bezwen touzour pare” (Lik 12:40). Apre ki Pol ti dir ki zour Zeova pou pran sa lemonn par sirpriz, i ti sipliy bann konpanyon Kretyen: “Fodre pa ki nou dormi parey lezot, me annou reste vizilan e azen.” (1 Tesalonisyen 5:6) Dan dernyen liv Labib, Zezi Kri i fer vwar konman i pou vin vit, an dizan: “Mon pe vini byento!” (Revelasyon 3:11; 22:7, 12, 20) Plizyer profet dan Lekritir Ebre ti osi dekrir e averti konsernan gran zour zizman Zeova. (Izai 2:12, 17; Zeremi 30:7; Yoel 2:11; Tsefanya 3:8) Lir Parol Bondye, Labib, toulezour e reflesir lo sa ki nou lir pou ed nou pour reste vizilan spirityelman.
11. Akoz letid Labib personnel i enportan pour nou reste vizilan spirityelman?
11 Wi, etidye Labib seryezman an servan bann piblikasyon baze lo Labib ki ‘lesklav fidel e pridan’ i fourni, i vreman enportan pour nou reste vizilan spirityelman. (Matye 24:45-47) Me pour nou benefisye avek letid personnel, i bezwen regilye e adapte avek nou progre. (Ebre 5:14–6:3) Nou bezwen pran nouritir spirityel ki solid regilyerman. I vre ki i pa sitan fasil pour trouv letan pour fer letid personnel dan sa lepok ki nou pe viv. (Efezyen 5:15, 16) Me selman i pa ase zis pour lir Labib ek bann piblikasyon Kretyen zis ler i konvenab pour nou. Letid personnel ki regilye i enportan si nou anvi ‘nou lafwa i vin for’ e anvi reste vizilan.—Tit 1:13.
12. Konman bann renyon Kretyen ek lasanble i ed nou pour konbat sonmey spirityel?
12 Bann renyon Kretyen ek lasanble i osi ed nou pour konbat sonmey spirityel. Konman? Par mwayen sa lenstriksyon ki nou gannyen. Eski pa nou pe toultan ganny rapele ki zour Zeova i pros dan sa bann rasanbleman? Sa bann renyon ki ganny fer tou le semenn, i osi donn nou loportinite pour “pous kanmarad pour annan lanmour e fer sa ki byen.” Pous oubyen ensit kanmarad i ed nou pour reste vizilan spirityelman. I pa sirprenan alor ki nou ganny demande pour rasanble ansanm regilyerman “sirtou ki la sa Zour Senyer pe aprose.”—Ebre 10:24, 25.
13. Ki mannyer predikasyon i ed nou pour reste vizilan spirityelman?
13 Nou osi ganny led pour reste vizilan kan nou partisip dan predikasyon avek tou nou leker. Ki pli bon fason pour bann siny lafen ek zot lenportans reste fre dan nou lespri, ki koz lo zot avek lezot? Deplis, kan nou vwar bann ki nou etidye Labib avek fer progre e konmans met an pratik sa ki zot pe aprann, nou menm nou vin pli konsyan ki letan i kourt. Zapot Pyer ti dir: “Gard zot lespri touzour alert, reste touzour vizilan.” (1 Pyer 1:13) “Montre touzour plis lentere dan travay Senyer” i en bon remed pour lafatig spirityel.—1 Korentyen 15:58.
Rezet Fason viv ki afekte nou Spirityalite
14. Parey i ganny dekrir dan Lik 21:34-36, kont ki kalite lavi Zezi ti averti nou?
14 Dan son fame profesi konsernan siny ki pou endik son prezans, Zezi ti donn ankor en lot lavertisman. I ti dir: “Fer byen atansyon zotmenm, pangar zot vizilans i ganny detournen avek festen, labwason ek traka lavi. Fer atansyon sa zour i sirprann zot parey en pyez. Parski sa bann levennman pou tonm lo tou zabitan later. Veye alor e priye tou letan, pour zot ganny lafors pour pas atraver tou sa bann keksoz ki pou arive, e ki zot ava tenir debout devan Fis-de-Lonm.” (Lik 21:34-36) Zezi ti dekrir byen bann fason viv dimoun an zeneral: manze e bwar an ekse, e en fason viv ki anmenn traka.
15. Akoz nou devret evite manz e bwar tro bokou?
15 Manz e bwar tro bokou i kont prensip Labib e nou bezwen rezet zot. Labib i dir: “Pa frekant bann bwarer diven ek bann ki voras lavyann.” (Proverb 23:20) Me en dimoun pa bezwen ariv lo sa nivo lo kote manze e bwar pour met son spirityalite an danze. Manz tro bokou i kapab fer li sonmey e pares avan menm ki i vin en dimoun voras e en bwarer. En proverb dan Labib i dir: “En dimoun ki pares i anvi bokou keksoz, me i napa nanryen.” (Proverb 13:4) En tel dimoun i kapab anvi fer lavolonte Bondye, me i pa arive akonpli son dezir akoz neglizans.
16. Ki mannyer nou kapab evite les traka konsernan nou fanmiy vin en lour pour nou?
16 Ki bann traka lavi ki Zezi in met nou an gard kont? I enkli bann traka personnel, pran swen avek nou fanmiy, ek lezot keksoz parey. Pa i bet pour les sa bann keksoz vin en fardo pour nou! Zezi ti demande: “Lekel parmi zot ki krwar si i pran traka i kapab viv pli lontan?” I ti donn sa konsey bann ki ti pe ekout li: “Pa bezwen pran traka e demann zot lekor, ‘Ki nou pou manze? Ki nou pou bwar? Ki nou pou mete?’ Bann payen ki rod tousala. Me zot Papa ki dan lesyel i konn tou sa ki zot bezwen.” Met lentere Rwayonm premye dan nou lavi e annan konfyans ki Zeova pou donn nou sa ki nou bezwen, pou fer nou gard lenkyetid anba kontrol e ed nou pour reste vizilan.—Matye 6:25-34.
17. Ki mannyer tay deryer keksoz materyel i kapab anmenn traka?
17 Tay deryer keksoz materyel i osi kapab anmenn traka. Par egzanp, serten dimoun i fer zot lavi konplike letan zot oule annan plis ki sa ki zot mwayen i permet. Lezot in ganny atire par bann lide pour fer larzan vitman e par bann lenvestisman finansyel riske. Pour lezot, ledikasyon konman en mwayen pour reisi lo plan finansyel i vin en latrap. I vre ki en serten nivo ledikasyon i kapab ed nou pour ganny travay. Me letan en dimoun i pas bokou letan pour fer bann letid avanse, son spirityalite i kapab ganny afekte. Sa i vreman danzere vi ki zour Zeova pe apros byen vit! Labib i averti: “Bann ki oule vin ris i tonm dan tantasyon e dan pyez en kantite dezir bet e move, ki plonz dimoun dan larin e fer zot maler.”—1 Timote 6:9.
18. Ki abilite nou devret devlope pour nou evite ganny atire dan en lavi kot keksoz materyel i premye?
18 Pour evite fer keksoz materyel vin premye dan nou lavi, i enportan pour nou devlop sa abilite pour fer diferans ant sa ki byen ek sa ki mal kan nou fer desizyon. Nou devlop sa abilite par regilyerman ‘pran nouritir solid ki pour bann adilt’ e par ‘egzers nou kapasite pour persevwar.’ (Ebre 5:13, 14) Ler nou pe etablir nou bann priyorite, “verifye bann keksoz pli enportan” pou osi anpes nou fer bann move swa.—Filipyen 1:10.
19. Si nou realize ki nou annan en pti gin letan pour keksoz spirityel, ki nou devret fer?
19 Met keksoz materyel premye dan nou lavi i kapab avegle nou, pa donn nou preski ditou letan pour bann keksoz spirityel. Ki mannyer nou kapab egzamin nou lekor e pa les nou ganny atire par en tel fason viv? Nou bezwen reflesir e priye pour vwar konman e ziska ki degre nou kapab senplifye nou lavi. Lerwa Salomon dan ansyen Izrael ti dir: “En serviter i fer en bon sonmey, ki swa i manz en pti gin oubyen bokou; me larises sa enn ki ris i anpes li dormi.” (Eklezyast 5:12) Eski nou depans bokou lenerzi ek letan pour pran swen avek nou bann keksoz ki pa sitan neseser? Pli nou annan, pli nou bezwen pran swen avek, pey lasirans, e proteze. Eski i pa ti pou benefisye nou si nou ti senplifye nou lavi par debaras nou avek serten sa bann keksoz?
Fer tou pour met ou pare
20, 21. (a) Ki lasirans zapot Pyer i donnen konsernan zour Zeova? (b) Ki bann keksoz ki nou bezwen fer an mezir ki nou pe met nou pare pour zour Zeova?
20 Sa lemonn dan letan Noe ti trouv son lafen. Pareyman, sa sistenm ki nou pe viv ladan pou osi trouv son lafen. Zapot Pyer i asir nou: “Zour Senyer pou ariv konman en voler. Sa zour lesyel pou disparet avek en gran fraka; e bann eleman lesyel pou fonn avek dife. Later avek tou sa ki lo la pou ganny brile.” Ni lesyel senbolik—bann gouvernman mesan—ni later senbolik—bann dimoun ki elwannyen avek Bondye—pa pou sirviv lakoler brilan Bondye. Pyer i endike konman nou kapab montre ki nou pare pour sa zour, an dizan: “Parski tousala pou ganny detri, ki kalite lavi zot devre viv? Zot devre anmenn en lavi sen e annan respe pour Bondye, letan zot pe esper sa zour, an fezan zot mye pour fer sa zour vin pli vit.”—2 Pyer 3:10-12.
21 Regilyerman asiste bann renyon Kretyen e partisip dan predikasyon sa bon nouvel i parmi bann keksoz ki nou fer ki montre nou annan respe pour Bondye. Fotespere ki nou fer zot avek devosyon senser pour Bondye anmezir ki nou pe esper gran zour Zeova avek pasyans. Annou ‘fer tou zefor posib, pour Bondye trouv nou pir, san defo e dan lape avek li.’—2 Pyer 3:14.
Eski ou rapel?
• Akoz nou bezwen met nou pare pour zour Zeova?
• Si nou pe preokip nou prensipalman avek bann keksoz dan lavi toulezour, ki nou devret fer?
• Kwa ki pou ed nou pour lalit avek sonmey spirityel?
• Ki kalite fason viv ki afekte nou spirityalite ki nou bezwen evite e akoz?
[Kestyon]
[Portre lo paz 17]
Dimoun dan letan Noe pa ti pran kont sa zizman ki ti pe vini —eski ou osi parey?