“Zot Lavwa in rezonnen lo Later antye”

“Ale e fer tou pep vin mon bann disip. Batiz zot o non di-Per, di-Fis e di-Sent-Espri.”—MATYE 28:19.

1, 2. (a) Ki travay Zezi ti demann son bann disip pour fer? (b) Akoz bann Kretyen dan premye syek ti kapab akonpli sitan bokou?

EN PE letan apre ki i ti’n mont dan lesyel, Zezi ti donn son bann disip en travay pour akonpli. I ti dir zot: “Ale e fer tou pep vin mon bann disip. Batiz zot o non di-Per, di-Fis e di-Sent-Espri.” (Matye 28:19) Sa ti vreman en gro latas ki zot ti annan pour fer!

² Zis mazinen! Zour Lapannkot 33 N.L., apepre 120 disip ti resevwar lespri sen. Apre zot ti konmans akonpli sa travay par dir avek lezot dimoun ki Zezi ti sa Mesi promiz, atraver ki nou kapab ganny sove. (Akt 2:1-36) Ki mannyer sa pti group dimoun ti pou kapab fer “tou pep” tann sa nouvel? Pour bann imen, sa ti paret enposib me “pour Bondye tou i posib.” (Matye 19:26) Bann premye Kretyen ti annan sipor lespri sen Zeova, e zot ti konsyan ki letan i kourt. (Zekarya 4:6; 2 Timote 4:2) Alor, zis dan lespas detrwa dizenn lannen, zapot Pol ti kapab dir ki sa bon nouvel ti pe ganny prese “dan lemonn antye.”—Kolosyen 1:23.

3. Kwa ki ti anpes dimoun rekonnet vre Kretyen?

³ Laplipar-di-tan dan premye syek, vre ladorasyon ti kontinyen propaze. Me Zezi ti’n profetize ki ti pou ariv en letan kot Satan ti pou senm “move zerb” e ki pour bokou syek “dible,” setadir bann vre Kretyen, ti pou ganny etoufe ziska letan rekolt. Apre lanmor bann zapot, sa profesi ti vin vre.—Matye 13:24-39.

Ogmantasyon rapid ozordi

4, 5. Depi 1919, ki travay ki bann Kretyen swazir ti konmans fer, e akoz i pa ti en travay fasil pour akonpli?

⁴ An 1919, ti’n ariv ler pour dible, savedir vre Kretyen, ganny separe avek bann move zerb. Bann Kretyen swazir ti konnen ki sa gran travay ki Zezi ti’n demande pour fer, ti ankor bezwen ganny akonpli. Zot ti konvenki ki zot ti pe viv dan “bann dernyen zour” e zot ti konn profesi Zezi: “Sa Bonn Nouvel Rwayonm pou ganny anonse partou dan lemonn pour tou dimoun konnen; apre sa, lafen pou arive.” (2 Timote 3:1; Matye 24:14) Wi, zot ti konnen ki ti annan bokou travay pour fer.

⁵ Me parey bann disip dan lannen 33 N.L., sa bann Kretyen swazir ti annan en gro latas pour fer. I ti annan zis detrwa mil zot dan ennde pei. Ki mannyer zot ti pou pres sa bon nouvel “partou dan lemonn”? Pa oubliye osi, ki popilasyon lemonn ti’n ogmante, sorti apepre 300 milyon dan letan Sezar pour vin preski 2 bilyon apre premye lager mondyal. Deplis toudilon 20 tyenm syek, i ti pou kontinyen ogmant en kantite.

6. Ki progre bann Kretyen swazir ti’n fer pour propaz sa bon nouvel ziska bann lannen 1930?

⁶ Toudmenm, bann serviter swazir Zeova, parey zot frer dan premye syek, ti antreprann sa travay avek lafwa total dan Zeova, e son lespri ti avek zot. Omilye bann lannen 1930, apepre 56,000 proklanmater ti anons laverite Labib dan 115 pei. Deza bokou travay ti’n ganny akonpli me ti reste ankor bokou plis pour fer.

7. (a) Ki sa nouvo defi ki bann Kretyen swazir ti rankontre? (b) Avek sipor ‘lezot mouton,’ ki mannyer sa travay rasanbleman pe progrese ziska ozordi?

⁷ Apre, en pli bon konprenezon lo lidantite sa “gran lafoul” mansyonnen dan Revelasyon 7:9 ti prezant en nouvo defi e osi promet sa  bann Kretyen ki ti pe travay dir ki zot pou ganny led. En gran lafoul krwayan, ‘lezot mouton’ “sorti dan tou nasyon, tribi, pep ek lalang” avek en lespwar pour viv lo later, ti bezwen ganny rasanble. Labib pa ti’n spesifye ki kantite pou annan. (Zan 10:16) Sa group ti pou ‘ofer Zeova ladorasyon lizour konman aswar.’ (Revelasyon 7:15) Savedir zot ti pou ede dan sa travay predikasyon ek lansennyman. (Izai 61:5) Alor, bann Kretyen swazir ti vreman kontan pour vwar bann proklanmater ogmant par plizyer dizenn milye e apre par plizyer milyon. Lannen 2003, en nouvo maksimonm 6,429,351 ti partisip dan travay predikasyon—lamazorite i manm sa gran lafoul. * Bann Kretyen swazir i apresye sa led e lezot mouton i apresye sa privilez pour siport zot bann frer swazir.—Matye 25:34-40.

8. Ki mannyer bann Temwen Zeova ti reazir anver bann gro presyon ki ti arive pandan dezyenm lager mondyal?

⁸ Ler dible ti revin evidan, Satan ti lans en lager entans kont li. (Revelasyon 12:17) Ki mannyer i ti reazir ler sa gran lafoul ti konmans aparet? Avek vyolans! Napa okenn dout ki i ti par deryer sa latak lo vre ladorasyon dan lemonn antye pandan dezyenm lager mondyal. Lo tou le de kote sa lager, bann Kretyen ti sibir bann gro presyon. Bokou nou bann pov frer ek ser ti soufer bann leprev terib, serten ti mor pour zot lafwa. Kantmenm tousala, zot ti montre ki zot annan sa menm santiman avek sa psalmis: “Ini avek Bondye mon pou loue son parol. Mon’n met mon konfyans dan Bondye, mon pa pou per. Ki dimoun i kapab fer mwan?” (Psonm 56:4; Matye 10:28) Fortifye par lespri Zeova, bann Kretyen swazir ek lezot mouton, ti debout ferm ansanm. (2 Korentyen 4:7) Sa ti fer ki “Parol Bondye ti kontinyen fannen.” (Akt 6:7) Ler lager ti konmanse an 1939, ti annan 72,475 Kretyen fidel ki ti pe partisip dan travay predikasyon. Lager ti fini 1945 e rapor pour sa lannen, ki pa ti konplet, ti revele ki 156,299 Temwen aktif ti pe propaz sa bon nouvel. Sa ti vreman en defet pour Satan!

9. Nonm sa de lekol ki ti ganny anonse pandan Dezyenm Lager Mondyal.

⁹ I evidan ki bann boulversman dezyenm lager mondyal pa ti fer bann serviter Zeova doute si travay predikasyon pou ganny akonpli. Annefe, an 1943, ler lager ti’n ariv lo son pik, de nouvo lekol ti ganny anonse. Enn, ki aprezan apel Lekol Minister Teokratik, ti ganny organize pour ganny fer dan tou kongregasyon pour form bann Temwen pour prese e fer disip. Sa lot, Watchtower Bible School of Gilead ti pou form bann misyonner ki ti pou devlop travay predikasyon dan bann pei etranze. Wi, ler lager ti arete, bann vre Kretyen ti pare pour fer plis ankor.

10. Pandan lannen 2003, konman pep Zeova in demontre zot devouman?

¹⁰ Sa de lekol in akonpli en travay ekselan! Tou bann ki’n ganny formen dan Lekol Minister Teokratik, zenn ek vye, paran ek zanfan, menm bann envalid, in partisip e pe kontinyen partisip dan lakonplisman sa travay ki Zezi in demande pour fer. (Psonm 148:12, 13; Yoel 2:28, 29) Lannen 2003, sak mwan en mwayenn 825,185 ti demontre ki zot konsyan ki nou pe viv dan en letan irzan par partisip pour en pe letan oubyen kontinyelman dan servis pionye. Dan sa menm lannen, bann Temwen ti depans 1,234,796,477 er-d-tan pour koz avek lezot lo sa bon nouvel Rwayonm. Sirman Zeova i kontan pour vwar devouman son pep!

Dan bann Pei etranze

11, 12. Nonm bann legzanp ki montre ki bann misyonner pe fer en bon travay.

¹¹ Diran bann lannen ki’n pase, bann ki’n sorti lekol Gilead e pli resaman bann ki’n fer Lekol Formasyon Ministeryel in etablir en tre bon repitasyon. Par egzanp, ler sa bann  premye misyonner ti ariv Brezil an 1945, i ti annan pa plis ki 400 proklanmater. Zot ek lezot misyonner ki’n swiv zot in travay dir akote zot bann frer ek ser Brezilyen devoue. Pour bann ki rapel sa bann letan i en gran lazwa pour vwar ki Brezil in raport en nouvo maksimonm 607,362 an 2003!

¹² Annou vwar Zapon. Avan dezyenm lager mondyal, i ti annan apepre san proklanmater Rwayonm dan sa pei. Pandan lager, persekisyon terib ti redwir lakantite zot, e alafen lager, zis detrwa Temwen ki ti ankor vivan spirityelman e fizikman. (Proverb 14:32) Sa detrwa fidel remarkab ti vreman zwaye pour akeyir sa premye 13 misyonner Gilead. Sa bann misyonner ti vitman kontan zot bann frer ek ser Zaponnen ki ti ranpli avek lantouzyasm e kontan ofer lospitalite. Plis ki 50 an plitar, an 2003, Zapon in raport en total 217,508 proklanmater! Zeova in vreman beni en kantite son pep dan sa pei. Dan bokou lezot pei i annan bann menm rapor. Bann frer ek ser ki’n kapab pres dan lezot pei in zwe en gran rol pour propaz sa bon nouvel. Sa in fer ki an 2003 sa bon nouvel in ganny anonse dan 235 pei, zil ek teritwar atraver lemonn. Wi, vreman, sa gran lafoul pe sorti dan “tou nasyon.”

“Sorti dan tou . . . Tribi, Pep ek Lalang”

13, 14. Dan ki fason Zeova ti demontre lenportans pour pres sa bon nouvel dan “tou bann . . . lalang”?

¹³ Labib i rakont premye mirak ki bann disip ki ti ganny swazir avek lespri sen zour Lapannkot 33 N.L. ti fer. Sa se koz dan langaz sa bann dimoun ki ti’n rasanble sa zour. Petet tou sa bann dimoun ki ti tann zot ti kapab koz en langaz ki ti ganny servi dan plizyer pei, petet Grek. Vi ki sa lafoul ti bann dimoun ki ti annan lakrent pour Bondye, i tre probab ki zot ti osi konpran bann servis ki ti ganny fer an Ebre kot tanp. Me zot ti port en pli gran latansyon ler zot ti tann sa bon nouvel dan langaz ki zot ti’n aprann depi zot lanfans.—Akt 2:5, 7-12.

¹⁴ Ozordi osi, i annan bokou langaz ki pe ganny servi dan sa travay predikasyon. I ti ganny profetize ki sa gran lafoul pou sorti pa zis dan bann nasyon me osi “tribi, pep ek lalang.” An akor avek sa, Zeova ti profetize atraver Zekarya: “Dis zonm sorti dan tou langaz bann nasyon pou tyonbo, wi zot pou vreman tyonbo zip en zonm ki en Zwif, an dizan: “Nou pou al avek zot, akoz nou’n antann ki Bondye i avek zot.’ ” (Zekarya 8:23) Menm si Temwen Zeova nepli annan sa don pour koz dan langaz, zot rekonnet lenportans pour ansenny dimoun dan zot prop langaz.

15, 16. Ki mannyer bann misyonner ek lezot in sirmont sa defi pour pres dan bann langaz lokal?

¹⁵ I vre ki ozordi i annan detrwa langaz ki ganny servi dan bokou pei, parey Angle, Franse ek Espanyol. Me bann ki’n kit zot pei pour servi dan lezot pei i esey aprann langaz sa pei pour fer bann ki pare pour aksepte sa bon nouvel aprann pli fasilman. (Akt 13:48) Aprann sa bann langaz i kapab pa fasil. Ler bann frer ek ser dan en pei Sid Pasifik apele Tuvalu ti bezwen piblikasyon dan zot prop langaz, enn bann misyonner ti aksepte pour akonpli sa latas. Vi ki ti napa en diksyonner, i ti konmans fer en lalis bann mo Tuvaluan. Avek letan, liv Vous pouvez vivre éternellement sur une terre qui deviendra un paradis * ti ganny pibliye dan langaz Tuvaluan. Ler bann misyonner ti ariv Curaçao, ti napa piblikasyon baze lo Labib ek diksyonner dan zot langaz, Papiamento. I ti annan osi bokou dezakor lo konman sa langaz i devret ganny ekrir. Kantmenm sa, de zan apre ki bann premye misyonner ti’n arive, premye trak Kretyen ti ganny pibliye dan sa langaz. Ozordi, Papiamento i enn parti sa 133 langaz ki Latour Veyer i ganny pibliye anmenmtan avek Angle.

¹⁶ An Namibi bann premye misyonner pa ti kapab trouv en Temwen lokal pour ed zot tradwir. Deplis, dan en langaz apele Nama, ti  napa ase mo pour eksprim bann lide ki ganny servi souvan dan nou bann piblikasyon parey sa mo “parfe.” En misyonner i raporte: “Mon ti servi sirtou bann ansennyan lekol ki ti pe etidye Labib pour kapab tradwir. Vi ki zot ti napa bokou konnesans laverite, mon ti bezwen asiz avek zot pour fer sir ki sak fraz ti egzakt.” Toudmenm, sa trak Une vie paisible dans un monde nouveau ti finalman ganny tradwir dan kat langaz Namibya. Ozordi, Latour Veyer i ganny pibliye regilyerman dan langaz Kwanyama ek Ndonga.

17, 18. Ki bann defi ki bann frer ek ser pe sirmonte an Meksiko ek lezot pei?

¹⁷ Langaz prensipal Meksiko i Espanyol. Me avan ki bann Espanyol ti ariv laba, i ti annan bokou langaz ki ti ganny koze dan sa pei, e serten i ankor pe ganny servi. Pour sa rezon, ki ozordi bann piblikasyon Temwen Zeova i ganny prodwir dan set langaz Meksiken e osi dan Langaz Siny Meksiken. Nou Minister Rwayonm an Maya ti premye piblikasyon ki sorti lo en baz regilye dan en langaz bann Endyen lo kontinan Lanmerik. Annefe, detrwa mil Maya, Aztecs, ek lezot i form parti sa 572,530 proklanmater Rwayonm an Meksiko.

¹⁸ Resaman, en gran kantite dimoun in al viv dan lezot pei konman refizye, oubyen zot in imigre pour rezon ekonomik. Sa i fer ki pour premye fwa dan bokou pei i aprezan annan en serten kantite dimoun ki koz lezot langaz. Bann Temwen Zeova in pare pour sirmont sa difikilte. Par egzanp, Itali i annan kongregasyon ek group ki koz 22 lezot langaz apard ki Italyen. Resaman plizyer kour ti ganny organize pour ansenny 16 langaz, enkli Langaz Siny Italyen, pour ed bann frer ek ser pres avek dimoun ki koz lezot langaz. Dan plizyer lezot pei, Temwen Zeova pe fer menm zefor pour kapab pres avek bann gran popilasyon imigran. Wi, avek led Zeova, sa gran lafoul pe vreman sorti dan bokou, bokou langaz.

“Lo Later antye”

19, 20. Ki parol Pol ki pe ganny akonpli ozordi dan en fason remarkab? Eksplike.

¹⁹ Zapot Pol ti ekrir dan premye syek: ‘Eski zot pa’n tann sa mesaz? Me mon dir, wi zot in tande. Zot lavwa in rezonnen lo later antye, e zot parol in fer letour lemonn.’ (Romen 10:18) Si sa ti vre dan premye syek, pa i pli evidan ankor ozordi! Plizyer milyon—petet plis ki zanmen avan dan listwar imen—pe dir: “Mon pou beni Zeova toultan; son louanz pou dan mon labous konstaman.”—Psonm 34:1.

²⁰ Deplis, sa travay pa pe ralanti. Lakantite proklanmater Rwayonm pe kontinyen ogmante. Pli ale, plis letan pe ganny depanse dan sa travay predikasyon. Plizyer milyon retourn vizit ek plizyer milye letid Labib pe ganny fer. Dimoun i kontinyen montre lentere. Lannen pase, en nouvo maksimonm 16,097,622 ti asiste Memoryal lanmor Zezi. I evidan, ki i annan ankor bokou travay pour akonpli. Annou kontinyen imit fidelite nou bann frer ek ser ki’n andir bann gro persekisyon. Osi, annou demontre sa menm devouman ki bann frer ek ser depi 1919 in demontre. Zot ti donn tou sa ki zot ti annan dan servis Zeova. Nou tou annou kontinyen azir an armoni avek parol sa psalmis: “Tou sa ki respire—loue Ya. Loue Ya, tou dimoun!”—Psonm 150:6.

[Not anba lo paz]

Eski ou kapab eksplike?

• Ki travay ki bann frer ek ser ti konmans fer an 1919, e akoz i pa ti en travay fasil pour akonpli?

• Lekel ki ti ganny rasanble pour siport sa travay predikasyon?

• Ki repitasyon bann misyonner ek lezot ki pe servi dan bann pei etranze in kite?

• Ki levidans ki ou kapab mansyonnen pour montre ki Zeova pe beni travay son pep ozordi?

[Kestyon]

 [Tablo lo paz 26-29]

RAPOR MONDYAL LANNEN SERVIS 2003 BANN TEMWEN ZEOVA