Bann Pwen enteresan dan Liv Zenez—2
Parol Bondye i vivan
Bann Pwen enteresan dan Liv Zenez—2
LIV Zenez i kouver 2,369 lannen listwar imen, depi kreasyon sa premye zonm, Adan, ziska lanmor Zozef garson Zakob. Dan premye lartik, nou ti diskit lo sa 10 premye sapit osi byen ki verse 9 dan sapit 11 ki kouver resi lo kreasyon ziska latour Babel. * Dan sa lartik, nou pou egzamin bann pwen enteresan dan larestan liv Zenez, ki koz lo sa ki Bondye ti fer dan letan Abraam, Izaak, Zakob ek Zozef.
ABRAAM TI VIN ZANMI BONDYE
Apepre 350 lannen apre Deliz, en zonm dan laliny desandans Sem, garson Noe, ti ne e i ti vin en dimoun tre spesyal pour Bondye. I ti apel Abram, plitar son non ti sanze pour vin Abraam. Abraam ti obeir sa ki Bondye ti’n dir li par kit Our, en lavil Kaldeen. I ti al viv dan latant dan en pei ki Zeova ti promet pour donn li ek son desandans. Akoz son lafwa ek lobeisans, Abraam ti ganny apele “zanmi Bondye.”—Zak 2:23.
Zeova ti pran aksyon kont bann move zabitan Sodonm ek bann lavil otour li, tandis ki Lot ek son de fiy ti ganny sove. Nesans Izaak, garson Abraam, ti akonpli en promes Bondye. Plizyer lannen plitar, lafwa Abraam ti ganny teste ler Zeova ti demann li pour ofer son garson konman en sakrifis. Abraam ti pare pour obeir me en lanz ti aret li. Napa okenn dout ki Abraam ti annan lafwa. Zeova ti asir li ki par mwayen son desandans, tou nasyon pou ganny beni. Abraam ti sagren en kantite par lanmor son madanm, Sara.
Larepons pour bann Kestyon lo Labib:
12:1-3—Kan ki lalyans ki Zeova ti fer avek Abraam ti pran lefe, e pour konbyen letan? Lalyans ki Zeova ti fer avek Abraam ki “par [Abram] tou fanmiy lo sirfas later pou ganny beni,” ti paret pran lefe ler Abram ti travers larivyer Efrat lo son semen pour al Kanaan. Sa ti le 14 Nizan 1943 A.N.L.—430 lannen avan ki Izrael ti ganny delivre Lezip. (Egzod 12:2, 6, 7, 40, 41) Sa lalyans Abraam ti “en lalyans pour en letan endefini.” I pou kontinyen pran lefe ziska ki tou fanmiy lo later i ganny beni e tou lennmi Bondye i ganny detri.—Zenez 17:7; 1 Korentyen 15:23-26.
15:13—Kan ki sa 400 lannen soufrans ki ti ganny predir ti fini? Sa peryod letan soufrans ti konmans an 1913 A.N.L. ler Izaak, garson Abraam, alaz 5 an ti aret tete e son demi frer Ismael ti pe ‘boufonn’ li. (Zenez 21:8-14; Galat 4:29) I ti fini ler bann Izraelit ti ganny delivre dan lesklavaz Lezip an 1513 A.N.L.
16:2—Eski i ti apropriye pour Sarai ofer son servant, Agar, konman en madanm avek Abram? Sa ki Sarai ti fer ti an armoni avek koutim ki ti egziste sa letan—ki en madanm steril ti oblize ofer son mari en lot madanm pour prodwir en zeritye. Poligami ti vin evidan pour premye fwa dan laliny desandans fanmiy Kaen. Finalman, i ti vin en koutim e serten adorater Zeova ti adopte sa pratik. (Zenez 4:17-19; 16:1-3; 29:21-28) Me Zeova pa ti abandonn son standar orizinal ki en zonm i marye avek zis en madanm. (Zenez 2:21, 22) I ti evidan ki Noe ek son bann garson, ki Zeova ti demann zot pour “vin bokou e ranpli later,” ti annan zis en sel madanm. (Zenez 7:7; 9:1; 2 Pyer 2:5) Zezi Kri ti repet sa standar pour marye avek zis en madanm.—Matye 19:4-8; 1 Timote 3:2, 12.
19:8—Eski i ti mal pour Lot ofer son fiy avek bann zabitan Sodonm? Dapre koutim bann dimoun dan sa rezyon, i ti responsabilite sa dimoun ki envit lezot pour protez son bann envite dan son lakaz, menm defann zot ziska lanmor si i neseser. Lot ti pare pour fer sa. Avek kouraz, i ti al deor li tousel pour fer fas avek sa group, e i ti ferm laport par deryer li. Letan i ti ofer son fiy, i tre probab ki Lot ti’n realize ki son bann envite ti bann mesaze sorti kot Bondye. Alor, petet i ti mazinen ki Bondye ti pou protez son fiy parey I ti protez son tantin, Sara, an Lezip. (Zenez 12:17-20) Annefe, Lot ek son fiy ti vreman ganny proteze.
19:30-38—Eski Zeova ti dakor ki Lot ti sou e vin papa garson son de fiy? Zeova pa toler bann ki fer bann pratik imoral deregle oubyen bann soular. (Levitik 18:6, 7, 29; 1 Korentyen 6:9, 10) Lot pa ti kontan ditou “kondwit deregle” bann zabitan Sodonm. (2 Pyer 2:6-8) Lefe ki bann fiy Lot ti soul li, i montre ki zot ti realize ki zot papa pa ti pou dakor pour annan relasyon seksyel avek zot ler i ti azen. Me vi ki zot ti bann etranze dan sa pei, son de fiy ti santi ki sa ti sel fason pour prezerv laliny desandans Lot. Sa resi i dan Labib pour revel relasyon bann Moabit (atraver Moab) e bann Amonit (atraver Benami) avek desandans Abraam, bann Izraelit.
Leson pour nou:
13:8, 9. Abraam ti donn en legzanp ekselan konman rezourd bann dezakor! Annou pa zanmen sakrifye bann bon relasyon pour bann benefis finansyel, preferans personnel, oubyen lorgey.
15:5, 6. Ler Abraam ti pe antre dan laz e i pa ti ankor ganny en garson, i ti koz avek son Bondye konsernan sa size. An retour, Zeova ti reasir li. Ki ti son rezilta? Abraam ti “met lafwa dan Zeova.” Si nou dir sa ki dan nou leker avek Zeova, les li rasir nou atraver Labib, e obeir li, nou lafwa pou vin pli for.
15:16. Zeova pa ti anmenn son zizman sever lo bann Amorit (oubyen Kananeen) pour kat zenerasyon. Akoz? Parski i en Bondye ki annan pasyans. I espere ziska ki napa okenn lespwar pour amelyorasyon. Parey Zeova, nou bezwen annan pasyans.
18:23-33. Zeova pa ti detri nenport ki dimoun. I ti protez bann ki drwat.
19:16. Lot ti “kontinyen tarde,” e bann lanz ti pres pour bezwen redi li ek son fanmiy an deor lavil Sodonm. I bon si nou kontinyen reste konsyan ki letan i kourt pandan ki nou pe esper lafen sa move lemonn.
19:26. I bet pour les bann keksoz ki nou’n kit deryer dan sa lemonn preokip nou oubyen pour anvi sa bann keksoz!
ZAKOB TI ANNAN 12 GARSON
Abraam ti aranze ki Izaak i marye avek Rebeka, en madanm ki ti annan lafwa dan Zeova. I ti donn nesans de garson ansanm apele Ezai ek Zakob. Ezai ti mepriz son drwa premye ne e i ti vann li avek Zakob, ki plitar ti ganny benediksyon son papa. Zakob ti sov Padan-aram, kot i ti marye avek Lea ek Rasel e i ti okip troupo zot papa pour apepre 20 an avan ki i ti ale avek son fanmiy. Zakob ti annan 12 garson ek osi bann fiy, ki i ti fer avek Lea, Rasel, ek de zot servant. Zakob ti lalit avek en lanz e i ti ganny beni, e son non ti sanze pour vin Izrael.
Larepons pour bann Kestyon lo Labib:
28:12, 13—Ki sinifikasyon rev Zakob ki ti enplik “en peron”? Sa “peron,” ki ti’n kapab fer avek ros, ti endike ki i annan kominikasyon ant lesyel ek later. Bann lanz Bondye ki ti monte desann lo sa peron i montre ki Zeova i anvoy bann lanz pour servi bann dimoun ki annan son laprouvasyon.—Zan 1:51.
30:14, 15—Akoz Rasel ti les pase en loportinite pour fer zanfan avek son mari an lesanz pour en pe mandragor? Dan letan ansyen, fri sa plant apele mandragor ti ganny servi konman en latizann pour kalme en dimoun e pour anpes oubyen soulaz bann douler misk. I annan krwayans osi ki sa fri ti annan abilite pour eksit dezir seksyel e pour fer dimoun vin pli fertil oubyen en led pour fer zanfan. (Kantik Salomon 7:13) Menm si Labib pa dir akoz Rasel ti fer sa lesanz, petet i ti’n mazinen ki sa fri ti pou ed li konsevwar en zanfan e i ti ava aret ganny sikannen konman en fanm steril. Me bokou lannen ti pase avan ki Zeova ti “ouver son matris.”—Zenez 30:22-24.
Leson pour nou:
25:23. Zeova i annan sa abilite pour konn tou detay lo en baba dan vant son manman e pour servi sa konnesans e swazir davans lekel ki pou akonpli son plan. Me i pa determin davans ki en dimoun pou finalman vini.—Osea 12:3; Romen 9:10-12.
25:32, 33; 32:24-29. Lentere Zakob pour ganny drwa premye ne ek son lalit ki i ti fer toudilon lannwit avek en lanz pour ganny beni, i montre ki i ti vreman apresye keksoz sakre. Zeova in donn nou plizyer keksoz sakre, parey nou relasyon avek li ek son lorganizasyon, ranson, Labib, e nou lespwar pour Rwayonm. Annou prouve ki nou parey Zakob par montre lapresyasyon pour sa bann keksoz.
34:1, 30. Sa problenm ki ti fer lezot nasyon rezet Zakob ti konmanse akoz Dina ti fer zanmi avek dimoun ki pa kontan Zeova. Nou devret byen swazir nou frekantasyon.
ZEOVA TI BENI ZOZEF AN LEZIP
Zalouzi ti fer bann garson Zakob vann zot frer Zozef konman en lesklav. An Lezip, Zozef ti ganny anprizonnen akoz i ti fidelman reste atase avek standar moral Bondye. Avek letan, i ti ganny anmennen devan Faraon pour enterpret rev Faraon, ki ti predir set lannen labondans swivi par set lannen lafanmin. Apre sa, Zozef ti ganny apwente administrater manze Lezip. Son bann frer ti vin Lezip pour rod manze akoz sa lafanmin. Sa fanmiy ti reini e etablir zot dan rezyon fertil Gosenn. Zis avan Zakob ti mor, i ti beni son bann garson e donn en profesi ki ti donn lespwar ki pou annan bann gran benediksyon plitar dan lavenir. Lekor Zakob ti ganny anmennen Kanaan pour ganny antere. Ler Zozef ti mor alaz 110 an, son lekor ti ganny anbonmen, e plitar i ti ganny transporte dan Later Promiz.—Egzod 13:19.
Larepons pour bann Kestyon lo Labib:
43:32—Akoz bann Ezipsyen pa ti pou zanmen manz avek bann Ebre? Sa i kapab akoz prezidis relizye oubyen akoz bann Ezipsyen ti fyer pour zot ras. Bann Ezipsyen pa ti kontan bann berze. (Zenez 46:34) Akoz? Petet senpleman akoz bann berze ti ganny konsidere konman bann dernyen dimoun dan sosyete Ezipsyen. Oubyen i kapab akoz ti napa ase later pour kiltive, alor bann Ezipsyen ti mepriz sa bann ki ti rod later pour okip bann troupo.
44:5—Eski Zozef ti vreman servi en lakoup pour lir lavenir? Sa lakoup larzan e sa ki ti ganny dir konsernan li ti form parti en konplo ki ti’n ganny aranze. Zozef ti en fidel adorater Zeova. I pa ti servi sa lakoup pour lir lavenir, zis parey Benzamen pa ti vreman vol sa lakoup.
49:10—Ki sinifikasyon sa “baton Lerwa” ek sa “baton komandan”? Baton Lerwa i en baton ki en dirizan i mars avek konman en senbol lotorite. Baton komandan i en gran baton ki demontre son pouvwar pour komande. Zakob ti refer avek sa de keksoz pour endike ki tribi Zida ti pou annan lotorite ek pouvwar ziska ki Silo i arive. Sa desandans Zida i Zezi Kri, sa enn ki Zeova in donn dominasyon dan lesyel. Kris i annan lotorite ek pouvwar pour komande.—Psonm 2:8, 9; Izai 55:4; Danyel 7:13, 14.
Leson pour nou:
38:26. Zida ti mal azir avek son belser Tamar, ki ti en vev. Me ler i ti fer fas avek son responsabilite akoz lansentman Tamar, Zida ti admet son fot avek limilite. Nou osi nou devret vitman rekonnet e aksepte nou fot.
39:9. Lafason ki Zozef ti reazir anver madanm Potifar i montre ki son panse ti an armoni avek panse Bondye lo size moralite e son konsyans ti ganny gide par bann prensip Bondye. Nou devret fer parey anmezir ki nou ganny plis konnesans egzakt lo laverite.
41:14-16, 39, 40. Zeova i kapab sanz sitiasyon bann ki annan lakrent pour li. Ler maler i arive, i byen pour nou met nou konfyans dan Zeova e reste fidel avek li.
Zot ti annan Lafwa dirab
Abraam, Izaak, Zakob, ek Zozef ti vreman bann zonm ki ti annan lakrent pour Bondye e osi lafwa. Resi zot lavi ki trouve dan Zenez i vreman fortifye nou lafwa e ansenny nou bann bon leson.
Ou kapab benefisye avek sa resi ler ou lir Labib tou le semenn ki’n ganny progranmen pour Lekol Minister Teokratik. Ler nou konsider sa bann pwen ki’n ganny mansyonnen, sa pou fer sa bann resi vin vivan.
[Not anba lo paz]
^ par. 1 Vwar lartik “Parol Bondye i vivan—Bann Pwen enteresan dan Liv Zenez—1” dan Latour Veyer le 1 Zanvye, 2004.
[Portre lo paz 15]
Zeova ti beni Zozef
[Portre lo paz 15]
Abraam ti en zonm ki ti annan lafwa
[Portre lo paz 15]
Lot ki ti en zonm drwat ti ganny prezerve ensi ki son de fiy
[Portre lo paz 17]
Zakob ti apresye bann keksoz sakre. Eski ou osi tou?