Personn pa kapab arive konpran Grander Zeova
Personn pa kapab arive konpran Grander Zeova
“Zeova i gran e vreman merit ganny loue. Personn pa kapab arive konpran son grander.”—PSONM 145:3.
1, 2. Ki kalite dimoun David ti ete, e ki mannyer i ti konsider son lekor an rapor avek Bondye?
PSONM 145 ti ganny konpoze par en zonm byen renonmen dan listwar. Letan i ti ankor en zenn garson, i ti konbat avek en zean ki ti byen arme e touy li. Kan i ti en lerwa, i ti ganny laviktwar lo bokou son bann lennmi dan konba. I ti apel David, e i ti dezyenm lerwa dan ansyen Izrael. Apre son lanmor, son repitasyon ti reste. Menm ozordi, bokou dimoun i konn serten keksoz lo David.
2 Kantmenm David ti akonpli bokou, i pa ti annan en gran lopinyon lo li menm. Dan en kantik, i ti dir sa lo Zeova: “Kan mon vwar ou lesyel, travay ou ledwa, lalin ek zetwal ki ou’n prepare, ki zonm mortel i ete ki ou gard li antet, e en senp imen ki ou pran swen avek li?” (Psonm 8:3, 4) Olye krwar ki li menm li David i ti en gran dimoun, i ti rekonnet ki se Zeova ki ti delivre li dan lanmen tou son bann lennmi. I ti dir sa lo Bondye: “Ou pou sov mwan parey en boukliye. Ou limilite i fer mwan gran.” (2 Samyel 22:1, 2, 36) Zeova i demontre limilite kan i pran pitye pour bann peser, e David ti rekonesan pour faver imerite Bondye.
‘Mon pou loue mon Bondye, mon Lerwa’
3. (a) Ki pwennvi David ti annan lo pouvwar lerwa Izrael? (b) Ziska ki degre David ti anvi loue Zeova?
3 Menm si David ti ganny apwente konman lerwa par Bondye, i ti konsider Zeova konman vre Lerwa Izrael. David ti dir: “Rwayonm i pour ou, O Zeova, sa Enn ki osi elev ou menm konman sef lo tou.” (1 Kronik 29:11) Deplis, David ti vreman annan en gran respe pour Bondye konman en Dirizan! I ti sante: “Mon pou loue ou, O mon Bondye Lerwa, e mon pou beni ou non tou letan, wi pour touzour. Mon pou beni ou toudilon lazournen. Mon pou loue ou non tou letan, wi pour touzour.” (Psonm 145:1, 2) David ti anvi loue Zeova lazournen antye e pour touzour.
4. Ki bann fo lakizasyon ki Psonm 145 i demanti?
4 Satan ti dir ki Bondye i en dirizan egois e ki priv son bann kreatir laliberte. Psonm 145 i prouve ki sa i fo. (Zenez 3:1-5) Sa psonm i osi demanti Satan, ki’n dir ki bann ki obeir Bondye i fer li zis pour ganny serten byenfe, pa akoz zot kontan Bondye. (Zob 1:9-11; 2:4, 5) Parey David, ozordi bann vre Kretyen pe fourni en larepons pour bann fo lakizasyon ki Satan in fer. Zot seri zot lespwar pour viv pour touzour anba dominasyon Rwayonm akoz zot anvi loue Zeova pour touzour. Plizyer milyon dimoun in deza konmans fer sa par demontre lafwa dan sakrifis Zezi e par servi Zeova avek lanmour apre ki zot in dedye zot lavi avek li e batize.—Romen 5:8; 1 Zan 5:3.
5, 6. Ki loportinite nou annan pour beni e loue Zeova?
5 Mazin sa kantite loportinite ki nou bann serviter Zeova nou annan pour beni e loue li. Nou kapab fer sa dan lapriyer, kan nou’n ganny touse oprofon par en keksoz ki nou’n lir dan son Parol, Labib. Nou kapab eksprim nou rekonesans e loue Zeova kan nou enpresyonnen par lafason ki i azir avek son pep e osi kan nou emerveye avek serten laspe son zoli kreasyon. Nou osi beni Zeova kan nou diskit konsernan son plan avek bann konpanyon Kretyen dan renyon oubyen dan nou bann konversasyon personnel. Anfet, tou “bonn aksyon” ki nou fer dan lentere Rwayonm Bondye i anmenn loner pour Zeova.—Matye 5:16.
6 En legzanp sa bann bon aksyon se konstriksyon bann lasal ladorasyon ki pep Zeova in fer resaman dan bann pei pov. Bokou sa bann lasal in ganny konstri avek led finansyel bann konpanyon Kretyen dan lezot pei. Serten Kretyen in ede par volonterman al dan sa bann landrwa pour donn lanmen konstri sa bann Lasal Rwayonm. Parmi tou bann bon aksyon, loue Zeova par pres sa bon nouvel lo son Rwayonm i pli enportan. (Matye 24:14) Parey lezot verse dan sa Psonm 145 i montre, David ti apresye lafason ki Bondye i dirize e i ti glorifye Li konman Lerwa. (Psonm 145:11, 12) Eski ou osi ou apresye sa bon fason ki Bondye i dirize? Eski ou souvan koz avek lezot konsernan son Rwayonm?
Legzanp pour montre konman Zeova i gran
7. Ki sa premye rezon nou annan pour loue Zeova?
7 Psonm 145:3 i donn rezon pli enportan pour loue Zeova. David i sante: “Zeova i gran e vreman merit ganny loue. Personn pa kapab arive konpran son grander.” Grander Zeova napa limit. Personn pa kapab fini dekouver, konpran, oubyen etidye son grander. Me aprezan annou vwar serten legzanp ki montre konman Zeova i gran, bann legzanp ki pou sirman benefisye nou.
8. Ki liniver i demontre an rapor avek grander ek pwisans Zeova?
8 Esey mazin en zour swar ki ou ti get anler dan en lesyel kler. Ou ti dan en landrwa kot ti napa okenn lalimyer. Eski ou pa ti enpresyonnen pour vwar sa kantite zetwal dan lespas? Eski ou pa ti santi ou pouse pour glorifye Zeova pour son grander ki’n fer li kree tou sa bann keksoz dan lespas? Parkont, sa ki ou ti vwar ti zis en pti poursantaz sa kantite zetwal dan sa galaksi ki later i form parti. Anplis ki sa, i annan anviron plis ki en santenn bilyon galaksi. Zis trwa ladan ki nou kapab vwar san servi en teleskop. Vreman, sa kantite zetwal ek galaksi ki form sa liniver imans i montre sa pwisans ki Zeova i annan pour kree e Son grander ki personn pa pou arive konpran.—Izai 40:26.
9, 10. (a) Ki laspe grander Zeova nou trouve an rapor avek Zezi Kri? (b) Ki lefe rezireksyon Zezi i devret annan lo nou lafwa?
9 Annou vwar lezot laspe grander Zeova. Sa i annan pour fer avek Zezi Kri. Lefe ki Bondye in kree son Garson e servi li pour bokou bokou syek konman Son “zouvriye abil,” sa i montre nou ki kantite gran Bondye i gran. (Proverb 8:22-31) Zeova ti demontre grander son lanmour kan i ti donn son sel garson konman en sakrifis pour limanite. (Matye 20:28; Zan 3:16; 1 Zan 2:1, 2) Deplis, sa lekor spirityel manifik ki Zeova ti fer pour Zezi ler i ti resisit li i enkrwayab.—1 Pyer 3:18.
10 Rezireksyon Zezi i enplik plizyer laspe grander Zeova ki enpresyonan. Sirman, Bondye ti fer Zezi rapel kreasyon tou keksoz vizib e envizib. (Kolosyen 1:15, 16) Sa i enkli lezot kreatir spirityel, liniver, later, e tou lezot form lavi lo later. Apard ki redonn son Garson konnesans lo listwar lavi lo later e dan lesyel ki li menm i ti’n temwannyen avan i vin lo later, Zeova ti osi fer Zezi rapel tou sa ki i ti eksperyanse konman en zonm parfe. Wi, rezireksyon Zezi i montre ki kantite gran Zeova i gran. Deplis, sa i en garanti ki lezot dimoun i kapab ganny resisite. I devret fortifye nou lafwa ki Bondye i kapab redonn lavi sa kantite dimoun mor ki i’n gard dan son memwar parfe.—Zan 5:28, 29; Akt 17:31.
Travay merveye ek bann gran Keksoz ki Zeova in fer
11. Ki gran travay Zeova ti konmanse zour Lapannkot lannen 33 N.L.?
11 Depi rezireksyon Zezi, Zeova in fer bokou lezot gran travay e bann travay merveye. (Psonm 40:5) Zour Lapannkot lannen 33 N.L., Zeova ti kree en nouvo nasyon, ‘Izrael Bondye.’ Sa nasyon i formen avek bann disip Kris ki’n ganny swazir par lespri sen. (Galat 6:16) Dan en fason enpresyonan, sa nouvo nasyon spirityel ti agrandi e propaz partou. Apre lanmor bann zapot, bann fo lansennyman ti devlope e se la kot larelizyon Kretyente ti aparet. Kantmenm sa, Zeova ti kontinyen fer bann travay merveye pour fer sir ki son plan i ganny realize.
12. Lefe ki Labib i disponib dan tou langaz prensipal lo later, ki sa i endike?
12 Par egzanp, Labib an antye ti ganny prezerve e avek letan ganny tradwir dan tou bann langaz prensipal lo later ozordi. Laplipar-di-tan, Labib ti ganny tradwir dan bann sitiasyon difisil e bann ki ti fer li ti ganny menase amor par bann reprezantan Satan. Wi, tradiksyon Labib dan plis ki 2,000 langaz pa ti pou’n posib si sa pa ti lavolonte Zeova, sa Bondye ki nou pa pou zanmen arive konpran son grander!
13. Konman ki Zeova in montre ki i gran an rapor avek son plan konsernan Rwayonm, depi 1914?
13 Zeova in montre konman i gran an rapor avek son plan konsernan Rwayonm. Par egzanp, an 1914, i ti fer son Garson, Zezi Kri vin Lerwa dan lesyel. En pti pe letan apre, Zezi ti pran aksyon kont Satan ek son bann demon. Zot ti ganny pouse dan lesyel e zot in ganny restrikte lo later, kot zot pe esper sa letan kot zot pou ganny zete dan labim. (Revelasyon 12:9-12; 20:1-3) Depi sa letan, bann frer swazir Zezi in ganny plis persekisyon. Me Zeova in soutenir zot pandan prezans envizib Kris.—Matye 24:3; Revelasyon 12:17.
14. Ki sa travay merveye ki Zeova ti fer an 1919, e ki sa ti akonpli?
14 An 1919, Zeova ti fer en lot travay merveye ki demontre ki kantite gran i gran. Bann disip swazir Zezi ki ti inaktif spirityelman, ti repran zot aktivite. (Revelasyon 11:3-11) Depi sa, dan bann lannen ki’n swiv, bann Kretyen swazir in pres sa bon nouvel lo sa Rwayonm ki’n ganny etabli dan lesyel avek devouman. Lezot Kretyen swazir in ganny rasanble pour konplet sa sif 144,000. (Revelasyon 14:1-3) Zeova in osi servi bann disip swazir Kris pour poz fondasyon “en nouvo later,” setadir en sosyete imen ki drwat. (Revelasyon 21:1) Me ki pou arive avek sa “nouvo later” apre ki tou bann Kretyen swazir i al dan lesyel?
15. Ki travay bann Kretyen swazir in organize e ki rezilta zot in gannyen?
15 An 1935, ti annan de lartik enportan dan magazin Latour Veyer le 1 ek le 15 Out, ki ti koz lo “sa gran lafoul” ki Revelasyon sapit 7 i mansyonnen. Avek devouman, bann Kretyen swazir ti konmans rod e envit sa bann konpanyon sorti dan tou nasyon, tribi, pep, ek langaz pour asosye avek zot. Sa “gran lafoul” pou sirviv sa ‘gran ladetres’ ki pe vini, avek lespwar pour viv pour touzour dan Paradi konman manm sa “nouvo later.” (Revelasyon 7:9-14) Gras a sa travay predikasyon e fer disip ki’n ganny organize par bann Kretyen swazir, plis ki sis milyon dimoun i aprezan annan lespwar pour viv pour touzour lo later. Pour ki loner i devret ale pour sa ogmantasyon malgre lopozisyon Satan ek son lemonn koronpi? (1 Zan 5:19) Zis Zeova ki kapab akonpli tousala an servan son lespri sen.—Izai 60:22; Zekarya 4:6.
Labote manifik Zeova ek son Grander
16. Akoz bann imen pa kapab vwar ‘labote manifik grander Zeova’ avek zot lizye?
16 Nenport ki kalite “travay merveye” ek ‘bann gran keksoz ki Zeova in fer’ pa pou zanmen ganny oubliye. David ti ekrir: “En zenerasyon apre lot pou aplodi ou travay. Zot pou koz lo bann gran keksoz ki ou’n fer. Mon pou preokip mwan avek labote manifik ou grander ek bann keksoz konsernan ou travay merveye. Zot pou koz konsernan lafors ou bann keksoz ki fer per. Mwan mon pou koz lo ou grander.” (Psonm 145:4-6) Pourtan, ki kantite David ti kapab konnen lo labote manifik Zeova, vi ki “Bondye i Lespri” e okenn imen pa kapab vwar li avek zot lizye?—Zan 1:18; 4:24.
17, 18. Ki mannyer lapresyasyon David pour ‘labote manifik grander Zeova’ ti agrandi?
17 Kantmenm David pa ti kapab vwar Bondye, son lapresyasyon pour grander Zeova ti ogmante dan diferan fason. Par egzanp, i ti kapab lir bann resi dan Lekritir konsernan bann gran keksoz ki Bondye ti’n fer, tel konman detri en lemonn mesan an servan en deliz. Petet David ti aprann konman bann fo bondye Ezipsyen ti ganny imilye tandis ki Bondye ti sov bann Izraelit dan lesklavaz Lezip. Tou sa bann levennman i montre grander Zeova.
18 Byensir, lapresyasyon David pa ti grandi zis par lir Lekritir me osi par reflesir lo la. Par egzanp, i ti’n kapab reflesir lo sa ki ti arive kan Zeova ti donn Lalwa nasyon Izrael. Ti annan loraz, zekler, en nyaz epe, e en gro son tronpet. Montanny Sinai ti sekwe e lafimen ti sorti ladan. Bann Izraelit ki ti’n rasanble anba montanny ti menm tann sa “Dis Komannman” sorti dan dife ek nyaz letan Zeova ti pe koz avek zot atraver en lanz. (Deterononm 4:32-36; 5:22-24; 10:4; Egzod 19:16-20; Akt 7:38, 53) Sa ti vreman montre konman Zeova i gran! Bann ki kontan Parol Bondye e ki reflesir lo bann resi koumsa, pou definitivman ganny touse par ‘labote manifik grander Zeova.’ Ozordi nou annan Labib an antye, kot nou kapab lir konsernan diferan vizyon manifik ki fer nou enpresyonnen par grander Zeova.—Ezekyel 1:26-28; Danyel 7:9, 10; Revelasyon, sapit 4.
19. Kwa ki pou ogmant nou lapresyasyon pour grander Zeova?
19 Etidye lalwa ki Bondye ti donn bann Izraelit ti en lot fason ki ti’n kapab fer David enpresyonnen par grander Bondye. (Deterononm 17:18-20; Psonm 19:7-11) Lobeisans anver lalwa Zeova ti onor nasyon Izrael e separ li avek tou lezot pep. (Deterononm 4:6-8) Parey ti leka avek David, kan nou lir Labib regilyerman, reflesir lo la oprofon, e etidye li seryezman, sa pou ogmant nou lapresyasyon pour grander Zeova.
Bann Kalite Bondye i glorifye son Grander
20, 21. (a) Psonm 145:7-9 i glorifye grander Zeova an rapor avek ki kalite? (b) Ki lefe bann kalite Bondye ki’n ganny mansyonnen la i annan lo tou sa ki kontan li?
20 Parey nou’n remarke, sa premye sis verse dan Psonm 145 i donn nou bann bon rezon pour loue Zeova akoz bann keksoz ki annan pour fer avek son grander. Verse 7 a 9 i glorifye grander Zeova par refer avek son bann kalite. David i sante: “Zot labous pou deborde avek bann lekspresyon louanz kan zot pou tann koz lo labondans ou labonte, e zot pou kriye avek lazwa akoz ou ladrwatir. Zeova i konpasyon e mizerikord, i pa ankoler vitman e i annan en gran labonte leker. Zeova i bon anver tou, e son mizerikord i pour tou sa ki i’n kree.”
21 Premyerman David i refer avek labonte ek ladrwatir Zeova, bann kalite ki Satan ti met an dout. Ki lefe sa bann kalite i annan lo tou sa ki kontan Bondye e soumet avek son lotorite? Labonte Zeova ek sa fason drwat ki i dirize i fer son bann adorater sitan zwaye ki zot pa kapab aret loue li. Deplis, Zeova i demontre son labonte anver “tou” dimoun. Fotespere ki sa i ed bokou plis dimoun ankor pour repantir e vin bann adorater sa vre Bondye avan i tro tar.—Akt 14:15-17.
22. Ki mannyer Zeova i tret son bann serviter?
22 David ti osi apresye bann kalite ki Bondye li menm ti mansyonnen kan I ti “pas devan figir [Moiz] e deklare: ‘Zeova, Zeova, en Bondye mizerikord e konpasyon, pa ankoler vitman, e ris an labonte leker e an verite.’ ” (Egzod 34:6) Se pour sa ki David ti kapab dir: “Zeova i konpasyon e mizerikord, i pa ankoler vitman e i annan en gran labonte leker.” Menm si Zeova i sitan gran ki personn pa pou arive konpran son grander, i onor son bann serviter par tret zot avek konpasyon. I annan bokou mizerikord, i pare pour pardonn bann peser ki repantir lo baz sakrifis Zezi. Deplis, Zeova pa ankoler vitman. I donn son bann serviter loportinite pour sirmont serten febles ki ti a kapab anpes zot antre dan son nouvo lemonn drwat.—2 Pyer 3:9, 13, 14.
23. Ki kalite enportan nou pou diskite dan lartik swivan?
23 David i glorifye Bondye pour son labonte leker, oubyen son lanmour fidel. Anfet, larestan Psonm 145 i montre konman Zeova i demontre sa kalite e konman son bann serviter fidel i reazir anver son labonte leker. Nou pou diskit sa dan lartik swivan.
Ki ou pou reponn?
• Ki loportinite nou annan pour loue Zeova “toudilon lazournen”?
• Ki legzanp ki montre ki personn pa pou kapab arive konpran grander Zeova?
• Ki mannyer nou lapresyasyon pour labote grander Zeova i kapab agrandi?
[Kestyon]
[Portre lo paz 3]
Bann galaksi dan liniver i montre konman Zeova i gran
[Portre lo paz 3]
Courtesy of Anglo-Australian Observatory, portre par David Malin
[Portre lo paz 5]
Konman grander Zeova in ganny demontre an rapor avek Zezi Kri?
[Portre lo paz 6]
Kan bann Izraelit ti resevwar Lalwa kot montanny Sinai, zot ti vwar laprev labote grander Zeova