“Senn sa Lemonn pe sanze”

“Bann frer, la sa ki mon oule dir. Letan i kourt.”—1 KORENTYEN 7:29.

1, 2. Ki sanzman ki ou’n vwar arive dan ou letan?

KI SANZMAN ki ou’n vwar arive dan ou letan? Eski ou mazin ennde? Par egzanp, i’n annan progre dan resers medikal. Resers dan sa domenn in fer ki lakantite letan ki en dimoun i viv an mwayenn dan serten pei in ogmante sorti 50 an okonmansman 20 tyenm syek pour ozordi ariv plis ki 70 an! Mazin osi konman nou’n benefisye par byen servi radyo, televizyon, telefonn mobil, ek faks. Pa bliye osi ki i’n annan progre dan domenn ledikasyon, transportasyon, ek drwa imen. Tousala in ede pour amelyor lavi bokou dimoun.

² Byensir, pa tou sanzman ki’n anmenn byenfe pour nou. Ogmantasyon krim, labi drog, divors, pri lavi, menas terorism ek bann prensip moral ki pe perdi, tousala in anmenn bann sitan move lefe ki nou pa kapab inyore. Antouka, ou ava dakor avek sa ki zapot Pol ti ekrir byen lontan: “Senn sa lemonn pe sanze.”—1 Korentyen 7:31, NW.

3. Ki Pol ti oule dir kan i ti ekrir ki “senn sa lemonn pe sanze”?

³ Kan Pol ti dir sa, i ti pe konpar sa lemonn avek lasenn en teat. Bann akter dan sa teat—bann gran politisyen, sef relizye, ek bann gran personnaz dan lasosyete—i fer zot laparans lo lasenn, zwe zot rol, e apre kit lasenn pour lezot akter. Lemonn in koumsa pour en bon pe letan. Dan lepase, en pei ti kapab ganny dirize par manm en sel fanmiy pour en bann dizenn oubyen santenn lannen. Sanzman ti al dousman. Me i pa leka ozordi kot listwar i kapab sanze omoman ki en gran dirizan i ganny asasinen! Wi, sa letan ki nou viv ladan pa stab ditou, e nou pa konnen ki demen pou anmennen.

4. (a) Ki pwennvi balanse bann Kretyen i bezwen annan konsernan bann levennman dan sa lemonn? (b) Ki sa de kalite laprev ki nou pe al egzaminen?

 ⁴ Si lemonn i en lasenn e son bann dirizan i bann akter, alors bann Kretyen zot bann spektater. * Me lefe ki zot “pa fer parti lemonn,” zot pa tro trakas zot avek performans oubyen menm lidantite sa bann akter. (Zan 17:16) Okontrer, zot pe rod okenn keksoz ki kapab endik zot ki sa pyes teat pe al fini—anfet i pou mal fini. Sa se akoz zot konnen ki sa sistenm i bezwen fini avan Zeova i entrodwir sa nouvo lemonn drwat ki lontan nou ti pe espere. * Alor, annou egzamin de kalite laprev ki montre nou pe viv dan letan lafen e ki nouvo lemonn i lanmenm dan kontour. Sa i: (1) Kalkilasyon bann dat dan Labib ek (2) sitiasyon lemonn ki pe deteryore.—Matye 24:21; 2 Pyer 3:13.

Alafendefen, en Mister i ganny devwale!

5. Ki savedir “letan bann nasyon etranze,” e akoz i enteres nou?

⁵ Zezi ti koz lo en letan kot bann dirizan lemonn ti pou okip lasenn san okenn lenterferans Rwayonm Bondye. Zezi ti apel sa peryod letan “letan bann nasyon etranze.” (Lik 21:24) Kan “letan bann nasyon etranze” ti pou’n fini, Rwayonm Bondye dan lesyel ti pou vin o pouvwar, avek Zezi ki’n ganny apwente konman son Dirizan. Premyerman, Zezi ti pou renny “omilye [son] bann lennmi.” (Psonm 110:2) Apre sa, dapre Danyel 2:44, sa Rwayonm ti pou “kraz e met en lafen” avek tou gouvernman imen, e i ti pou reste pour touzour.

6. Kan “letan bann nasyon etranze” ti konmanse, konbyen letan i ti dire, e kan i ti fini?

⁶ Kan ki “letan bann nasyon etranze” ti pou fini e Rwayonm Bondye ti pou konmans rennyen? Larepons ki ti “ganny sele ziska letan lafen,” i enplik kronolozi Labib. (Danyel 12:9) Anmezir ki sa “letan” ti aprose, Zeova ti pran bann pa neseser pour devwal larepons avek en group etidyan Labib ki annan limilite. Avek led lespri Bondye, zot ti arive konpran ki “letan bann nasyon etranze” ti konmans ler Zerizalenm ti ganny detrir an 607 A.N.L. e sa “letan” ti dir pour 2,520 an. Alors, zot ti arive konpran ki an 1914 “letan bann nasyon etranze” ti terminen. Zot ti osi realize ki 1914 ti konmansman lafen sa sistenm. Vi ki ou en etidyan Labib, eski ou kapab servi Labib pour eksplike konman ki sa dat 1914 in ganny kalkile? *

7. Ki teks Labib ki ed nou pour konnen kan sa set letan dan liv Danyel ti konmanse, konbyen letan i ti dire, e kan i ti fini?

⁷ Nou kapab ganny en lide konman pour kalkil sa dat dan liv Danyel. Zeova ti servi Lerwa Babilonn, Neboukadnetsar, pour detrir Zerizalenm an 607 A.N.L., okonmansman “letan bann nasyon etranze.” Alors, i ti devwal avek sa lerwa ki pour en total set letan senbolik bann nasyon ti pou kontinyen dirize san ki I enterfer dan zot zafer. (Ezekyel 21:26, 27; Danyel 4:16, 23-25) Konbyen letan sa set letan senbolik ti pou dire? Dapre Revelasyon 11:2, 3, ek 12:6, 14, trwa letan edmi i fer 1,260 zour. Alors, set letan i bezwen de fwa 1,260 zour, ki fer 2,520. Se tou? Non. Zeova ti donn profet Ezekyel, ki ti viv menm lepok avek Danyel, en lareg pour enterpret bann keksoz senbolik: “En zour pour en lannen, en zour pour en lannen, se sa ki mon donn ou.” (Ezekyel 4:6) Alors sa set letan i an realite 2,520 lannen.  Si nou kont 2,520 lannen apartir lannen 607 A.N.L., nou tonm lo 1914 konman sa lannen ki letan bann nasyon ti fini.

“Letan lafen” in ganny konfirmen

8. Ki laprev ou kapab montre pour fer vwar ki sitiasyon lemonn in vin pli pir depi 1914?

⁸ Bann levennman ki pe arive dan lemonn depi 1914 i konfirmen ki sa leksplikasyon ki nou’n fek vwar baze lo kronolozi Labib i korek. Zezi li menm ti dir ki lager, lafanmin, ek maladi ti pou endike ki nou pe viv dan letan lafen sa sistenm. (Matye 24:3-8; Revelasyon 6:2-8) Sanmenm ki nou’n vwar depi 1914. Zapot Pol ti azoute ki latitid bann dimoun antre zot ti pou sanze. Sa ki i dir konsernan sa bann sanzman i egzakteman sanmenm ki nou tou nou pe vwar avek nou lizye.—2 Timote 3:1-5.

9. Ki bann obzervater in dir konsernan sitiasyon lemonn depi 1914?

⁹ Eski “senn sa lemonn” in vreman sanz sa kantite ki nou pe krwar depi 1914? Dan liv The Generation of 1914, Profeser Robert Wohl i fer sa remark swivan: “Bann dimoun ki’n viv avan e apre sa lager pa kapab rezet sa lide ki en lemonn ti vwar son lafen an Out 1914 e en lot ti konmanse.” Pour konfirm sa, Dokter Jorge A. Costa e Silva, ki direkter lasante mantal pour Lorganizasyon Mondyal pour Lasante, ti ekrir: “Nou pe viv dan en lepok kot keksoz pe sanz vreman vit, e sa in fer traka ek presyon ariv en nivo ki nou pa’n zanmen deza eksperyanse dan listwar imen.” Eski ou personnelman ou’n eksperyans sa?

10. Ki leksplikasyon Labib i donnen konsernan sa kondisyon deplorab ki lemonn i ladan depi 1914?

¹⁰ Lekel ki par deryer sa kondisyon deplorab ki lemonn i ladan? Revelasyon 12:7-9 i devwal son lidantite: “Ti annan lager dan lesyel, Misel [Zezi Kri] avek son bann lanz ti lager kont dragon [Satan oubyen Dyab]. Dragon avek son bann lanz ti lager, me dragon pa ti ganny laviktwar, e li avek son bann lanz pa ti kapab reste ankor dan lesyel. Sa gro dragon, ti ganny zet ater. Limenm . . . ki tronp lemonn antye.” Alors, Satan ki par deryer tou sa problenm ki nou pe vwar lo later. Deplis, depi ki i’n ganny pouse dan lesyel an 1914, sa in anmenn ‘maler pour later ek lanmer, parski dyab in desann kot zot avek en gran lakoler, akoz i konnen ki i reste li ankor zis en pti pe letan.’—Revelasyon 12:10, 12.

Konman tousala pou fini

11. (a) Ki metod Satan i servi pour tronp “lemonn antye”? (b) Ki zefor spesyal Satan pou fer ki zapot Pol in atir latansyon lo la?

¹¹ Vi ki Satan i konnen ki son lafen pe aprose, i’n ranforsi son zefor depi 1914 pour tronp “lemonn antye.” I konn tre byen konman pour tronp dimoun. Li i fer son louvraz deryer lasenn, i met son bann akter lo lasenn,  setadir bann dirizan sa lemonn ek bann ki vin fer sanzman. (2 Timote 3:13; 1 Zan 5:19) Enn son lobzektif se pour fer dimoun krwar ki son fason dirize ki pou anmenn vre lape. An zeneral, son propagann in reisi parski dimoun i kontinyen annan lespwar malgre ki nou pe kontinyen vwar plis laprev ki sitiasyon pe vin pli pir. Zapot Pol ti predir ki zis avan sa sistenm i ganny detrir, pou annan en term remarkab ki pou souvan ganny servi dan propagann Satan. I ti ekrir: “Kan dimoun i ava pe dir: ‘Tou i an-pe e an sekirite,’ alor en sel kou destriksyon pou tonm lo zot, parey douler lakousman ki sezi en madanm ansent.”—1 Tesalonisyen 5:3; Revelasyon 16:13, 14.

12. Ki zefor ki’n kontinyen ganny fer pour anmenn lape dan nou letan?

¹² Dan sa bann dernyen lannen, bann politisyen in souvan servi sa term “lape ek sekirite” pour dekrir plizyer zot bann plan. Zot ti menm deklar 1986 konman Lannen Enternasyonal pour Lape, menm si sa lannen pa ti gard sa repitasyon. Eski sa bann zefor ki bann dirizan lemonn pe fer pe deza akonpli 1 Tesalonisyen 5:3, oubyen eski Pol ti pe refer avek en levennman spesifik ki ti pou sekwe lemonn antye?

13. Kan Pol ti predir ki dimoun pou dir: “Tou i an-pe e an sekirite,” avek ki i ti konpar sa destriksyon ki ti pou swiv? Ki nou kapab aprann atraver sa?

¹³ Vi ki nou pli konpran bann profesi Labib apre ki zot in ganny akonpli oubyen anmezir ki zot pe ganny akonpli, nou pou bezwen espere pour vwar. Me i enteresan note ki Pol ti konpar sa destriksyon zis apre ki dimoun i dir: “Tou i an-pe e an sekirite,” avek douler lakousman ki sezi en madanm ansent. Pandan en peryod nef mwan, en manman ki pe ekspekte en baba i vin deplizanpli konsyan ki sa baba pe devlope dan son vant. Petet i kapab tann batman leker son baba oubyen i kapab santi li pe bouze dan son vant. Sa baba i menm kapab tap tap li detanzaot. Sa bann siny i vin deplizanpli kler ziska ki en zour, sa manman i santi en douler en sel kou, ki anons larive sa levennman ki zot ti pe espere—nesans sa baba. Alors, nenport ki fason ki sa profesi “tou i an-pe e an sekirite” i ganny akonpli, i pou swiv par en levennman ki pou ariv en sel kou, ki pou fer mal, me ki pou finalman vin en benediksyon. Sa se destriksyon bann dimoun mesan e larive en nouvo lemonn.

14. Dan ki lord bann fitir levennman pou arive e konman i pou fini?

¹⁴ Sa destriksyon ki pe vini pou efreyan pour bann Kretyen fidel ki pou gete konman bann spektater. Premyerman, bann lerwa lo later (laspe politik lorganizasyon Satan) pou vir kont bann siporter Gran Babilonn (son laspe relizye) e detrir zot. (Revelasyon 17:1, 15-18) Alor, san ekspekte keksoz pou sanze en sel kou dan sa teat. Rwayonm Satan pou divize kont li menm, ler enn pou atak lot. Deplis, Satan pa pou kapab anpes sa arive. (Matye 12:25, 26) Zeova pou met dan leker sa bann lerwa lo later “lavolonte pour akonpli son plan,” setadir pour fer fini avek sa bann larelizyon lo later ki opoz li. Apre ki bann fo larelizyon i ganny detrir, Zezi Kri pou diriz son bann larme seles dan en konba pour detrir tou sa ki reste dan lorganizasyon Satan. Savedir son laspe komers ek politik. Finalman, Satan li menm pa pou kapab fer nanryen. Lo sa not, rido pou fermen e sa teat ki’n konmanse depi byen lontan pou fini lanmenm.—Revelasyon 16:14-16; 19:11-21; 20:1-3.

15, 16. Ki lefe sa rapel ki “letan i kourt” i devret fer lo nou?

¹⁵ Kan tou sa bann keksoz pou arive? Nou pa konn sa zour ek sa ler. (Matye 24:36) Me nou konnen ki “letan i kourt.” (1 Korentyen 7:29) Alors, i tre enportan ki nou byen servi sa letan ki reste. Konman? Parey zapot Pol i eksplike, nou bezwen “servi byen tou bann lokazyon” pour fer bann keksoz pli  enportan olye gaspiy letan lo bann keksoz ki pa sitan enportan. Nou bezwen fer sak zour konte. Akoz? “Parski sa letan ki nou pe viv ladan i move.” Alor, kan nou ‘konpran konman Zeova i oule nou azir,’ nou pa pou gaspiy sa letan presye ki reste nou.—Efezyen 5:15-17; 1 Pyer 4:1-4.

¹⁶ Vi ki nou konnen ki sa lemonn pe ariv ver son lafen, ki lefe sa i devret annan lo nou personnelman? Zapot Pyer ti ekrir sa pour nou byenfe: “Parski tousala pou ganny detri, ki kalite lavi zot devre viv? Zot devre anmenn en lavi sen e annan respe pour Bondye.” (2 Pyer 3:11) Se sa fason ki nou devret viv! An akor avek bon konsey Pyer, nou bezwen (1) vey byen lafason ki nou viv pour ki nou anmenn en lavi sen e (2) fer sir ki tou sa ki nou fer dan servis Zeova i touzour reflekte nou lanmour profon pour li.

17. Ki bann pyez Satan ki bann Kretyen fidel i devret kontinyen veye?

¹⁷ Lanmour pour Bondye pou ed nou reziste sa lemonn ki annan pouvwar pour atir nou. Vi ki nou konnen ki pe al arive avek sa sistenm, i danzere pour nou devlop en pasyon pour fason viv ek plezir sa lemonn ki kapab atiran. Menm si nou pe viv e travay dan sa lemonn, nou devret pran aker sa bon konsey pour pa profit tou sa ki dan lemonn. (1 Korentyen 7:31) Anfet, nou bezwen fer sir ki nou pa ganny anbete par propagann sa lemonn. Sa lemonn pa pou reisi trouv solisyon pour son bann problenm. I pa pou toultan kapab soutenir son lekor. Kwa ki fer nou asire ki sa pou leka? Parol enspire Bondye i dir sa: “Lemonn pou disparet ek tou son bann dezir; me sa ki fer lavolonte Bondye i reste eternelman.”—1 Zan 2:17.

Pa se tou, i annan ankor sa ki bon ki pe vini!

18, 19. Ki bann sanzman ki ou pli enpasyan pour vwar dan nouvo lemonn e akoz i pou vo lapenn espere?

¹⁸ Byento, Zeova pou met en lafen avek Satan ek bann ki siport li. Apre sa, bann fidel ki’n sirviv lafen sa sistenm pou konmans travay pour sanz “senn” sa lemonn enn fwa pour tou. Lager pou nepli gat senn sa lemonn parski Bondye pou fer “arete lager ziska dan bann landrwa pli lwen lo later.” (Psonm 46:9) Olye annan mankman manze, “pou annan legren an abondans lo later; . . . pou annan anplis.” (Psonm 72:16) Nou pou nepli vwar prizon, kordgard, maladi transmet par sèks, trafiker drog, lakour ki donn divors, bann prosedir pour bann ki’n faid pey zot det, ek terorism.—Psonm 37:29; Izai 33:24; Revelasyon 21:3-5.

¹⁹ Bann latonm pou vid. Plizyer bilyon dimoun ki pou ganny resisite—plis akter—pou vin lo lasenn. Pa i pou gou pour vwar plizyer zenerasyon reini ansanm e bann ki’n separe depi byen lontan pe ser kanmarad dan lebra telman zot kontan! Finalman, tou dimoun lo later pou ador Zeova. (Revelasyon 5:13) Kan tou keksoz lo lasenn pou’n fini aranze, rido pou ouver e later pou’n vin en paradi. Ki santiman ou pou gannyen kan ou get sa lasenn? Ou pou bezwen kriye, ‘Zot, lontan mon ti pe esper sa! Ti vo lapenn espere!’

[Not anba lo paz]

Ki ou pou reponn?

• Konman ki dan nou letan nou vwar realizasyon parol zapot Pol ki “senn sa lemonn pe sanze”?

• Konman kronolozi Labib i fer nou konnen kan “letan bann nasyon etranze” ti fini?

• Ki mannyer bann sanzman dan sitiasyon lemonn i konfirmen ki an 1914 “letan lafen” ti konmanse?

• Vi ki “letan i kourt,” ki lefe sa i devret fer lo nou?

[Kestyon]

[Portre lo paz 30]

Alafendefen, sa mister in ganny devwale!