Zeova i annan en gran Lanmour fidel
Zeova i annan en gran Lanmour fidel
“Zeova i . . . annan en gran labonte leker.”—PSONM 145:8.
1. Ki grander lanmour Bondye i ete?
“BONDYE i lanmour.” (1 Zan 4:8) Sa parol rekonfortan i prouve ki Zeova i diriz avek lanmour. Menm bann imen ki pa obeir li i benefisye avek soley ek lapli ki i fourni avek lanmour! (Matye 5:44, 45) Akoz Bondye i kontan bann imen, menm son bann lennmi i kapab repantir, retourn ver li, e ganny lavi. (Zan 3:16) Me byento, Zeova pou detrir bann mesan ki pa oule sanze. Sa i a permet bann ki kontan li pour rezwir lavi pour touzour dan en nouvo lemonn drwat.—Psonm 37:9-11, 29; 2 Pyer 3:13.
2. Ki kalite lanmour Zeova i demontre inikman anver bann ki’n dedye zot lavi avek li?
2 Zeova i kontan son bann vre adorater dan en fason ki presye pour zot e son lanmour i dire. En tel lanmour i ganny dekrir par en mo Ebre ki’n ganny tradwir konman “labonte leker,” oubyen “lanmour fidel.” Lerwa David dan ansyen Izrael ti vreman apresye labonte leker Bondye. Atraver son prop leksperyans ek refleksyon lo fason ki Bondye i azir anver lezot, David ti kapab sante avek konfyans: “Zeova i . . . annan en gran labonte leker [oubyen, “lanmour fidel”].”—Psonm 145:8.
Idantifye bann Fidel Bondye
3, 4. (a) Ki mannyer Psonm 145 i ed nou pour idantifye bann fidel Zeova? (b) Ki mannyer bann fidel Bondye i “beni” li?
3 Ana, manman profet Samyel, ti dir sa lo Zeova: “I vey lipye son bann fidel.” (1 Samyel 2:9) Lekel sa “bann fidel”? Lerwa David ti donn en larepons. Apre ki i ti glorifye Zeova pour son bann zoli kalite, i ti dir: “Ou bann fidel pou beni ou.” (Psonm 145:10) Petet ou pe demann ou lekor ki mannyer bann dimoun i kapab beni Bondye? Zot fer li prensipalman par loue li oubyen par koz an byen lo li.
4 Bann fidel Zeova se bann ki servi zot labous pour koz an byen lo li. Kwa ki domin zot konversasyon dan bann rankont sosyal oubyen dan bann renyon Kretyen? Se Rwayonm Zeova! Bann fidel Bondye i partaz menm santiman avek David, ki ti sante: “Zot pou koz lo laglwar ou rwayote e zot pou koz lo ou pwisans.”—Psonm 145:11.
5. Ki mannyer nou konnen ki Zeova i port latansyon kan son bann fidel i koz an byen lo li?
5 Eski Zeova i port latansyon kan son bann fidel i loue li? Wi, i ekout sa ki zot dir. Dan en profesi ki annan pour fer avek vre ladorasyon dan nou letan, Malaki ti ekrir: “Sa letan, bann ki annan lakrent pour Zeova ti koz avek kanmarad, sakenn avek son konpanyon, e Zeova ti kontinyen port latansyon e ekoute. En liv souvenir ti konmans ganny ekrir devan li pour bann ki annan lakrent pour Zeova e pour bann ki pans lo son non.” (Malaki 3:16) Zeova i vreman kontan kan son bann fidel i koz an byen lo li, e sa i fer li mazin zot.
6. Ki aktivite ki ed nou idantifye bann fidel Bondye?
6 Bann serviter fidel Zeova i osi kapab ganny idantifye par zot kouraz ek linisyativ pour koz avek bann dimoun ki pa ador sa vre Bondye. Anfet, bann fidel Bondye i “fer bann imen konn bann keksoz pwisan ki i’n fer e laglwar labote son rwayote.” (Psonm 145:12) Eski ou rod oubyen sezi tou loportinite ki ou gannyen pour koz avek bann ki pa Temwen konsernan rwayote oubyen gouvernman Zeova? Kontrerman avek bann gouvernman imen ki pou byento disparet, son gouvernman i pour touzour. (1 Timote 1:17) I tre esansyel pour dimoun konn konsernan gouvernman Zeova e pran zot pozisyon konman son siporter. David ti sante: “Ou pou lerwa pour touzour, e ou pou dominen pandan tou zenerasyon ki swiv.”—Psonm 145:13.
7, 8. Ki ti arive an 1914, e ki laprev i annan ki Bondye pe aprezan rennyen atraver Rwayonm son Garson?
7 Depi 1914, nou’n annan plis rezon pour koz konsernan gouvernman Zeova. Sa lannen, Bondye ti etabli son Rwayonm Mesyanik, avek Zezi Kri, Garson David, konman Lerwa. Dan sa fason, Zeova ti realiz son promes ki rwayonm David pou ganny solidman etabli pour touzour.—2 Samyel 7:12, 13; Lik 1:32, 33.
8 Bann siny prezans Zezi ki nou pe vwar, i laprev ki Zeova pe aprezan rennyen atraver Rwayonm son Garson, Zezi Kri. Laspe pli remarkab sa siny se sa travay ki Zezi ti predir pour tou bann fidel Bondye kan i ti dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Matye 24:3-14) Parski bann fidel Bondye pe akonpli sa profesi avek devouman, plis ki sis milyon zonm, madanm, ek zanfan pe aprezan partisip dan sa gran travay ki pa pou zanmen ganny repete. Byento tou bann ki opoz Rwayonm Zeova pou trouv zot lafen.—Revelasyon 11:15, 18.
Benefisye atraver Dominasyon Zeova
9, 10. Ki diferans i annan ant Zeova ek bann dirizan imen?
9 Si nou’n dedye nou lavi avek Souvren Senyer Zeova, nou relasyon avek li i anmenn bokou byenfe pour nou. (Psonm 71:5; 116:12) Par egzanp, akoz nou annan lakrent pour Bondye e nou fer sa ki drwat, nou ganny son laprouvasyon e nou pros avek li spirityelman. (Akt 10:34, 35; Zak 4:8) Kontrerman avek sa, bann dirizan imen i souvan frekant bann gran zans, parey bann sef militer, bann biznesmenn ris, oubyen bann dimoun ki popiler dan sport ek divertisman. En zournal Afriken, Sowetan, ti raporte ki en zofisye gouvernman enportan ti dir sa konsernan bann landrwa pov dan son pei: “Mon konpran akoz laplipar nou pa anvi al dan sa bann landrwa. I senpleman akoz nou anvi oubliye ki sa bann sitiasyon i egziste. I fatig nou konsyans e nou anbarase akoz nou nou pe pase dan bann [loto] byen ser.”
10 Byensir, serten dirizan imen i senserman enterese avek byennet zot sitwayen. Me menm bann ki pli onnet pa konn zot bann sitwayen byen. Anfet, nou kapab demande: Eski i annan okenn dirizan ki sitan enterese avek tou son sitwayen ki i pou vitman vin ed zot dan letan difisil? Wi, i annan. David ti ekrir: “Zeova pe donn sipor tou sa bann ki pe tonbe, e pe redres tou sa bann ki’n kourbe.”—Psonm 145:14.
11. Ki bann leprev bann fidel Bondye i rankontre, e ki led zot gannyen?
11 Bann fidel Bondye i rankontre bokou leprev ek maler akoz zot prop lenperfeksyon e akoz zot pe viv dan en lemonn ki anba pouvwar Satan, “dyab.” (1 Zan 5:19; Psonm 34:19) Bann Kretyen i osi ganny persekite. Serten i soufer avek en maladi kronik oubyen akoz zot in perdi en dimoun ki zot ti pros avek. Parfwa, fot ki bann fidel Zeova i fer i kapab fer zot “kourbe” avek dekourazman. Me nenport leprev ki zot rankontre, Zeova i touzour pare pour rekonfort zot tou e donn zot lafors spirityel ki zot bezwen. Lerwa Zezi Kri i annan menm lentere dan son bann sitwayen fidel.—Psonm 72:12-14.
Manze ki satisfer nou dan Letan apropriye
12, 13. Ki mannyer Zeova i fourni bezwen “tou kreatir vivan”?
12 Akoz i annan en gran labonte leker, Zeova i fourni tou bezwen son bann serviter. Sa i enkli donn zot manze nourisan ki satisfer zot. Lerwa David ti ekrir: “Tou lizye i get ou [Zeova] avek lespwar e ou pe donn zot zot manze dan son sezon. Ou pe ouver ou lanmen e satisfer dezir tou kreatir vivan.” (Psonm 145:15, 16) Menm dan letan maler, Zeova i kapab aranz keksoz pour ki son bann fidel i ganny ‘dipen sak zour.’—Lik 11:3; 12:29, 30.
13 David ti mansyonnen ki dezir “tou kreatir vivan” i ganny satisfe. Sa i enkli bann zannimo. Si ti napa sa kantite vezetasyon lo later ek plant dan lanmer, bann kreatir ki viv dan delo, bann zwazo ek bann zannimo lo later pa ti pou ganny loksizenn pour respire oubyen manze pour manze. (Psonm 104:14) Me Zeova i fer sir ki zot bezwen i ganny satisfe.
14, 15. Ki mannyer nouritir spirityel pe ganny fourni ozordi?
14 Kontrerman avek zannimo, imen i annan en bezwen spirityel. (Matye 5:3) Zeova i satisfer bezwen spirityel son bann fidel dan en fason vreman merveye! Avan son lanmor, Zezi ti promet ki ‘lesklav fidel e pridan’ ti pou donn bann disip Zezi “zot manze kan i ler.” (Matye 24:45) Ozordi, sa lesklav i konpoze avek sa restan 144,000 Kretyen swazir. Atraver zot, Zeova in vreman fourni nouritir spirityel an abondans.
15 Par egzanp, laplipar pep Zeova pe aprezan benefisye avek en nouvo tradiksyon Labib ki egzakt dan zot prop langaz. Pa Traduction du monde nouveau in vreman en benediksyon merveye! Deplis, plizyer milyon piblikasyon in ganny pibliye dan plis ki 300 langaz avek bi pour ed dimoun etidye Labib. Tou sa bann nouritir spirityel in vreman en benediksyon pour bann vre adorater partou lo later. Lekel ki merit ganny loner pour tousala? Zeova. Son gran labonte leker in fer li posib pour sa lesklav fourni “manze dan son sezon.” Par sa bann provizyon, “dezir tou kreatir vivan” dan sa paradi spirityel ozordi i ganny satisfe. Deplis, bann serviter Zeova i vreman kontan ki zot annan lespwar pour vwar later ganny transformen dan en paradi!—Lik 23:42, 43.
16, 17. (a) Ki legzanp nou annan konsernan nouritir ki vin dan son letan? (b) Ki mannyer Psonm 145 i eksprim santiman bann fidel Bondye konsernan sa kestyon prensipal ki Satan ti leve?
16 Annou vwar en legzanp remarkab nouritir spirityel ki’n ganny fourni dan son letan. Pandan 1939, Dezyenm Lager Mondyal ti konmanse Lerop. Sa menm lannen, dan Latour Veyer le 1 Novanm an Angle ti annan en lartik ki ti annan pour tit “Neutrality.” Gras a sa lenformasyon kler dan sa lartik, Temwen Zeova partou dan lemonn ti vwar nesesite pour pa siport sa bann nasyon ki ti pe lager dan okenn fason. Sa in fer bann gouvernman lo tou le de kote sa lager ki ti dir pour sis lannen ankoler avek zot. Me kantmenm zot ti ganny enterdi e persekite, bann fidel Bondye ti kontinyen pres sa bon nouvel Rwayonm. Depi 1939 ziska 1946, zot ti ganny beni avek en ogmantasyon 157 poursan. Deplis, zot fidelite remarkab pandan sa lager pe kontinyen ed dimoun pour idantifye sa vre larelizyon.—Izai 2:2-4.
17 Sa nouritir spirityel ki Zeova i fourni pa zis vin atan me i osi satisfer nou. Pandan Dezyenm Lager Mondyal, bann nasyon ti pe lager seryezman, tandis ki pep Zeova ti ganny led pour konsantre lo en keksoz bokou pli enportan ki zot prop delivrans. Zeova ti ed zot pour konpran ki premye konsern, ki enplik liniver antye, i annan pour fer avek son drwa pour dirize. I vreman satisfezan pour konnen ki par zot fidelite sak Temwen Zeova ti annan en pti rol pour zwe dan zistifikasyon drwa Zeova pour dirize e pour prouve ki Dyab i en manter! (Proverb 27:11) Kontrerman avek Satan ki koz lalang lo Zeova e son fason dirize, bann fidel Zeova i kontinyen deklare piblikman ki: “Zeova i drwat dan tou son semen.”—Psonm 145:17.
18. Ki bann legzanp nouritir spirityel nou’n gannyen resaman ki’n vin atan e ki’n vreman satisfer nou?
18 En lot legzanp nouritir spirityel ki’n vin atan e ki’n satisfer nou se sa liv Approchez-vous de Jéhovah. I ti ganny lanse dan Lasanble Distrik “Bann Proklanmater Rwayonm devoue” ki ti ganny fer partou dan lemonn dan lannen 2002 a 2003. Sa liv ki’n ganny prodwir par ‘lesklav fidel e pridan’ e ki’n ganny pibliye par Temwen Zeova, i konsantre lo bann kalite merveye Zeova, enkli sa bann kalite ki’n ganny mansyonnen dan Psonm 145. Sa zoli liv pou sirman zwe en gran rol pour ed bann fidel Bondye pour apros pli pre avek li.
En Letan pour apros pli pre avek Zeova
19. Ki sa letan enportan ki pe aprose, e konman nou kapab fer fas avek li?
19 Sa letan enportan pe aprose pour regle sa problenm lo drwa Zeova pour dirize. Parey Ezekyel sapit 38 in predir, Satan pou byento ranpli son rol konman “Gog sorti dan pei Magog.” Sa pou enplik en latak lo pep Zeova partou lo later. Satan pou sey fer tou sa ki i kapab pour fer tonbe bann fidel Bondye. Bann adorater Zeova pou bezwen envok li avek ensistans plis ki zanmen oparavan. Wi, zot pou apel li pour led. Eski zot lakrent ek lanmour pour Bondye pou anven? Pa ditou, parski Psonm 145 i dir: “Zeova i pre avek tou bann ki envok li, tou bann ki envok li avek senserite. I pou akonpli dezir bann ki annan lakrent pour li, e i pou tann zot lapel pour led. I pou sov zot. Zeova pe protez tou sa bann ki kontan li, me tou bann mesan i pou ekstermin zot.”—Psonm 145:18-20.
20. Ki mannyer Psonm 145:18-20 pou byento trouv son realizasyon?
20 Pa i pou gou pour nou santi Zeova pros avek nou e pe sov nou tandis ki tou bann mesan pe ganny detri! Pandan sa letan vreman kritik, ki sitan pros, Zeova pou ekout zis “bann ki envok li avek senserite.” Definitivman, i pa pou ekout bann ipokrit. Parol Bondye i montre klerman ki lesey bann mesan pour envok son non lo dernyen minit in touzour anven.—Proverb 1:28, 29; Mika 3:4; Lik 13:24, 25.
21. Ki mannyer bann fidel Zeova i montre ki zot kontan servi son non?
21 La i lemoman pour bann ki annan lakrent pour Zeova “envok li avek senserite.” Son bann fidel i kontan servi son non dan lapriyer e dan zot komanter ki zot fer dan bann renyon. Zot servi non Bondye dan zot konversasyon personnel. Avek kouraz, zot osi fer lezot konn non Zeova dan zot minister piblik.—Romen 10:10, 13-15.
22. Akoz i enportan pour nou kontinyen rezet bann latitid ek dezir lemonn?
22 Pour benefisye avek nou relasyon pros avek Zeova, i osi enportan pour nou kontinyen rezet bann keksoz ki afekte nou spirityalite. Sa i enkli kontan keksoz materyel, bann divertisman ki pa apropriye pour Kretyen, pa oule pardonnen, oubyen pa montre lentere anver bann ki dan bezwen. (1 Zan 2:15-17; 3:15-17) Si nou pa koriz zot, sa bann aktivite ek move tre i kapab fer nou komet pese grav e finalman perdi laprouvasyon Zeova. (1 Zan 2:1, 2; 3:6) I bon pour gard antet ki Zeova pou kontinyen demontre labonte leker, oubyen lanmour fidel anver nou, si selman nou reste fidel anver li.—2 Samyel 22:26.
23. Ki gran lavenir ki pe esper bann fidel Bondye?
23 Annou alor gard nou lespri lo sa gran lavenir ki pe esper bann fidel Zeova. An fezan sa, nou annan sa lespwar merveye pou vin enn parmi bann ki pou glorifye, beni, e loue Zeova “toudilon lazournen,” “wi pour touzour.” (Psonm 145:1, 2) Annou alor ‘reste dan lanmour Bondye an atandan lavi eternel.’ (Zid 20, 21) Anmenmtan ki nou kontinyen benefisye avek bann kalite merveye Zeova, enkli son gran labonte leker ki i demontre anver bann ki kontan li, fotespere ki nou annan menm santiman avek David dan dernyen parol Psonm 145: “Mon labous pou loue Zeova. Ki tou laser i beni son non sen pour bokou bokou letan, wi pour touzour.”
Ki ou pou reponn?
• Konman Psonm 145 i ed nou idantifye bann fidel Bondye?
• Ki mannyer Zeova i “satisfer dezir tou kreatir vivan”?
• Akoz nou bezwen apros pli pre avek Zeova?
[Kestyon]
[Portre lo paz 9]
Bann fidel Bondye i kontan koz lo bann keksoz pwisan ki I’n fer
[Portre lo paz 10]
Serviter Zeova i ed bann ki pa Temwen pour aprann konsernan laglwar son rwayote
[Portre lo paz 11]
Zannimo: Parque de la Naturaleza de Cabárceno
[Portre lo paz 11]
Zeova i fourni manze pour “tou kreatir vivan”
[Portre lo paz 12]
Zeova i donn lafors ek gidans son bann fidel ki rod son led atraver lapriyer