Zeova i pran swen avek nou toulezour
Zeova i pran swen avek nou toulezour
“Pa trakas zot lespri, . . . zot Papa i konnen ki zot bezwen tousala.”—LIK 12:29, 30.
1. Ki mannyer Zeova i fourni manze pour bann zannimo?
ESKI ou’n deza vwar en sren oubyen en lot zwazo pe bek beke dan later? Petet ou ti demann dan ou menm ki sa sren i vwar dan sa later pour manze. Dan son Sermon lo montanny, Zezi ti montre ki nou kapab retir en leson dan lafason ki Zeova i nouri bann zwazo. I ti dir: “Get bann zwazo ki anvole dan lezer; zot pa senm lagrenn, zot pa rekolte, e zot pa met an rezerv dan stor, pourtan zot Papa ki dan lesyel i nouri zot! E zot, eski pa zot annan plis valer ki bann zwazo?” (Matye 6:26) Zeova i fourni manze pour tou son bann kreatir dan en fason vreman merveye.—Psonm 104:14, 21; 147:9.
2, 3. Lefe ki Zezi ti ansenny nou pour priy pour nou dipen sak zour, ki leson spirityel nou kapab retire ladan?
2 Be akoz dan son model lapriyer Zezi ti dir nou demande pour: “Donn nou sak zour nou dipen neseser”? (Matye 6:11) Nou kapab retir bann leson spirityel ki vreman enportan dan sa senp demann. Premyerman, i fer nou rapel ki se Zeova ki fourni tou sa ki nou bezwen. (Psonm 145:15, 16) Bann imen i kapab plante e kiltive, me zis Bondye ki kapab fer pouse, ki swa spirityelman oubyen fizikman. (1 Korentyen 3:7) Sa ki nou manze e bwar i en kado sorti kot Bondye. (Akt 14:17) Letan nou demann li pour donn nou sa ki nou bezwen sak zour, sa i montre ki nou pa pran sa bann keksoz alalezer. Byensir, sa pa vedir ki aprezan nou nepli bezwen travay si nou kapab fer li.—Efezyen 4:28; 2 Tesalonisyen 3:10.
3 Dezyenmman, letan nou demann ‘nou dipen sak zour,’ sa i endike ki nou pa devret tro trakas pour demen. Zezi ti dir osi: “Alor pa bezwen pran traka e demann zot lekor, ‘Ki nou pou manze? Ki nou pou bwar? Ki nou pou mete?’ Bann payen ki rod tousala. Me zot Papa ki dan lesyel i konn tou sa ki zot bezwen. Rod plito Rwayonm Bondye ek son lazistis, e limenm i a donn zot anplis tou lezot keksoz osi. Alor pa trakas pour demen; demen pou anmenn ase traka par limenm.” (Matye 6:31-34) Priy pour ‘nou dipen sak zour’ i ankouraz nou pour viv en lavi senp, ‘kontant nou avek sa ki nou annan.’—1 Timote 6:6-8.
Nouritir spirityel sak Zour
4. Ki levennman dan lavi Zezi e osi bann Izraelit ki montre lenportans nouritir spirityel?
4 Priy pour nou dipen sak zour i devret osi fer nou rapel ki nou bezwen nouritir spirityel toulezour. Kantmenm Zezi ti byen lafen apre ki i pa ti’n manze pour en bon pe letan, i pa ti les Satan tant li pour fer ros vin dipen. I ti dir: “Dan Lekritir i’n dir: ‘Zonm pa viv zis lo dipen tousel me lo tou parol ki sorti dan labous Bondye.’ ” (Matye 4:4) La Zezi ti pe sit sa ki profet Moiz ti dir bann Izraelit: “[Zeova] ti imilye ou e les ou lafen e nouri ou avek lamann, ki ni ou ni ou bann zanset pa ti konnen. I ti fer sa pour fer ou konnen ki zonm pa viv zis lo dipen tousel me lo tou parol ki sorti dan labous Zeova.” (Deterononm 8:3) Lafason ki Zeova ti fourni lamann pa ti zis donn bann Izraelit manze, me i ti osi ansenny zot bann leson spirityel. Premyerman, zot ti bezwen sakenn “anmas lakantite ki zot pou bezwen pour en zour.” Si zot ti anmas plis ki zot ti bezwen pour en zour, sa ki reste ti konmans anvoy loder e ganny moutouk lo la. (Egzod 16:4, 20) Pourtan, sa pa ti arive son sizyenm zour, kan zot ti bezwen anmas ase lamann pour servi zour Saba osi. (Egzod 16:5, 23, 24) Alors, sa lamann ti servi konman en bon rapel ki zot bezwen obeir e ki zot lavi pa depan zis lo dipen me osi lo “tou parol ki sorti dan labous Zeova.”
5. Konman Zeova i fourni nou avek nouritir spirityel sak zour?
5 Nou osi nou bezwen toulezour pran nouritir spirityel ki Zeova i fourni atraver son Garson. Se pour sa ki Zezi in apwent en ‘lesklav fidel e pridan’ pour fourni pep Bondye “manze kan i ler.” (Matye 24:45) Sa lesklav fidel i fourni en labondans nouritir spirityel dan laform bann piblikasyon ki ed nou etidye Labib. Me pa zis sa, i osi ankouraz nou pour lir Labib sak zour. (Zozye 1:8; Psonm 1:1-3) Parey Zezi, nou osi nou kapab ganny nouritir spirityel par fer zefor sak zour pour aprann konsernan lavolonte Zeova e fer li.—Zan 4:34.
Pardon pour nou Pese
6. Avek ki nou pese i kapab ganny konpare, e avek ki kondisyon Zeova i pare pour kennsel zot?
6 Lot keksoz ki model lapriyer i demande i: “Pardonn nou nou pese, parey nou pardonn bann ki’n fer nou ditor.” (Matye 6:12) Letan nou fer pese, i konmsi nou dwa Zeova en det. Me nou Papa lanmour i pare pour efas oubyen kennsel sa det si nou senserman repantir, ‘sanz nou lavi,’ e demann li pardon akoz lafwa dan sakrifis Kris.—Akt 3:19; 10:43; 1 Timote 2:5, 6.
7. Akoz nou bezwen priy pour pardon nou pese sak zour?
7 De lot kote, nou fer pese kan nou pa arive satisfer standar drwat Zeova. Akoz nou enparfe, nou tou nou fer pese an parol, an aksyon, e an panse. Oubyen nou pa arive fer sa ki nou devret fer. (Eklezyast 7:20; Romen 3:23; Zak 3:2; 4:17) Alors, menm si nou pa konsyan ki nou’n fer pese pandan lazournen, nou bezwen demann pardon pour nou pese dan nou lapriyer sak zour.—Psonm 19:12; 40:12.
8. Letan nou demann pardon pour nou pese dan lapriyer, ki nou devret fer e ki byenfe nou gannyen apre?
8 Nou devret priy pour pardon apre ki nou’n egzamin nou onnetman, repantir, e konfes nou pese, akoz nou annan lafwa ki disan Kris i kapab liber nou. (1 Zan 1:7-9) Pour prouve ki nou lapriyer i senser, nou devret ‘pratik bann keksoz ki montre vreman ki nou’n repanti.’ (Akt 26:20) Apre sa, nou pou kapab annan lafwa ki Zeova i pare pour pardonn nou pese. (Psonm 86:5; 103:8-14) Nou pou ganny en lape lespri enkrwayab, “lape Bondye ki depas tou konpreansyon imen,” ki an retour pou ‘gard nou leker ek nou lespri dan Kris-Zezi.’ (Filipyen 4:7) Me model lapriyer Zezi i ansenny nou ankor plis lo ki fodre nou fer pour nou pese ganny pardonnen.
Bezwen pardonnen pour ganny pardonnen
9, 10. (a) Ki komanter Zezi ti fer lo sa model lapriyer, e ki sa komanter ti aksantye? (b) Ki mannyer Zezi ti ankor montre nesesite pour pardonnen?
9 I enteresan note ki sa demann pour “pardonn nou nou pese, parey nou pardonn bann ki’n fer nou ditor,” i sa sel bout dan sa model lapriyer ki Zezi ti fer komanter lo la. Apre ki i ti fini sa lapriyer, i ti azoute: “Si zot pardonn bann ki’n fer zot ditor, zot Papa ki dan lesyel i a osi pardonn zot. Me si zot pa pardonn lezot ki’n fer zot ditor, zot Papa osi pa pou pardonn zot zot pese.” (Matye 6:14, 15) Alors, Zezi ti fer byen kler ki pour Zeova pardonn nou, nou osi nou bezwen pare pour pardonn lezot.—Mark 11:25.
10 En lot zour, Zezi ti donn en parabol pour montre ki nou bezwen pardonn lezot si nou oule Zeova pardonn nou. I ti rakont zistwar en lerwa ki ti pare pour kennsel en gro det ki enn son serviter ti dwa li. Plitar sa lerwa ti pini sa zonm akoz i ti refize les pase en pli pti det ki son kanmarad ti dwa li. Zezi ti konklir son parabol an dizan: “Koumsa menm ki mon Papa ki dan lesyel pou fer avek zot si zot pa pardonn zot frer avek tou zot leker.” (Matye 18:23-35) Sa leson i kler: Pese ki Zeova in pardonn nou tou endividyelman i bokou plis ki okenn fot ki nenport dimoun in kapab fer kont nou. Deplis, Zeova i pardonn nou toulezour. Alor, sirman nou kapab pardonn lezot pour fot ki zot fer kont nou detanzaot.
11. Ki konsey zapot Pol ti donnen ki nou pou swiv si nou oule ki Zeova i pardonn nou? Ki bon rezilta nou pou gannyen?
11 Zapot Pol ti ekrir: “Vin bon, ranpli avek lafeksyon pour kanmarad; e pardonn kanmarad, parey Bondye in pardonn zot dan Kris.” (Efezyen 4:32) Pardonn kanmarad i fer lape egziste parmi Kretyen. Pol ti osi sipliye: “Konman pep ki Bondye in swazir, en pep sen ki Bondye i kontan, zot devre ranpli avek konpasyon, labonte, limilite, ladouser ek pasyans. Siport kanmarad, pardonn kanmarad sak fwa ki enn ant zot i ofans en lot. Parey Senyer ti pardonn zot, zot osi pardonn kanmarad. E par lao tousala, annan lanmour ki soud tou keksoz parfetman ansanm dan larmoni.” (Kolosyen 3:12-14) Tousala i enplike dan sa lapriyer ki Zezi in ansenny nou: “Pardonn nou nou pese, parey nou pardonn bann ki’n fer nou ditor.”
Proteksyon kan nou ganny tante
12, 13. (a) Ki lide serten i gannyen kan nou demande pour pa les nou ganny tante? (b) Lekel sa gran Tantater, e ki nou pe demande letan nou priye ki Zeova pa les nou ganny tante?
12 Lot keksoz ki ganny demande dan model lapriyer Zezi se: “Pa permet ki nou ganny tante.” (Matye 6:13) Serten i krwar ki sa i vedir ki Zeova i tant nou. Eski sa i posib? Non, parski disip Zak ti ganny enspire pour ekrir: “Personn pa devre dir, ler i ganny tante, ‘Mon’n ganny tante par Bondye,’ parski Bondye pa kapab ganny tante par sa ki mal, e limenm i pa tant personn.” (Zak 1:13) Deplis, en psalmis ti ekrir: “Si ou ti vey bann fot, O Ya, O Zeova, lekel ki ti pou kapab debout devan ou?” (Psonm 130:3) Zeova pa vey tou pti fot ki nou fer, e definitivman i pa sey fer nou tonbe. Alors, ki sa bout dan sa model lapriyer i oule dir?
13 Satan i sa enn ki pe sey fer nou tonbe par son bann riz e menm i oule devor nou. (Efezyen 6:11) I en gran Tantater. (1 Tesalonisyen 3:5) Letan nou priye pour Zeova pa permet nou ganny tante, nou pe demann li pour pa les nou tonbe kan nou ganny tante. Nou pe demann li led pour nou “pa les nou ganny anbete par Satan,” e pour nou pa les tantasyon domin nou. (2 Korentyen 2:11) Nou priye pour reste dan “landrwa sekre sa enn Tre O,” pour ganny proteksyon spirityel ki Zeova i donn tou bann ki rekonnet son lotorite dan tou sa ki zot fer.—Psonm 91:1-3.
14. Konman zapot Pol i asir nou ki Zeova pa pou abandonn nou si nou depan lo Li kan nou ganny tante?
14 Nou kapab asire ki si sa i nou dezir senser, parey nou’n eksprimen dan nou lapriyer e par nou aksyon, Zeova pa pou zanmen abandonn nou. Zapot Pol i asir nou: “Tou tantasyon ki’n ariv zot i arive normalman avek en dimoun. Me Bondye i fidel dan son promes, e i pa pou permet ki nou ganny tante plis ki nou kapab siporte, me avek tantasyon i osi donn mwayen pour sorti pour ki ou kapab siporte.”—1 Korentyen 10:13.
“Anpes nou tonm dan le mal”
15. Akoz la i pli enportan ki zanmen oparavan pour priye ki nou pa tonm dan lemal?
15 Dapre bann maniskri Lekritir Grek ki nou pli kapab kont lo la, lapriyer model Zezi i fini avek sa parol: “Anpes nou tonm dan le mal.” * (Matye 6:13) Dan sa letan lafen ki nou pe viv, i pli enportan pour nou ganny proteze kont Dyab. Satan ek son bann demon pe fer lager avek larestan Kretyen swazir, “ki obei konmannman Bondye e ki fidel avek temwanyaz Zezi,” e avek zot konpanyon, sa “gran lafoul.” (Revelasyon 7:9; 12:9, 17) Zapot Pyer ti konsey bann Kretyen: “Reste vizilan e vey byen. Zot lennmi, dyab pe pas partou konman en lyon ki kriye, pe rode ki i pou devore. Reste ferm dan lafwa e reziste li.” (1 Pyer 5:8, 9) Satan ti a kontan aret nou travay predikasyon. I servi son bann reprezantan lo later, ki swa relizye, komersyal, oubyen politik, pour esey fer nou per. Me si nou reste ferm, Zeova pou delivre nou. Disip Zak ti ekrir: “Soumet zot avek Bondye, me reziste kont Dyab e i ava sov lwen avek zot.”—Zak 4:7.
16. Ki Zeova i kapab servi pour ed son bann serviter ki pe pas dan difikilte?
16 Zeova ti permet son Garson ganny tante. Me apre ki Zezi ti reziste Dyab, an servan Parol Bondye konman en proteksyon, Zeova ti anvoy bann lanz pour fortifye li. (Matye 4:1-11) Pareyman, si nou priy avek lafwa e fer Zeova nou refiz, i pou servi son bann lanz pour ed nou. (Psonm 34:7; 91:9-11) Zapot Pyer ti ekrir: “Bondye i konnen ki mannyer i pou delivre bann dimoun ki atase avek li dan difikilte, e pou gard bann ki move pour pinisyon pour zour zizman.”—2 Pyer 2:9.
Delivrans konplet pros pour arive
17. Ki mannyer Zezi ti met sak keksoz dan zot plas dan son model lapriyer?
17 Dan sa model lapriyer ki Zezi ti donnen, i ti met sak keksoz dan zot plas. Nou premye konsern se ki gran non sen Zeova i ganny glorifye. Vi ki Rwayonm Mesyanik i sa lenstriman ki pou akonpli sa, nou priye ki sa Rwayonm i ganny etabli pour detrir tou bann gouvernman imen enparfe e pour asire ki lavolonte Bondye i ganny akonpli antyerman lo later parey dan lesyel. Nou lespwar pour viv pour touzour lo later i depan lo glorifye non sen Zeova e rekonnet son drwa pour diriz liniver antye. Apre ki nou’n priy konsernan sa bann keksoz pli enportan, nou kapab priye pour sa ki nou bezwen sak zour, pour pardonn nou pese, e pour nou pa tonm dan tantasyon ek riz Satan, sa mesan.
18, 19. Ki mannyer model lapriyer Zezi i ed nou reste vizilan e fer nou lespwar reste ferm ziska lafen?
18 Sa letan kot nou pou ganny delivre konpletman avek sa mesan ek son sistenm koronpi pe aprose. Satan i byen konnen ki i reste li zis “en pti pe letan” pour tir son “gran lakoler” lo later, sirtou lo bann serviter fidel Zeova. (Revelasyon 12:12, 17) Dan sa siny ki Zezi ti donnen pour endik lafen sa sistenm, i ti predir bann levennman eksitan. Serten sa bann levennman pa ankor arive. (Matye 24:3, 29-31) Ler nou vwar sa bann keksoz arive, nou lespwar pour delivrans pou briy ankor pli for. Zezi ti dir: “Kan sa bann keksoz i a konmans arive, dres zot e lev zot latet anler, akoz zot delivrans i ava pe aprose.”—Lik 21:25-28.
19 Sa model lapriyer bref me konplet ki Zezi ti donn son bann disip i en bon gid pour nou konnen lo ki nou devret priye anmezir lafen i aprose. Fotespere ki nou kontinyen annan konfyans ki Zeova pou kontinyen pran swen avek nou lo plan spirityel e materyel ziska lafen. Ler nou reste vizilan atraver lapriyer, nou pou kapab “tenir byen ferm ziska lafen sa konfyans ki nou’n resevwar depi okonmansman.”—Ebre 3:14; 1 Pyer 4:7.
[Not anba lo paz]
^ par. 15 Serten Labib pli ansyen, parey King James Version, i fini sa lapriyer Notre Père avek en fraz ki loue Bondye: “Akoz ou ki posed larwayote, pisans ek laglwar pour touzour. Amenn.” The Jerome Biblical Commentary i dir: “Sa fraz . . . pa ganny trouve dan bann [maniskri] ki ou pli kapab kont lo la.”
Revizyon
• Kwa ki enplike ler nou demande pour ganny ‘nou dipen neseser sak zour’?
• Eksplike ki nou pe demande ler nou dir “pardonn nou nou pese, parey nou pardonn bann ki’n fer nou ditor.”
• Ki i enplike ler nou demann Zeova pour pa permet ki nou ganny tante?
• Akoz nou bezwen demann Zeova dan lapriyer pour “anpes nou tonm dan le mal”?
[Kestyon]
[Portre lo paz 23]
Lydekker
[Portre lo paz 25]
Nou bezwen pardonn lezot si nou anvi ganny pardonnen