Akoz Temwen Zeova i kontinyen vizit ou?

PARTOU dan lemonn, tou dimoun i konnen ki bann Temwen Zeova pa zanmen arete pas devan laport bann dimoun pour prese. Serten dimoun i demande akoz bann Temwen i kontinyen vizit zot, sirtou si avan sa, zot pa’n montre en gran lentere dan mesaz ki bann Temwen pe anmennen. De let sorti Larisi i ede eksplik rezon pour sa.

Masha, en fiy 19 an ki reste Khabarovsk i admet: “Fransman, avan sa mon ti fer tou sa ki mon kapab pour evit bann Temwen Zeova.” Me son latitid ti sanze apre ki i ti lir detrwa magazin pibliye par bann Temwen. I ekrir: “Tou sa ki mon’n lir ti vreman enteresan e zot in ed mwan konpran bokou keksoz. Me pli enportan, sa lenformasyon i fer en dimoun get lemonn dan en lot fason. Dousman dousman, mon ti konmans konpran rezon ki nou la lo sa later.”

Svetlana ki sorti dan lavil Ussuriysk sitye nor avek Vladivostok, ti ekrir: “Mon’n fek konmans lir Latour Veyer ek Réveillez-vous! Dan sa letan ki nou pe viv ladan nou vreman bezwen sa bann magazin. Mon kontan lir tou bann lartik. Zot vreman enteresan, e zot ed mwan aprann e konpran bokou keksoz. Mersi! Mersi bokou ki zot la dan lemonn e pe fer en travay tre esansyel.”

Dan lemonn antye, bann Temwen Zeova i pran oserye sa kestyon ki zapot Pol ti demande e ki fer reflesir: “Ki mannyer zot pou tann koz lo li si personn pa anons li?” (Romen 10:14) Akoz ou pa pran en moman pour ekout bann Temwen prosenn fwa ki zot pas kot ou? Petet ou osi ou pou kontan sa mesaz rekonfor ki annan dan Parol Bondye, Labib.