‘Lesklav Fidel’ i pas tes!

“Ler i’n arive pour zizman konmanse, e se par pep Bondye ki i pou konmanse.” —1 PYER 4:17.

1. Ki Zezi ti vwar letan i ti enspekte sa “lesklav”?

ZOUR Lapannkot lannen 33 N.L., Zezi ti apwent en “lesklav” pour fourni manze kan i ler pour “tou lezot lesklav.” An 1914, Zezi ti vin lerwa, e pa bokou letan apre, ti’n arive ler pour li enspekte sa “lesklav.” I ti vwar ki lamazorite manm sa “lesklav” ti’n montre zot “fidel e pridan.” Alors, i ti met zot “ansarz tou son byen.” (Matye 24:45-47, NW ) Me ti osi annan en move lesklav ki pa ti ni fidel ni pridan.

Sa move Lesklav

2, 3. Kote sa move lesklav i sorti e ki mannyer i’n arive vin en move lesklav?

² Zezi ti koz lo sa move lesklav deswit apre ki i ti’n koz lo “lesklav fidel e pridan.” I ti dir: “Me si i pa en bon serviter, i pou dir dan limenm, ‘Mon met i tarde pour li retournen,’ e i konmans bat serviter, e i manze e bwar avek bann soular. Son met pou retournen en zour ki i pa pe ekspekte e en ler ki i pa konnen; I pou pini sa serviter severman, e met li ansanm avek bann ipokrit. La pou annan depler ek grensman ledan.” (Matye 24:48-51) Sa lekspresyon ‘me si i pa en bon serviter’ i atir nou latansyon lo sa ki Zezi ti fek dir lo lesklav fidel e pridan. I fer nou konpran ki sa move lesklav ti en manm lesklav fidel avan sa. * Me ki mannyer i’n vin en move lesklav?

³ Avan 1914, plizyer manm lesklav fidel ti ekspekte zwenn avek nouvo Marye dan lesyel sa menm lannen. Me zot ekspektasyon pa ti vin vre. Akoz sa ek lezot devlopman, bokou zot ti dezapwente e serten ti ofanse. Serten zot ti konmans “bat” zot frer verbalman e frekant “bann soular,” bann group relizye dan Kretyente.—Izai 28:1-3; 32:6.

4. Ki reaksyon Zezi anver sa move lesklav e anver tou bann ki montre sa menm leta lespri?

⁴ Sa bann dimoun ki ti Kretyen oparavan ti ganny idantifye konman sa move lesklav e Zezi ti pini zot “severman.” Konman? I ti rezet zot e zot ti perdi zot lespwar pour al viv dan lesyel. Me zot pa ganny detrir deswit. Zot ti bezwen premyerman pas dan en peryod letan kot pou annan depler ek grensman ledan “deor, dan fernwanr,” setadir an deor kongregasyon Kretyen. (Matye 8:12) Depi sa letan, ennde lezot Kretyen swazir in montre en menm move leta lespri. Zot in idantifye zot avek sa move lesklav. Serten ‘lezot mouton’ in imit zot enfidelite. (Zan 10:16) Tou sa bann lennmi Kris pou eksperyans menm ‘fernwanr spirityel deor.’

5. Ki mannyer lesklav fidel e pridan ti reazir, kontrerman avek sa move lesklav?

⁵ Sa lesklav fidel e pridan ti pas dan menm tes ki sa move lesklav. Me olye ofanse, zot ti koriz zot fason panse. (2 Korentyen 13:11) Zot lanmour pour Zeova e pour zot bann frer ti ganny ranforsi. Sa in fer zot vin “pilye ek sipor laverite” pandan sa “bann dernyen zour” boulverse.—1 Timote 3:15; 2 Timote 3:1.

 Parabol dis zenn Fiy

6. (a) Ki mannyer Zezi ti montre ki son lesklav fidel i pridan? (b) Avan 1914, ki mesaz bann Kretyen swazir ti anonse?

⁶ Apre ki i ti’n koz lo sa move lesklav, Zezi ti donn de parabol pour montre akoz serten Kretyen swazir ti pou fidel e pridan tandis ki serten non. * Pour montre konman serten ti pridan, i ti dir: “Rwayonm Lesyel i kapab ganny konpare avek dis zenn fiy ki pran zot lalanp e sorti pour al zwenn nouvo marye. Senk parmi sa bann fiy ti fol e senk ti [pridan, NW ]. Sa senk ki ti fol ti pran zot lalanp me zot pa ti anmenn delwil avek zot. Tandis ki sa senk ki ti [pridan, NW ] ti anmenn fyol delwil avek zot lalanp.” (Matye 25:1-4) Sa dis zenn fiy i fer nou rapel bann Kretyen swazir avan 1914. Zot ti’n kalkile ki nouvo marye, Zezi Kri, ti pe al fer son laparisyon. Alors, zot ti “sorti pour al zwenn” li. Avek kouraz, zot ti prese ki “letan bann nasyon etranze” ti pe al fini an 1914.—Lik 21:24.

7. Kan e akoz bann Kretyen swazir ti ‘al dormi’ dan en sans senbolik?

⁷ Zot ti annan rezon. Letan bann nasyon etranze ti terminen an 1914, e Rwayonm Bondye anba direksyon Zezi Kri ti konmans son fonksyon. Me sa ti arive dan lesyel, kot nou pa vwar. Isi lo later, limanite ti konmans eksperyans sa bann “maler” ki ti’n ganny predir. (Revelasyon 12:10, 12) En moman leprev ti konmanse. Bann Kretyen swazir pa ti konpran keksoz byen, alor zot ti mazinen ki “nouvo marye ti tarde pour arive.” Vi ki zot ti konfize e lemonn ti en pe agresif avek zot, zot ti ralanti e preski aret net sa travay predikasyon. Parey sa bann zenn fiy dan parabol, zot ti “asoupi e zot ti dormi” dan en sans spirityel, parey bann swadizan Kretyen enfidel ti fer apre lanmor bann zapot Zezi.—Matye 25:5; Revelasyon 11:7, 8; 12:17.

8. Kwa ki ti fer zot tann kriye: “La nouvo marye!” e ki ti’n ariv ler pour bann Kretyen swazir fer?

⁸ Apre an 1919 en keksoz ti arive san ekspekte. Nou lir: “Dan milye lannwit zot ti tann kriye: ‘La nouvo marye! Sorti, vin zwenn li!’ Alor, tou sa bann zenn fiy ti leve e konmans etiz zot lalanp.” (Matye 25:6, 7) Zis ler keksoz ti paret pli sonm, zot ti tann en lapel pour zot vin aktif! An 1918, Zezi, “mesaze pour lalyans,” ti’n vin dan tanp spirityel Zeova pour enspekte e netway kongregasyon Bondye. (Malaki 3:1) Aprezan, bann Kretyen swazir ti bezwen sorti pour al zwenn li dan lakour teres sa tanp. Ti’n ariv ler pour zot “anvoy lalimyer.”—Izai 60:1; Filipyen 2:14, 15.

9, 10. Akoz serten Kretyen ti “pridan” tandis ki serten ti azir parey en “fol” an 1919?

⁹ Me ekout en kou! Dan sa parabol, serten sa bann zenn fiy ti annan en problenm. Zezi ti kontinyen: “Sa bann fiy fol ti dir avek sa bann ki [pridan, NW ], ‘Donn nou enpe zot delwil akoz nou lalanp pe tennyen.’ ” (Matye 25:8) Lalanp pa pou alimen si napa delwil. Alors delwil lalanp i fer nou rapel Parol laverite Bondye ek son lespri sen, ki donn lafors bann vre adorater pour anmenn lalimyer. (Psonm 119:130; Danyel 5:14) Avan 1919, bann Kretyen swazir ki ti pridan ti seryezman rode  ki Bondye i ekspekte zot fer, menm si zot ti en pe feb spirityelman. Alors, kan lapel ti ganny donnen pour anvoy lalimyer, zot ti’n pare.—2 Timote 4:2; Ebre 10:24, 25.

¹⁰ Me serten Kretyen swazir pa ti pare pour fer sakrifis oubyen fer serten zefor lo zot menm, kantmenm zot ti vreman anvi avek Nouvo Marye. Alor kan ti’n ariv ler pour zot aktif dan predikasyon, zot pa ti ankor pare. (Matye 24:14) Zot ti menm esey ralanti zot bann konpanyon devoue par demann zot en pe zot delwil. Ki mannyer sa bann zenn fiy dan parabol Zezi ki ti pridan ti reazir? Zot ti dir: “Non, akoz i a riske napa ase pour nou ek pour zot, al plito kot i vann, e aste pour zot.” (Matye 25:9) Pareyman, an 1919 bann Kretyen swazir ki ti fidel ti refize fer okenn keksoz ki ti a kapab redwir zot kapasite pour anmenn lalimyer. Alor, zot ti pas zot tes.

11. Ki ti arive avek sa bann lafoli?

¹¹ Zezi i konklir: “Letan [sa bann lafoli] ti’n al aste delwil, nouvo marye ti arive. Sa senk zenn fiy ki ti’n pare ti antre dan festen maryaz, e laport ti fermen. Pli tar sa senk lezot fiy ti arive. Zot ti kriye, ‘Senyer, senyer ouver laport!’ Nouvo marye ti reponn, ‘An verite mon dir zot, mon pa konn zot.’ ” (Matye 25:10-12) Wi, serten pa ti’n met zot pare pour larive Nouvo Marye. Alors, zot pa ti pas zot tes e zot ti perdi zot loportinite pour asiste sa festen maryaz dan lesyel. Sa i vreman malere!

Parabol trwa Serviter

12. (a) Ki Zezi ti fer pour montre fidelite son lesklav? (b) Lekel sa zonm ki ti “ale”?

¹² Apre ki i ti montre konman ki son lesklav i pridan, Zezi ti montre fidelite son lesklav. I ti dir: “I pou parey en zonm ki pe prepare pou al dan en lot pei; I ti apel son bann serviter e met zot ansarz son propriyete. I ti donn enn son serviter senk talan, i ti donn en lot de, e i ti donn en trwazyenm en sel; sakenn selon son kapasite. Apre i ti ale.” (Matye 25:14, 15) Sa zonm dan sa parabol i Zezi li menm, ki ti “ale” kan i ti mont dan lesyel lannen 33 N.L. Me avan i ti mont dan lesyel, Zezi ti konfye son bann disip fidel avek “son propriyete.” Konman?

13. Ki mannyer Zezi ti prepar en gran aktivite e donn lotorizasyon son bann “serviter” pour fer komers?

¹³ Pandan son minister lo later, Zezi ti konmans prepar en gran aktivite par pres sa bon nouvel lo Rwayonm partou dan teritwar Izrael. (Matye 9:35-38) Avan i ti “ale,” i ti konfye sa teritwar avek son bann disip fidel, an dizan: “Ale e fer tou pep vin mon bann disip. Batiz zot o non di-Per, di-Fis e di-Sent-Espri. Ansenny zot pour obei tou sa  ki mon’n konmande. E konnen ki mwan mon avek zot toulezour, ziska lafen dimoun.” (Matye 28:18-20) Par sa parol, Zezi ti donn son “bann serviter” lotorizasyon pour fer komers ziska ki i retournen. I ti donn “sakenn selon son kapasite.”

14. Akoz Zezi pa ti ekspekte zot tou fer menm kantite komers?

¹⁴ Sa lekspresyon i endike ki pa tou Kretyen premye syek ki ti annan menm sirkonstans oubyen posibilite. Akoz zot sitiasyon personnel, serten parey Pol ek Timote, ti lib pour kontribye otan posib dan predikasyon ek lansennyman. Petet sitiasyon lezot ti anpes zot fer otan ki zot ti anvi fer. Par egzanp, serten Kretyen ti bann lesklav, lezot ti byen aze e malad, oubyen serten ti annan sa responsabilite pour okip zot fanmiy. Byensir, pa tou privilez dan kongregasyon ki ti disponib pour tou disip. Bann ser swazir ek serten frer swazir pa ti ansennyen dan kongregasyon. (1 Korentyen 14:34; 1 Timote 3:1; Zak 3:1) Kantmenm sa, nenport ki sitiasyon sakenn ti ladan, tou disip swazir Kris, zonm konman fanm, ti bezwen fer komers. Savedir zot ti bezwen byen servi loportinite ki zot gannyen e zot sitiasyon personnel pour kontribye dan minister Kretyen. Bann disip Zezi dan nou letan i fer menm parey.

Lenspeksyon i konmanse!

15, 16. (a) Kan ti’n ariv ler pour regle kont? (b) Ki bann nouvo loportinite pour “fer komers” ki bann fidel ti gannyen?

¹⁵ Sa parabol i kontinyen: “Apre en bon pe letan, met sa bann serviter ti retournen e regle son kont avek zot.” (Matye 25:19) An 1914—en bon pe letan apre lannen 33 N.L.—Zezi Kri ti konmans rennyen dan son Rwayonm. An 1918, trwa zan edmi plitar, i ti vin dan tanp spirityel Bondye e akonpli parol zapot Pyer: “Ler i’n arive pour zizman konmanse, e se par pep Bondye ki i pou konmanse.” (1 Pyer 4:17; Malaki 3:1) Ti’n ariv ler pour li regle son kont.

¹⁶ Ki sa bann lesklav, bann frer swazir Zezi, ti’n fer avek “talan” Lerwa? Depi lannen 33 N.L., enkli bann lannen avan 1914,  bokou zot ti pe travay dir pour fer “komers” Zezi. (Matye 25:16) Menm pandan premye lager mondyal, zot in montre en gran dezir pour servi zot Met. Aprezan ti’n ler pour donn bann ki fidel ankor loportinite pour “fer komers.” Letan lafen sa sistenm ti’n arive. Sa bon nouvel ti bezwen ganny prese partou lo later. “Rekolt later” ti bezwen ganny rekolte. (Revelasyon 14:6, 7, 14-16) Bann dernyen dible ti bezwen ganny trouve e “en gran lafoul” lezot mouton ti bezwen ganny rasanble.—Revelasyon 7:9; Matye 13:24-30.

17. Ki mannyer bann Kretyen swazir fidel ti ‘partaz lazwa zot met’?

¹⁷ Letan rekolt i en moman lazwa. (Psonm 126:6) Alor, i apropriye ki ler Zezi ti konfye son bann frer swazir avek plis responsabilite an 1919, i ti dir: “Ou’n fer byen avek en pti sonm, alor mon pou met ou ansarz en pli gran sonm. Vin partaz mon lazwa!” (Matye 25:21, 23, nou ki’n met an italik.) Deplis, nou pa kapab konpran ki degre kontan sa Met i kontan pour vin Lerwa dan Rwayonm Bondye. (Psonm 45:1, 2, 6, 7) Sa lesklav fidel i partaz sa lazwa letan i reprezant Lerwa e ogmant son bann lentere lo later. (2 Korentyen 5:20) Zot lazwa i ganny trouve dan parol profetik Izai 61:10: “Sirman mon pou rezwir akoz Zeova. Mon pou zwaye akoz mon Bondye. Parski i’n met mwan lenz delivrans.”

18. Akoz serten pa ti pas tes, e ki ti arive avek zot?

¹⁸ Malerezman, serten pa ti pas sa tes. Nou lir: “Sa serviter ki ti ganny en talan ti antre e dir, ‘Met, mon konnen ki ou en dimoun sever; ou rekolte kot ou pa’n senmen, e ou ranmas kot ou pa’n fannen. Alor mon ti per e mon ti al kasyet ou larzan dan later. La mon rann ou sa ki pour ou.’ ” (Matye 25:24, 25) Pareyman, serten Kretyen swazir pa’n fer “komers.” Avan 1914, zot pa ti montre okenn dezir pour partaz zot lespwar avek lezot, e zot pa ti anvi konmanse an 1919. Ki mannyer Zezi ti reazir anver zot lensolans? I ti aras zot tou zot privilez. Zot ti ganny ‘zet deor dan fernwanr, la kot pou annan depler ek grensman ledan.’—Matye 25:28, 30.

Lenspeksyon i kontinyen

19. Konman ki sa lenspeksyon i kontinyen, e ki tou Kretyen swazir i determinen pour fer?

¹⁹ Byensir, laplipar bann ki ti vin lesklav swazir Kris pandan letan lafen pa ti ankor servi Zeova kan Zezi ti fer son lenspeksyon an 1918. Eski zot ti perdi sa loportinite pour zot ganny enspekte? Non. Sa lenspeksyon ti’n zis konmanse an 1918/19 kan lesklav fidel e pridan konman en group ti pas sa tes. Sak Kretyen swazir pe kontinyen ganny enspekte ziska ki zot finalman ganny sele. (Revelasyon 7:1-3) Vi ki zot rekonnet sa, bann frer swazir Kris i determinen pour kontinyen ‘fer komers’ fidelman. Zot determinen pour montre zot pridan par annan en bon rezerv delwil pour ki sa lalimyer i kler pli for. Zot konnen ki letan sakenn ant zot pou mor fidel, Zezi pou resevwar zot dan zot  landrwa reste dan lesyel.—Matye 24:13; Zan 14:2-4; 1 Korentyen 15:50, 51.

20. (a) Ki lezot mouton denozour i determinen pour fer? (b) Ki bann Kretyen swazir i konsyan?

²⁰ Sa gran lafoul lezot mouton in imit zot bann frer swazir. Zot konsyan ki konn plan Bondye i mars avek en gran responsabilite. (Ezekyel 3:17-21) Alors, avek led Parol Zeova ek lespri sen, zot osi zot kit zot bon rezerv delwil letan zot etidye Labib e asosye avek zot konpanyon Kretyen. Zot osi fer zot lalimyer klere, kan zot partisip dan predikasyon e ansenny lezot. Dan sa fason, zot pe “fer komers” ansanm avek zot bann frer swazir. De lot kote, bann Kretyen swazir i gard antet ki sa bann talan ti ganny mete dan zot lanmen. Zot bezwen rann kont lafason ki propriyete Senyer pe ganny servi. Kantmenm napa bokou zot, zot pa kapab met zot responsabilite dan lanmen sa gran lafoul. Avek sa antet, “lesklav fidel e pridan” i kontinyen responsab komers Lerwa. Zot apresye soutyen bann manm devoue sa gran lafoul. Bann manm sa gran lafoul zot, zot rekonnet responsabilite zot bann frer swazir e zot santi zot privilezye pour travay anba zot sirveyans.

21. Ki konsey ki aplik pour tou Kretyen depi 1919 ziska nou letan?

²¹ Sa de parabol i eklersi nou lo bann levennman ki ti arive dan bann letan 1919. Parkont, i annan bann prensip ladan ki tou bann vre Kretyen ki pe viv dan sa bann dernyen zour i kapab met an pratik. Alors, menm si sa konsey ki Zezi ti donnen alafen sa parabol dis zenn fiy ti aplik premyerman pour bann Kretyen swazir avan 1919, son prensip i ankor itil pour tou Kretyen. Annou alors pran aker parol Zezi: “Veye alor, akoz zot pa konn ni zour ni ler.”—Matye 25:13.

[Not anba lo paz]

Eski ou kapab eksplike?

• Kan ki Zezi ti enspekte son bann disip, e ki i ti vwar?

• Akoz serten Kretyen swazir ti devlop menm latitid avek sa ‘move lesklav’?

• Ki mannyer nou kapab montre nou pridan lo plan spirityel?

• Konman nou kapab kontinyen “fer komers” parey bann frer swazir Zezi?

[Kestyon]

[Bwat lo paz 29]

KAN ZEZI TI VINI?

Dan Matye sapit 24 ek 25, i mansyonnen ki Zezi pou “vini” dan diferan sans. I pa bezwen deplase fizikman pour li “vini.” Plito, i “vini” dan lesans ki i tourn son latansyon ver bann imen oubyen ver son bann disip, plizoumwen pour zizman. Alors, an 1914, i ti “vini” pour konmans son prezans konman Lerwa. (Matye 16:28; 17:1; Akt 1:11) An 1918, i ti “vini” konman mesaze lalyans e konmans ziz bann ki ti pe dir zot servi Zeova. (Malaki 3:1-3; 1 Pyer 4:17) Zour Armagedon, i pou “vini” pour egzekit zizman lo bann lennmi Zeova.—Revelasyon 19:11-16.

Sa vini (oubyen aparet) ki Matye 24:29-44 ek 25:31-46 i koz lo la plizyer fwa pe refer avek sa ‘gran ladetres.’ (Revelasyon 7:14) De lot kote, sa vini ki Matye 24:45 ziska 25:30 i mansyonnen plizyer fwa, i konsernan zizman bann swadizan disip Kris apartir 1918. Par egzanp, i pa pou fer sans pour dir ki rekonpans sa lesklav fidel, zizman sa bann zenn fiy fol, ek zizman sa lesklav lakanny ki ti kasyet talan son Met, pou ariv kan Zezi i “vini” dan gran ladetres. Sa pou vedir ki bokou Kretyen swazir pa ti pou ganny trouve fidel sa letan e zot ti pou bezwen ganny ranplase. Tandis ki dan Revelasyon 7:3 i endike ki tou bann lesklav swazir Kris pou’n fini ganny “sele” kan gran ladetres i arive.

[Portre lo paz 27]

Sa move lesklav pa ti ganny okenn benediksyon an 1919

[Portre lo paz 28]

Sa bann zenn fiy ki ti pridan ti’n pare kan nouvo marye ti arive

[Portre lo paz 30]

Lesklav fidel ti fer “komers”

Lesklav lakanny pa ti fer

[Portre lo paz 31]

Bann Kretyen swazir ek sa “gran lafoul” pe kontinyen fer zot lalimyer klere