Pa les nou ganny anbete
Pa les nou ganny anbete
“Fer atansyon ki zot pa tonm dan pyez personn avek zot bann fo largiman.”—KOLOSYEN 2:8.
1-3. (a) Ki legzanp ki montre ki dimoun i pare pour anbet son prosen dan preski tou laspe lavi? (b) Akoz nou pa devret sirprann par sa sitiasyon dan lemonn?
“KONBYEN zot ki pa’n zanmen ganny en kliyan ki’n koz manti avek zot?” Sa i kestyon ki en profeser lalwa ti demande dan en serve ki i ti fer detrwa lannen pase. Ki larepons i ti gannyen? I eksplike: “Parmi plizyer milye avoka, zis enn ki pa’n zanmen ganny en kliyan ki’n koz manti avek li.” Akoz? “Sa avoka ti’n fek konmans travay avek en gran lakonpanni e i pa ti ankor koz avek en kliyan.” Sa leksperyans i montre en laverite regretab—koz manti e anbet lezot in en keksoz komen ozordi dan lemonn.
2 Dimoun i esey anbet zot prosen dan plizyer fason e sa i egziste preski dan tou laspe lavi ozordi. I annan en kantite legzanp dan bann rapor medya. Bann politisyen i koz manti konsernan zot aksyon, bann kontab ek avoka i egzazer profi lakonpanni, bann ki fer lavertisman i tronp konsonmater, i annan dimoun ki vol bann lakonpanni lasirans an kour. Sa i zis ennde legzanp. Larelizyon osi pe anbet dimoun. Bann pret pe tronp lamas dimoun par ansenny bann fo krwayans, tel ki ler nou mor nou nanm i kontinyen viv par la, lanfer dife, ek Trinite.—2 Timote 4:3, 4.
3 Eski nou devret sirprann ki dimoun i pare pour anbet lezot? Pa vreman. Konsernan “bann dernyen zour,” Labib ti averti: “Bann move dimoun ek bann anbeter, zot pou fer touzour plis progre dan sa ki mal, zot pou anbet lezot e zot osi zot pou ganny anbete.” (2 Timote 3:1, 13) Konman Kretyen, nou devret vey bann fo konsep ki kapab detourn nou avek laverite. Sa i fer nou demann de kestyon: Akoz i sitan komen ozordi pour dimoun anbet lezot, e ki mannyer nou kapab pa les nou ganny anbete?
Akoz i sitan popiler ozordi pour Dimoun anbet lezot?
4. Dapre Labib, akoz dimoun dan lemonn i sitan pare pour anbet lezot?
4 Labib i klerman eksplike akoz dan lemonn i annan en kantite mansonz pour anbet lezot. Zapot Zan ti ekrir ki “lemonn antye i dan pouvwar dyab.” (1 Zan 5:19) Zezi ti dir konsernan Satan Dyab: “I pa’n zanmen kontan laverite, akoz napa laverite dan li. Ler i koz manti, i koz selon son natir, akoz i manter e papa tou mansonz.” Eski i drol alor, ki sa lemonn i reflekte lespri, valer, ek karakter tronper son dirizan?—Zan 8:44; 14:30; Efezyen 2:1-3.
5. Ki mannyer Satan in ogmant son zefor pour anbet dimoun dan sa letan lafen, e lekel ki i’n sirtou targete?
5 Dan nou letan, Satan in ogmant son zefor. I’n ganny zete lo later. I konnen ki son letan i kourt, e i annan “en gran lakoler.” Vi ki i determinen pour detri otan dimoun posib, Satan pe “tronp lemonn antye.” (Revelasyon 12:9, 12) Satan pa pe esey tronp dimoun detanzaot. Okontrer, i pe toultan fer zefor pour tronp limanite, san arete. * I servi tou kalite metod pour tronp dimoun—enkli riz ek traizon—pour avegle lespri bann dimoun ki pa krwar Parol Bondye e fer zot reste lwen avek Bondye. (2 Korentyen 4:4) Sa eksper dan anbet dimoun i sirtou determinen pour devor sa bann ki pe ador Bondye “an-espri e an verite.” (Zan 4:24; 1 Pyer 5:8) Pa zanmen oubliye ki an realite Satan in dir: ‘Mon kapab detourn nenport dimoun avek Bondye.’ (Zob 1:9-12) Annou vwar serten “taktik pour anbet” dimoun ki Satan i servi e ki mannyer nou kapab veye pour pa tonm dan sa bann pyez.—Efezyen 6:11, Jewish New Testament.
Pa les nou ganny anbete par bann ki’n abandonn Lafwa
6, 7. (a) Ki bann ki abandonn e rezet laverite i kapab pretann? (b) Ki mannyer Labib i klerman montre zot vre lentansyon?
6 Depi lontan Satan pe servi bann dimoun ki’n kit laverite, dan son zefor pour anbet bann serviter Bondye. (Matye 13:36-39) Zot kapab pretann ki zot ador Zeova e krwar Labib, me zot rezet lorganizasyon Zeova lo later. Serten zot i menm aksepte ankor bann lansennyman ki dezonnor Bondye dan “Gran Babilonn,” lanpir mondyal fo larelizyon. (Revelasyon 17:5; 2 Pyer 2:19-22) Anba lenspirasyon Bondye, bann ekriven Labib ti servi bann parol for pour ekspoz motivasyon ek metod bann ki abandonn e rezet laverite.
7 Ki zot lobzektif? Laplipar zot pa satisfe zis pour kit sa larelizyon ki avan zot ti konsider konman sa enn ki vre. Laplipar-di-tan, zot anvi anmenn lezot avek zot. Olye ale e al rod zot prop disip, bokou zot zot esey “fer bann krwaryan [savedir bann disip Kris] swiv zot.” (Akt 20:29, 30) Konsernan bann fo ansennyan, zapot Pol ti donn sa lavertisman tre serye: “Fer atansyon ki zot pa tonm dan pyez personn avek zot bann fo largiman.” (Kolosyen 2:8) Sa verse i byen dekrir ki sa bann dimoun pe esey fer. Parey en dimoun ki kidnap en viktim san ekspekte avek son fanmiy, bann ki abandonn laverite i fer bann manm kongregasyon ki annan konfyans tonm dan zot pyez. Zot esey egar sa bann dimoun avek troupo.
8. Ki metod bann ki abandonn e rezet laverite i servi pour akonpli zot bi?
8 Ki bann metod zot servi pour akonpli zot lobzektif? Zot souvan servi bann lenformasyon ki’n ganny deformen, ki annan en pti bout laverite ladan, oubyen ki konpletman fo. Zezi ti konnen ki son bann disip ti pou ganny viktimize par sa bann ki “koz manti pour dir tou sort keksoz mal kont Matye 5:11) Sa bann oponan malis ti pou koz lalang pour anbet lezot. Zapot Pyer ti averti ki bann ki abandonn e rezet laverite pou servi “bann fo zistwar,” pour propaz zot bann fo lansennyman. Zot pou osi ‘deform sans’ Labib pour akonpli zot lobzektif. (2 Pyer 2:3, 13; 3:16) Malerezman, zot reisi “detourn lafwa serten dimoun.”—2 Timote 2:18.
zot.” (9, 10. (a) Ki mannyer nou kapab veye ki nou pa les bann ki abandonn e rezet Labib anbet nou? (b) Akoz nou pa trakase si nou konprenezon lo plan Bondye i bezwen ganny aziste?
9 Ki mannyer nou kapab veye ki nou pa les zot anbet nou? Par obeir konsey dan Parol Bondye, ki dir: “Met zot byen lo zot gard avek sa bann ki senm divizyon ek dezord kontrerman avek lansennyman ki zot in gannyen. Evit bann tel dimoun.” (Romen 16:17) Nou “evit bann tel dimoun” par rezet zot bann rezonnman—ki swa sa ki zot dir zot menm, sa ki zot ekrir lo papye oubyen lo Internet. Akoz nou pran en tel pozisyon? Premyerman, akoz Parol Bondye i demann nou pour fer sa, e nou annan konfyans ki Zeova i toultan pran nou lentere aker.—Izai 48:17, 18.
10 Dezyenmman, nou kontan sa lorganizasyon ki’n ansenny nou sa bann laverite presye ki klerman separ nou avek Gran Babilonn. Anmenmtan, nou rekonnet ki nou konnesans lo plan Bondye i pa parfe. Diran bann lannen ki’n pase, i’n annan bann azisteman ki’n ganny fer dan nou konprenezon Labib. Bann Kretyen fidel i kontant zot pour esper Zeova fer tou sa bann azisteman. (Proverb 4:18) Antretan, nou pa pou abandonn sa lorganizasyon ki Bondye i kontan pour servi, akoz nou vwar klerman levidans son benediksyon lo sa lorganizasyon.—Akt 6:7; 1 Korentyen 3:6.
Fer atansyon pour pa anbet nou prop Lekor
11. Akoz imen enparfe i annan en tandans pour anbet son prop lekor?
11 Vi ki nou annan sa tandans pour anbet nou prop lekor, Satan pa tarde pour eksplwat sa tandans. Zeremi 17:9 i dir: “Leker i pli tret ki okenn keksoz e i tre move.” Zak ti ekrir: “Tou dimoun i ganny tante ler i les li ganny antrennen e atire par son prop move dezir.” (Zak 1:14) Si nou leker i ganny atire par dezir pour fer pese, i kapab fer nou vwar pese konman en keksoz ki atiran e ki napa nanryen mal avek. Ler nou devlop en pwennvi koumsa, nou pe anbet nou lekor. Akoz si nou les pese domin nou, nou pou trouv nou maler.—Romen 8:6.
12. Dan ki fason nou kapab tonm dan sa latrap pour anbet nou prop lekor?
1 Samyel 15:13-15, 20, 21) Nou move leker i kapab osi rod fason pour zistifye bann kondwit ki pa apropriye pour Kretyen. Par egzanp, lanmizman. Serten lanmizman i bon, prop, e i gou. Me laplipar lanmizman ki sa lemonn i ofer ki swa atraver bann film, progranm televizyon, e lo Internet i sal e imoral. I fasil pour nou konvenk nou lekor ki nou kapab get bann divertisman ki pa telman apropriye san ki i afekte nou. Serten i menm rezonnen: “Sa pa fatig mon konsyans, alor ki problenm i annan avek?” Me sa bann dimoun koumsa pe ‘tronp zot lekor’ avek bann fo rezonnman.—Zak 1:22.
12 Anbet nou prop lekor i en latrap ki nou kapab fasilman tonm ladan. En leker tret i kapab zistifye en defo grav dan nou personnalite oubyen ekskiz nou lekor pour en pese grav. (13, 14. (a) Ki legzanp dan Labib ki montre ki nou konsyans pa toultan en bon gid? (b) Ki mannyer nou kapab fer atansyon pour pa anbet nou prop lekor?
13 Ki mannyer nou kapab veye ki nou pa anbet nou prop lekor? Premyerman, nou bezwen mazinen ki nou pa kapab toultan depan lo nou konsyans. Annou vwar legzanp zapot Pol. Avan i ti vin en Kretyen, i ti persekit bann disip Kris. (Akt 9:1, 2) Petet a sa moman son konsyans pa ti fatig li. Me i evidan ki son konsyans ti’n ganny mal formen. Pol ti dir: “Mon ti pe fer tousala dan linyorans, san lafwa.” (1 Timote 1:13) Alor zis akoz en serten divertisman pa fatig nou konsyans, sa pa vedir ki definitivman sa ki nou pe fer i byen. Zis en bon konsyans ki’n ganny byen formen par Parol Bondye ki kapab vin en bon gid pour nou.
14 I annan serten sizesyon itil ki nou bezwen kit antet, pour nou kapab evite anbet nou lekor. Egzamin ou lekor avek led lapriyer. (Psonm 26:2; 2 Korentyen 13:5) En egzaminasyon onnet lo nou menm i kapab fer nou vwar nesesite pour fer serten sanzman dan nou pwennvi ek fason fer. Ekout lezot. (Zak 1:19) Vi ki nou kapab ganny enfliyanse par nou prop lopinyon ler nou egzamin nou menm, alor i byen pour ekout parol fran bann Kretyen matir. Si ou pe fer bann desizyon oubyen pe azir en fason ki bann Kretyen eksperyanse ki annan bon zizman i vwar pa telman apropriye, ou kapab demann ou lekor, ‘Eski i kapab ki mon konsyans pa’n ganny byen formen oubyen kekfwa mon leker pe anbet mwan?’ Nouri regilyerman lo Labib ek bann piblikasyon baze lo Labib. (Psonm 1:2) Sa pou ed ou gard ou panse, latitid, ek santiman an armoni avek bann prensip Bondye.
Fer atansyon bann Mansonz Satan
15, 16. (a) Dan son zefor pour anbet nou, ki kalite mansonz Satan i servi? (b) Ki mannyer nou kapab evite ganny anbete par sa bann mansonz?
15 Satan i servi diferan kalite mansonz pour li kapab anbet nou. I esey konvenk nou ki bann keksoz materyel ki anmenn boner ek satisfaksyon, kan sa ler levidans i souvan montre ki sa pa leka. (Eklezyast 5:10-12) I kontan fer nou krwar ki sa lemonn mesan pou egziste pour touzour, menm si i annan levidans kler ki nou pe viv dan “bann dernyen zour.” (2 Timote 3:1-5) Satan i ankouraz sa krwayans ki napa nanryen mal dan viv en lavi imoral, menm si bann ki zis anmize i souvan rekolte bann move konsekans. (Galat 6:7) Ki mannyer nou kapab evite ganny anbete par sa bann mansonz?
16 Benefisye atraver bann legzanp dan Labib. Dan Labib i annan legzanp bann dimoun ki ti ganny anbete par bann mansonz Satan. Sa bann legzanp i servi konman en lavertisman pour nou. Zot ti kontan keksoz materyel, nepli konsyan letan ki zot ti pe viv ladan, oubyen zot ti les bann pratik imoral domin zot lavi. Tou sa bann konportman ti anmenn bann move konsekans. (Matye 19:16-22; 24:36-42; Lik 16:14; 1 Korentyen 10:8-11) Aprann avek bann legzanp modern. I malere pour dir, parler serten Kretyen i bliye ki letan i kourt e zot krwar ki servi Bondye pe priv zot en bon keksoz. Zot kapab kit laverite e viv en lavi ki dapre zot i gou. Me sa bann dimoun i lo en “teren glise,” akoz to-ou-tar zot pou pey konsekans zot move kondwit. (Psonm 73:18, 19) I en bon keksoz pour aprann atraver fot lezot.—Proverb 22:3.
17. Akoz Satan i promot sa mansonz ki Zeova pa ni kontan nou oubyen apresye nou?
17 I annan en lot mansonz ki Satan i servi byen. Sa mansonz ki Zeova pa ni kontan nou oubyen I pa ni apresye nou. Pandan plizyer milye lannen, Satan in etidye imen enparfe. I konn byen ki dekourazman i kapab afeblir nou. (Proverb 24:10) Alor i promot sa mansonz ki nou pa vo nanryen dan lizye Zeova. Si nou “ganny rabat” e krwar ki Zeova pa enterese avek nou, nou kapab tant pour abandonnen. (2 Korentyen 4:9) Sa i egzakteman sa ki Satan i anvi fer nou krwar! Alor, ki mannyer nou kapab anpes nou ganny anbete par sa mansonz Satan?
18. Ki mannyer Labib i asir nou ki Zeova i kontan nou?
18 Pran aker sa ki Labib i dir konsernan lanmour Bondye pour nou. Parol Bondye i servi detrwa legzanp tousan pour asir nou ki Bondye i konn nou e kontan nou tou endividyelman. Zeova i met ou larm dan son “boutey,” savedir i vwar e rapel bann larm ki ou’n verse dan ou lalit pour reste fidel. (Psonm 56:8) I konnen ler ou “annan leker brize,” e i pros avek ou dan sa bann moman. (Psonm 34:18) I konn tou detay lo ou, enkli lakantite ‘bren seve lo ou latet.’ (Matye 10:29-31) Pli enportan, Bondye in “donn son sel Garson” pour ou byennet. (Zan 3:16; Galat 2:20) Parler, petet ou kapab vwar li difisil pour krwar ki sa bann verse i aplik pour ou personnelman. Me nou devret krwar parol Zeova. I anvi nou krwar ki i pa zis kontan son pep an zeneral me i kontan nou personnelman.
19, 20. (a) Akoz i enportan pour rekonnet e rezet sa mansonz Satan ki Zeova pa kontan ou? (b) Ki mannyer en sirveyan ti ed bann ki dekouraze?
19 Rekonnet e rezet sa mansonz. Si ou konnen ki en dimoun pe koz manti, ou kapab protez ou lekor pour ki ou pa ganny anbete. Pareyman, senpleman konnen ki Satan i anvi ou krwar sa mansonz ki Bondye pa kontan ou, i kapab dan li menm vin en gran led. En ser ti dir konsernan en lartik ki ti averti kont bann taktik Satan: “Mon pa ti’n zanmen realize ki Satan i servi mon santiman pour dekouraz mwan. Aprezan ki mon konn sa, mon determinen pour sirmont sa bann santiman.”
20 Annou vwar legzanp en sirveyan dan en pei Sid Lanmerik. Ler i vizit bann frer ek ser ki dekouraze, i souvan demann zot, ‘Eski ou krwar dan Trinite?’ Normalman sa enn ki dekouraze i reponn, ‘Byensir non,’ vi ki i realize ki sa i en mansonz Satan. Apre sa sirveyan i demande, ‘Eski ou krwar dan lanfer?’ Menm larepons, ‘Byensir non!’ Apre, sa sirveyan i dir zot ki i annan ankor en mansonz Satan ki souvan pa ganny rekonnet konman en mansonz. I diriz zot latansyon lo paz 249, paragraf 21, dan liv Approchez-vous de Jéhovah, * ki denons sa mansonz ki Zeova pa kontan nou personnelman. Sa sirveyan i ganny bon rezilta ler i ed bann ki dekouraze rekonnet e rezet sa mansonz Satan.
Protez ou Lekor pour pa ganny anbete
21, 22. Akoz nou pa dan linyorans konsernan bann taktik Satan pour anbet dimoun, e ki nou devret determinen pour fer?
21 Dan sa dernyen staz bann dernyen zour, i pa sirprenan ki Satan pou kontinyen anvoy en kantite mansonz. Gran mersi, Zeova i fer nou konn bann taktik rize Satan. Labib ek bann piblikasyon baze lo Labib ki sorti kot ‘lesklav fidel e pridan’ i klerman devwal bann move metod Satan. (Matye 24:45) Vi ki nou ganny averti davans, alor nou byen prepare pour sirmont sa bann taktik.—2 Korentyen 2:11.
22 Alor, annou reste vizilan kont rezonnman bann ki abandonn e rezet laverite. Annou determinen pour evit tou kalite pyez ki kapab anbet nou. Finalman, annou rekonnet e rezet tou mansonz Satan. Ler nou fer sa, nou pou protez nou relasyon avek “Bondye laverite,” ki deteste mansonz.—Psonm 31:5; Proverb 3:32.
[Not anba lo paz]
^ par. 5 Konsernan sa verb ki ganny tradwir pe “tronp” dan Revelasyon 12:9, en liv referans i dir ki i “endik en aksyon kontinyel ki vin en tre dan personnalite en dimoun.”
^ par. 20 Pibliye par Temwen Zeova.
Eski ou rapel?
• Akoz dan lemonn ozordi i annan sitan en kantite parol pour anbet lezot?
• Ki mannyer nou kapab veye pour nou pa ganny anbete par bann ki abandonn e rezet laverite?
• Ki mannyer nou kapab fer atansyon ki nou pa devlop okenn tandans pour anbet nou prop lekor?
• Ki mannyer nou kapab evite ganny anbete par bann mansonz Satan?
[Kestyon]
[Portre lo paz 17]
Pa anbet ou lekor konsernan divertisman
[Portre lo paz 18]
Pour ki ou pa anbet ou lekor, egzamin ou lekor avek led lapriyer, ekout lezot, e nouri lo Parol Bondye regilyerman