Rekonfor pour sa ki pe soufer

LER bann zonm ek fanm fidel dan lepase ti rankontre problenm, zot ti priy bokou pour ganny gidans Bondye. Me zot ti osi fer bann aksyon neseser pour amelyor zot sitiasyon difisil, tel parey servi zot lespri pour ki zot adverser pa atrap zot. Par egzanp, zefor ki David ti fer ansanm avek son konfyans dan Zeova, ti permet li andir son difikilte. Ki nou devret fer nou osi?

I tre probab ki nou debourye lo nou menm pour rezourd nou problenm, ler nou pas dan difikilte. Par egzanp, si nou napa en travay, eski pa nou fer zefor pour trouv en travay apropriye ki pou soutenir nou ek nou fanmiy? (1 Timote 5:8) Oubyen, si nou annan en problenm lasante, eski pa nou al kot dokter? Zezi li menm, ki ti annan pouvwar sorti kot Bondye pour geri tou kalite maladi, ti rekonnet ki ‘bann ki malad i bezwen dokter.’ (Matye 9:12) Me pa toultan ki nou bann problenm pou ganny rezourd konpletman. Petet nou bezwen kontinyen siport zot en serten degre.

Akoz nou pa koz avek Zeova dan lapriyer lo sa size? Par egzanp, ler nou pe rod en travay, lapriyer avek konfyans dan Zeova pou ed nou reziste tantasyon pour aksepte travay ki pa an akor avek prensip Labib. Lapriyer pou anpes nou vin egois oubyen kontan larzan ki kapab ‘egar nou lwen avek lafwa.’ (1 Timote 6:10) Annefe, ler nou pe fer bann desizyon enportan konsernan travay oubyen fanmiy oubyen size lasante, nou kapab swiv konsey David: “Larg ou fardo lo Zeova li menm, e li menm i pou soutenir ou. Zanmen i pou les sa enn ki drwat drive.”—Psonm 55:22.

Lapriyer senser pou osi ed nou pour pa reste latet fatige, pour ki nou kapab siport nou problenm. Zapot Pol, ki ti en Kretyen senser, ti ekrir: ‘Dan tou keksoz par lapriyer ek siplikasyon demann Bondye tou sa ki zot bezwen avek en leker rekonnesan.’ Dan ki fason lapriyer senser i kapab konsol nou? ‘Lape Bondye ki depas tou panse i ava sirvey zot leker ek zot lespri dan Kris-Zezi.’ (Filipyen  4:6, 7) Lape Bondye i depas tou panse. Alor, ler traka oubyen latristes i vin en lour lo nou, nou pa pou santi nou boulverse. I pou ‘sirvey nou leker ek nou lespri.’ Sa pou ed nou pour pa reazir tro vit e dan en move fason, ki kapab fer nou problenm vin pli grav.

Lapriyer i kapab fer en diferans dan lafason ki en sitiasyon i deroule. Ler zapot Pol ti dan prizon an Ronm, avek limilite i ti demann son bann konpanyon pour priy pour li. Akoz Pol ti demann sa? “Priy spesyalman pour mwan, pour ki Bondye i a permet mwan retourn kot zot pli vit.” (Ebre 13:19) Andotmo, Pol ti konnen ki ler Zeova ti antann sa kantite lapriyer ki son bann konpanyon Kretyen ti pe fer, sa ti kapab fer en diferans an rapor avek ler ki i ti pou ganny large.—Filemon 22.

Eski lapriyer pou sanz fason ki nou difikilte i fini? I kapab. Me nou devret mazinen ki Zeova pa neseserman reponn nou lapriyer dan sa fason ki nou nou ti ava oule. Pol ti priy plizyer fwa konsernan son “soufrans,” ki ti kapab en problenm lasante. Me olye retir sa problenm, Bondye ti dir Pol: “Mon lagras i tou sa ki ou bezwen; parski mon pisans i azir dan lafebles.”—2 Korentyen 12:7-9.

Alors, i kapab ki nou problenm pa pou disparet deswit. Me sa i en loportinite pour montre nou konfyans dan nou Papa dan lesyel. (Zak 1:2-4) Annan lasirans ki menm si Zeova Bondye pa retir sa problenm, i kapab “donn mwayen pour sorti pour ki ou kapab siporte.” (1 Korentyen 10:13) I byen pour fer resorti ki Zeova i ganny apele “Bondye ki touzour donn konsolasyon. I konsol nou dan tou bann soufrans.” (2 Korentyen 1:3, 4) Bondye i kapab donn nou sa ki nou bezwen pour andire, e nou annan lespwar lavi eternel.

Parol Bondye, Labib, i promet ki Zeova “pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans.” (Revelasyon 21:3, 4) Eski en lemonn san problenm i zis en rev? Petet pour ou i en rev akoz ou’n abitye viv dan problenm. Toudmenm, Bondye in promet ki en zour nou pou nepli per e pou nepli annan maler. Wi son plan pou sirman reisi.—Izai 55:10, 11.

[Portre lo paz 9]

Soulazman apre en moman dezespwar