Depan lo Lespri Bondye kan nou Sitiasyon i sanze

“Fer tou pour ganny laprouvasyon Bondye.”—2 TIMOTE 2:15, NW.

1. Ki bann sanzman ki vin en defi pour nou byennet spirityel?

SA LEMONN otour nou pe kontinyen sanze. Nou vwar bann progre enpresyonan dan domenn syantifik ek teknolozi. Tandis ki bann prensip moral zot, zot pe perdi zot valer. Parey nou’n vwar dan lartik presedan, bann Kretyen i bezwen reziste sa lespri lemonn ki kont Bondye. De lot kote, anmezir ki lemonn i sanze, nou osi nou sanze dan plizyer fason. Nou devlope sorti en zanfan pour vin adilt. Nou ganny oubyen perdi serten byen materyel, lasante, e bann dimoun ki nou kontan. Nou napa kontrol lo bokou sa bann sanzman, e zot kapab vin en nouvo defi ki menas nou byennet spirityel.

2. Ki mannyer sitiasyon dan lavi David ti sanze?

² Napa bokou dimoun ki’n eksperyans sitan bann gran sanzman dan zot lavi parey David, garson Zese. David ti en senp gardyen mouton. En sel kou i ti vin en ero pour son pei. Plitar, i ti ganny sase parey en zannimo par en lerwa zalou. Apre David ti vin en lerwa e i ti fer bokou sikse dan son bann konba. Akoz en pese grav ki i ti fer, i ti sibir bann konsekans ki ti fer li soufer bokou. Ti ariv maler ek divizyon dan son fanmiy. I ti vin ris, vye, e malad dan son vye zour. Malgre i ti rankontre bokou sanzman dan son lavi, David ti toultan met son konfyans dan Zeova ek Son lespri. I ti fer tou pour “ganny laprouvasyon Bondye,” e Bondye ti beni li. (2 Timote 2:15, NW ) Menm si nou sitiasyon pa parey pour David, nou kapab tir en leson lo fason ki i ti fer fas avek diferan sitiasyon dan son lavi. Son legzanp i kapab ed nou pour konpran konman nou kapab kontinyen ganny led lespri Bondye letan bann sitiasyon i sanze dan nou lavi.

Limilite David—En bon Legzanp

3, 4. Ki mannyer David ti sorti en senp gardyen mouton pour vin renonmen dan son pei?

³ Kan David ti ankor en zenn garson, pa bokou dimoun ki ti remark li, menm son prop fanmiy. Kan profet Samyel ti vin Betleenm, papa David ti prezant li avek set dan son wit garson. David, ki ti pli zenn garson, ti ganny les deryer pour vey zot mouton. Me Zeova li, i ti’n swazir David pour vin fitir lerwa Izrael. Zot ti apel David ki ti dan laplenn. Apre, Labib i dir: “Samyel ti pran flakon delwil e vid lo li omilye son bann frer. Lespri Zeova ti konmans travay lo David depi sa zour.” (1 Samyel 16:12, 13) David ti depan lo sa lespri toudilon son lavi.

⁴ Byento sa zenn gardyen mouton ti pou renonmen dan son pei. I ti ganny apele pour servi lerwa e zwe lanmizik pour li. I ti touy Golyat, en solda zean ki ti sitan for ki menm bann pli bon solda Izrael ti per pour debout avek li. David ti ganny apwente lider lo bann larme, e i ti reisi bat bann Filisten. Dimoun ti kontan li. Zot ti konpoz sanson pour glorifye li. Avan sa, en konseye Lerwa Sail ti dekrir David pa selman konman en dimoun ki “zwe byen” larp me osi konman “en zonm kouraze, for, e en zonm ki konn lager. I koz avek lentelizans e i annan en zoli laparans fizik.”—1 Samyel 16:18; 17:23, 24, 45-51; 18:5-7.

5. Kwa ki ti a’n kapab fer David arogan, e ki mannyer nou konnen i pa ti koumsa?

 ⁵ David ti paret annan tou—popilarite, labote, lazenes, fasilite koze, talan dan lanmizik, kouraz pour lager, ek laprouvasyon Bondye. Nenport sa bann keksoz ti’n kapab fer li arogan. Pourtan, napa enn ki ti fer li arogan. Remarke ki David ti reponn Lerwa Sail kan i ti ofer David lanmen son fiy. Avek en limilite senser, David ti dir: “Ki mon ete e ki mon fanmiy ek fanmiy mon papa i ete an Izrael, pour mwan vin zann lerwa?” (1 Samyel 18:18) En spesyalis Labib ti fer en komanter lo sa verse: “Sa ki David ti oule dir se ki ni lo en baz personnel, ni akoz son ran sosyal, oubyen ni akoz son zanset, i pa ti pou kapab dir ki i merit sa loner pour vin zann lerwa.”

6. Akoz nou devret devlop limilite?

⁶ David ti annan limilite akoz i ti rekonnet ki Zeova ti bokou bokou pli siperyer ki bann imen enparfe dan tou fason. David ti sirprann pour vwar ki Bondye i menm remark en zonm. (Psonm 144:3) David ti osi konnen ki nenport sikse ki i ti kapab annan ti akoz Zeova ti demontre limilite par abes li pour soutenir, protez, e pran swen avek li. (Psonm 18:35) Pa sa i en bon leson pour nou! Nou talan, nou lakonplisman, ek nou privilez pa devret zanmen fer nou orgeye. Zapot Pol ti ekrir: ‘Ki ou posede ki ou pa ti resevwar? Si ou’n resevwar, alor, akoz ou vant ou lekor konmsi ou pa’n resevwar?’ (1 Korentyen 4:7) Pour ganny lespri sen Bondye ek son laprouvasyon, nou bezwen devlop limilite e prezerv li.—Zak 4:6.

“Pa vanze”

7. Ki loportinite David ti gannyen pour touy Lerwa Sail?

⁷ Kantmenm popilarite David pa ti fer li arogan, i ti fer Lerwa Sail zalou amor, li ki lespri Bondye ti’n kit li. Menm si David pa ti’n fer nanryen mal, i ti bezwen sove pour sov son lavi e i ti reste dan dezer. En fwa, kan Lerwa Sail ti determinen pour rod David, i ti antre dan en kavern ros san konnen ki David ek son bann konpanyon ti pe kasyet la. Bann konpanyon David ti ensiste ki i profit sa loportinite, ki pour zot ti sorti kot Bondye, pour touy Sail. Nou kapab imazin zot dan fernwanr pe koz dousman avek David: “Ozordi i sa zour ki Zeova i dir ou,‘Lala! Mon pe met ou lennmi dan ou lanmen, fer sa ki paret byen dan ou lizye avek li.’ ”—1 Samyel 24:2-6.

8. Akoz David pa ti revanze?

 ⁸ David ti refize fer Sail okenn ditor. I ti demontre lafwa ek pasyans, i ti pare pour les keksoz dan lanmen Zeova. Apre ki lerwa ti kit sa kavern ros, David ti kriy avek li: “Mon espere ki Zeova i a ziz ant mwan ek ou; e Zeova i a revanz lo ou pour mwan. Tandis ki mwan, mon pa pou poz mon lanmen lo ou.” (1 Samyel 24:12) Kantmenm i ti konnen ki Sail ti annan tor, David pa ti zanmen revanze. I pa ni ti mal koz avek Sail oubyen malparl li. Plizyer lezot lokazyon, David ti evite pran aksyon lo li menm. Plito, i ti les tou dan lanmen Zeova.—1 Samyel 25:32-34; 26:10, 11.

9. Akoz nou pa devret rann mal pour mal si nou pe rankontre lopozisyon oubyen persekisyon?

⁹ Parey David, ou kapab trouv ou dan bann sitiasyon difisil. Petet ou ganny opoze oubyen persekite avek ou kanmarad lekol, koleg travay, ou fanmiy, oubyen lezot ki pa partaz ou lafwa. Pa rann mal pour mal. Esper Zeova, demann li son led atraver lespri sen. I kapab ki sa bann dimoun pou enpresyonnen par ou bon kondwit e zot osi zot pou vin krwayan. (1 Pyer 3:1) Antouka, asire ki Zeova i vwar ou sitiasyon e i pou fer serten keksoz dan son letan apropriye. Zapot Pol ti ekrir: “Pa vanze, me les lakoler Bondye azir. Parski Senyer i dir dan Lekritir: ‘Mwan ki pou fer vanzans, mwan ki pou fer peye.’ ”—Romen 12:19.

“Ekout Disiplin”

10. Ki mannyer David ti arive fer en pese grav, e konman i ti sey kasyet son pese?

¹⁰ Letan ti pase. David ti vin en lerwa ki dimoun ti byen kontan. Son fidelite remarkab, ansanm avek sa bann zoli psonm ki i ti ekrir ti a kapab fasilman donn lenpresyon ki David pa ti pou zanmen tonm dan pese grav. Me sa pa ti leka. En zour, sa lerwa ti anler lo son twa e i ti vwar en zoli madanm pe bennyen. I ti fer rode lekel sa madanm. Apre ki i ti’n aprann ki sa madanm ti Batseba e ki son mari Ouriya ti’n al lager, David ti anvoy sers li e annan relasyon avek li. Plitar, i ti dekouver ki Batseba ti’n tonm ansent. Si sa ti ganny devwale, i ti pou vreman en gran skandal! Anba Lalwa Moiz, adilter ti en krim ki ti merit lanmor. Evidaman, David ti krwar i ti kapab kasyet son pese. Alors, i ti anvoy en mesaz kot fron batay pour fer Ouriya retourn Zerizalenm. David ti pe swete ki Ouriya i pas lannwit avek Batseba, me Ouriya pa ti fer sa. David ti sitan dezespere ki i ti fer anvoy Ouriya lager avek en let pour komandan militer, Yoab. Dan sa let, i ti demande ki Ouriya i ganny mete dan en pozisyon dan batay ki ti pou fer li ganny touye. Yoab ti obeir, e Ouriya ti ganny touye. Apre ki Batseba ti’n obzerv son peryod dey dapre koutim, David ti pran li konman son madanm.—2 Samyel 11:1-27.

11. Ki sitiasyon Natann ti met devan David, e konman David ti reazir?

¹¹ I paret ki son plan ti’n marse. Me David ti’n devret realize ki tousala i ekspoze devan lizye Zeova. (Ebre 4:13) Mwan ti pase, e sa zanfan ti ne. Apre, anba gidans Bondye, Natann ti al kot David. Sa profet ti prezant en ka devan lerwa kot en zonm ris ki ti annan plizyer mouton ti pran e touy sel mouton presye ki en zonm mwen fortinen ti annan. David ti en zonm zis e i ti vwar ki sa ki sa zonm ti’n fer ti mal. Me i pa ti ankor realize ki Natann ti pe koz lo li. Deswit, David ti rann en zizman kont sa zonm ris. Avek en gran lakoler, i ti dir avek Natann: “Sa zonm i merit lanmor!”—2 Samyel 12:1-6.

12. Ki zizman Zeova ti rann kont David?

¹² Sa profet ti reponn: “Ou menm ou sa zonm!” David ti’n ziz son prop lekor. Byensir, laont ek profon latristes ti ranplas sa lakoler ki David ti annan. Tou sezi, i ti ekoute kan Natann ti pas zizman Zeova. Ti napa okenn parol rekonfor. David ti’n mepriz parol Zeova par fer sa ki mal. Pa i ti’n touy  Ouriya avek lepe lennmi? Aprezan en lepe pa ti pou kit son lakaz. Pa i ti’n pran madanm Ouriya dan kasyet? Menm keksoz ti pou ariv avek li, me pa an kasyet, plito an piblik.—2 Samyel 12:7-12.

13. Ki mannyer David ti reazir anver disiplin Zeova?

¹³ Erezman, David ti aksepte son fot. I pa ti pran lakoler avek profet Natann. I pa ti blanm lezot oubyen sey zistifye sa ki i ti’n fer. Kan i ti retrouv li fas-a-fas avek son pese, David ti aksepte son responsabilite an dizan: “Mon’n fer pese kont Zeova.” (2 Samyel 12:13) Psonm 51 i montre konman i ti soufer akoz son remor-d-konsyans e profon regre. I ti sipliy Zeova: “Pa zet mwan lwen avek ou; e pa pran ou lespri sen avek mwan.” I ti konnen ki Zeova, en Bondye ki pran pitye, pa ti pou mepriz “en leker brize e kraze” akoz pese. (Psonm 51:11, 17) David ti kontinyen depan lo lespri Bondye. Zeova ti pardonn David kantmenm i pa ti protez li kont bann konsekans son pese ki ti fer li soufer.

14. Ki mannyer nou devret reazir anver disiplin Zeova?

¹⁴ Nou tou nou enparfe, e nou tou nou fer pese. (Romen 3:23) Parfwa nou kapab tonm dan en pese grav parey David. Zis parey en papa ki annan lanmour i disiplin son zanfan, Zeova i koriz bann ki oule servi li. Kantmenm disiplin i pour nou prop benefis, i pa fasil pour aksepte li. Menm parfwa i “rann malere.” (Ebre 12:6, 11) Pourtan, si nou “ekout disiplin” nou kapab rekonsilye avek Zeova. (Proverb 8:33) Pour kontinyen ganny benediksyon Zeova, nou bezwen aksepte koreksyon e rod laprouvasyon Bondye.

Pa met zot Lespwar dan bann Larises enserten

15. (a) Konman serten dimoun i servi zot larises? (b) Konman David ti anvi servi son larises?

¹⁵ Napa okenn lendikasyon ki David ti sorti dan en ran sosyal ki o oubyen ki son fanmiy ti ris. Me pandan son renny konman lerwa, David ti ganny en gran fortin. Parey ou konnen, bokou pe akimil zot larises, fer fason pour ganny plis ankor, oubyen depans li dan en fason egois. Lezot pe servi zot larzan pour elev zot lekor. (Matye 6:2) David ti servi son larises dan en fason diferan. I ti annan en gran dezir pour onor Zeova. David ti eksprim son dezir avek Natann pour batir en tanp pour Zeova pour met lars lalyans ladan, ki ti an Zerizalenm “dan latant ki’n ganny fer avek latwal.” Zeova ti kontan pour aprann konsernan lentansyon David, me i ti dir li atraver Natann ki se Salomon son garson ki ti pou batir sa tanp.—2 Samyel 7:1, 2, 12, 13.

16. Ki preparasyon David ti fer pour konstriksyon tanp?

¹⁶ David ti anmas bann materyo pour servi dan sa gran proze konstriksyon. David ti dir avek Salomon: “Mon’n prepar san mil talan lor ek en milyon talan larzan pour lakaz Zeova. I annan osi kwiv ek feray ki nou pa  kapab peze degre i annan en kantite. Mon’n prepar osi dibwa ek ros, me ou pou azout ankor avek.” Avek son fortin personnel, David ti kontribye 3,000 talan lor ek 7,000 talan larzan. * (1 Kronik 22:14; 29:3, 4) David pa ti fer sa gran kontribisyon zis pour fer lezot vwar, me akoz i ti annan lafwa ek devouman pour Zeova. David ti rekonnet lekel ki’n donn li tou sa larises, parski i ti dir: “Akoz tou keksoz i sorti kot ou, e sa ki nou’n donn ou i sorti dan ou lanmen menm.” (1 Kronik 29:14) Leker zenere David ti pous pour li fer tou sa ki i ti kapab pour promot ladorasyon pir.

17. Konman sa konsey dan 1 Timote 6:17-19 i aplik pour bann dimoun ki annan larzan e osi bann ki napa?

¹⁷ Pareyman, annou servi nou bann byen materyel pour fer sa ki byen. Olye met bann keksoz materyel premye dan nou lavi, i pli bon pour rod laprouvasyon Bondye. Sa i vre lasazes ek boner. Pol ti ekrir: “Pour bann ki posed larises dan sa monn mon rekomann zot ki zot pa annan lorgey, dir zot pa met zot lesperans dan sa bann larises enserten, me met lesperans dan Bondye ki donn nou tou keksoz an labondans pour nou zouir. Demann zot pour fer sa ki byen, e ki zot larises i konsist an bonn aksyon. Zot devre montre zot zenere e touzour pare pour partaz avek lezot. Alor zot ava anmas en bon e solid trezor pour lavenir, e koumsa zot ava ganny vre lavi.” (1 Timote 6:17-19) Nenport sitiasyon ekonomik ki nou ladan, annou depan lo lespri Bondye e viv en lavi ki pou fer nou “ris devan Bondye.” (Lik 12:21) Napa nanryen ki pli presye ki ganny laprouvasyon nou Papa lanmour dan lesyel.

Rod Laprouvasyon Bondye

18. Dan ki fason David in kit en bon legzanp pour bann Kretyen?

¹⁸ Diran son lavi, David ti rod laprouvasyon Zeova. Dan en sanson, i ti dir avek en lavwa for: “Montre mwan faver, Bondye, montre mwan faver, parski mon’n pran refiz dan ou.” (Psonm 57:1) David ti byen fer pour met son konfyans dan Zeova. I ti vin vye, “e ti’n viv bokou letan.” (1 Kronik 23:1) Kantmenm David ti fer bann fot grav, i’n ganny site konman enn parmi bokou temwen Bondye ki ti annan en lafwa remarkab.—Ebre 11:32.

19. Ki mannyer nou kapab ganny laprouvasyon Bondye?

¹⁹ Kan bann sitiasyon dan ou lavi i sanze, mazinen ki zis parey Zeova ti soutenir, fortifye e koriz David, I kapab fer parey pour ou. Parey David, zapot Pol ti rankontre bokou sanzman dan son lavi. Me li osi i ti reste fidel par depan lo lespri Bondye. I ti ekrir: “Mon kapab fer fas avek tou par Kris ki donn mwan lafors.” (Filipyen 4:12, 13) Si nou depan lo Zeova, i pou ed nou reisi. I anvi nou reisi. Si nou ekout li e apros pli pre avek li, i pou donn nou lafors pour fer son lavolonte. Deplis, si nou kontinyen depan lo lespri Bondye, nou pou kapab “ganny laprouvasyon Bondye,” la konmela e pour touzour.—2 Timote 2:15, NW.

[Not anba lo paz]

Ki ou pou reponn?

• Ki mannyer nou kapab veye ki nou pa vin orgeye?

• Akoz nou pa devret revanze?

• Ki pwennvi nou devret annan lo disiplin?

• Akoz nou devret met nou konfyans dan Bondye olye dan larises?

[Kestyon]

[Portre lo paz 28]

David ti depan lo lespri Bondye e rod Son laprouvasyon. Eski ou pe fer parey?

[Portre lo paz 30]

“Tou keksoz i sorti kot ou, e sa ki nou’n donn ou i sorti dan ou lanmen menm”