“Fer ou Travay konman Predikater Levanzil”

“Kontrol ou dan tou sirkonstans, . . . fer ou travay konman predikater levanzil.”—2 TIMOTE 4:5.

1. Ki travay Zezi ti demann son bann disip pour fer?

NON Zeova ek son plan pe ganny anonse dan lemonn antye. Sa i akoz pep Bondye in pran oserye sa travay ki Zezi Kri ti donn son bann disip ler i ti dir: “Ale e fer tou pep vin mon bann disip. Batiz zot o non di-Per, di-Fis e di-Sent-Espri. Ansenny zot pour obeir tou sa ki mon’n konmande.”—Matye 28:19, 20.

2. Ki lenstriksyon Timote, ki ti en ansyen, ti gannyen? Nonm en fason ki bann ansyen ozordi i akonpli zot minister?

² Bann disip Zezi dan premye syek ti pran oserye sa travay. Par egzanp, zapot Pol ti ankouraz son konpanyon Timote, ki ti en ansyen: “Fer ou travay konman predikater levanzil, e ranpli ou devwar dan servis Bondye.” (2 Timote 4:5) Ozordi, en fason ki en ansyen i ranpli son devwar i par vin en proklanmater devoue, enn ki partisip regilyerman dan predikasyon. Par egzanp, sirveyan Letid Liv Kongregasyon i apresye sa bon loportinite pour diriz e form lezot dan travay predikasyon. Pol ti desarz son responsabilite pour anons sa bon nouvel e i ti ede form lezot dan sa travay.—Akt 20:20; 1 Korentyen 9:16, 17.

 Bann Predikater devoue dan Lepase

3, 4. Ki leksperyans Filip ti pas ladan konman en proklanmater sa bon nouvel?

³ Bann premye Kretyen ti renonmen konman bann predikater devoue. Annou vwar legzanp Filip. I ti enn parmi sa “7 zonm . . . ki [ti] annan bon repitasyon, ki [ti] ranpli avek Sent-Espri.” I ti ganny swazir pour distribye manze toulezour parmi bann vev Kretyen ki ti koz Grek ek Ebre an Zerizalenm. (Akt 6:1-6) Filip ti al Samari apre ki sa travay spesyal ti’n fini, ler tou Kretyen eksepte bann zapot ti’n disperse akoz persekisyon. Laba i ti anons sa bon nouvel e i ti ganny pouvwar avek lespri sen pour tir demon e geri bann dimoun paralize. Bokou Samariten ti aksepte mesaz Rwayonm e ti batize. Ler bann zapot Zerizalenm ti tann sa, zot ti anvoy zapot Pyer ek Zan Samari afen ki bann ki ti’n fek batize i kapab resevwar lespri sen.—Akt 8:4-17.

⁴ Apre sa, lespri sen ti diriz Filip pour li rankontre en Etyopyen lo semen ki al Gaza. Apre ki Filip ti’n klerman eksplik li profesi Izai, sa zonm, “en zofisye enportan ki ti ansarz trezor Kandas, larenn Etyopyen” ti met lafwa dan Zezi Kri e i ti ganny batize. (Akt 8:26-38) Apre Filip ti al Azot “e partou i ti anons Levanzil, ziska ki i ti ariv Sezare.” (Akt 8:39, 40) I vreman en bon legzanp konman en proklanmater Levanzil!

5. Ki repitasyon sa kat fiy Filip ti annan?

⁵ Apepre 20 an plitar, Filip ti ankor aktif dan predikasyon an Sezare. Ler Pol ek Lik ti reste kot li, i ti annan “kat fiy non-marye, ki ti profet.” (Akt 21:8-10) I kler ki zot ti’n ganny byen formen spirityelman, devoue dan predikasyon, e zot ti osi annan privilez pour predir bann levennman. Ozordi, si paran i devoue dan predikasyon, sa i kapab fer menm lefe lo son zanfan. Zot legzanp pou motiv zot zanfan fer travay predikasyon vin zot karyer.

Bann Predikater devoue ozordi

6. Ki sikse bann proklanmater dan premye syek ti fer?

⁶ Dan son fame profesi ki ti koz konsernan nou letan, setadir letan lafen, Zezi Kri ti dir: “Me avan, Bonn Nouvel i bezwen ganny anonse avek tou bann nasyon.” (Mark 13:10) Lafen pou vini apre ki sa bon nouvel in ganny anonse “partou dan lemonn.” (Matye 24:14) Anmezir ki Pol ek lezot proklanmater dan premye syek ti proklanm sa bon nouvel, bokou dimoun ti vin krwayan. An rezilta, bokou kongregasyon ti ganny formen partou partou dan Lanpir Romen. Bann ansyen ki ti ganny apwente pour servi dan sa bann kongregasyon ti partisip avek zot frer ek ser dan travay predikasyon. Alor, sa travay ti ganny fer dan bokou plis landrwa ankor. Parol Zeova ti kontinyen propaze e i ti ganny byen etablir dan sa letan, zis parey i ete ozordi akoz plizyer milyon Temwen Zeova pe proklanm sa bon nouvel. (Akt 19:20) Eski ou parmi sa bann ki pe loue Zeova avek lazwa?

7. Ki bann proklanmater Rwayonm pe fer ozordi?

⁷ Ozordi, bokou proklanmater Rwayonm pe profit loportinite pour ogmant zot partisipasyon dan travay predikasyon. Plizyer milye zot in vin misyonner, e plizyer santenn milye zot i partisip aplentan konman pionye ordiner ek pionye asistan. Bokou zonm, fanm, ek zanfan pe fer en travay ekselan konman bann proklanmater Rwayonm devoue! Annefe, tou pep Bondye pe rezwir son benediksyon anmezir ki zot servi li zepol kont zepol konman bann predikater.—Tsefanya 3:9.

8. Dan ki fason sa travay mark fron bann dimoun pe ganny fer ozordi, e lekel ki pe fer li?

⁸ Bondye in donn bann disip ki’n ganny swazir sa responsabilite pour proklanm sa bon nouvel dan lemonn antye. ‘Lezot mouton’ Zezi, ki pe kontinyen ogmante, pe siport bann Kretyen swazir dan sa travay  predikasyon. (Zan 10:16) Dan en vizyon profetik ki Ezekyel ti gannyen, sa travay ki sov lavi dimoun, ti ganny konpare avek met en mark lo fron sa bann dimoun ki pe sagrinen e plennyen akoz bann move keksoz ki pe arive ozordi. Byento, bann move dimoun pou ganny detri. Antretan, nou annan en gran loner pour anmenn sa laverite ki sov lavi anver tou dimoun.—Ezekyel 9:4-6, 11.

9. Ki mannyer bann nouvo i kapab ganny led dan predikasyon?

⁹ Si i fer en pe letan depi ler nou pe partisip dan sa travay predikasyon, nou kapab fer serten keksoz pour ed bann nouvo dan kongregasyon. Parler, nou kapab envit zot pour akonpanny nou dan predikasyon. Bann ansyen i ganny ankouraze pour fer tou sa ki zot kapab pour batir zot konpanyon Kretyen spirityelman. Zefor ranpli avek limilite ki bann ansyen i fer, i kapab ed lezot en kantite pour vin bann predikater efikas e devoue.—2 Pyer 1:5-8.

Pres devan Laport Dimoun

10. Ki legzanp Kris ek son bann premye disip in kite dan predikasyon?

¹⁰ Zezi Kri in kit en pli bon legzanp konman en predikater Levanzil pour son bann disip. Konsernan minister Kris ek son bann zapot, Parol Bondye i dir: “Zezi ti vwayaz dan plizyer lavil ek vilaz pour pres Bonn Nouvel Rwayonm Bondye. Son douz disip ti avek li.” (Lik 8:1) Ki Labib i dir lo bann zapot zot menm? Apre ki lespri sen ti desann lo zot zour Lapannkot lannen 33 N.L., “toulezour zot ti kontinyen prese dan Tanp ek dan bann lakaz e anons Zezi konman Mesi.”—Akt 5:42.

11. Dapre Akt 20:20, 21, ki zapot Pol ti fer dan son minister?

¹¹ Vi ki zapot Pol ti en predikater devoue, i ti kapab dir avek bann ansyen an Efez: “Mon pa’n kasyet nanryen ki kapab itil pour zot, ler mon’n ansennyen an piblik ek dan zot lakaz.” Ler Pol ti pe ‘ansennyen dan zot lakaz,’ eski i ti pe vizit bann konpanyon adorater Zeova se zot, andotmo, eski i ti pe fer vizit pastoral? Non, akoz i ti dir: “Mon’n fer apel avek bann Zwif konman avek non-Zwif pour sanz zot lavi pese e vin kot Bondye, e krwar dan nou Senyer Zezi-Kri.” (Akt 20:20, 21) An zeneral, sa bann ki ti’n deza fini dedye zot lavi avek Zeova pa ti pou bezwen ganny lenstriksyon konsernan “sanz zot lavi pese e vin kot Bondye, e krwar dan nou Senyer Zezi-Kri.” Pol ti form bann ansyen Efez pour pres devan laport e osi ansenny bann non krwayan konsernan repantans ek lafwa. Par fer tousala, Pol ti pe imit metod ki Zezi ti’n kite.

12, 13. An armoni avek Filipyen 1:7, ki pep Zeova in fer konsernan zot drwa pour prese?

¹² Pres devan laport dimoun i kapab vin en keksoz ki pa fasil pour fer. Par egzanp, serten dimoun i ofanse ler nou vin se zot avek sa mesaz Labib. I pa nou lentansyon pour ofans dimoun. Me pres devan laport i en keksoz ki sorti dan Labib, e lanmour pour Bondye e pour nou prosen i motiv nou pour pres dan sa fason. (Mark 12:28-31) Nou’n bezwen prezant bann ka devan lakour, enkli lakour siprenm Letazini pour kapab “defann e konsolid” nou drwa pour prese devan laport dimoun. (Filipyen 1:7) Preski toultan sa lakour in donn desizyon dan nou faver. La en desizyon ki zot souvan fer:

¹³ “Distribisyon bann papye relizye i en vye fason fer pour propaz mesaz Levanzil, i egziste depi ler lenprimri ti ganny envante. I’n toultan en mwayen efikas e pwisan pour plizyer group relizye. Ozordi, sa fason pres Levanzil i ganny servi en kantite par plizyer sekt. Zot bann krwayan i anmenn Levanzil kot plizyer milye lakour e esey fer lezot aksepte zot lafwa par vizit zot se zot. . . . Anba Premye Lamannman Konstitisyon Letazini,  sa kalite aktivite relizye i annan menm lenportans avek ladorasyon dan legliz e fer en lapres devan en lodyans.”—Murdock v. Pennsylvania, 1943.

Akoz Kontinyen prese?

14. Ler nou plante e aroze dan nou minister, ki finalman i kapab arive?

¹⁴ I annan bokou rezon pour pas devan laport dimoun pour pres avek zot. Sak fwa ki nou vizit en lakour, nou esey plant en lagrenn laverite Labib. Ler nou revizit sa dimoun, nou esey aroz li. Sa i kapab fer plis lefe lo sa dimoun, akoz Pol ti ekrir: “Mwan mon’n plante, Apolos in aroze, me Bondye li in fer pouse.” (1 Korentyen 3:6) Alor, annou kontinyen ‘plante e aroze,’ avek konfyans ki Zeova pou “fer pouse.”

15, 16. Akoz nou vizit bann dimoun kot zot lakour plizyer fwa?

¹⁵ Nou fer sa travay predikasyon akoz lavi dimoun i an danze. Ler nou prese, nou kapab sov nou lekor ek sa bann ki ekout nou. (1 Timote 4:16) Si nou ti konnen ki lavi en dimoun ti an danze, eski nou ti pou fer selman en pti zefor pour ed li? Ditou! Vi ki lavi dimoun i enplike, nou vizit zot lakour plizyer fwa. Sitiasyon dimoun pe kontinyen sanze. En dimoun ki pa ti ekout mesaz Labib akoz i ti tro okipe, i kapab ekoute en lot fwa. Nou kapab zwenn en lot manm sa fanmiy, e nou kapab fer en diskisyon lo Labib.

¹⁶ Pa zis zot sitiasyon ki kapab sanze me zot latitid osi. Par egzanp, ler en dimoun pe soufer akoz in perdi kelken dan lanmor sa i kapab fer li ekout mesaz Rwayonm. Nou anvi konsol sa dimoun, fer li konsyan son bezwen spirityel, e montre li ki i kapab fer pour satisfer sa bezwen.—Matye 5:3, 4.

17. Ki rezon prensipal par deryer nou aktivite predikasyon?

¹⁷ Rezon prensipal ki nou pres devan laport dimoun oubyen dan lezot form minister Kretyen se pour ede fer konnen non Zeova. (Egzod 9:16; Psonm 83:18) Wi, nou retir bokou satisfaksyon ler nou travay predikasyon i ed bann ki kontan laverite ek ladrwatir vin bann dimoun ki loue Zeova! En psalmis ti sante: “Zot zennonm e osi bann vyerz, vyeyar ansanm avek bann zanfan. Loue non Zeova, parski son non i gran. Son grander i parlao later ek lesyel.”—Psonm 148:12, 13.

Prese i benefisye nou menm

18. Ki mannyer nou benefisye atraver nou travay predikasyon?

¹⁸ Travay predikasyon i benefisye nou personnelman dan diferan fason. Anmenn sa bon nouvel devan laport dimoun i ed nou devlop limilite, sirtou ler nou pa ganny byen resevwar. Pour vin bann predikater efikas, nou bezwen vin parey Pol, ki ti ‘vin tou avek tou dimoun pour li sov detrwa.’ (1 Korentyen 9:19-23) Leksperyans dan predikasyon i ed nou fer atansyon mannyer nou koze. Par depan lo Zeova e swazir byen nou parol, nou kapab aplik konsey Pol: “Ki zot parol i touzour agreab e enteresan, pour zot kapab donn bann repons valab tou dimoun.”—Kolosyen 4:6.

19. Ki mannyer lespri sen i ed bann proklanmater?

¹⁹ Travay predikasyon i osi fer nou depan lo lespri sen Bondye. (Zekarya 4:6) An retour, son fri—“lanmour, lazwa, lape, pasyans, labonte, fidelite, ladouser, kontrol lo son lekor”—i vin evidan dan nou minister. (Galat 5:22, 23) I fer en lefe lo fason ki nou azir avek dimoun. Sa se akoz ler nou soumet avek gidans lespri sen, i ed nou demontre lanmour, lazwa, ek lape. I osi ed nou pran pasyans, zantiy avek lezot, demontre ladouser ek lafwa, e osi kontrol lo nou lekor ler nou pe anons sa bon nouvel.

20, 21. Ler nou reste okipe konman bann proklanmater, ki serten byenfe ek benediksyon nou gannyen?

²⁰ En lot benediksyon ki nou gannyen konman predikater se ki nou pli pare  pour konpran santiman lezot. Ler dimoun i mansyonn zot problenm—maladi, mank lanplwa, difikilte dan lakour—nou pa azir konman bann konseye, me nou partaz bann verse Labib ki ankouraz e konsol zot. Nou enterese avek dimoun ki’n ganny avegle spirityelman me ki paret kontan sa ki drwat. (2 Korentyen 4:4) I vreman en lazwa pour donn led spirityel bann ki annan sa bon kondisyon leker pour resevwar lavi eternel.—Akt 13:48.

²¹ Partisip regilyerman dan travay predikasyon i ed nou kit nou lespri lo keksoz spirityel. (Lik 11:34) Sa i definitivman itil, sankwa nou kapab ganny tante pour zis mazin ganny keksoz materyel ki popiler dan sa lemonn. Zapot Zan ti ankouraz bann Kretyen: “Pa bezwen kontan lemonn ni sa bann keksoz ki dan lemonn. Si en dimoun i kontan lemonn, i napa lanmour pour nou Papa dan li. Tou sa ki dan lemonn: dezir natir imen, dezir atraver nou lizye ek lorgey dan lavi toulezour, tousala pa sorti kot nou Papa me i sorti dan lemonn. Lemonn pou disparet ek tou son bann dezir, me sa ki fer lavolonte Bondye i reste eternelman.” (1 Zan 2:15-17) Letan nou okipe dan predikasyon e nou annan bokou pour fer dan travay Senyer, sa i ed nou pour pa kontan lemonn.—1 Korentyen 15:58.

Akimil Larises dan Lesyel

22, 23. (a) Ki trezor bann predikater pe akimile? (b) Konman lartik swivan pou ed nou?

²² Travay avek devouman dan predikasyon Rwayonm i anmenn bann byenfe permanan. Zezi ti montre sa ler i ti dir: “Pa akimil zot larises lo later, kot i a ganny detri par lever ek larouy, kot voler a kas laport e vole. Plito akimil zot larises dan lesyel, kot i pa pou ganny detri ni par lever, ni par larouy, kot voler pa pou kapab kas laport e vole, parski la kot ou larises i ete, ou leker pou lanmenm.”—Matye 6:19-21.

²³ Annou kontinyen akimil nou trezor dan lesyel e rekonnet ki nou pa pou ganny en pli gran privilez ki reprezant Souvren Senyer Zeova konman son bann Temwen. (Izai 43:10-12) Anmezir ki nou akonpli nou latas konman bann minis Bondye, petet nou pou santi parey sa ser Kretyen aze 90 an, ki ti dir sa konsernan son gran servis pour Bondye: “Mon remersi Zeova ki’n pare pour aksepte mwan pandan tou sa bann lannen, e mon priye avek tou mon leker ki i pou reste mon bon Papa pour touzour.” Si nou osi nou apresye nou relasyon avek Bondye, sirman nou pou anvi fer sa travay konman en proklanmater oprofon. Lartik swivan pou ed nou vwar ki mannyer nou kapab akonpli nou minister oprofon.

Ki ou pou reponn?

• Akoz nou devret fer sa travay predikasyon?

• Ki ou kapab dir lo bann predikater dan lepase ek ozordi?

• Akoz nou pres devan laport dimoun?

• Ki mannyer ou benefisye ler ou pres sa bon nouvel?

[Kestyon]

[Portre lo paz 12]

Ozordi i annan bann predikater zwaye parey Filip ek son bann fiy

[Portre lo paz 16]

Ki mannyer ou benefisye letan ou partaz sa bon nouvel avek lezot dimoun?