Lekel sa Bebet ek son Mark

ESKI ou en dimoun ki kontan rezourd en mister? Pour reisi fer sa, ou pou bezwen rod plis lenformasyon pour trouv en solisyon. Dan son Parol enspire, Bondye i fourni bann lenformasyon neseser konsernan sa sif 666, non oubyen mark sa bebet dan Revelasyon sapit 13.

Dan sa lartik nou pou egzamin kat pwen prensipal ki pou fer nou konnen ki savedir mark sa bebet. Nou pou egzaminen (1) ki mannyer bann non dan Labib i ganny swazir parler, (2) lekel sa bebet, (3) ki savedir ler i dir ki 666 i “en sif en zonm,” e (4) ki savedir sa nimero 6 e akoz i ganny ekrir trwa fwa, savedir 600 azout 60 azout 6, oubyen 666.—Revelasyon 13:18.

Bann Non dan Labib i annan en Sinifikasyon

Souvan bann non dan Labib i annan en sinifikasyon spesyal, sirtou ler zot ganny donnen par Bondye. Par egzanp, vi ki Abram ti pou vin papa bokou nasyon, Bondye ti sanz non sa patrias pour vin Abraam, ki vedir “Papa en kantite” dimoun. (Zenez 17:5) Bondye ti dir avek Zozef ek Mari apel sa zanfan ki Mari ti pou gannyen Zezi. Sa non i vedir “Zeova i delivrans.” (Matye 1:21; Lik 1:31) Atraver minister Zezi ek son lanmor sakrifisyel, Zeova in fer nou delivrans posib, an armoni avek sinifikasyon non Zezi.—Zan 3:16.

Pareyman, sa non oubyen sif 666 ki Bondye in donnen, i bezwen pe reprezant en tre prensipal dan sa bebet. Alor pour nou kapab konn son bann tre, nou bezwen konnen lekel sa bebet li menm e aprann konsernan son bann aktivite.

Sa Bebet i ganny idantifye

Liv Danyel dan Labib i fourni bokou lenformasyon lo sinifikasyon bann bebet senbolik dan Labib. SAPIT 7 i dekrir byen kler “kat gro bebet”—en lyon, en lours, en leopar, ek en bebet feros avek bann gro ledan feray. (Danyel 7:2-7) Danyel i dir nou ki sa bann bebet i reprezant bann “lerwa,” oubyen pouvwar politik, ki sakenn ti domin bann gran lanpir.—Danyel 7:17, 23.

Konsernan sa bebet dan Revelasyon 13:1, 2, The Interpreter’s Dictionary of the Bible i dir ki “i annan tou bann tre sa kat bebet dan vizyon Danyel. . . . Dan sa ka, sa premye bebet [dan Revelasyon] i reprezant tou bann pouvwar politik ki opoz Bondye dan sa lemonn.” Revelasyon 13:7 i montre ki sa i vre, akoz i dir ki sa bebet ‘ti ganny pouvwar lo tou tribi, tou pep, tou lalang ek tou nasyon.’ *

Akoz Labib i servi bann bebet pour reprezant bann dirizan imen? Pour omwen de rezon. Premyerman, akoz repitasyon ki bann gouvernman in annan pour vers disan dimoun pandan plizyer lannen, parey bebet feros. De istoryen apele Will ek Ariel Durant ti  ekrir: “Lager i en keksoz ki’n toultan form parti listwar imen, e menm si dimoun i vin pli sivilize oubyen Demokrasi i pli dominan, lager pa’n diminyen.” I vre ki “zonm in domin zonm ver son ditor”! (Eklezyast 8:9) Dezyenm rezon i akoz “Dragon [savedir Satan] ti donn li tou son pisans, son tronn ek en gran pouvwar.” (Revelasyon 12:9; 13:2) Sa i montre ki Satan ki par deryer bann gouvernman imen. Pour sa rezon ki zot reflekte son move latitid parey bebet feros.—Zan 8:44; Efezyen 6:12.

Me sa pa vedir ki tou bann dirizan imen i ganny servi direkteman par Satan. Annefe, dan en serten fason, bann gouvernman imen i servi konman “serviter Bondye.” Zot gard stabilite dan lasosyete, si non ti pou annan en kantite boulvers. Deplis, serten lider in protez bann drwa imen, enkli drwa pour ador Bondye dan sa vre fason—en keksoz ki Satan pa oule. (Romen 13:3, 4; Ezra 7:11-27; Akt 13:7) Me akoz lenfliyans Satan, napa okenn imen oubyen lorganizasyon imen ki’n kapab anmenn vre lape ek sekirite. *—Zan 12:31.

“En sif en Zonm”

Vi ki sa mark oubyen non i ganny apele “en sif en zonm,” oubyen parey The Amplified Bible i dir “sif imen,” sa i en trwazyenm keksoz ki ed nou konpran ki savedir 666. Sa lekspresyon pa kapab pe refer avek en dimoun tousel, akoz se Satan ki annan lotorite lo sa bebet me pa okenn dimoun. (Lik 4:5, 6; 1 Zan 5:19; Revelasyon 13:2, 18) Okontrer, vi ki sa bebet i annan “en sif [oubyen mark] en zonm,” sa i endike ki sa bebet pa pe reprezant bann demon oubyen lespri, me en keksoz imen ki annan serten tre imen. Lekel sa bann tre? Labib i reponn: “Tou dimoun in fer pese e pa’n arive ganny laglwar Bondye.” (Romen 3:23) Alor, vi ki sa bebet i annan “en sif en zonm” sa i endike ki bann gouvernman i reflekte kondisyon enparfe bann imen, savedir mark pese ek lenperfeksyon.

Listwar i montre ki sa i vre. Ansyen Sekreter-d-eta pour Letazini, Henry Kissinger ti dir: “Tou sivilizasyon ki’n deza egziste in alafendizour tonbe. Listwar i en resi bann zefor ki’n fel, bann aspirasyon ki pa’n ganny akonpli. . . . Alor konman en istoryen, en dimoun i bezwen aksepte ki tou keksoz pou mal fini.” Remark onnet ki Kissinger ti fer i siport sa laverite fondamantal dan Labib: “Mon konnen, O Zeova, ki semen en imen pa pour li. I pa pour  imen ki pe marse pour diriz son lepa.”—Zeremi 10:23.

Aprezan ki nou’n konnen lekel sa bebet e konpran ki mannyer Bondye i vwar li, aprezan nou kapab egzamin dernyen bout nou mister. Sa i sa nimero sis e akoz i ganny ekrir trwa fwa, savedir, 666, oubyen 600 azout 60 azout 6.

Akoz Trwa Sis?

Dan Labib, serten nimero i annan en sinifikasyon senbolik. Par egzanp, nimero set i souvan ganny servi pour reprezant en keksoz ki konplet, oubyen parfe dan lizye Bondye. Par egzanp, i ti annan set ‘zour,’ savedir set peryod letan dan semenn kreasyon Bondye. Pandan sa letan Bondye ti pou konpletman akonpli son travay kreasyon lo later. (Zenez 1:3–2:3) Parol Bondye i parey larzan ki’n ganny “pirifye set fwa,” savedir i’n ganny rafinen dan en fason parfe. (Psonm 12:6; Proverb 30:5, 6) Naamann ki ti annan lalep ti ganny demande pour benny set fwa dan Larivyer Zourden e i ti geri konpletman.—2 Lerwa 5:10, 14.

Sis i mank enn pour ariv set. Dan lizye Bondye, eski pa nimero sis i en senbol apropriye pour dekrir en keksoz enparfe oubyen ki annan defo? Definitivman wi! (1 Kronik 20:6, 7) Deplis, ekrir sis trwa fwa, i met bokou lanfaz lo sa lenperfeksyon. Parey nou’n vwar, vi ki 666 i “en sif en zonm” sa i montre ki sa pwennvi i byen. Alors, ler nou met tou sa bann pwen ansanm, savedir repitasyon sa bebet, son sif imen ek sa sif 666 li menm, zot tou zot anmenn nou lo en sel konklizyon. Sa se sa lide totalman an defo dan lizye Zeova.

Fason ki Labib in dekrir defo sa bebet i fer nou rapel sa ki Zeova ti dir lo Lerwa Belsatsar dan ansyen Babilonn. Atraver Danyel, Zeova ti dir sa dirizan: “Ou’n ganny peze dan balans e ou’n ganny trouve an defo.” Son aswar menm, Belsatsar ti ganny touye e Lanpir Babilonn ti tonbe. (Danyel 5:27, 30) Pareyman, zizman Bondye lo bann pouvwar politik ek bann ki annan son mark pou vedir lafen sa bebet ek son bann siporter. Me sa voyaz, Bondye pa pou zis detrir en sistenm politik me tou tras dominasyon imen. (Danyel 2:44; Revelasyon 19:19, 20) Alors, i vreman enportan ki nou evite ganny mark sa bebet, ki vedir destriksyon!

Sa Mark i ganny idantifye

Zis apre ki sa sif 666 i ganny devwale, Revelasyon i mansyonn 144,000 disip Zezi Kri, ki annan son non ek non son Papa, Zeova, ekrir lo zot fron. Sa bann non lo sa bann dimoun i montre ki zot pour Zeova ek son Garson e zot rann temwannyaz avek lafyerte. Pareyman, bann ki annan mark sa bebet zot  montre klerman ki zot servi sa bebet. Alor, sa mark, ki swa i lo lanmen drwat oubyen lo fron, dan en sans senbolik i idantifye sa enn ki annan sa mark konman en dimoun ki ador oubyen siport bann sistenm politik sa lemonn. Bann ki annan sa mark i donn “Sezar” sa ki pour Bondye. (Lik 20:25; Revelasyon 13:4, 8; 14:1) Ki mannyer zot fer sa? Par ador bann sistenm politik, son bann senbol, ek son lafors militer, e zot met lespwar dan sa bann keksoz pour anmenn delivrans. Okenn ladorasyon ki zot donn Bondye i vid, i zis parol.

Parkont, Labib i ankouraz nou: “Pa met ou konfyans dan bann dimoun enportan, ni dan zonm lo later, ki pa kapab sov nou. Son lespri i sorti, i retourn dan son sirfas later, sanmenm sa zour son bann panse i disparet.” (Psonm 146:3, 4) Bann dimoun ki ekout sa bon konsey pa konfize ler bann gouvernman pa akonpli zot promes oubyen letan bann dirizan popiler i perdi zot pozisyon.—Proverb 1:33.

Sa pa vedir ki bann vre Kretyen i zis asize e pa fer nanryen konsernan problenm limanite. Okontrer, zot fer konnen tou dimoun konsernan en gouvernman ki pou rezourd problenm limanite. Sa i Rwayonm Bondye ki zot reprezante.—Matye 24:14.

Sel Lespwar pour Limanite i Rwayonm Bondye

Ler i ti lo later, Zezi ti pres prensipalman lo Rwayonm Bondye. (Lik 4:43) Dan son model lapriyer, Zezi ti ansenny son bann disip pour priye ki sa Rwayonm i vini e ki lavolonte Bondye i ganny fer lo later. (Matye 6:9, 10) Sa Rwayonm i en gouvernman ki pou domin later antye. I pa pou dan en lavil isi lo later, me i pou dirize depi lesyel. Pour sa rezon, Zezi ti apel li “Rwayonm lesyel.”—Matye 11:12.

Lekel ki pli byen kapab vin Lerwa sa Rwayonm apard ki Zezi Kri, sa enn ki ti mor pour bann ki pou vin sitwayen son Rwayonm? (Izai 9:6, 7; Zan 3:16) Byento, sa dirizan parfe ki ozordi i en lespri pwisan, pou zet sa bebet, son bann lerwa, ek son bann lafors militer dan “lak kot dife ek souf pe brile.” Sa i senboliz destriksyon total. Me sa pa fini la. Zezi pou osi elimin Satan, en keksoz ki okenn imen pa kapab fer.—Revelasyon 11:15; 19:16, 19-21; 20:2, 10.

Rwayonm Bondye pou anmenn lape pour tou son bann sitwayen obeisan. (Psonm 37:11, 29; 46:8, 9) Menm soufrans ek lanmor pou nepli egziste. Vreman, sa i en lespwar merveye pour bann ki evite ganny mark sa bebet!—Revelasyon 21:3, 4.

[Not anba lo paz]

[Bwat lo paz 5]

Lenformasyon pour ed nou konpran Sinifikasyon 666

1. Bann non Labib i parler revel serten keksoz lo personnalite oubyen lavi sa dimoun ki port sa non, parey dan ka Abraam, Zezi ek bokou lezot. Pareyman, sif oubyen non sa bebet i reprezant son bann tre.

2. Dan liv Labib apele Danyel, diferan kalite bebet i reprezant bann rwayonm oubyen lanpir imen. Sa bebet dan Revelasyon 13:1, 2 i reprezant tou sistenm politik dan lemonn, ki ganny pouvwar avek Satan e ki ganny kontrole par li.

3. Vi ki sa bebet i annan “sif en zonm” oubyen “sif imen,” sa i endike ki sa bebet pa pe reprezant bann demon oubyen lespri, me en keksoz ki annan pour fer avek imen. Alor, i reflekte bann defo ki imen i annan akoz pese ek lenperfeksyon.

4. Dan lizye Bondye, sa nimero set i endik en keksoz konplet oubyen parfe. Parkont nimero sis, ki mank enn pour ariv set i montre ki en keksoz i enparfe, pa konplet. Sa mark 666 i trwa fwa 6 ki met lanfaz lo sa defo, par repet sa nimero trwa fwa.

[Portre lo paz 6]

Zanfan lafen: UNITED NATIONS/Photo by F. GRIFFING

[Portre lo paz 6]

Listwar i montre ki zonm pa kapab byen dirize. Sa i ganny byen reprezante par sa sif 666

[Portre lo paz 7]

Zezi Kri pou diriz later dan en fason parfe