Fer tou pour demontre Labonte dan en Lemonn agresif
Fer tou pour demontre Labonte dan en Lemonn agresif
“Keksoz atiran dan imen i son labonte leker.”—PROVERB 19:22.
1. Akoz i kapab difisil pour demontre labonte?
ESKI ou konsider ou konman en bon dimoun? Si wi, viv dan sa lemonn ozordi i kapab vreman difisil pour ou. I vre ki labonte i ganny idantifye dan Labib konman en parti “fri Lespri.” Me akoz i sitan difisil pour dimoun demontre labonte menm dan bann pei kot zot dir zot Kretyen? (Galat 5:22) Parey nou’n vwar dan premye lartik, en rezon pour sa i ganny trouve dan sa ki zapot Zan ti ekrir—lemonn antye i dan pouvwar Dyab, en kreatir spirityel mesan. (1 Zan 5:19) Zezi Kri ti idantifye Satan konman “sa enn ki gouvern lemonn.” (Zan 14:30) Alors sa lemonn i tant pour vin kriyel parey sa enn ki gouvern li.—Efezyen 2:2.
2. Kwa ki kapab fer li difisil pour nou demontre labonte?
2 Letan lezot i tret nou dan en move fason i afekte nou lavi. Petet bann move vwazen, bann enkoni, e menm bann zanmi oubyen fanmiy i kapab parfwa fer en keksoz san reflesir. Lefe ki nou pa kapab evit kontak avek bann dimoun ki malelve, ki kriy avek kanmarad e menm zour kanmarad i kapab vin en presyon pour nou ki souvan fer nou dekouraze. Sa mank savwar viv delapar lezot i kapab fer nou pa anvi tret zot dan en bon fason, e petet parler nou mazin pour rann zot laparey. Sa i menm kapab fer nou ganny serten problenm lasante e osi problenm spirityel.—Romen 12:17.
3. Ki problenm serye dimoun i rankontre ki kapab teste zot labonte?
3 Presyon akoz kondisyon ki nou viv ladan, i kapab fer li difisil pour nou demontre labonte. Par egzanp, dimoun an zeneral i santi zot anba presyon akoz menas e latak teroris, ensi ki posibilite pour diferan group servi zarm biolozik e nikleer. Deplis, i annan sitan en kantite dimoun ki viv dan lapovrete. Zot annan zis sifizaman manze, labri, lenz ek swen medikal pour viv. Kan sitiasyon i paret dezespere koumsa, i kapab pa fasil pour demontre labonte.—Eklezyast 7:7.
4. Ki move konklizyon serten i kapab tire kan zot pe mazinen si zot pou demontre labonte anver lezot?
4 En dimoun i kapab fasilman konklir ki i pa vreman neseser pour demontre labonte e ki demontre labonte i menm kapab donn lenpresyon ki i tro mou. I kapab santi ki i pe ganny abize, sirtou kan lezot i tret li parey salte. (Psonm 73:2-9) Me Labib i donn nou en bon gidans kan i dir: “En larepons, letan i ganny donnen avek douser, i kalmi lakoler, me en parol ki koz douler i fer monte lakoler.” (Proverb 15:1) Ladouser ek labonte i de laspe fri lespri ki relye etrwatman avek kanmarad e zot byen itil kan nou pe fer fas avek bann sitiasyon difisil.
5. Ki serten laspe nou lavi ki nou bezwen demontre labonte?
5 Vi ki demontre fri lespri sen Bondye i vreman enportan pour nou Kretyen, i ti a byen si nou vwar konman nou kapab demontre enn sa bann kalite, labonte. Eski i posib pour demontre labonte dan en lemonn agresif? Si wi, dan ki laspe nou kapab montre ki nou pa pe les lenfliyans Satan touf nou labonte, sirtou kan nou anba presyon? Annou vwar konman nou kapab demontre labonte dan lafanmiy, dan nou landrwa travay, kot lekol, avek nou vwazen, dan predikasyon, e anver nou bann konpanyon Kretyen.
Labonte dan Lafanmiy
6. Akoz labonte i sitan enportan dan lafanmiy, e konman nou kapab demontre li?
6 Pour nou ganny benediksyon ek gidans Zeova, fri lespri i neseser e nou bezwen byen devlop li. (Efezyen 4:32) Annou konsantre lo nesesite pour manm fanmiy demontre labonte anver kanmarad. Dan lavi toulezour, msye ek madanm i devret zantiy e montre lentere dan kanmarad e osi anver zot zanfan. (Efezyen 5:28-33; 6:1, 2) Labonte i bezwen evidan dan fason ki manm fanmiy i koz avek kanmarad. Zanfan i devret onor e respekte zot paran e paran i devret tret zot zanfan byen. Nou bezwen toultan pare pour felisite, me pran letan avan nou akize.
7, 8. (a) Ki kalite latitid nou devret evite si nou anvi demontre sa vre labonte dan lafanmiy? (b) Ki mannyer bon kominikasyon i kontribye pour fer relasyon antre manm fanmiy for? (c) Ki mannyer ou kapab demontre labonte dan ou fanmiy?
7 Demontre labonte dan nou fanmiy i enplik swiv sa konsey ki zapot Pol ti donnen: “Debaras zot avek tousala: lakoler, pasyon ek malis. Pa les okenn parol kalomni ek parol obsenn sorti dan zot labous.” Toulezour, bann fanmiy Kretyen i devret koz avek kanmarad dan en fason respektab. Akoz? Parski bon kominikasyon i lakle pour en fanmiy vin for e an bonn sante. Kan ou pa tonm dakor avek en keksoz, apez sa konfli par sey rezourd sa problenm olye rod ou rezon. Bann manm fanmiy ki ere i fer en gran zefor pour ki labonte ek konsiderasyon i egziste antre zot.—Kolosyen 3:8, 12-14.
8 Labonte i en bon kalite e i fer nou anvi fer sa ki byen pour lezot. Alors, nou sey fer nou itil, pare pour ede, e annan konsiderasyon pour leres manm fanmiy. I demann zefor endividyel ensi ki zefor lafanmiy antye pour kapab montre sa kalite labonte ki reflekte an byen lo sa fanmiy. Dan sa fason, zot pa pou zis ganny laprouvasyon Bondye, me zot pou onor Zeova, Bondye labonte, dan kongregasyon e dan kominote.—1 Pyer 2:12.
Labonte dan Landrwa Travay
9, 10. Dekrir serten problenm ki kapab leve dan travay, e konman nou kapab rezourd li avek labonte.
9 Petet i pa fasil pour en Kretyen demontre labonte anver son bann koleg travay. Vi ki souvan i annan konpetisyon parmi bann travayer, en koleg travay i kapab fer trik oubyen azir malonnet pour sali ou repitasyon e fer ou perdi ou plas travay. (Eklezyast 4:4) I pa fasil pour demontre labonte dan bann sitiasyon koumsa. Toudmenm, ler en serviter Zeova i mazinen ki azir avek labonte i pli bon fason fer, i devret fer tou pour ganny sa bann dimoun kantmenm zot difisil. Montre ki ou enterese avek zot i kapab ede. Petet ou kapab montre lentere si en koleg travay i malad oubyen si en manm son fanmiy i malad. Menm demann konsernan zot lasante i kapab fer en bon lefe lo sa dimoun. Wi, bann Kretyen i devret fer tou sa ki depann lo zot pour sey promot larmoni ek lape. Parfwa en bon parol ki montre ou lentere ek konsern i kapab ede amelyor sitiasyon.
10 Parler, en anplwayer i kapab enpoz son pwennvi lo son bann travayer. I kapab oule ki tou son travayer i partisip dan serten levennman nasyonal oubyen dan en lafet ki kont prensip Labib. Kan konsyans en Kretyen pa permet li pour partisip dan sa bann zafer, sa i kapab kree dezakor ant li ek son anplwayer. Me petet la i pa pli bon moman pour al an detay konsernan akoz i ti pou mal pour fer sa ki ou anplwayer i oule. Apre tou, pour bann ki pa partaz nou krwayans Kretyen, sa bann levennman oubyen selebrasyon napa nanryen mal avek. (1 Pyer 2:21-23) Petet ou kapab zantiman eksplik ou rezon akoz ou personnelman ou pa pou partisip dan sa levennman. Si ou ganny koze mirak, pa rann laparey. I byen pour en Kretyen swiv sa bon konsey dan Romen 12:18: “Fer tou sa ki depann lo ou pour viv anpe avek tou dimoun.”
Labonte kot Lekol
11. Kwa ki fer li difisil pour bann zenn demontre labonte anver zot kanmarad lekol?
11 I kapab vreman difisil pour bann zenn demontre labonte anver zot kanmarad lekol. Souvannfwa bann zenn i anvi ganny aksepte par zot kanmarad. Serten garson i azir konmsi zot ki la, pour ganny ladmirasyon lezot etidyan. Zot al ziska pour abiz lezot kot lekol. (Matye 20:25) Lezot zenn i kontan demonstre zot skil dan laklas, dan sport, oubyen dan lezot aktivite. Zot krwar akoz zot annan serten talan, sa i fer zot pli siperyer ki lezot e fer zot tret zot kanmarad dan en move fason. En zenn Kretyen i devret fer sir ki i pa fer parey li osi. (Matye 20:26, 27) Zapot Pol ti dir ki “lanmour i pasyan, e i bon” e ki lanmour pa “vant son prop lekor. I pa arogan.” Alors, en Kretyen pa devret swiv move legzanp bann ki azir dan en tel fason, me i devret aplik konsey Labib dan son relasyon avek son bann kanmarad lekol.—1 Korentyen 13:4.
12. (a) Akoz i pa fasil pour bann zenn azir dan en bon fason avek zot ansennyan? (b) Avek ki bann zenn i kapab rod led kan zot anba presyon pour azir dan en move fason?
12 Bann zenn i devret osi tret zot ansennyan dan en bon fason. Bokou etidyan i pran plezir pour fer zot ansennyan ankoler. Zot krwar zot smart letan zot imilye zot ansennyan par fer bann keksoz ki vyol lalwa lekol. Zot kapab sey fer lezot swiv zot par met presyon lo zot. Kan en zenn Kretyen i refize fer parey, i kapab ganny sikannen oubyen abize. Siport en sitiasyon koumsa toudilon lannen i kapab teste determinasyon en Kretyen pour demontre labonte. Me pa oubliye ki i vreman enportan pour nou reste en serviter fidel Zeova. Ou kapab asire ki Zeova pou soutenir ou par mwayen son lespri dan sa bann moman difisil dan ou lavi.—Psonm 37:28.
Labonte anver nou Vwazen
13-15. Kwa ki kapab anpes nou demontre labonte anver nou vwazen, e konman nou kapab fer fas avek sa bann difikilte?
13 Nenport ki landrwa ou reste, dan en lakaz, dan en flat, oubyen lezot landrwa, ou kapab mazin diferan fason pour demontre labonte e eksprim konsern pour byennet ou vwazen. Sa osi pa touzour fasil.
14 Me si ou vwazen akote ou pa tro kontan ou akoz ou ras, nasyonalite, oubyen larelizyon? Si parfwa zot mal koz avek ou oubyen zot inyor ou konpletman? Konman en serviter Zeova, i pli bon si ou demontre labonte otan ki ou kapab. Lezot pou vwar ki ou vreman diferan e sa pou vreman anmenn laglwar pour Zeova, li ki pli gran legzanp labonte. Ou pa zanmen konnen, latitid ou vwazen i kapab sanze akoz ou labonte. I kapab menm vin en adorater Zeova.—1 Pyer 2:12.
15 Ki mannyer nou kapab demontre labonte? Premyerman par nou kondwit egzanpler dan lafanmiy, kan nou tou nou devlop fri lespri. Ou vwazen i kapab remark sa. Parfwa, ou kapab rann ou vwazen en servis. Pa oubliye ki labonte i vedir pran en lentere aktif dan byennet lezot.—1 Pyer 3:8-12.
Labonte dan Predikasyon
16, 17. (a) Akoz labonte i enportan dan nou predikasyon? (b) Ki mannyer labonte i kapab ganny demontre dan diferan laspe predikasyon?
16 Labonte i devret evidan dan nou predikasyon anmezir nou fer tou nou zefor pour zwenn bann dimoun kot zot lakour, kot zot landrwa travay, e dan bann landrwa piblik. Nou devret gard antet ki nou pe reprezant Zeova, ki touzour bon.—Egzod 34:6.
17 Ki ou kapab fer pour montre labonte dan predikasyon? En legzanp, se kan ou pe rann temwannyaz lo semen, ou kapab demontre labonte par montre konsiderasyon pour sa dimoun e fer ou prezantasyon bref. Vi ki normalman lo trotwar i annan dimoun ki pe ale vini, veye ki ou pa blok semen. Deplis, kan ou pe pres dan teritwar biznes, montre labonte par fer ou prezantasyon bref, par gard antet ki bann boutikye i bezwen servi zot kliyan.
18. Ki mannyer bon zizman i kapab ed nou pour demontre labonte dan predikasyon?
18 Devan laport bann dimoun, nou bezwen servi nou bon zizman. Pa reste tro bokou letan devan laport en dimoun, sirtou si letan pa bon. Eski ou kapab vwar letan en dimoun pe konmans annwiye oubyen menm irite par ou prezans? Petet kot ou reste, Temwen Zeova i pas souvan. Si sa i leka, montre en konsiderasyon spesyal, montre ou touzour zantiy e amikal. (Proverb 17:14) Esey konpran akoz en dimoun pa’n oule ekoute sa zour. Mazinen ki demen enn ou frer oubyen ser Kretyen pou pas kot sa lakour ankor. Si ou’n rankontre en dimoun ki pa’n koz byen avek ou, fer en zefor spesyal pour demontre labonte. Pa lev ou lavwa for oubyen fer lanmin lo ou figir. Koz dan en fason kalm. En bon Kretyen pa pou fer paryaz koze avek sa dimoun ki i pe koz avek. (Matye 10:11-14) Petet en lot fwa sa dimoun pou ekout sa bon nouvel.
Labonte dan Kongregasyon
19, 20. Akoz labonte i neseser dan kongregasyon, e konman nou kapab demontre li?
19 I osi enportan pour demontre labonte anver nou bann konpanyon Kretyen. (Ebre 13:1) Vi ki nou form parti en lasosyasyon frer ek ser partou dan lemonn, labonte i enportan dan nou relasyon avek kanmarad.
20 Si en kongregasyon pe servi menm Lasal Rwayonm avek enn, de, oubyen trwa lezot kongregasyon, i enportan pour byen azir avek zot. Kan i neseser pour aranz ler renyon e fer netwayaz oubyen renovasyon, nou pa pou kapab travay ansanm si i annan konpetisyon parmi nou. Montre labonte ek konsiderasyon kantmenm nou kapab annan diferan pwennvi. Dan sa fason, labonte pou dominen, e Zeova pour vreman beni lentere ki ou montre dan byennet lezot.
Kontinyen demontre Labonte
21, 22. An rapor avek Kolosyen 3:12, ki nou devret determinen pour fer?
21 Labonte i en kalite ki tous tou laspe nou lavi. Alors nou devret fer li vin en par enportan dan nou personnalite Kretyen. Nou devret fer li vin en labitid pour demontre labonte anver lezot.
22 Annou montre labonte anver lezot toulezour. Dan sa fason, nou tou nou ava pe aplik konsey zapot Pol: “Konman pep ki Bondye in swazir, en pep sen ki Bondye i kontan, zot devre ranpli avek konpasyon, labonte, limilite, ladouser ek pasyans.”—Kolosyen 3:12.
Eski ou rapel?
• Kwa ki fer li difisil pour en Kretyen demontre labonte?
• Akoz i enportan pour demontre labonte dan nou fanmiy?
• Kwa ki fer li difisil pour demontre labonte kot lekol, kot travay, e anver nou vwazen?
• Eksplike konman bann Kretyen i demontre labonte dan predikasyon.
[Kestyon]
[Portre lo paz 13]
Kan nou tou dan fanmiy nou demontre labonte, sa i promot linite ek korperasyon
[Portre lo paz 14]
Ou kapab demontre labonte kan en koleg travay oubyen son fanmiy i malad
[Portre lo paz 15]
Zeova i soutenir bann ki kontinyen demontre labonte menm si zot ganny sikannen
[Portre lo paz 16]
Ofer led nou vwazen ki dan bezwen i en fason pour demontre labonte