Kan Lavolonte Bondye pou’n ganny akonpli lo Later

LER Zezi ti ansenny son bann disip pour priye, “Ki ou lavolonte i ganny akonpli lo later parey dan lesyel,” i ti dir sa akoz i ti’n viv dan lesyel avek son Papa. (Matye 6:10; Zan 1:18; 3:13; 8:42) Dan lesyel, Zezi ti eksperyans en letan kot tou keksoz ki ti arive dan lesyel ek lo later ti an armoni avek lavolonte Bondye. Sa ti en letan merveye pour akonpli tou keksoz e pour trouv satisfaksyon.—Proverb 8:27-31.

Bann kreatir spirityel ti bann premye kreasyon Bondye. Zot “son bann lanz, ki annan gran pwisans, ki pe fer sa ki i dir.” Zot osi “son bann minis, ki pe fer son lavolonte.” Konmela osi zot ankor pe fer li. (Psonm 103:20, 21) Eski zot ti annan sa abilite pour fer zot prop swa? Wi. Kan Zeova Bondye ti pe kree later, sa “bann garson Bondye ti konmans aplodi.” (Zob 38:7) Zot laplodisman ti montre ki zot ti kontan plan Bondye, e ki zot ti dakor avek son plan.

Apre ki later ti’n fini ganny kree, Bondye ti prepar li pour imen reste lo la. Apre sa, i ti kree premye zonm ek premye fanm. (Zenez, sapit 1) Eski sa osi i merit laplodisman? Parol enspire Bondye, Labib i dir: “Apre sa Bondye ti vwar tou keksoz ki i ti’n fer e, gete! i ti tre bon.” Wi, sa ki i ti’n fer ti san defo, i ti parfe.—Zenez 1:31.

Ki ti lavolonte Bondye pour nou premye paran ek zot desandans? Dapre Zenez 1:28, lavolonte Bondye pour zot osi ti tre bon: “Bondye ti beni zot e Bondye ti dir zot: ‘Fer zanfan e vin bokou, ranpli later e domin li. Annan kontrol lo bann pwason dan lanmer ek bann kreatir ki anvole dan lesyel ek tou kreatir vivan ki pe marse lo later.’ ” Pour ki sa travay merveye i ganny akonpli, nou premye paran e osi zot desandans ti pou bezwen viv. Napa okenn landrwa ki ti annan maler, lenzistis, latristes, ouswa lanmor.

Sa ti en letan kot lavolonte Bondye ti pe ganny fer dan lesyel ek lo later. Tou sa ki ti viv an armoni avek son lavolonte ti pou trouv bokou plezir pour fer li. Me kwa ki ti al mal?

En problenm san ekspekte konsernan lavolonte Bondye ti arive. I pa ti en problenm ki pa ti pou kapab ganny rezourd. Me sa ti pou anmenn bokou latristes ek soufrans, ki ti pou kree bokou konfizyon konsernan lavolonte Bondye pour limanite. Nou tou nou’n vin viktim sa sitiasyon. Ki problenm ti arive?

Lavolonte Bondye dan en Letan Rebelyon

Enn parmi bann garson spirityel Bondye ti vwar loportinite pour li enterfer avek lavolonte Bondye pour limanite. I ti anvi fer sa pour ki li menm i benefisye. Pli i ti mazin lo sa loportinite, pli sa loportinite ti paret posib e pli atiran. (Zak 1:14, 15) Petet sa lanz ti mazinen ki si i ti kapab reisi fer sa premye koup imen ekout li plito ki Bondye, alor  Bondye ti pou oblize toler en lot pouvwar ki opoz sa ki pour li. Petet osi i ti’n kalkile ki Bondye pa ti pou egzekit zot, akoz sa ti pou vedir ki plan Bondye in fel. Okontrer, Zeova Bondye ti pou bezwen fer sanzman dan son plan. I ti pou bezwen aksepte pozisyon sa garson spirityel, ki bann imen ti pou obeir aprezan. Pour sanmenm rezon, ki sa rebel ti plitar ganny apele Satan, ki vedir “Opozan.”—Zob 1:6.

Par azir dapre son dezir, Satan ti apros sa fanm. I ti ankouraz li pour inyor lavolonte Bondye e pour vin endepandan. I ti dir: “Sirman zot pa pou mor. . . . sirman zot pou vin parey Bondye, pour konn sa ki bon ek sa ki move.” (Zenez 3:1-5) Pour sa fanm, sa parol ti paret en keksoz ki ti pou donn li son liberte. I ti aksepte sa ki Satan ti’n dir akoz i ti krwar ki sa ti pou donn li en pli bon lavi. Plitar, i ti konvenk son mari pour fer parey li.—Zenez 3:6.

Sa pa ti lavolonte Bondye pour sa koup. I ti zot lavolonte. Me sa ti pou anmenn bann move konsekans. Bondye ti’n deza fini dir zot ki dezobeisans ti pou anmenn zot lanmor. (Zenez 3:3) Bondye pa ti’n kree zot pour reisi lo zot menm, zot ti bezwen depan lo li. (Zeremi 10:23) Deplis, zot ti pou vin enparfe, e zot ti pou pas lenperfeksyon ek lanmor avek zot desandans. (Romen 5:12) Satan pa ti pou kapab sanz sa.

Eski sa bann keksoz ki ti arive ti sanz plan Bondye ouswa son lavolonte pour bann imen ek later pour touzour? Non. (Izai 55:9-11) Me zot in lev bann kestyon ki bezwen ganny reponn: Eski imen i kapab “vin parey Bondye, pour konn sa ki bon ek sa ki move,” parey Satan ti dir? Andotmo, si nou ganny ase letan, eski nou pou kapab arive determinen lo nou menm kwa ki byen e kwa ki mal, kwa ki anmenn byenfe e kwa ki anmenn soufrans, dan tou laspe lavi? Eski nou merit obeir Bondye dan tou keksoz akoz son fason dirize i pli bon? Eski nou merit toultan soumet avek son lavolonte? Ki mannyer ou pou reponn sa bann kestyon?

I ti annan zis en fason pour reponn sa bann kestyon devan tou bann lanz ek imen: Les bann ki ti rod lendepandans prouve si zot pou kapab reisi. Si Bondye ti’n met zot amor ler zot ti rebele, sa pa ti pou reponn sa bann kestyon ki ti’n ganny souleve. Les imen viv endepandan pour en serten letan ti pou rezourd sa bann problenm akoz rezilta ti pou evidan. Bondye ti endike ki i pou tret sa sitiasyon dan sa fason, ler i ti dir sa fanm ki i pou annan zanfan. Alors en fanmiy imen ti konmanse. Se gras a desizyon Bondye pour permet sa fanm annan zanfan ki nou la ozordi!—Zenez 3:16, 20.

Me sa pa vedir ki Bondye ti pou les bann imen ek sa garson spirityel rebel fer tou sa ki zot anvi. Bondye pa’n abandonn son drwa pour dirize, ni rezet son plan. (Psonm 83:18) I ti fer sa kler ler i ti predir destriksyon final sa enn ki’n konmans sa rebelyon e letan i pou retir tou bann move lefe. (Zenez 3:15) Alors, depi okonmansman, lafanmiy imen in ganny en promes ki soulaz zot.

Antretan, nou premye paran e zot fitir desandans ti’n sorti anba dominasyon Bondye.  Pour Bondye anpes tou bann move konsekans zot desizyon arive, i ti pou bezwen toultan pe enpoz son lavolonte lo zot. I ti pou menm parey pour pa les zot esey viv endepandan avek Bondye.

Byensir, i ti pou annan dimoun ki pou swazir dominasyon Bondye. Zot ti pou aprann ki lavolonte Bondye pour limanite dan sa letan e otan ki posib viv an armoni avek. (Psonm 143:10) Toudmenm, zot ti pou ganny afekte avek problenm ziska ler sa kestyon lo lendepandans limanite i ganny reponn.

Move lefe bann swa ki dimoun ti fer ti vin evidan byen boner dan listwar imen. Kaen, premye zanfan ki ti ne, ti touy son frer Abel akoz “son laksyon ti move, e pour son frer ti bon e zis.” (1 Zan 3:12) Sa pa ti lavolonte Bondye, akoz Bondye ti’n averti Kaen e apre i ti pini li. (Zenez 4:3-12) Kaen ti swazir lendepandans ki Satan ti ofer; alor i “ti apartenir a dyab.” Lezot ti fer menm parey.

Apre ki imen ti’n lo later pour plis ki 1,500 lannen, “later ti vin koronpi dan lizye sa vre Bondye, e later ti ranpli avek vyolans.” (Zenez 6:11) Aksyon ti bezwen ganny pran pour anpes later ganny andomaze. Bondye ti anmenn en deliz lo later antye e i ti protez en fanmiy drwat ki ti pe viv dan sa letan—Noe, son madanm, son bann garson, ek zot madanm. (Zenez 7:1) Nou tou nou zot desandans.

Depi sa letan, Bondye in toultan fourni gidans pour bann ki senserman anvi konn son lavolonte. I ti enspir bann zonm fidel pour rikord son bann mesaz pour nenport dimoun ki tourn ver Bondye pour gidans. Sa bann mesaz in ganny rikorde dan Labib. (2 Timote 3:16) Avek lanmour, Bondye i permet bann imen fidel annan en relasyon avek li, menm pour vin son zanmi. (Izai 41:8) I osi donn zot lafors ki zot bezwen pour siport bann difikilte ki imen in pas atraver pandan sa plizyer lannen lendepandans avek li. (Psonm 46:1; Filipyen 4:13) Pa nou rekonesan pour tousala!

‘Ou Lavolonte pou ganny akonpli’—konpletman

Sa ki Bondye in fer ziska prezan i pa se tou son lavolonte pour bann imen. Zapot Pyer ti ekrir: “Nou pe espere dapre son promes en nouvo lesyel ek en nouvo later kot pou annan lazistis.” (2 Pyer 3:13) Sa parol senbolik i refer avek en nouvo gouvernman ki pou diriz limanite ek en nouvo sosyete imen anba sa gouvernman.

Profet Danyel ti klerman montre sa ler i ti ekrir: “Dan bann zour sa bann lerwa, Bondye lesyel pou etabli en rwayonm ki pa pou zanmen ganny detrir. . . . I pou kraz e met en lafen avek tou sa bann rwayonm, e li menm i pou dire pour en letan endefini.” (Danyel 2:44) Sa profesi i predir ki sa move sistenm pou trouv son lafen e i pou ganny ranplase par Rwayonm ouswa gouvernman Bondye. Pa sa i en bon nouvel! Lager ek vorasite ki ranpli sa lemonn ozordi avek vyolans e ki pe menase pour detri later pou en zour ganny oubliye.

Kan sa bann keksoz pou arive? Bann disip Zezi ti demande: ‘Kan tousala pou arive, e ki siny ki pou endik ou prezans ek konklizyon sa sistenm?’ Dan son larepons, Zezi ti dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”—Matye 24:3, 14.

Ozordi dimoun dan lemonn antye i konnen ki sa travay predikasyon pe ganny fer. Petet ou’n vwar sa dan ou vwazinaz. Dan son liv These Also Believe, Profeser Charles Braden ti ekrir: “Bann Temwen Zeova in literalman kouver later avek zot temwannyaz. . . . Napa okenn lezot group relizye dan lemonn ki’n montre plis larder ek persistans dan zefor pour propaz sa bon nouvel Rwayonm ki bann Temwen Zeova.” Bann  Temwen pe aktivman anons sa bon nouvel dan plis ki 230 pei e dan preski 400 langaz. Zanmen avan, sa travay in deza ganny akonpli lo en tel nivo dan lemonn parey ozordi. I enn parmi bokou levidans ki sa letan pe aprose pour sa Rwayonm ranplas bann gouvernman imen.

Sa Rwayonm ki Zezi ti dir pou ganny prese i sa menm Rwayonm ki i ti ansenny nou pour priye dan son model lapriyer: “Ki ou Renny i ganny etabli; ki ou lavolonte i ganny akonpli lo later parey dan lesyel.” (Matye 6:10) Wi, sa Rwayonm i sa mwayen ki Bondye pou servi pour akonpli son plan, son lavolonte, pour bann imen ek later.

Ki sa i vedir? Les Revelasyon 21:3, 4 reponn: “Mon ti tann en lavwa for sorti kot tronn kriye: ‘La aprezan Bondye in fer son demer parmi zonm. I pou reste avek zot. Zot pou vin son pep, e i pou vin zot Bondye. I pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.’ ” Wi lavolonte Bondye pou sirman ganny akonpli lo later e dan lesyel—konpletman. * Eski ou pa ti a kontan la lo later kan sa i arive?

[Not anba lo paz]

[Portre lo paz 4]

Lendepandans avek lavolonte Bondye pou anmenn maler