Pep Bondye i bezwen kontan Labonte

“Ki Zeova pe demann ou an retour apard ki demontre lazistis, kontan labonte, e mars dan en fason modes avek ou Bondye?”—MIKA 6:8.

1, 2. (a) Akoz nou pa devret sirprann ki Zeova i ekspekte son pep demontre labonte? (b) Ki kestyon konsernan labonte ki merit nou latansyon?

ZEOVA i en Bondye ki annan labonte. (Romen 2:4; 11:22) Sa premye koup, Adan ek Ev, ti bezwen vreman apresye sa! Dan zarden Edenn, zot ti antoure avek kreasyon Bondye. Sa ti en levidans son labonte anver imen, parski zot ti kapab rezwir lakreasyon. Bondye pe kontinyen demontre son labonte anver tou dimoun, menm bann ki pa rekonesan e bann ki move.

² Vi ki imen in ganny kree dan resanblans Bondye, zot kapab imit bann kalite ki Bondye i annan. (Zenez 1:26) I pa sirprenan alor ki Zeova i ekspekte nou pour demontre labonte. Parey Mika 6:8 i dir, pep Bondye i bezwen “kontan labonte.” Me kisisa labonte? Ki relasyon i annan avek lezot kalite Bondye? Vi ki imen i kapab demontre labonte anver kanmarad, akoz nou pe viv dan en lemonn sitan difisil e kriyel koumsa? Akoz nou ki Kretyen nou devret fer zefor pour demontre labonte dan nou relasyon avek lezot?

Kisisa Labonte?

3. Konman ou ti pou dekrir labonte?

³ Nou demontre labonte kan nou pran en lentere aktif dan byennet lezot. Nou fer sa par fer keksoz pour ede e dir bann parol ki pran kont santiman lezot. Annan labonte i enplik fer sa ki byen olye fer ditor. En dimoun ki annan labonte i amikal, dous, emab, e zantiy. I zenere e annan konsiderasyon pour lezot. Zapot Pol ti donn bann Kretyen sa konsey: “Zot devre ranpli avek konpasyon, labonte, limilite, ladouser ek pasyans.” (Kolosyen 3:12) Alor, labonte i form parti personnalite tou vre Kretyen.

4. Ki mannyer Zeova in pran linisyativ pour demontre labonte anver imen?

⁴ Zeova in pran linisyativ pour montre labonte. Parey zapot Pol ti dir, “depi ki labonte ek lanmour nou Sover, Bondye, in ganny demontre anver zonm,” ki “i’n sov nou pa akoz nou’n fer sa ki drwat me akoz son mizerikord. I’n donn nou lavi par lav nou e i’n renouvle nou atraver lespri sen.” (Tit 3:4, 5, NW ) Bondye i ‘lav,’ oubyen netway, bann Kretyen swazir dan disan Zezi, savedir i’n fer zot benefisye avek valer sakrifis Kris. Zot in osi ganny en nouvo lavi atraver lespri sen pour vin en “kreasyon nouvo,” bann garson Bondye. (2 Korentyen 5:17) Deplis, labonte ek lanmour Bondye i al osi pour “en gran lafoul,” ki’n “lav zot rob e blansi li dan disan Lanyo.”—Revelasyon 7:9, 14; 1 Zan 2:1, 2.

5. Akoz bann ki ganny gide par lespri Bondye i demontre labonte?

⁵ Labonte i osi form parti fri lespri sen Bondye, oubyen son lafors aktif. Pol ti dir: “Fri Lespri se: Lanmour, lazwa, lape, pasyans, labonte, fidelite, ladouser, kontrol lo son prop lekor. Lalwa pa kont sa bann keksoz.” (Galat 5:22, 23) Alors, eski pa bann ki ganny gide par lespri Bondye i devret demontre labonte anver lezot?

 Vre Labonte pa en Febles

6. Kan ki labonte i vin en febles, e akoz?

⁶ Serten dimoun i vwar labonte konman en febles. Zot krwar ki en dimoun i bezwen dir e menm parfwa brit, pour lezot vwar son lafors. Me an realite, i demann bokou lafors pour demontre sa vre labonte e evite ferm lizye lo sa ki mal an krwayan ki nou pe demontre labonte. Vre labonte i form parti fri lespri Bondye. Alor, ler en dimoun i annan labonte, sa pa vedir i en dimoun ki mou, ki ferm lizye lo sa ki mal. De lot kote, labonte i vin en febles letan en dimoun i toler sa ki mal an krwayan i pe demontre labonte.

7. (a) Kwa ki montre ki Eli ti tro mou? (b) Akoz bann ansyen i devret fer sir ki zot pa toler sa ki mal an krwayan ki zot pe demontre labonte?

⁷ Annou vwar legzanp Eli ki ti gran pret an Izrael. I ti tro mou avek son de garson, Ofni ek Fineas, ki ti servi konman pret kot tabernak. Lalwa Bondye ti spesifye ki morso sakrifis ki devret vin pour bann pret. Me Ofni ek Fineas pa ti satisfe avek sa. Zot ti fer en serviter demann sa dimoun ki pe ofer sakrifis lavyann kri, avan ki lagres i ganny brile lo lotel. Sa de garson Eli ti osi dormi avek bann madanm ki ti pe servi dan larantre tabernak. Me olye tir Ofni ek Fineas dan zot fonksyon, Eli ti zis reprimann zot lezerman. (1 Samyel 2:12-29) I pa sirprenan alor ki “sa letan, parol sorti kot Zeova ti rar”! (1 Samyel 3:1) Bann ansyen dan kongregasyon Kretyen i devret fer sir ki zot pa toler sa ki mal an krwayan ki zot pe demontre labonte. Sa i kapab met spirityalite kongregasyon an danze. Vre labonte pa ferm lizye lo bann move parol ek aksyon ki vyol standar Bondye.

8. Ki mannyer Zezi ti demontre vre labonte?

⁸ Nou pli gran legzanp Zezi Kri, pa ti zanmen toler sa ki mal an krwayan ki i pe demontre labonte. Me i ti en vre legzanp labonte. Par egzanp, i “ti ranpli avek konpasyon pour lafoul ki i ti war, akoz zot ti fatige e dekouraze parey bann mouton ki napa berze.” Bann dimoun senser ti santi zot alez pour apros Zezi e menm anmenn zot zanfan kot li. Mazin sa labonte ek konpasyon ki i ti demontre ler “i ti pran bann zanfan dan son lebra, enpoz lanmen lo zot e beni zot.” (Matye 9:36; Mark 10:13-16) Kantmenm Zezi ti en bon dimoun, i ti reste ferm pour sa ki byen dan lizye son Papa seles. Zezi pa ti zanmen toler sa ki mal. I ti ganny kouraz avek Bondye pour denons bann sef relizye ki ti ipokrit. Parey nou kapab trouve dan Matye 23:13-26, i ti repet sa parol ennde fwa: “Maler! profeser Lalwa ek Farizyen, ipokrit!”

Labonte ek lezot bon Kalite

9. Ki mannyer labonte i relye avek pasyans e osi fer dibyen lezot?

⁹ Labonte i relye avek lezot kalite ki lespri Bondye i prodwir. Par egzanp i relye avek pasyans. Annefe, en dimoun ki devlop labonte  i demontre sa kalite par pran pasyans avek lezot. I pran pasyans menm avek bann dimoun ki pa bon. Dan langaz Grek, ti annan de mo diferan pour sa mo ki’n ganny tradwir “labonte.” Enn sa mo ti donn lide fer sa ki byen pour byennet lezot. Bann payen ti sitan enpresyonnen avek lafason ki bann premye Kretyen ti demontre sa kalite ki, dapre Tertullian, zot ti apel bann disip Zezi ‘dimoun ki’n ganny fer avek labonte.’

10. Ki mannyer labonte ek lanmour i relye avek kanmarad?

¹⁰ I annan en lyen ant labonte ek lanmour. Zezi ti dir konsernan son bann disip: “Dimoun pou war ki zot mon bann disip si zot kontan kanmarad.” (Zan 13:35) Konsernan sa kalite lanmour, Pol ti dir: “Lanmour i pasyan, e i bon.” (1 Korentyen 13:4) Labonte i osi relye avek sa laspe lanmour dan mo “labonte leker,” ki souvan ganny servi dan Labib. Sa kalite labonte i sorti dan en lanmour fidel. Sa mo Ebre ki’n ganny tradwir “labonte leker” i pa zis en serten lafeksyon. I en labonte ki dirab, ki ou demontre li anver en dimoun ziska ki ou bi an rapor avek sa dimoun i ganny realize. Labonte leker Zeova, oubyen son lanmour fidel, i ganny demontre dan diferan fason. Par egzanp, i montre li par sov e protez son serviter.—Psonm 6:4; 40:11; 143:12.

11. Ki lasirans labonte leker Zeova i donn nou?

¹¹ Labonte leker Zeova i atir dimoun anver li. (Zeremi 31:3) Kan bann serviter Bondye i bezwen son led oubyen delivrans, zot konnen ki son lanmour i fidel. I pa pou dezapwent zot. Alors, zot kapab priye avek konfyans, parey sa psalmis ki ti dir: “Mwan, mon’n met mon konfyans dan ou labonte leker; ki mon leker i zwaye dan ou delivrans.” (Psonm 13:5) Vi ki lanmour Bondye i fidel, son bann serviter i kapab met tou zot konfyans dan li. Zot annan sa lasirans: “Zeova pa pou abandonn son pep, ni kit son prop leritaz.”—Psonm 94:14.

Akoz sa Lemonn i sitan kriyel?

12. Kan e konman dominasyon kriyel ti konmanse?

¹² Larepons sa kestyon i annan pour fer avek sa ki ti arive dan zarden Edenn. Okonmansman listwar imen, en lanz ki ti’n devlop legois ek lorgey dan son leker, ti fer en konplo pour li vin sef lemonn. I ti reisi son konplo, parski i’n vin “sef lemonn,” en sef vreman kriyel. (Zan 12:31) Ozordi nou konn li konman Satan oubyen Dyab, lennmi prensipal Bondye ek zonm. (Zan 8:44; Revelasyon 12:9) Son konplo egois pour etablir en dominasyon ki pou ranplas dominasyon Zeova ti ganny devwale zis apre ki Ev ti ganny kree. Alors, move  dominasyon ti konmans kan Adan ti swazir pour aret depan lo gidans Bondye e rezet Son labonte konpletman. (Zenez 3:1-6) Olye depan lo zot menm, Adan ek Ev ti an realite vin anba lotorite egois e orgeye Satan. Zot ti aksepte son dominasyon.

13-15. (a) Ki serten konsekans rezet dominasyon drwat Zeova? (b) Akoz sa lemonn i en landrwa kriyel?

¹³ Annou vwar serten konsekans ki ti swiv. Adan ek Ev pa ti ganny dwa reste lo sa bout later ki ti deza en paradi. Zot ti kit en later byen ris kot zot ti kapab fasilman ganny fri ek plant nourisan, pour al reste dan en kondisyon difisil an deor zarden Edenn. Bondye ti dir avek Adan: “Parski ou’n ekout lavwa ou madanm e manz sa fri ki mon ti dir ou, ‘Ou pa devret manz li,’ later pou ganny modi akoz ou. Dan douler ou pou manz sa ki i prodwir toudilon ou lavi. I pou pous pikan ek move zerb pour ou.” Sa malediksyon ki ti ganny prononse lo later ti vedir ki ti pou vreman difisil aprezan pour kiltiv later. Bann desandan Adan ti telman santi lefe sa malediksyon lo later, avek tou son bann pikan, ki Lamek papa Noe ti mansyonn ‘douler zot lanmen akoz sa later ki Zeova ti’n modi.’—Zenez 3:17-19; 5:29.

¹⁴ Adan ek Ev ti osi sanz zot trankilite pour ladetres. Bondye ti dir avek Ev: “Mon pou ogmant ou douler lansentman. Ou pou donn nesans ou zanfan dan douler e ou dezir pou dan ou mari. I pou domin lo ou.” Plitar, Kaen, premye zanfan Adan ek Ev, ti fer en keksoz vreman kriyel. I ti touy son frer, Abel.—Zenez 3:16; 4:8.

¹⁵ Zapot Zan ti fer sa deklarasyon: “Lemonn antye i dan pouvwar dyab.” (1 Zan 5:19) Parey son dirizan, dan lemonn ozordi i annan bann move latitid parey legois ek lorgey. I pa sirprenan pour vwar sa kantite kriyote ek britalite dan sa lemonn! Me i pa pou reste toultan koumsa. Zeova pou fer sir ki olye kriyote ek britalite, se labonte ek konpasyon ki pou rennyen anba son Rwayonm.

 Labonte pou rennyen anba Dominasyon Rwayonm Bondye

16. Akoz renny Bondye atraver Zezi Kri i marke par labonte? Ki sa i obliz nou pour fer?

¹⁶ Zeova ek Lerwa ki i’n swazir pour Son Rwayonm, Zezi Kri, i ekspekte ki zot sitwayen i ganny rekonnet pour zot labonte. (Mika 6:8) Zezi ti donn nou en pti lide konman sa ladministrasyon ki son Papa in konfye li ti pou marke par labonte. (Ebre 1:3) Nou kapab vwar sa dan sa ki Zezi ti dir kan i ti denons bann sef relizye, ki ti pe met en fardo lo lepep. I ti dir: “Vin kot mwan zot tou ki fatige e ki pe anmenn en fardo e mwan, mon a donn zot repo. Pran mon zoug e aksepte mon legzanp akoz mon dou e mon annan limilite dan mon leker e zot a ganny repo. Akoz mon zoug i fasil e mon fardo i leze.” (Matye 11:28-30) Ozordi, i annan bokou dirizan, bann dirizan relizye oubyen lezot dirizan, ki rent dimoun avek zot pake lalwa ek travay ki pa ganny rekonnet. Parkont Zezi li, i pa demann son bann disip sa ki zot pa kapab donnen e sa ki i demann zot pour fer i satisfer zot bezwen. Son zoug i vreman fasil e i donn nou lafors! Eski nou pa santi nou motive pour tret lezot avek labonte, parey li?—Zan 13:15.

17, 18. Akoz nou annan konfyans ki bann ki renny avek Kris dan lesyel e bann ki reprezant li lo later pou demontre labonte?

¹⁷ Zezi ti dir en keksoz remarkab avek son bann zapot ki montre ki dominasyon Rwayonm Bondye i vreman diferan avek dominasyon zonm. Nou lir dan Labib: “Bann disip ti konmans diskite antre zot lekel parmi zot ki ti pou ganny konsidere pli enportan. Me Zezi ti dir zot, ‘Dan lemonn, bann lerwa i servi lotorite lo zot pep; e bann ki annan pouvwar zot ganny apele byenfeter. Me zot, zot pa devre fer koumsa. Okontrer, sa ki pli enportan parmi zot i devre pran plas sa ki pli pti, e sa ki ansarz i devre parey en serviter, Lekel ki pli enportan, sa ki asiz atab oubyen sa ki pe servi? Pa sa enn ki asiz atab? Me mwan, mon parmi zot konman enn ki pe servi.’ ”—Lik 22:24-27.

¹⁸ Bann dirizan imen i sey montre zot pouvwar par “servi lotorite” lo lepep. Zot osi rod bann gran tit ki pou fer zot pli enportan ki bann anba zot pouvwar. Me Zezi ti dir ki vre lenportans i vin atraver servi lezot, kontinyelman fer otan ki nou kapab pour servi lezot. Tou sa ki pou renny avek Kris dan lesyel oubyen sa ki reprezant li lo later i bezwen fer tou pour swiv son legzanp limilite ek labonte.

19, 20. (a) Konman Zezi ti montre grander labonte Zeova? (b) Ki mannyer nou kapab imit Zeova an se ki konsern demontre labonte?

¹⁹ Annou vwar lezot bon konsey ki Zezi ti donnen. Pour montre grander labonte Zeova, Zezi ti dir: “Si ou kontan zis sa bann ki kontan ou, ki rekonpans ou merite? Menm bann move dimoun zot kontan sa ki kontan zot. Si ou fer dibyen zis sa ki fer ou dibyen ki rekonpans ou merite? Menm bann move dimoun zot fer parey. E si ou pret zis bann ki ou krwar pou rann ou, ki rekonpans ou merite? Menm bann move dimoun zot pret bann move parey zot, pour ki zot rann en menm sonm an retour? Me ou, kontan ou bann lennmi, fer dibyen, e prete san esper nanryen an retour. E ou rekonpans i ava gran e ou a vin zanfan Bondye Tre-O, parski i bon anver bann dimoun engra e move. Montre konpasyon parey Bondye, ou Papa, i annan konpasyon.” (Nou ki’n met an italik.)—Lik 6:32-36.

²⁰ Labonte pa rod zis son prop lentere. I pa demann nanryen e i pa ekspekte nanryen an retour. Labonte Zeova i fer li “fer leve son soley lo bann ki move parey lo bann ki bon, e i fer tonbe lapli lo bann ki fer dibyen parey lo bann ki fer dimal.” (Matye  5:43-45; Akt 14:16, 17) Nou imit nou Papa dan lesyel letan nou pa zis pa fer ditor bann engra me nou osi fer zot dibyen, menm nou bann lennmi. Kan nou demontre labonte, nou montre Zeova ek Zezi ki nou anvi viv anba Rwayonm Bondye, kot labonte ek lezot bon kalite pou domin tou relasyon imen.

Akoz nou bezwen demontre Labonte?

21, 22. Akoz nou devret demontre labonte?

²¹ Pour en vre Kretyen, demontre labonte i sirtou enportan. I montre ki lespri Bondye pe travay lo li. Deplis, kan nou demontre vre labonte, nou imit Zeova ek Zezi Kri. Labonte i osi en kalite ki Zeova i ekspekte bann sitwayen son Rwayonm pour demontre. Alors, nou bezwen kontan labonte e aprann demontre li.

²² Ki serten fason pratik ki nou kapab demontre labonte dan nou lavi toulezour? Lartik swivan pour diskit sa size.

Ki ou pou reponn?

• Kisisa labonte?

• Akoz nou pe viv dan en lemonn difisil e kriyel?

• Ki mannyer nou konnen ki labonte pou rennyen anba dominasyon Rwayonm Bondye?

• Akoz i enportan pour bann ki anvi viv anba Rwayonm Bondye demontre labonte?

[Kestyon]

[Portre lo paz 8]

Bann ansyen dan kongregasyon i sey demontre labonte kan zot pran swen avek troupo

[Portre lo paz 9]

Akoz son labonte leker, Zeova pa pou dezapwent son bann serviter dan letan difisil

[Portre lo paz 10]

Labonte Zeova i fer li fer tou dimoun benefisye avek son soley ek lapli