Pran Kouraz parey Zeremi

“Met ou lespwar dan Zeova; pran kouraz e fodre ki ou leker i for. Wi, met ou lespwar dan Zeova.”—PSONM 27:14.

1. Ki benediksyon Temwen Zeova i rezwir?

TEMWEN ZEOVA i dan en paradi spirityel. (Izai 11:6-9) Sa lemonn i boulverse, me zot zot pe benefisye en latmosfer spirityel inik avek zot konpanyon Kretyen, ki anpe avek Bondye e avek kanmarad. (Psonm 29:11; Izai 54:13) Deplis, zot paradi spirityel pe vin pli gran. Tou sa ki ‘fer lavolonte Bondye avek tou zot leker’ pe kontribye pour fer sa paradi vin pli gran. (Efezyen 6:6) Konman? Letan zot viv an akor avek bann prensip Labib e ansenny lezot pour fer parey. Kan zot fer sa, dan en sans, zot pe envit sa bann dimoun pour benefisye avek bann gran benediksyon dan sa paradi.—Matye 28:19, 20; Zan 15:8.

2, 3. Ki bann vre Kretyen i bezwen andire?

² Me pa akoz nou dan en paradi spirityel ki nou pa pou rankontre leprev. Nou ankor enparfe e nou soufer avek maladi, lavyeyes, e finalman lanmor. Deplis, nou pe temwanny lakonplisman bann profesi konsernan “bann dernyen zour.” (2 Timote 3:1) Lager, krim, maladi, lafanmin, ek lezot maler pe ravaz limanite antye, e Temwen Zeova pa en leksepsyon.—Mark 13:3-10; Lik 21:10, 11.

³ Deplis, nou byen konnen ki kantmenm nou santi an sekirite dan nou paradi spirityel, deor divan lopozisyon pe soufle. Zezi ti averti son bann disip: “Parski, zot pa fer parti lemonn, parski mon’n swazir zot e mon’n retir zot dan lemonn, sanmenm rezon akoz ki i ay zot. Rapel byen sa ki mon dir zot: ‘Okenn serviter pa pli gran ki son met.’ Si zot in persekit mwan, zot osi, zot pou ganny persekite.” (Zan 15:18-21) Keksoz i ankor parey ozordi. Laplipar dimoun pa konpran oubyen pa rekonnet valer nou ladorasyon. Serten i kritik nou, boufonn nou, oubyen menm ay nou parey Zezi ti dir. (Matye 10:22) Parfwa zefor i ganny fer pour fann bann fo lenformasyon ek propagann lo nou atraver medya. (Psonm 109:1-3) Wi, nou tou nou rankontre bann sitiasyon difisil, e sa i kapab fer serten parmi nou dekouraze. Ki mannyer nou kapab andire?

4. Kote nou rod led pour andire?

⁴ Zeova pou ed nou. Anba lenspirasyon, en psalmis ti ekri: “En dimoun drwat i rankontre bokou maler, me Zeova i delivre li dan tou sa bann maler.” (Psonm 34:19; 1 Korentyen 10:13) Bokou nou i kapab konfirmen ki kan nou met tou nou konfyans dan Zeova, i donn nou lafors pour siport nenport difikilte. Lanmour ki nou annan pour Zeova e sa lazwa ki i’n met devan nou i ed nou lalit avek dekourazman ek lafreyer. (Ebre 12:2, NW ) Dan sa fason, nou kontinyen reste ferm malgre difikilte.

Parol Bondye ti donn Zeremi Lafors

5, 6. (a) Nonm serten legzanp bann vre adorater Zeova ki ti kapab andire. (b) Ki mannyer Zeremi ti reazir kan i ti ganny apele pour vin en profet?

⁵ Toudilon listwar, bann serviter fidel Zeova in trouv lazwa malgre bann sitiasyon difisil. Serten ti viv pandan letan zizman  kan Zeova ti eksprim son lakoler lo bann mesan. Parmi bann adorater ki ti reste fidel, ti annan Zeremi ek ennde son bann kontanporen, e osi bann Kretyen dan premye syek. Sa bann legzanp dan lepase in ganny rikorde dan Labib pour ankouraz nou, e nou kapab aprann bokou kan nou etidye zot. (Romen 15:4) Annou vwar legzanp Zeremi.

⁶ Zeremi ti ganny apele pour vin en profet an Zida letan i ti ankor byen zenn. Sa pa ti en travay fasil. Bokou dimoun ti pe ador bann fo bondye. Yosiya ki ti lerwa kan Zeremi ti konmans son minister ti fidel. Me kantmenm sa, tou lezot lerwa ki ti swiv li pa ti fidel. Deplis, preski tou bann profet ek bann pret ki ti responsab pour enstri lepep, pa ti siport laverite. (Zeremi 1:1, 2; 6:13; 23:11) Alor, ki mannyer Zeremi ti santi kan Zeova ti apel li pour vin en profet? I ti per! (Zeremi 1:8, 17) Zeremi ti rapel son premye reaksyon: “Mon ti dir: ‘A, Souvren Senyer Zeova! Vreman, mon pa konn koze, akoz mon ankor tro zenn.’ ”—Zeremi 1:6.

7. Ki kalite reaksyon Zeremi ti gannyen dan son teritwar, e ki lefe sa ti fer lo li?

⁷ Laplipar dimoun dan teritwar Zeremi pa ti aksepte son mesaz, e souvan i ti rankontre lopozisyon for. En fwa, Pasour, ki ti en pret ti kalot Zeremi e fer met li dan blok dibwa. Zeremi ti dekrir konman i ti santi sa letan: “Mon ti dir: ‘Mon pa pou mansyonn [Zeova], e mon pa pou koz ankor lo son non.’ ” Petet ou osi ou’n deza santi koumsa e ou ti anvi aret dan semen. Annou vwar kwa ki ti ed Zeremi persevere. I ti dir: “Dan mon leker, i [parol Bondye, oubyen son mesaz] ti parey en dife ki pe brile anndan dan mon lezo, e mon ti fatige gard anndan. Mon ti nepli kapab siporte.” (Zeremi 20:9) Eski Parol Bondye i fer menm lefe lo ou?

Bann Konpanyon Zeremi

8, 9. (a) Ki febles profet Ouriya ti annan, e ki ti son rezilta? (b) Akoz Barouk ti dekouraze, e konman i ti ganny led?

⁸ Zeremi pa ti tousel dan son travay profetik. I ti annan bann konpanyon, e sa ti bezwen vreman ankouraz li. Me annandeler son bann konpanyon pa ti azir dan sa pli bon fason. Par egzanp, enn son konpanyon ki ti apel Ouriya ti pe averti sa ki ti pe al arive avek Zerizalenm ek Zida, “dapre tou sa ki Zeremi ti’n dir.” Me kan Lerwa Yeoyakim ti donn lord pour touy Ouriya, lafreyer ti fer li sov Lezip. Me sa pa ti sov son lavi. Bann zonm lerwa ti rod li, atrap li, e retourn avek li Zerizalenm kot i ti ganny touye. Sa ti bezwen vreman en gran sok pour Zeremi!—Zeremi 26:20-23.

⁹ En lot konpanyon Zeremi ti Barouk, son sekreter. Barouk ti en bon soutyen pour Zeremi, me en serten letan li osi i ti perdi son lekilib spirityel. I ti konmans konplent, an dizan: “Maler pour mwan  aprezan, parski Zeova in azout sagrinasyon avek mon douler! Mon’n fatige soupire e mon pa’n trouv okenn landrwa repo.” Barouk ti dekouraze e i ti konmans perdi lapresyasyon pour bann keksoz spirityel. Kantmenm sa, Zeova ti zantiman donn Barouk en bon konsey e i ti sanze. Apre i ti ganny lasirans ki i pou sirviv destriksyon Zerizalenm. (Zeremi 45:1-5) Zeremi ti’n bezwen vreman ganny ankouraze kan Barouk ti reganny son lekilib spirityel!

Zeova ti soutenir son Profet

10. Ki promes Zeova ti fer avek Zeremi ki ti ankouraz li?

¹⁰ Pli enportan se ki Zeova pa ti abandonn Zeremi. I ti konpran santiman son profet e i ti donn li lafors ek sipor ki i ti bezwen. Par egzanp, okonmansman minister Zeremi kan i ti krwar i pa pou kapab fer sa travay, Zeova ti dir li: “Pa per zot figir, parski ‘Mon avek ou pour delivre ou,’ se sa ki Zeova i deklare.” Apre ki Zeova ti donn son profet lenformasyon konsernan son travay, i ti dir li: “Zot pou sirman lager kont ou, me zot pa pou reisi parski ‘Mon avek ou pour delivre ou,’ se sa ki Zeova i deklare.” (Zeremi 1:8, 19) Pa sa ti rekonfortan! Deplis, Zeova ti vreman gard son parol.

11. Ki mannyer nou konnen ki Zeova ti gard son promes pour soutenir Zeremi?

¹¹ Alor, apre ki i ti’n ganny met dan blok dibwa e dimoun ti sikann li, Zeremi ti kapab dir avek konfyans: “Zeova ti avek mwan parey en zonm for ki fer per. Se pour sa ki sanmenm sa bann ki pe persekit mwan pou tonbe e pa pou reisi. Zot pou vreman onte.” (Zeremi 20:11) Plitar, kan  zot ti oule touy Zeremi, Zeova ti kontinyen soutenir li. Parey Barouk, Zeremi ti sirviv destriksyon Zerizalenm konman en zonm lib, tandis ki son bann persekiter ek bann ki ti inyor lavertisman ti swa mor oubyen ganny pran konman prizonnyen Babilonn.

12. Kantmenm nou annan rezon pour dekouraze, ki nou devret gard antet?

¹² Parey Zeremi, ozordi bokou Temwen Zeova i rankontre serten difikilte dan zot lavi. Parey nou’n mansyonnen pli boner, serten sa bann difikilte i vin akoz nou prop lenperfeksyon, lezot akoz sa konfizyon ki lemonn i ladan, e lezot ankor akoz i annan ki opoz nou travay. Parler sa bann difikilte i kapab fer nou dekouraze. Parey Zeremi, nou kapab ariv lo en pwen kot nou demann nou lekor si nou pou kapab kontinyen servi Zeova. Anfet, i normal pour nou santi nou dekouraze detanzaot. Dekourazman i teste ki kantite nou kontan Zeova. Alors, annou determinen pour pa les dekourazman fer nou aret servi Zeova parey Ouriya ti fer. Okontrer, annou fer parey Zeremi e annan konfyans ki Zeova pou soutenir nou.

Konman konbat Dekourazman

13. Ki mannyer nou kapab swiv legzanp Zeremi ek David?

¹³ Zeremi ti toultan koz avek Zeova. I ti dir li son bann santiman pli profon e sipliy li pour donn li lafors. Sa i en bon legzanp pour nou swiv. David ki ti viv dan lepok Labib, ti rod lafors avek Zeova li osi. I ti ekrir: “Ekout sa ki mon annan pour dir, O Zeova. Konpran mon zemisman. Ekout mwan kan mon kriy osekour, mon Lerwa, mon Bondye, akoz avek ou ki mon priye.” (Psonm 5:1, 2) Resi enspire lo lavi David i montre ki Zeova ti reponn lapriyer David plizyer fwa. (Psonm 18:1, 2; 21:1-5) Pareyman, kan nou anba bokou presyon oubyen kan nou problenm i paret ensiportab, nou pou ganny bokou rekonforte si nou tourn ver Zeova dan lapriyer e devid nou leker avek li. (Filipyen 4:6, 7; 1 Tesalonisyen 5:16-18) Zeova pa refize pour ekout nou. Okontrer, i asir nou ki ‘i pran swen avek nou.’ (1 Pyer 5:6, 7) De lot kote, i pa ti pou rezonnab pour priy Zeova e apre pa ekout sa ki i annan pour dir nou.

14. Ki lefe parol Zeova ti fer lo Zeremi?

¹⁴ Ki mannyer Zeova i koz avek nou? Annou get ankor legzanp Zeremi. Vi ki Zeremi ti en profet, Zeova ti kominik avek li direkteman. Zeremi i dekrir lefe parol Bondye lo son leker: “Ou bann parol ti ganny trouve, e mon ti konmans manz zot. Ou parol i en lafyerte ek en lazwa dan mon leker; parski mon’n port ou non, O Zeova Bondye bann larme.” (Zeremi 15:16) Wi, Zeremi ti kontan akoz i ti port non Bondye, e Son parol ti annan en gran valer pour li. Alors, parey zapot Pol, Zeremi ti annan en gran dezir pour anons sa mesaz ki i ti’n ganny konfye.—Romen 1:15, 16.

15. Ki mannyer nou kapab fer parol Zeova anrasinen dan nou leker, e kwa ki pou fer nou pa reste labous fermen?

¹⁵ Ozordi, Zeova pa pe koz direkteman avek personn. Me nou annan son parol dan Labib. Alors, si nou annan en lapros serye vizavi nou letid Labib e reflesir oprofon lo sa ki nou aprann, parol Bondye pou vin “en lafyerte ek en lazwa” dan nou leker nou osi. Deplis, nou pli gran plezir se port non Zeova kan nou al partaz son parol avek lezot. Annou pa zanmen bliye ki napa okenn lezot group dimoun dan sa lemonn ozordi ki pe anons non Zeova. Zis son bann Temwen ki pe anons sa bon nouvel lo son Rwayonm ki’n ganny etabli e ansenny bann dimoun dous konman vin disip Zezi Kri. (Matye 28:19, 20) Pa sa i en loner! Kan nou mazin sa gran privilez ki Zeova in konfye nou, eski nou kapab reste labous fermen?

 Annou vey nou Frekantasyon

16, 17. Ki pwennvi Zeremi ti annan lo frekantasyon, e konman nou kapab imit li?

¹⁶ Zeremi ti mansyonn en lot keksoz ki ti ed li pour ganny kouraz. I ti dir: “Mon pa’n asiz dan group bann ki pe fer riye pour mwan rezwir. Akoz ou lanmen, mon’n asiz mon tousel parski ou’n donn mwan bokou keksoz pour denonse.” (Zeremi 15:17) Zeremi ti prefere reste li tousel ki les li ganny koronpi par bann move zanmi. Nou osi ozordi nou get keksoz parey. Nou pa zanmen bliy lavertisman zapot Pol ki “move frekantasyon i gat repitasyon.” Wi, i gat en bon repitasyon ki nou’n annan menm pour bokou lannen.—1 Korentyen 15:33.

¹⁷ Move frekantasyon i fer lespri lemonn sali nou lespri. (1 Korentyen 2:12; Efezyen 2:2; Zak 4:4) Annou alor devlop nou abilite pour konn idantifye en move frekantasyon e evit li konpletman. (Ebre 5:14) Si Pol ti ankor vivan ozordi, ki ou krwar i ti pou dir avek en Kretyen ki get bann film imoral oubyen vyolan oubyen bann sport vyolan? Ki mannyer i ti pou konsey en frer ki pe fer zanmi avek en enkoni atraver Internet? Ki i ti pou mazinen lo en Kretyen ki pas sepa konbyen letan devan televizyon oubyen lo bann zwe video, me ki napa en bon labitid pour fer son letid personnel?—2 Korentyen 6:14; Efezyen 5:3-5, 15, 16.

Kontinyen reste dan sa Paradi spirityel

18. Kwa ki pou ed nou reste for spirityelman?

¹⁸ Nou kontan nou paradi spirityel en kantite. Napa nanryen dan sa lemonn ozordi ki kapab ganny konpare avek li. Menm bann ki pa servi Bondye i fer bann bon komanter lo sa lanmour, konsiderasyon, ek labonte ki bann Kretyen i annan pour kanmarad. (Efezyen 4:31, 32) Toudmenm, nou bezwen konbat dekourazman plis ki zanmen oparavan. Bon frekantasyon, lapriyer, ek bon labitid letid i kapab ed nou pou reste for spirityelman. Zot pou donn nou lafors pour sirmont nenport leprev, avek konfyans total dan Zeova.—2 Korentyen 4:7, 8.

19, 20. (a) Kwa ki pou ed nou andire? (b) Avek ki lartik swivan i ganny adrese, e i pou osi enteres ki sennla?

¹⁹ Nou pa devret zanmen les bann ki pa kontan nou mesaz Labib fer nou per e fer nou lafwa vin feb. Parey bann lennmi Zeremi ki ti persekit li, bann ki lalit kont nou pe lalit kont Bondye. Zot pa pou reisi. Zeova ki pli for ki nou bann oponan, i dir nou: “Met ou lespwar dan Zeova; pran kouraz e fodre ki ou leker i for. Wi, met ou lespwar dan Zeova.” (Psonm 27:14) Avek lespwar dan Zeova ki’n byen anrasinen dan nou leker, annou determinen pour pa aret fer sa ki byen. Annou annan konfyans parey Zeremi ki nou pou rekolte si nou pa arete.—Galat 6:9.

²⁰ Konbat dekourazman i en lalit kontinyel pour bokou Kretyen. Parkont, bann zenn zot annan zot prop difikilte pour fer fas avek. Me zot osi annan bann gran loportinite. Lartik swivan i ganny adrese direkteman avek bann zenn parmi nou. I pou osi enteres bann paran e tou adilt batize dan kongregasyon, ki par zot parol, zot legzanp, e zot sipor, zot kapab ed bann zenn dan kongregasyon.

Ki ou pou reponn?

• Akoz nou ekspekte rankontre bann sitiasyon ki dekouraz nou, e avek ki nou devret rod led?

• Ki mannyer Zeremi ti sirmont dekourazman malgre i ti annan en latas difisil pour fer?

• Kwa ki pou fer nou leker ‘fyer e zwaye’ menm dan difikilte?

[Kestyon]

[Portre lo paz 19]

Zeremi ti krwar i ankor tro zenn e mank leksperyans pour vin en profet

[Portre lo paz 20]

Menm kan i ti ganny persekite, Zeremi ti konnen ki Zeova ti avek li “parey en zonm for ki fer per”