Bann Aze dan nou Fanmiy Kretyen i annan bokou valer

“Bann ki’n ganny plante dan lakaz Zeova, . . . zot pou fleri. Zot pou kontinyen prospere kan zot seve in vin blan.”—PSONM 92:13, 14.

1. Konman bokou dimoun i konsider bann dimoun aze?

ZEOVA i kontan tou son bann serviter fidel, enkli bann ki avanse dan laz. Me dapre en estimasyon an Letazini, preski lanmwatye milyon bann dimoun aze i ganny abize oubyen neglize tou le zan. Bann rapor parey sorti en pe partou dan lemonn i endike ki labi bann dimoun aze i en problenm mondyal. En lorganizasyon i dir ki sa problenm i akoz “latitid ki bokou dimoun i annan partou . . . ki bann dimoun aze nepli itil, nepli prodiktif, e zot depan tro bokou lo lezot.”

2. (a) Ki mannyer Zeova i vwar son bann serviter fidel ki aze? (b) Ki deskripsyon rekonfortan nou trouve dan Psonm 92:12-15?

² Zeova i apresye bokou son bann serviter fidel ki aze. I konsantre lo sa ki nou ete anndan, nou “kote spirityel,” olye lo sa ki nou pa kapab fer fizikman. (2 Korentyen 4:16) Dan son Parol, Labib, nou vwar sa lasirans rekonfortan: “En dimoun ki drwat pou fleri parey en pye palm, i pou vin gran parey en pye sed an Liban. Bann ki’n ganny plante dan lakaz Zeova, dan lakour nou Bondye, zot pou fleri. Zot pou kontinyen prospere dan zot vye zour, zot pou kontinyen reste gra e fre, pour fer konnen ki Zeova i drwat.” (Psonm 92:12-15) Egzamin sa bann verse pou montre bann diferan kontribisyon ki zot bann aze zot kapab fer dan nou fanmiy Kretyen.

“Prospere kan zot Seve in vin blan”

3. (a) Akoz bann dimoun drwat i ganny konpare avek bann pye palm? (b) Ki mannyer bann aze i kapab “prospere kan zot seve in vin blan”?

³ Sa psalmis i konpar bann dimoun drwat avek bann pye palm ki’n ganny ‘plante dan lakour nou Bondye.’ Zot pou “kontinyen prospere kan zot seve in vin blan.” En lot tradiksyon sa verse i lir koumsa: “Dan zot vye zour zot kontinyen prodwir fri.” (Tanakh) Eski pa sa panse i ankourazan? Dan bann pei biblik, souvan ou ti kapab vwar bann zoli pye palm debout byen drwat dan bann lakour. Apard ki anbelir en lakour, sa bann pye palm ti raport bokou fri. Serten zot ti kontinyen raport fri pour plis ki san tan. * Letan ou kontinyen reste anrasinen dan laverite, ou osi ou kapab ‘kontinyen  prodwir fri par ou bon travay.’—Kolosyen 1:10.

4, 5. (a) Ki fri enportan bann Kretyen i bezwen prodwir? (b) Nonm serten legzanp bann dimoun aze dan Labib ki ti prodwir fri par loue Zeova avek zot labous.

⁴ Zeova i ekspekte bann Kretyen prodwir fri par loue son non par nou labous. (Ebre 13:15) Eski sa i aplik pour ou konman en dimoun aze? Byensir.

⁵ Dan Labib i annan legzanp bann aze ki ti koz konsernan Zeova ek son plan, san okenn lafreyer. Moiz ti’n depas “swasanndis an” kan Zeova ti fer li vin son profet ek reprezantan. (Psonm 90:10; Egzod 4:10-17) Lavyeyes pa ti anpes profet Danyel donn en temwannyaz san lafreyer konsernan drwa Zeova pour dirize. Danyel ti kapab dan son 90 an kan Belsatsar ti apel li pour enterpret sa lekritir misterye lo miray. (Danyel, sapit 5) Be ki nou pou dir lo zapot Zan dan son vye zour? Ver lafen son servis fidel, i ti ganny anprizonnen lo zil Patmos “akoz Parol Bondye ek temwanyaz Zezi.” (Revelasyon 1:9) Petet ou rapel lezot dimoun dan Labib ki ti prodwir fri par loue Zeova dan zot vye zour.—1 Samyel 8:1, 10; 12:2; 1 Lerwa 14:4, 5; Lik 1:7, 67-79; 2:22-32.

6. Ki mannyer Zeova in servi “bann vyeyar” pour profetize dan bann dernyen zour?

⁶ Zapot Pyer ti sit sa ki profet Yoel ti profetize kan i ti dir: “ ‘Bondye in dir, Dan lepok avan lafen, mon pou vers mon Lespri lo tou dimoun [enkli “bann vyeyar”], . . . e zot pou profetize.’ ” (Akt 2:17, 18; Yoel 2:28) Alors, dan sa bann dernyen zour, Zeova in servi bann manm Kretyen swazir ek ‘lezot mouton’ ki aze pour fer konnen son plan. (Zan 10:16) Serten zot in fidelman prodwir fri Rwayonm pour plizyer dizenn lannen.

7. Montre konman bann aze i kontinyen prodwir fri Rwayonm malgre bann limitasyon fizik.

⁷ Annou vwar legzanp Sonia, ki ti konmans servis aplentan an 1941. Kantmenm pour bokou lannen i ti soufer avek en maladi ki ti persiste, i ti regilyerman kondwir bann letid Labib kot li. Sonia i eksplike: “Pres sa bon nouvel i form parti mon lavi. Anfet, i mon lavi. Mon refize pran mon retret dan predikasyon.” Pa bokou letan pase, Sonia ek son ser, Olive, ti partaz sa mesaz lespwar dan Labib avek Janet, en pasyan ki ti annan en maladi ki napa gerizon. Zot ti rankontre li lopital letan zot ti pe esper dokter. Manman Janet, ki ti en gran Katolik, ti sitan enpresyonnen par sa lentere ranpli avek lanmour ki zot ti montre anver son fiy ki i ti aksepte pour etidye Labib. Aprezan i pe byen progrese. Eski ou kapab sezi bann loportinite parey pour prodwir fri Rwayonm?

8. Ki mannyer Kaleb ti demontre konfyans dan Zeova dan son vye zour? Konman bann Kretyen aze i kapab imit son legzanp?

⁸ Letan bann Kretyen aze i kontinyen persiste dan predikasyon avek kouraz kantmenm zot laz i limit zot, zot pe swiv lepa Kaleb, ki ti akonpanny Moiz dan dezer pour 40 lannen. Kaleb ti annan 79 an kan i ti travers Larivyer Zourden pour antre dan Later Promiz. Apre ki i ti’n lager konman en solda Izrael pour sis an, i ti’n kapab aprezan repoze. Me i pa ti fer sa. Okontrer, avek kouraz i ti demande pour li al kaptir “bann lavil  proteze avek miray” dan rezyon montanny Zida, en landrwa kot bann zonm vreman for ti reste. Sa ti en latas tre difisil. Avek led Zeova, Kaleb ti vreman ‘depouy zot zis parey Zeova ti’n promet.’ (Zozye 14:9-14; 15:13, 14) Ou kapab annan lasirans ki zis parey i ti avek Kaleb, Zeova i avek ou anmezir ki ou kontinyen prodwir fri Rwayonm dan ou vye zour. Deplis, si ou reste fidel, i pou donn ou en plas dan son nouvo lemonn ki i’n promet.—Izai 40:29-31; 2 Pyer 3:13.

“Zot pou kontinyen reste gra e fre”

9, 10. Ki mannyer bann Kretyen pli aze i kapab gard zot lafors spirityel e gard zot lafwa for? (Vwar bwat lo paz 11.)

⁹ Aprezan, sa psalmis i diriz latansyon lo prodiktivite bann aze ki servi Zeova. I sante: “En dimoun ki drwat pou fleri parey en pye palm, i pou vin gran parey en pye sed an Liban. Zot pou kontinyen prospere kan zot seve in vin blan, zot pou kontinyen reste gra e fre.”—Psonm 92:12,14.

¹⁰ Ki mannyer ou kapab gard ou lafors spirityel kantmenm laz pe antre? En pye palm i reste zoli kan i annan en bon sours delo prop. Ou osi ou kapab ganny soutenir avek sa delo laverite dan Labib kan ou etidye Parol Bondye e asosye avek son lorganizasyon. (Psonm 1:1-3; Zeremi 17:7, 8) Ou lafors spirityel i fer ou vin en bon eleman pour ou bann konpanyon Kretyen. Annou vwar konman sa ti leka pour Gran Pret Yeoyada.

11, 12. (a) Ki rol enportan Yeoyada ti zwe dan listwar rwayonm Zida? (b) Ki mannyer Yeoyada ti servi son lenfliyans pour promot vre ladorasyon?

¹¹ Yeoyada ti kapab annan plis ki san tan kan Larenn Atali ti pran kontrol lo Zida par touy son prop pti zanfan. Ki vye Yeoyada ti pou kapab fer? Pour sis an, li ek son madanm ti’n kasyet sel zeritye tronn ki ti reisi sirviv, Yeoas, dan tanp. Apre san ekspekte, Yeoyada ti deklar Yeoas lerwa, ki ti annan set an sa letan, e fer egzekit Atali.—2 Kronik 22:10-12; 23:1-3, 15, 21.

¹² Vi ki i ti pran swen avek lerwa, Yeoyada ti servi son lenfliyans pour promot vre ladorasyon. I ti “fer en lalyans ant li ek lepep, e osi avek lerwa ki zot ti pou kontinyen reste pep Zeova.” Yeoyada ti donn lord lepep pour detri lakaz fo bondye Baal e retir son bann lotel, zimaz, ek pret. Se osi anba gidans Yeoyada ki Yeoas ti reetablir bann servis tanp e fer bann travay reparasyon lo tanp ki ti vreman neseser. “Yeoas ti kontinyen fer sa ki byen dan lizye Zeova pandan tou sa letan ki pret Yeoyada ti enstri li.” (2 Kronik 23:11, 16-19; 24:11-14; 2 Lerwa 12:2) Kan i ti mor alaz 130 an, Yeoyada ti ganny antere ansanm avek bann lerwa akoz “i ti’n fer sa ki byen an Izrael, anver sa vre Bondye ek Son lakaz.” Sa ti vreman en gran loner.—2 Kronik 24:15, 16.

13. Ki mannyer bann Kretyen pli aze i kapab ‘fer sa ki byen anver sa vre Bondye ek son lakaz’?

¹³ Petet ou pa kapab fer otan ki ou ti a anvi pour promot vre ladorasyon akoz ou lasante pa tro bon oubyen akoz lezot sitiasyon. Kantmenm sa, ou ankor touzour kapab ‘fer sa ki byen anver sa vre Bondye ek son lakaz.’ Ou kapab montre ou devouman pour lakaz spirityel Zeova par asiste e partisip dan renyon kongregasyon. Ou kapab osi partisip dan predikasyon kan i posib. Letan ou pare  pour aksepte konsey sorti dan Labib e siport fidelman ‘lesklav fidel e pridan’ ensi ki kongregasyon, sa pou fer nou fanmiy Kretyen vin pli for. (Matye 24:45-47) Ou kapab osi ankouraz bann frer ek ser “pour annan lanmour e fer sa ki byen.” (Ebre 10:24, 25; Filemon 8, 9) Deplis, ou pou vin en benediksyon pour lezot si ou azir an armoni avek konsey zapot Pol: “Dir bann vyeyar ki zot devre modere, respektab, rezonnab e solid dan zot lafwa, zot lanmour ek zot perseverans. Dir egalman, bann vye madanm ki zot devre konport zot konman dimoun ki pe viv en lavi sen. Zot pa devre kolport zaksyon ki fer ditor, ni vin lesklav labwason. Sirtou zot devre donn bon konsey.”—Tit 2:2-4.

14. Ki bann sirveyan Kretyen ki annan bokou leksperyans i kapab fer pour promot vre ladorasyon?

¹⁴ Eski ou’n servi konman ansyen dan kongregasyon pour bokou lannen? En ansyen avek bokou leksperyans i donn sa konsey: “Servi sa lasazes ki ou’n gannyen diran tou sa bann lannen dan en fason zenere. Konfye serten responsabilite avek lezot, e partaz ou leksperyans avek bann ki pare pour aprann. . . . Vwar potansyel dan lezot. Devlop sa potansyel. Prepar pour lavenir.” (Deterononm 3:27, 28) Ou lentere senser dan sa travay Rwayonm pou anmenn bokou byenfe pour lezot dan nou fanmiy Kretyen.

“Fer konnen ki Zeova i drwat”

15. Ki mannyer bann Kretyen pli aze i “fer konnen ki Zeova i drwat”?

¹⁵ Bann serviter Bondye ki pli aze i desarz zot responsabilite pour “fer konnen ki Zeova i drwat” avek bokou lazwa. Si ou en Kretyen aze, ou parol ensi ki ou aksyon i kapab montre lezot ki ‘Zeova i ou Ros, dan ki napa okenn lemal.’ (Psonm 92:15) En pye palm i donn temwannyaz an silans lo bann kalite admirab nou Kreater. Me Zeova in donn ou sa privilez pour temwanny konsernan li avek bann ki pe aksepte vre ladorasyon. (Deterononm 32:7; Psonm 71:17, 18; Yoel 1:2, 3) Akoz sa i enportan?

16. Ki legzanp dan Labib ki montre lenportans pour “fer konnen ki Zeova i drwat”?

¹⁶ Kan Zozye, ki ti en lider Izraelit,  ti’n “vye e avanse dan laz,” i ti “kriy nasyon Izrael antye, son bann ansyen, son bann sef, son bann ziz, ek son bann zofisye,” e rapel zot tou sa ki Zeova ti fer pour zot. I ti dir: “Napa okenn parol parmi tou bann bon parol ki Zeova zot Bondye in dir zot ki pa’n reisi. Tousala in vin vre pour zot.” (Zozye 23:1, 2, 14) Pour en serten letan, sa parol ti fortifye determinasyon sa pep pour reste fidel. Me apre lanmor Zozye, “en lot zenerasyon ti monte . . . ki pa ti konn ni Zeova e ni travay ki i ti’n fer pour Izrael. Bann garson Izrael ti konmans fer sa ki mal dan lizye Zeova e konmans servi Baal.”—Ziz 2:8-11.

17. Ki mannyer Zeova in azir avek son pep dan letan modern?

¹⁷ Ozordi, fidelite kongregasyon Kretyen pa depan lo temwannyaz bann serviter Bondye ki pli aze. Pourtan, nou lafwa dan Zeova ek son bann promes i ganny ranforsi kan nou tann lezot koz lo “gran travay” ki i’n fer pour son pep dan sa bann dernyen zour. (Ziz 2:7; 2 Pyer 1:16-19) Si ou’n asosye avek lorganizasyon Zeova pour bokou lannen, petet ou rapel sa letan kot ti annan en pti gin proklanmater dan ou pei oubyen kot bokou ti opoz sa travay predikasyon. Avek letan, ou’n vwar Zeova retir serten lobstak e ‘akseler’ lakantite ki aksepte laverite. (Izai 54:17; 60:22) Ou’n vwar bann laverite dan Labib ganny eklersi e ou’n temwanny bann sanzman ki’n ganny fer ptit-a-pti dan lorganizasyon vizib Bondye. (Proverb 4:18; Izai 60:17) Eski ou sey ankouraz lezot par partaz ou leksperyans avek zot konsernan sa ki Zeova in fer pour son pep? Sa i kapab vreman annan en lefe pozitif e ankourazan lo nou fanmiy Kretyen!

18. (a) Montre ki lefe i kapab annan letan nou ‘fer konnen lezot ki Zeova i drwat.’ (b) Eski ou’n deza eksperyanse ou menm konman Zeova i en Bondye ki drwat?

¹⁸ Me ki ou pou dir konsernan bann moman ki ou’n personnelman eksperyans swen ek gidans Zeova dan ou lavi? (Psonm 37:25; Matye 6:33; 1 Pyer 5:7) En ser aze ki ti apel Martha ti abitye ankouraz lezot par dir: “Nenport kwa ki arive, pa zanmen abandonn Zeova. I pou soutenir ou.” Sa konsey ti annan en lefe profon lo Tolmina, enn bann etidyan Labib Martha ki ti batize boner dan bann lannen 60. Tolmina i rapel: “Kan mon msye ti mor, mon ti vreman dekouraze, me sa parol ti fer mwan determinen pour pa mank ni en renyon. Zeova ti vreman donn mwan lafors pour kontinyen.” Tolmina in donn sa menm konsey avek plizyer son bann etidyan Labib diran  bann lannen ki’n pase. Vreman, letan ou ankouraz lezot e koz avek zot lo sa ki Zeova in fer, ou kapab batir lafwa ou bann konpanyon Kretyen en kantite.

Zeova i apresye bokou bann Aze ki fidel

19, 20. (a) Ki mannyer Zeova i vwar bann aktivite son bann serviter aze? (b) Ki nou pou egzaminen dan lartik swivan?

¹⁹ Sa lemonn ki mank lapresyasyon napa konsiderasyon pour bann aze. (2 Timote 3:1, 2) Kan zot ganny mazinen, sa i souvan akoz bann keksoz ki zot ti akonpli dan lepase—sa ki zot ti ete, pa sa ki zot ete konmela. Me Labib li, i dir: “Bondye pa enzis pour li oubliy travay ki zot in fer, ni lanmour ki zot in montre pour li par servis ki zot in rann e pe kontinyen rann bann sen.” (Ebre 6:10) Byensir, Zeova i mazin bann travay ki ou’n fer dan lepase. Me i osi apresye ou pour sa ki ou pe kontinyen fer dan son servis. Wi, i vwar bann aze ki fidel konman bann Kretyen prodiktif, ki annan en lafwa for—en levidans son pwisans.—Filipyen 4:13.

²⁰ Eski ou vwar bann manm pli aze dan nou fanmiy Kretyen parey Zeova i vwar zot? Si wi, ou pou santi ou pouse pour montre ou lanmour anver zot. (1 Zan 3:18) Lartik swivan pou diskit serten fason pratik ki nou kapab montre nou lanmour par pran swen avek zot.

[Not anba lo paz]

Ki ou pou reponn?

• Ki mannyer bann aze i “prodwi fri”?

• Akoz lafors spirityel en Kretyen aze i en bon eleman?

• Ki mannyer bann aze i “fer konnen ki Zeova i drwat”?

• Akoz Zeova i apresye son bann serviter ki’n servi li depi lontan?

[Kestyon]

[Bwat lo paz 11]

Ki mannyer zot Lafwa in reste for

Kwa ki’n ed bann Kretyen ki’n servi depi lontan reste for spirityelman e gard zot lafwa for? La sa ki serten in dir:

“Lir bann verse Labib ki konsantre lo nou relasyon avek Zeova i vreman enportan. Preski tou le swar, mon resit Psonm 23 ek 91.”​—Olive, batize an 1930.

“Mon’n fer sir ki mon pa mank en diskour batenm e mon ekout atantivman, konmsi mwan ki pe al batize. Gard mon dedikasyon fre dan mon lespri in ed mwan bokou pour reste fidel.”​—Harry, batize an 1946.

“I vreman enportan pour priye toulezour. Toultan demann Zeova son led, proteksyon, ek benediksyon, ‘pran li an konsiderasyon dan tou nou semen.’ ” (Proverb 3:​5, 6)​—Antônio, batize an 1951.

“Ekout leksperyans bann ki’n servi Zeova fidelman pour bokou lannen i renouvle mon determinasyon pour reste fidel avek li.”​—Joan, batize an 1954.

“I enportan pour nou evite annan en gran lopinyon lo nou menm. Tou sa ki nou annan se gras a faver imerite Bondye. Sa kalite pwennvi i fer nou kontinyen get dan sa bon direksyon pour ganny sa nouritir spirityel ki nou bezwen ziska lafen.”​—Arlene, batize an 1954.

[Portre lo paz 9]

Bann aze i prodwir fri Rwayonm ki annan bokou valer

[Portre lo paz 12]

Lafors spirityel en Kretyen aze i en bon eleman