Eski fodre ou dan en Larelizyon?

‘PA FODRE mon dan en larelizyon ouswa al legliz toultan pour mwan krwar dan Bondye!’ Sa i fason ki bokou dimoun i santi konsernan vin en manm dan en larelizyon ouswa form parti avek okenn lorganizasyon relizye. Annefe, serten dimoun i dir ki zot santi zot pli pros avek Bondye ler zot deor pe admir lanatir olye ki asiste en servis relizye dan en legliz. Ozordi, bokou dimoun i dir ki i pa neseser asosye avek en larelizyon ouswa en lorganizasyon pour krwar dan Bondye.

Me lezot pa santi koumsa. Zot dir ki i neseser form parti avek en larelizyon e osi zwenn ansanm avek lezot. Zot menm dir ki sa i tre enportan, si en dimoun i anvi Bondye i aksepte li. Alor sa kestyon konsernan si asosye avek en larelizyon i vreman neseser, i en size ki konsern sak dimoun endividyelman, pa zis bann dimoun ki etidye larelizyon pour konn bann statistik. Antouka, vi ki sa i enplik nou relasyon avek Bondye, eski pa i fer sans pour konn pwennvi Bondye lo sa size? Alor, ki nou kapab aprann lo sa size dan son Parol, Labib?

Fason ki Bondye ti azir avek Dimoun dan Lepase

Preski 4,400 an pase, en deliz katastrofik ti kouver later antye. I pa fasil pour oubliy en tel levennman, e dan bokou pei i annan bann zistwar ki’n ganny rakonte lo sa levennman. Menm si sa bann zistwar i annan serten detay diferan, zot annan bokou keksoz an komen. Par egzanp, bokou zot i mansyonnen ki zis en pti gin dimoun ek serten zannimo ki ti sirviv.

Eski bann ki ti ganny sove zour sa Deliz ti bann dimoun ki ti sanse? Labib i montre ki sa pa ti leka. I enteresan pour vwar ki Bondye pa ti dir avek sak dimoun konsernan sa Deliz ki ti pe vini. Plito, Bondye ti dir avek Noe, ki an retour ti averti bann dimoun dan son lepok  konsernan sa Deliz.—Zenez 6:13-16; 2 Pyer 2:5.

Pour sa bann dimoun kapab sirviv, zot ti bezwen ansanm avek sa group. Zot ti osi bezwen pare pour aksepte gidans ki Bondye ti’n donn Noe. Menm bann zannimo ki ti dan sa lars ti sirviv Deliz akoz zot ti’n asosye avek sa group. Noe ti ganny bann lenstriksyon presi pour fer laranzman apropriye pour prezerv lavi sa bann zannimo.—Zenez 6:17–7:8.

Plizyer syek plitar, bann desandans Noe, atraver son garson Sem, ti vin lesklav Lezip. Me Bondye ti deside liber zot e anmenn zot dan sa pei ki i ti promet zot zanset Abraam. Ankor enn fwa, i pa ti dir sa avek sak dimoun me premyerman i ti dir avek bann ki ti’n ganny swazir konman lider—Moiz ek son frer, Aaron. (Egzod 3:7-10; 4:27-31) Apre ki sa bann lesklav ti’n ganny libere Lezip konman en group, Bondye ti donn zot Son Lalwa kot montanny Sinai. Zot ti form nasyon Izrael.—Egzod 19:1-6.

Bann Izraelit ti ganny libere akoz zot ti asosye avek en group ki Bondye ti etabli e akoz zot ti swiv gidans bann lider ki ti ganny apwente dan sa group. Ti menm annan laranzman pour bann Ezipsyen ki ti anvi asosye avek sa group ki Bondye ti aprouve. Ler bann Izraelit ti kit Lezip, sa bann Ezipsyen ti al avek zot, alor zot ti kapab resevwar benediksyon Bondye.—Egzod 12:37, 38.

Plitar, dan premye syek, Zezi ti konmans son travay predikasyon. I ti rasanble bann dimoun ansanm konman son bann disip. I ti tret zot konman en group menm si i ti demontre en pli gran latansyon anver serten dimoun dapre zot bezwen. I ti dir avek sa 11 zapot fidel: “Zot bann ki’n reste fidel anver mwan dan tou mon difikilte ek soufrans. Parey mon Papa in donn mwan pouvwar pour gouvern son Rwayonm, mwan osi, mon donn zot menm pouvwar.” (Lik 22:28, 29) Plitar, bann disip ti resevwar lespri sen Bondye ler zot ti ansanm konman en group.—Akt 2:1-4.

Sa bann legzanp i montre klerman ki dan lepase Bondye ti toultan azir avek son pep konman en group organize. Sa ennde dimoun ki Bondye ti koz avek zot personnelman—Noe, Moiz, Zezi ek lezot, Bondye ti servi zot pour kominik avek en group. Napa okenn rezon pour krwar ki Bondye i azir diferaman avek son bann serviter ozordi. Byensir, sa i lev en lot kestyon: Eski asosye avek nenport larelizyon i sifi? Nou pou egzamin sa kestyon tre enportan dan lartik swivan.

[Portre lo paz 4]

Depi lontan Bondye in azir avek son pep konman en group organize