I Responsabilite tou Kretyen pour pran swen avek bann aze

“Mon pou reste touzour parey menm kan zot in vye e kan zot seve in vin blan, mon pou kontinyen siport zot.”—IZAI 46:4.

1, 2. Ki mannyer swen ki nou Papa dan lesyel i donn nou i diferan avek swen ki bann paran i donn zot zanfan?

BANN paran devoue i pran swen avek zot zanfan depi ki zot ankor pti baba ziska ki zot grandi. Menm kan bann zanfan i vin adilt e annan zot prop fanmiy, zot papa ek zot manman i kontinyen donn zot latansyon ek sipor.

² I vre ki imen pa arive fer tou pour zot zanfan. Me nou Papa dan lesyel i touzour kapab donn son bann serviter fidel latansyon ek sipor ranpli avek lanmour. Zeova ti pe adres son pep swazir dan letan lontan, kan i ti dir: “Mon pou reste touzour parey menm kan zot in vye e kan zot seve in vin blan, mon pou kontinyen siport zot.” (Izai 46:4) Pa sa i en parol rekonfortan pour bann Kretyen aze! Zeova pa abondann bann ki reste fidel avek li. Okontrer, i promet pour soutenir, siport, e gid zot diran zot lavi, menm dan zot vye zour.—Psonm 48:14.

3. Ki nou pou egzaminen dan sa lartik?

³ Ki mannyer nou kapab imit lentere ranpli avek lanmour ki Zeova i demontre anver  bann aze? (Efezyen 5:1, 2) Annou vwar bann fason ki bann zanfan, bann sirveyan dan kongregasyon, e sak Kretyen i kapab pran swen avek bann manm pli aze dan nou fanmiy Kretyen.

Nou Responsabilite konman Zanfan

4. Ki responsabilite bann zanfan Kretyen i annan anver zot paran?

⁴ “Respekte zot papa ek zot manman.” (Efezyen 6:2; Egzod 20:12) Zapot Pol ti sit sa parol senp me profon sorti dan Lekritir Ebre, pour rapel bann zanfan zot responsabilite anver zot paran. Me ki sa parol i annan pour fer avek pran swen avek bann aze? En legzanp ankourazan dan letan lontan pou ed nou reponn sa kestyon.

5. (a) Kwa ki endike ki Zozef pa ti’n oubliy son responsabilite anver son fanmiy? (b) Ki i enplike dan respekte nou paran, e ki bon legzanp Zozef in kite dan sa domenn?

⁵ Pour plis ki 20 an, Zozef ti napa okenn kontak avek son vye papa, patrias Zakob. Me i kler ki Zozef pa ti’n perdi son lanmour pour Zakob. Anfet, kan Zozef ti finalman dir son bann frer ki vreman i ete, i ti demande: “Eski mon papa i ankor vivan?” (Zenez 43:7, 27; 45:3) Sa letan, pei Kanaan ti dan en lafanmin sever. Alors, Zozef ti anvoy en mesaz pour son papa, an dizan: “Vin kot mwan. Pa tarde. Ou ava reste dan pei Gosenn e kontinyen reste obor mwan . . . Mon pou fourni ou manze laba.” (Zenez 45:9-11; 47:12) Wi, respekte bann paran aze i enkli protez zot e pran swen avek zot lo plan materyel kan zot pa dan en pozisyon pour fer li zot menm. (1 Samyel 22:1-4; Zan 19:25-27) Zozef ti aksepte sa responsabilite avek bokou lazwa.

6. Ki mannyer Zozef ti demontre son lanmour senser pour son papa, e ki mannyer nou kapab imit son legzanp?

⁶ Avek benediksyon Zeova, Zozef ti’n vin enn bann zonm pli ris Lezip, e i ti annan bokou pouvwar. (Zenez 41:40) Me i pa ti konsider son lekor tro enportan oubyen tro okipe pour respekte son papa ki ti annan 130 an. Letan i ti aprann ki Zakob (oubyen Izrael) ti pe aprose, “Zozef ti fer met pare son kales e i ti al zwenn Izrael son papa Gosenn. Ler i vwar li, i ti may li dan son likou e konmans plere. I ti pler en kantite.” (Zenez 46:28, 29) Sa kalite lakey pa ti zis en fason ki zot ti montre respe. Zozef ti vreman kontan son papa en kantite e i pa ti onte pour demontre son lanmour. Si nou paran i aze, eski nou osi nou montre zot bokou lafeksyon?

7. Akoz Zakob ti oule ganny antere Kanaan?

⁷ Sa latasman ki Zakob ti annan avek Zeova ti reste for ziska lafen son lavi. (Ebre 11:21) Vi ki i ti annan lafwa dan promes Bondye, Zakob ti demande ki son lekor i ganny antere an Kanaan. Zozef ti respekte son papa par fer sa ki i ti demande, kantmenm sa ti koute e demann zefor.—Zenez 47:29-31; 50:7-14.

8. (a) Ki rezon prensipal pour nou pran swen avek nou paran aze? (b) Ki en serviter aplentan ti fer pour pran swen avek son paran aze? (Vwar bwat lo paz 15.)

⁸ Kwa ki ti pous Zozef pour pran swen avek son papa? Lanmour ek sa santiman ki i dwa sa enn ki’n donn li lavi e ki’n pran swen  avek li ti serten fakter. Me san dout Zozef ti osi santi en gran dezir pour fer plezir Zeova. Nou osi nou devret santi parey. Pol ti ekrir: “Si en vev i annan zanfan oubyen pti zanfan, fodre ki sa bann zanfan i aprann met an pratik premyerman zot lafwa anver zot prop fanmir, e ensi, ranpli zot devwar anver zot paran ek gran paran. Se sa ki fer plezir Bondye.” (1 Timote 5:4) Anfet, lanmour pour Zeova ek lakrent avek respe profon pour li, pou pous nou pour pran swen avek nou paran aze, nenport ki difikilte ki sa i kapab enplike. *

Ki mannyer bann Ansyen i montre ki zot enterese

9. Lekel ki Zeova in apwente pour pran swen avek troupo, enkli bann Kretyen aze?

⁹ Ver lafen son lavi, Zakob ti refer avek Zeova konman “sa vre Bondye ki’n vey mwan toudilon mon lavi ziska prezan.” (Zenez 48:15) Ozordi, Zeova i pran swen avek son bann serviter lo later atraver bann sirveyan Kretyen, oubyen ansyen, anba direksyon son Garson, Zezi Kri, “sef Berze.” (1 Pyer 5:2-4) Ki mannyer bann ansyen i kapab imit Zeova dan lafason ki zot pran swen avek bann manm pli aze dan troupo?

10. Kwa ki’n ganny fer pour donn led bann Kretyen aze lo plan materyel? (Vwar bwat lo paz 17.)

¹⁰ En pe letan apre ki kongregasyon Kretyen ti’n formen, bann zapot ti apwent “7 zonm . . . ki annan bon repitasyon, ki ranpli avek Sent-Espri e ki annan bokou lasazes,” pour sirvey “distribisyon” manze parmi bann vev ki ti dan bezwen. (Akt 6:1-6) Plitar, Pol ti demann Timote pour met bann vev aze ki egzanpler lo lalis bann ki annan drwa ganny led materyel. (1 Timote 5:3, 9, 10) Pareyman, bann ansyen dan kongregasyon ozordi i pare pour organiz led pratik pour bann Kretyen aze kan i neseser. Parkont, pran swen avek bann aze pa enplik zis sa.

11. Ki Zezi ti dir lo sa pov vev ki ti ofer en pti kontribisyon?

¹¹ Ver lafen son minister lo later, Zezi ti pe asize kot tanp e “get lafoul met zot lofrann dan bwat laket.” En dimoun ti kapte son latansyon. Resi i dir: “En pov vev ti vini e li i ti met de pti sou.” Zezi ti kriy son bann disip e dir zot: “An verite, mon dir zot, sa pov vev in met plis ki tou sa bann ki’n met larzan dan bwat laket. Parski lezot in tir dan sa ki zot annan an plis pour donnen. Me li, dan son  lapovrete, i’n met tou sa ki i ti annan, i’n donn tou sa ki i ti annan pour li viv.” (Mark 12:41-44) An term larzan, kontribisyon sa vev ti pti gin. Me Zezi ti konnen ki kantite son Papa dan lesyel i apresye kan en dimoun i eksprim son lanmour dan sa fason avek tou son leker. Kantmenm sa vev ti aze, Zezi pa ti fer konmsi i pa’n vwar sa ki i ti’n fer.

12. Ki mannyer bann ansyen i kapab montre zot lapresyasyon pour kontribisyon ki bann Kretyen aze i fer?

¹² Parey Zezi, bann sirveyan Kretyen pa inyor sa ki bann aze i fer pour promot vre ladorasyon. Bann ansyen i annan plizyer rezon pour felisit bann aze. Zot kapab ganny felisite pour zot partisipasyon dan predikasyon e dan renyon, pour zot bon lenfliyans dan kongregasyon, e pour zot perseverans. En parol lankourazman ki senser i kapab fer bann aze “fyer” pour zot servis sakre. Koumsa zot a evite konpar zot avek sa ki lezot Kretyen pe fer oubyen avek sa ki zot zot ti kapab akonpli dan lepase, ki kapab dekourazan pour zot.—Galat 6:4.

13. Ki mannyer bann ansyen i kapab servi talan ek leksperyans bann aze?

¹³ Bann ansyen i kapab rekonnet kontribisyon presye ki bann Kretyen aze i fer par byen servi zot leksperyans ek talan. Bann aze ki egzanpler i kapab ganny servi detanzaot dan bann demonstrasyon oubyen entervyou. En ansyen i fer sa remark: “Bann dimoun dan lodyans i vreman donn latansyon e ekoute kan mon entervyou en frer oubyen ser aze ki’n elve son zanfan dan laverite.” Bann ansyen dan en lot kongregasyon i raporte ki en ser pionye aze 71 an in reisi ed bann proklanmater pour vin regilye dan predikasyon. I osi ankouraz zot pour fer bann keksoz “debaz,” parey lir Labib ek teks pour lazournen e apre reflesir lo sa ki zot lir.

14. Ki mannyer en konsey ansyen ti montre lapresyasyon pour en ansyen ki ti pli aze?

¹⁴ Bann ansyen i osi apresye kontribisyon ki lezot ansyen pli aze i fer. José, ki dan son 70 an e ki’n servi konman en ansyen pour bokou lannen, ti fer en gran loperasyon resaman. Vi ki i ti bezwen pran letan avan i reganny son lasante, i ti mazin pour aret servi  konman en sirveyan prezidan. José i dir: “Reaksyon lezot ansyen ti sirprann mwan. Olye aksepte mon sizesyon, zot ti demann mwan ki led pratik mon bezwen pour mwan desarz mon responsabilite.” Avek led en pli zenn ansyen, José ti kapab kontinyen servi konman en sirveyan prezidan avek lazwa, e sa in vin en benediksyon pour kongregasyon. En lot ansyen i dir: “Bann frer ek ser i apresye bokou travay ki José i fer konman en ansyen. Zot kontan li e annan respe pour li akoz son leksperyans ek legzanp lafwa. I anrisir nou kongregasyon.”

Pran Swen avek Kanmarad

15. Akoz tou Kretyen i bezwen enterese avek byennet bann aze parmi zot?

¹⁵ Pa zis bann zanfan ki annan paran aze ek bann ansyen ki devret santi zot konsernen avek bann aze. Pol ti pe konpar kongregasyon Kretyen avek en lekor imen, kan i ti ekrir: “Bondye in organiz lekor dan en tel fason ki i donn lenportans bann parti enferyer, koumsa napa divizyon dan lekor me bann parti lekor i ganny en swen egal enn a lot.” (1 Korentyen 12:24, 25) En lot versyon Labib i tradwir sa koumsa: “Sak parti [lekor i bezwen] fer byennet lezot vin zot konsern.” (Knox) Pour kongregasyon Kretyen fonksyonn dan larmoni, sak manm i bezwen konsernen avek byennet son bann konpanyon Kretyen, enkli bann aze.—Galat 6:2.

16. Ki mannyer nou kapab montre lentere dan bann aze kan nou asiste renyon?

¹⁶ Bann renyon Kretyen i donn nou en bon loportinite pour montre nou lentere dan bann aze. (Filipyen 2:4; Ebre 10:24, 25) Eski nou pran letan pour koz avek bann dimoun aze dan renyon? Menm si i apropriye pour demann zot konman sava lasante, eski pa i ti pou byen si nou “partaz avek zot bann kado spirityel,” petet en leksperyans ankourazan oubyen en panse dan Labib? Vi ki bann aze pa tro kapab mouvmante parey nou, i ti pou byen si nou al ver zot olye ekspekte zot vin kot nou. Si zot pa tann tro byen, petet nou bezwen evite koz vit e pronons byen nou bann mo. Deplis, si nou anvi “benefisye lankourazman” kanmarad, nou bezwen ekout atantivman sa ki sa dimoun aze i dir.—Romen 1:11, 12.

17. Ki mannyer nou kapab montre konsern pour bann Kretyen aze ki oblize reste dan lakaz?

¹⁷ Me si serten aze pa kapab asiste renyon? Zak 1:27 i montre ki i nou devwar pour “pran swen bann orflen ek bann vev dan zot  soufrans.” Sa verb Ebre ki’n ganny tradwi “pran swen” ti osi annan sa sans “pour vizit” lezot. (Akt 15:36) Pa bann aze i kontan ler nou vizit zot! Kan i ti anprizonnen an Ronm ver lannen 65 N.L., Pol ki ti “en vyeyar” sa letan, ti vwar li li tousel. I ti anvi vwar son konpanyon travay Timote e i ti ekrir: “Fer tou ou posib vin kot mwan pli vit.” (Filemon 9; 2 Timote 1:3, 4; 4:9) Kantmenm bann aze pa vreman bann prizonnyen, serten zot i oblize reste dan lakaz akoz problenm lasante. An realite serten zot i kapab pe dir, ‘Silvouple, fer ou mye pour vizit mwan osito posib.’ Eski nou pe reponn sa lapel?

18. Ki byenfe nou anmennen pour bann aze kan nou vizit zot?

¹⁸ Pa zanmen sou estim byenfe pour vizit en frer oubyen en ser aze. Kan en Kretyen ki apel Onezifor ti an Ronm, i ti rod Pol avek pasyans ziska ki i ti trouv li. Apre, i ti ‘souvan al rekonfort li.’ (2 Timote 1:16, 17) En ser aze i dir: “Mon kontan pas letan avek bann zenn. Sa ki fer mwan pli kontan ankor se ki zot tret mwan parey enn zot fanmiy. Sa i lev mon moral.” En lot Kretyen aze i dir: “Mon vreman apresye kan en dimoun i anvoy mwan en kart, telefonn mwan en pti kou, oubyen rann mwan en pti vizit. Sa i redonn mwan lafors.”

Zeova i rekonpans bann ki montre Lentere

19. Ki byenfe nou gannyen kan nou pran swen avek bann aze?

¹⁹ Pran swen avek bann aze i anmenn bokou benediksyon. Frekant bann dimoun aze e benefisye avek zot konnesans ek leksperyans i en privilez dan li menm. Bann ki pran swen avek bann aze i santi bokou lazwa akoz zot pe donnen. Zot osi santi satisfaksyon ek en lape lespri akoz zot pe desarz zot responsabilite biblik. (Akt 20:35) Deplis, bann ki pran swen avek bann aze pa bezwen per ki demen zot a ganny abandonnen dan zot vye zour. Parol Bondye i asir nou: “En dimoun zenere pou prospere, e sa enn ki pe aroz lezot bokou, li osi i pou ganny aroze bokou.”—Proverb 11:25.

20, 21. Ki mannyer Zeova i vwar bann ki pran swen avek bann aze, e ki nou devret determinen pour fer?

²⁰ Zeova i rekonpans bann zanfan ki annan lakrent pour li, bann ansyen, ek lezot Kretyen ki pare pour pran swen avek bann aze. En tel leta lespri i an akor avek sa proverb: “Sa ki rann faver bann dernyen dimoun pe pret Zeova, e I pou rekonpans li pour son bon aksyon.” (Proverb 19:17) Si lanmour i pous nou pour rann faver bann dernyen dimoun ek bann pov, Bondye i konsider sa konman en lòn ki i pou repeye par son benediksyon. I osi repey nou akoz swen ki nou donn nou bann frer ek ser aze, dan ki bokou parmi i ‘pov dan lemonn me ris dan lafwa.’—Zak 2:5.

²¹ Pa Bondye i donn nou bokou an retour! Sa i enkli lavi eternel. Pour laplipar serviter Zeova, zot pou viv pour touzour lo later, kot lefe pese pou’n ganny retire e bann aze ki fidel pou reganny zot lafors ki zot ti annan letan zot ti zenn. (Revelasyon 21:3-5) Anmezir ki nou esper sa letan, annou kontinyen akonpli nou responsabilite pour pran swen avek bann aze.

[Not anba lo paz]

Ki ou pou reponn?

• Ki mannyer bann zanfan i kapab respekte zot paran aze?

• Konman bann ansyen i montre lapresyasyon pour bann manm troupo ki pli aze?

• Ki sak Kretyen i kapab fer pour montre lentere senser dan bann aze?

• Ki benediksyon nou gannyen kan nou pran swen avek bann Kretyen aze?

[Kestyon]

[Bwat lo paz 15]

Kan son Paran ti bezwen Led

Philip ti pe servi konman en volonter dan travay konstriksyon Liberia an 1999, kan i ti aprann ki son papa ti byen malad. I ti konvenki ki son manman pa ti pou kapab fer fas avek sa sitiasyon li tousel. Alors i ti deside pour retourn seli pour organiz swen medikal pour son papa.

Philip i rapel: “I pa ti fasil pour mwan retournen me mon ti santi ki mon premye lobligasyon i anver mon paran.” Diran sa trwa lannen ki ti swiv, i ti trouv en lakaz pli konvenab pour son paran. Avek led bann konpanyon Kretyen laba, i ti aranz en pe sa landrwa pour adapte avek bezwen son papa.

Aprezan, manman Philip i pli byen ekipe pour fer fas avek problenm lasante son papa. Resaman, Philip ti kapab aksepte lenvitasyon pour travay konman en volonter kot biro brans Temwen Zeova an Masedwann.

[Bawat lo paz 17]

Zot pa’n inyor son Bezwen

Ada i en Kretyen aze 85 an ki viv an Ostrali. Move lasante ti obliz li reste se li. Alors, bann ansyen dan son kongregasyon ti fer laranzman pour asiste li. Zot ti organiz en group frer ek ser pour ed li. Sa bann frer ek ser ti kontan pour fer bann pti louvraz pour li, parey netwaye, lave, kwi manze, e fer konmisyon.

Sa progranm led ti konmanse preski 10 an pase. Ziska prezan, plis ki 30 frer ek ser in ede pour pran swen avek Ada. Zot pe kontinyen vizit li, lir bann piblikasyon baze lo Labib avek li, enform li konsernan progre spirityel bann dan kongregasyon, e priy avek li regilyerman.

En ansyen dan son kongregasyon ti dir: “Bann ki pran swen avek Ada i vwar li en privilez pour ed li. Bokou zot in ganny motive par son servis fidel dan lepase, e zot pa kapab zis inyor son bezwen.”

[Portre lo paz 14]

Eski nou zenere dan lafason ki nou eksprim nou lafeksyon pour nou paran aze?

[Portre lo paz 16]

Kongregasyon antye i kapab demontre zot lanmour pour bann konpanyon Kretyen ki aze