Ki Larelizyon ou devret swazir?

‘DIFERAN larelizyon i senpleman diferan semen ki anmenn ver menm destinasyon. Apre tou, pa i annan zis en Bondye?’ Bokou dimoun i santi koumsa. Zot krwar ki asosye avek en larelizyon i enportan, me selman zot pa krwar i vreman enportan ki larelizyon en dimoun i swazir pour swiv.

Sa largiman i kapab paret rezonnab okonmansman, akoz i vre ki i annan zis en Bondye, Tou Pwisan. (Izai 44:6; Zan 17:3; 1 Korentyen 8:5, 6) Me nou pa kapab inyor bann diferans oubyen menm bann kontradiksyon ki egziste parmi bokou larelizyon ki pretann pe servi sa vre Bondye. Zot vreman diferan dan zot bann pratik, zot krwayans, zot lansennyman, e osi dan sa ki zot ekspekte dan zot larelizyon. I sitan annan en gran diferans ki bann dimoun dan en larelizyon ouswa dan en group i trouv li difisil pour konpran ouswa aksepte sa ki lezot i ansennyen oubyen krwar.

De lot kote, Zezi ti dir: “Bondye i Lespri e tou sa ki ador li, i devre ador li an-espri e an verite.” (Zan 4:24) Eski ador Bondye an verite i permet egziste en kantite lide kontradiktwar lo lekel Bondye, ki son bann plan, e konman i anvi ganny adore? Eski i fer sans pour krwar ki i pa enportan pour Bondye Tou Pwisan konman nou ador li?

Vre Kretyen dan premye syek e konmela

Parfwa, bann Kretyen dan premye syek ti annan diferan lopinyon lo serten keksoz. Par egzanp, ler i ti pe koz avek bann Kretyen an Korent, zapot Pol ti dir: “Mon bann frer, mon’n aprann par bann dimoun Kloe, ki i annan diskord parmi zot. Sa ki mon oule dir, se ki sakenn i dir keksoz diferan. En bann i dir: ‘Mwan, mon pour Pol’, en lot, ‘Mwan, mon pour Apolos’, oubyen ‘Mwan, mon pour Pyer’, oubyen ‘Mwan, mon pour Kris.’ ”—1 Korentyen 1:11, 12.

Eski Pol ti vwar sa bann diferans pa tro enportan? Eski sak dimoun ti pe swiv son prop semen pour ganny sove? Non! Pol ti konsey zot: “Bann frer, mon demann zot par Zezi-Kris nou Senyer: Met zot byen dakor ansanm e ki okenn divizyon pa egziste parmi zot. Reste byen ini ansanm dan en menm lespri e en menm lopinyon.”—1 Korentyen 1:10.

Byensir, annan menm lopinyon ouswa krwayans i pa en keksoz ki ariv par-d-fors. Sa i arive selman ler sak dimoun i byen egzamin serten keksoz e zot aksepte e tonm lo  menm konklizyon. Alor, en letid lo Parol Bondye ek en dezir senser pour aplik sa ki ou pe aprann i bann pa enportan pour trouv sa kalite linite ki Pol ti koz lo la. Eski nou kapab trouv sa kalite linite? Parey nou’n vwar dan premye lartik, depi lontan Bondye in azir avek son pep konman en group. Eski i posib pour idantifye sa group ozordi?

Byenfe pour asosye avek sa bon Group

En fwa, psalmis David ti demande: “O Zeova, lekel ki pou vin en envite dan ou latant? Lekel ki pou reste dan ou montanny sen?” Sirman sa i en kestyon ki fer reflesir. David ti reponn: “Sa ki napa okenn repros kont li e ki pe fer sa ki drwat, e ki pe koz laverite dan son leker.” (Psonm 15:1, 2) En konnesans egzakt lo Labib pou ed en dimoun idantifye sa larelizyon ki pe fer bann keksoz ki Bondye i ekspekte. Apre, ler i asosye avek sa group, i pou ganny sa bon lasosyasyon avek bann dimoun ki ador Bondye dan linite e “an-espri e an verite.”

Temwen Zeova in demontre ki menm si dan sa lemonn ozordi napa linite, i posib pour partaz menm krwayans e viv dan linite. Parmi zot i annan bokou dimoun ki ti dan lezot larelizyon avan e sorti dan diferan group etnik. Lezot Temwen ti bann dimoun ki pa ti asire si i annan en Bondye ouswa ki pa ti krwar dan li avan sa. I annan lezot ankor ki pa ti fatig zot ditou avek larelizyon. Ozordi sa bann dimoun ki’n sorti dan tou sort kalite larelizyon, kiltir, ek krwayans pe rezwir en linite relizye ki nou pa kapab trouve okenn lezot landrwa dan sa lemonn.

Baz pour en tel linite i Parol Bondye, Labib. Byensir, bann Temwen Zeova i realize ki zot pa kapab konmann lezot ki pour fer. Me zot apresye sa privilez pour ankouraz dimoun pour konn Labib pour zot fer zot swa konsernan larelizyon baze lo sa fondasyon solid. Dan sa fason, bokou plis dimoun i kapab rezwir bann byenfe ki vin atraver ador Bondye “an-espri e an verite.”

Ozordi, i pli fasil pour vin viktim bann move lenfliyans e ganny atire pour fer sa ki mal. I tre enportan pour swazir sa bon kalite lasosyasyon. Labib i dir ki “sa ki mars avek bann dimoun saz pou vin saz” e “move frekantasyon i gat repitasyon.” (Proverb 13:20; 1 Korentyen 15:33) I en proteksyon ler nou asosye avek bann vre adorater Bondye. Se pour sa rezon Labib i rapel nou: “Annou rode konman pous kanmarad pour annan lanmour e fer sa ki byen. Pa abandonn zot lasanble parey labitid serten parmi zot, me ankouraz kanmarad sirtou ki la sa Zour Senyer pe aprose.” (Ebre 10:24, 25) Pa i en benediksyon ler bann vre zanmi, bann frer ek ser spirityel, i ed kanmarad avek lanmour pour akonpli zot bann responsabilite devan Bondye!

Legzanp Ottmar i montre ki sa i vre. I ti ganny elve dan en fanmiy Katolik, Lalmanny, e i ti aret al legliz. I eksplike: “Alafen sak lanmes ki mon ti asiste, mon ti santi mwan vid san okenn bi zis parey ler mon ti antre.” Kantmenm sa, i pa ti perdi son lafwa dan Bondye. Apre sa, i ti rankontre Temwen Zeova e i ti konvenki ki zot bann vre serviter Bondye. I ti vwar sa nesesite pour asosye avek zot. Aprezan i dir: “Mon aktif dan en lorganizasyon mondyal, e mon lespri ek leker i anpe. Ptit-a-pti mon pe ganny led pour annan en pli bon konnesans lo Labib. Sa i en keksoz vreman presye pour mwan.”

En Lenvitasyon pour bann ki pe rode

En group dimoun ki travay ansanm e tonm dakor avek kanmarad i kapab akonpli en pli bon travay ki bann dimoun ki travay sakenn pour li. Par egzanp, ler Zezi ti pe kit son bann disip, i ti dir zot: “Ale e fer tou pep vin mon bann disip. Batiz zot o non di-Per, di-Fis e di-Sent-Espri. Ansenny zot pour obei tou sa ki mon’n konmande.” (Matye  28:19, 20) Konman ki en travay koumsa i kapab ganny byen akonpli si ti napa okenn gidans ouswa okenn lorganizasyon? Ki mannyer en dimoun pou kapab obeir sa konmann dan Labib si i sey servi Bondye li tousel?

Lannen pase, Temwen Zeova atraver lemonn in distribye 91,933,280 liv ek brosir, e 697,603,247 magazin baze lo Labib. Zot ti koz avek plizyer milyon dimoun dan 235 pei lo mesaz sorti dan Parol Bondye. Sa i en levidans remarkab ki ler en group i ini e byen organize, i kapab akonpli bokou plis ki ler en dimoun i li tousel.

Apard ki distribye bann piblikasyon baze lo Labib, Temwen Zeova i fer bann letid Labib gratwit pour ed dimoun byen konpran sa ki Bondye i ekspekte nou fer. Lannen pase, en mwayen 5,726,509 letid Labib ti ganny fer sak semenn avek enn ouswa plizyer dimoun. Sa lansennyman sorti dan Labib in ed plizyer milyon dimoun ganny en baz solid pour zot kapab fer zot swa konsernan ladorasyon. Ou ganny envite pour aprann dan Labib sa ki Bondye i ekspekte nou fer. Apre ou kapab fer ou swa.—Efezyen 4:13; Filipyen 1:9; 1 Timote 6:20; 2 Pyer 3:18.

Si ou anvi fer plezir Bondye, i tre enportan pour asosye avek en larelizyon. Me pa avek nenport ki larelizyon ouswa lorganizasyon. Ou bezwen swazir sa larelizyon baze lo konnesans egzakt Labib, pa lo bann krwayans ki napa fondman ouswa lo sa ki ou tann en lot dimoun dir. (Proverb 16:25) Aprann ki sa vre larelizyon i devret pe fer. Konpar zot avek ou prop krwayans. Apre swazir dapre sa ki ou’n aprann.—Deterononm 30:19.

[Portre lo paz 7]

Temwen Zeova i ini dan en lemonn ki napa linite