Eski Bondye i responsab pour nou Problenm?

LER gran fiy Marion ti soufer avek en problenm grav avek son laservel, Marion ti fer sa ki bokou nou ti pou fer.  * I ti priy Bondye pour led. Marion i dir: “Mon pa rapel en lot moman kot mon ti santi mwan sitan dezespere e tousel koumsa.” Plitar, kondisyon son fiy ti deteryore, e Marion ti konmans kestyonn Bondye. I ti demande: “Akoz sa pe arive?” I pa ti kapab konpran ki mannyer en Bondye ki annan lanmour e ki enterese avek imen i kapab abandonn li.

I annan bokou dimoun ki’n pas dan menm sitasyon avek Marion. Partou dan lemonn, en kantite dimoun in santi ki Bondye in abandonn zot dan bann moman difisil. Apre ki son pti zanfan ti ganny touye, Lisa i dir: “Mon ankor pe rode e pe demann mon lekor sa kestyon ‘akoz Bondye’ i permet keksoz mal arive. Mon pa’n perdi konpletman mon lafwa dan Bondye, me i’n nepli parey avan.” Pareyman, apre en trazedi ki ti pran lavi son pti garson, en madanm ti dir: “Mon pa ti santi okenn konsolasyon sorti kot Bondye ler sa ti arive. I pa’n montre mwan ditou ki i enterese oubyen konpran mwan.” I ti azoute: “ Mon pa pou zanmen pardonn Bondye.”

Lezot dimoun i ankoler avek Bondye ler zot get sa ki pe pase dan lemonn. Zot vwar bann pei ravaze par lanmizer ek lafanmin, bann refizye lager san en lespwar, plizyer milyon zanfan ki vin bann orfelen akoz sida, e plizyer milyon dimoun soufer avek lezot maladi. Ler zot vwar tousala ek lezot dezas parey arive, bokou dimoun i blanm Bondye akoz i paret i pa pe fer nanryen pour sanz sa sitiasyon.

Me an realite, pa Bondye ki devret ganny blanmen pour sa bann problenm ki pe ravaz limanite. Annefe, i annan bann rezon solid pour krwar ki byento Bondye pou sanz nou sitiasyon ki nou ladan ozordi. Nou envit ou pour lir sa lartik swivan e ou pou vwar ki Bondye i vreman enterese avek nou.

[Not anba lo paz]