Devlop Pwennvi Kris lo sa ki fer en Dimoun vin enportan

“Si enn parmi zot i oule vin enportan i bezwen vin zot serviter.”—MATYE 20:26.

1. Ki pwennvi lemonn lo sa ki fer en dimoun vin enportan?

OBOR ansyen lavil Ezipsyen ki ti apel Thebes (ozordi apele Karnak), apepre 500 kilomet sid avek Cairo, i annan en stati Faraon Amenhotep 3 ki mezir 18 met oter. Ler en dimoun i konpar li avek sa manman stati, i santi li pti pti. Zot ti sirman fer sa moniman pour fer dimoun devlop ladmirasyon pour sa dirizan. Sa i montre pwennvi ki lemonn i annan lo sa ki fer en dimoun vin enportan. Pour lemonn vin en dimoun enportan i vedir fer ou lekor paret pli gran e pli enportan posib e osi fer lezot santi zot konman en nanryen ditou.

2. Ki legzanp Zezi ti kite pour son bann disip, e ki kestyon nou bezwen demann nou lekor?

² Aprezan konpar sa pwennvi avek sa enn ki Zezi Kri ti ansennyen. Menm si i ti “Senyer” ek “Met” son bann disip, Zezi ti ansenny zot ki en dimoun i vin enportan par servi lezot. Dernyen zour son lavi lo later, Zezi ti demontre ki i ti oule dir par sa ki i ti ansennyen letan i ti lav lipye son bann disip. Sa i sirman en zes ranpli avek limilite! (Zan 13:4, 5, 14) Kwa ki atir ou plis—servi lezot oubyen ganny servi? Eski legzanp Kris i kree dan ou en dezir pour abes ou devan lezot zis parey li i ti fer? Alors, annou egzamin pwennvi Kris lo sa ki fer en dimoun vin enportan konpare avek pwennvi popiler dan lemonn.

 Evit Pwennvi Lemonn konsernan vin en Dimoun enportan

3. Mansyonn bann legzanp dan Labib ki montre sa ki arive avek bann ki anvi laglwar sorti kot zonm.

³ Dan Labib i annan plizyer legzanp ki montre problenm ki arive ler en dimoun i oule vin enportan dapre standar lemonn. Mazin sa zonm pwisan apele Amann, ki ti en dimoun distenge dan lakour pale bann Pers pandan letan Ester ek Mordekai. Amann ti ganny imilye e osi trouv son lanmor akoz i ti oule ki lezot i onor li. (Ester 3:5; 6:10-12; 7:9, 10) Ki nou pou dir lo Neboukadnetsar arogan, ki ti vin fou letan i ti’n vin en gran lerwa? Son parol i montre ki i ti annan en move pwennvi lo sa ki fer en dimoun enportan. I ti dir: “Eski sa pa Gran Babilonn, ki mwan menm mon’n konstri pour lakour rwayal avek lafors mon pouvwar e pour loner mon grander?” (Danyel 4:30) Ti osi annan Erod Agripa 1, ki ti aksepte laglwar ki i pa ti merite olye donn Bondye laglwar. “Lever ti manz li e i ti mor.” (Akt 12:21-23) Tou sa bann zonm ti perdi zot pouvwar akoz zot pa ti arive apresye pwennvi Bondye konsernan sa ki fer en dimoun vin enportan.

4. Lekel ki par deryer sa leta lespri pour vin fyer ki egziste dan lemonn?

⁴ I normal pour nou anvi servi nou lavi dan en fason ki fer nou ganny loner ek respe. Me Satan i eksplwat sa dezir par ankouraz nou pour vin fyer e vantar. Sa latitid i reflekte lanbisyon Satan. (Matye 4:8, 9) Pa zanmen bliye ki i ‘bondye sa syek’ e i determinen pour promot son fason panse isi lo later. (2 Korentyen 4:4; Efezyen 2:2; Revelasyon 12:9) Bann Kretyen i evit pwennvi lemonn konsernan vin en dimoun enportan, akoz nou konnen lekel ki par deryer sa bann kalite panse.

5. Eski lakonplisman, popilarite, ek larises i garanti satisfaksyon dirab? Eksplike.

⁵ Definitivman ou pou annan en lavi ere si ou vin en gran dimoun dan lemonn, si lezot i onor ou, e si ou annan en ta larzan. Sa i pwennvi ki Satan i promote. Me eski sa i vre? Eski lakonplisman, popilarite, ek larises i garanti en lavi ranpli avek satisfaksyon? Labib i averti nou pour pa les nou ganny anbete par sa kalite rezonnman. Salomon ki ti en Lerwa saz ti ekrir: “Mon’n vwar tou travay dir e tou skil dan travay, sa i fer konpetisyon antre kanmarad. Sa osi i anven e tay deryer divan.” (Eklezyast 4:4) Bokou dimoun ki’n dedye tou zot lavi pour vin ris oubyen enportan dan lemonn i kapab konfirmen ki sa konsey enspire dan Labib i vre. En legzanp sa, i en zonm ki ti ede fer plan, konstri e teste sa veso spasyal ki ti anmenn zonm lo lalin. I ti reflesir: “Mon ti travay dir e mon ti vin byen kalipa dan sa ki mon ti fer. Me tousala pa’n kapab donn mwan lape lespri e en boner dirab dan lavi.” * Pwennvi lemonn konsernan sa ki fer en dimoun enportan ki swa dan domenn biznes, sport, oubyen divertisman, pa garanti satisfaksyon dirab.

 En Servis motive par Lanmour i fer nou enportan

6. Kwa ki montre ki Zak ek Zan ti annan en move pwennvi lo vin enportan?

⁶ En levennman dan lavi Zezi i montre sa ki vreman fer en dimoun enportan. Zezi ek son bann disip ti lo semen pour al Zerizalenm pour Lapak lannen 33 N.L. Dan semen, Zak ek Zan, de kouzen Zezi, ti montre ki zot annan en move pwennvi konsernan vin enportan. Atraver zot manman, zot ti fer sa demann avek Zezi: “Ordonn ki mon de garson ava asiz enn lo ou kote drwat e lot lo ou kote gos dan ou rwayonm.” (Matye 20:21) Pour bann Zwif, asiz lo kote drwat oubyen kote gos en serten dimoun ti en gran loner. (1 Lerwa 2:19) Akoz lanbisyon, Zak ek Zan ti esey fer tou pour ganny pli o pozisyon. Zot ti oule fer sir ki zot ganny sa bann pozisyon ki pou donn zot lotorite. Zezi ti konnen ki ti pe pase dan zot lespri e i ti sezi sa loportinite pour koriz zot move pwennvi konsernan sa ki fer en dimoun vin enportan.

7. Ki mannyer Zezi ti dekrir fason pour en Kretyen vin vreman enportan?

⁷ Zezi ti konnen ki dan sa lemonn kot lorgey i dominen, sa enn ki ganny vwar konman pli enportan i sa enn ki kontrol e donn lord lezot e ki par fer zis en pti zes tou son demann i kapab ganny akonpli. Me parmi bann disip Zezi, servi lezot avek limilite i sa standar pour determinen si en dimoun i enportan. Zezi ti dir: “Si enn parmi zot i oule vin enportan i bezwen vin zot serviter. E sa ki oule vin premye parmi zot i bezwen vin lesklav zot tou.”—Matye 20:26, 27.

8. Ki savedir vin en serviter, e ki kestyon nou kapab demann nou lekor?

⁸ Sa mo Grek ki ganny tradwir “serviter” dan Labib i refer avek en dimoun ki esey fer tou zefor posib pour servi lentere lezot. Zezi ti pe ansenny son bann disip en leson enportan: Donn lord dimoun pour fer keksoz pa fer en dimoun vin enportan; me servi lezot avek lanmour i fer en dimoun vin enportan. Demann ou lekor: ‘Si mon ti Zak oubyen Zan, ki mannyer mon ti pou’n reazir? Eski mon ti pou’n sezi sa pwen ki servi lezot avek lanmour i sanmenm ki fer en dimoun vin vreman enportan?’—1 Korentyen 13:3.

9. Ki legzanp Zezi in kite par lafason i ti azir avek lezot?

⁹ Zezi ti montre son bann disip ki standar  lemonn konsernan sa ki fer en dimoun vin enportan i pa sa standar ki li in demontre. Zezi pa ti zanmen annan en latitid siperyer anver bann ki i ti servi oubyen fer zot santi zot enferyer. Tou sort kalite dimoun—zonm, fanm, ek zanfan, dimoun ris, pov, bann gran zans, osi byen ki bann gran peser—ti santi zot alez avek li. (Mark 10:13-16; Lik 7:37-50) Souvannfwa, dimoun i vin enpasyan avek lezot ki annan mwens abilite ki zot. Zezi ti diferan. Menm si parler son bann disip ti azir san reflesir e ti kontan argimante, avek pasyans i ti ansenny zot. I ti montre zot ki i ti vreman annan limilite e ki i ti en dimoun dous.—Zekarya 9:9; Matye 11:29; Lik 22:24-27.

10. Ki mannyer lavi antye Zezi i montre ki i ti donn tou pour servi lezot?

¹⁰ Sa lentere pour lezot ki Garson Bondye in kite i montre sa ki vreman fer en dimoun vin enportan. Zezi pa ti vin lo later pour esper lezot servi li me i ti vin pour servi lezot, geri “diferan kalite maladi” e liber dimoun anba kontrol demon. Menm si i ti fatige e bezwen letan pour repoze, Zezi ti toultan met bezwen lezot avan pour li. I ti donn tou pour rekonfort zot. (Mark 1:32-34; 6:30-34; Zan 11:11, 17, 33) Son lanmour ti pous li pour ed dimoun spirityelman, vwayaz plizyer santenn kilomet lo bann semen ranpli avek lapousyer pour pres sa bon nouvel Rwayonm. (Mark 1:38, 39) Sirman, Zezi ti vwar servi lezot konman en keksoz tre enportan.

Imit Limilite Kris

11. Ki bann kalite bann frer ki ganny apwente pour servi konman ansyen dan kongregasyon i devret demontre?

¹¹ Tar dan bann lannen 1800, sa bon latitid ki bann sirveyan Kretyen i devret devlope ti ganny aksantye ler bann zonm ti pe ganny swazir pour vin bann reprezantan pour vizit e pour servi bezwen pep Bondye. Dapre Zion’s Watch Tower le 1 Septanm, 1894, zot ti rod bann zonm ki ti annan “limilite—pour ki zot pa vin vantar . . . , ki abes zot pour ki zot pa pres lo zot menm, me lo Kris—pa pour eksprim zot prop konnesans, me son Parol dan tou son senplisite ek pwisans.” I tre kler ki bann vre Kretyen pa devret rod responsabilite zis pour satisfer en lanbisyon personnel oubyen pour ganny popilarite, pouvwar, ek kontrol lo lezot. En sirveyan ki annan limilite i gard antet ki son bann responsabilite i form parti “en fonksyon nob,” me pa en pozisyon enportan pour anmenn laglwar lo li menm. (1 Timote 3:1, 2) Tou ansyen ek asistan ministeryel i devret fer tou zot zefor pour servi lezot avek limilite, pour partisip dan servis sakre e donn en bon legzanp pour lezot imite.—1 Korentyen 9:19; Galat 5:13; 2 Timote 4:5.

12. Ki kestyon bann ki pe aspir pour privilez dan kongregasyon i kapab demann zot lekor?

¹² Okenn frer ki pe fer zefor pour ganny privilez  i bezwen demann son lekor: ‘Eski mon rod loportinite pour servi lezot, oubyen mon tant pour anvi lezot servi mwan? Eski mon pare pour fer bann travay itil ki lezot pa fasilman remarke?’ Par egzanp, en zennonm i kapab pare pour donn diskour dan kongregasyon me i kapab ezite pour ed bann aze. Petet i apresye lasosyasyon bann frer ki annan responsabilite dan kongregasyon, me ezite pour partisip dan travay predikasyon. I ti ava byen pour en tel zennonm demann son lekor: ‘Eski mon konsantre plis lo bann laspe servis Bondye ki fer mwan ganny rekonnet e onore? Eski mon pe esey fer tou zefor pour briye devan lezot?’ Si nou pe rod laglwar pour nou menm, alor nou pa pe imit legzanp Zezi.—Zan 5:41.

13. (a) Ki mannyer legzanp limilite en sirveyan i kapab fer lefe lo lezot? (b) Akoz nou kapab dir ki limilite i pa en swa pour en Kretyen?

¹³ Ler nou travay dir pour imit limilite Kris, sa i pous nou pour servi lezot. Konsider legzanp en sirveyan ki vizit bann Betel dan lemonn ki ti pe enspekte travay enn bann biro brans Temwen Zeova. Menm si i ti annan en progranm byen sarze e en gro responsabilite lo li, sa sirveyan ti arete pour ed en zenn frer ki ti pe lager pour aziste en masin. Sa frer ti rakonte: “Mon pa ti oule krwar! I ti dir mwan ki i ti travay lo sa menm masin ler i ti en zennonm dan Betel, e i rapel ki mannyer i ti difisil pour aziste byen sa masin. I ti pas en bon pti pe letan pour travay avek mwan lo sa masin menm si i ti annan sitan bokou lezot keksoz enportan pour fer. Sa ti vreman enpresyonn mwan.” Sa zenn frer, ki aprezan en sirveyan dan enn bann biro brans Temwen Zeova, i ankor rapel sa limilite ki sa frer ti demontre. Fotespere ki nou pa zanmen santi ki nou tro gran pour fer bann senp keksoz oubyen tro enportan pour fer bann pti louvraz. Okontrer, nou devret annan “limilite.” Sa i pa en swa ki nou annan. I form parti sa ‘nouvo personnalite’ ki en Kretyen i devret devlope.—Filipyen 2:3; Kolosyen 3:10, 12; Romen 12:16.

Ki mannyer devlop Pwennvi Kris lo vin enportan

14. Ki mannyer reflesir lo nou relasyon avek Bondye e avek nou prosen i ed nou devlop sa bon pwennvi lo vin en dimoun enportan?

¹⁴ Ki mannyer nou kapab ganny sa bon pwennvi konsernan sa ki fer en dimoun vin enportan. Reflesir lo nou relasyon avek Zeova i en fason. Son grander, pwisans, ek lasazes i met li bokou pli o ki bann senp imen. (Izai 40:22) Reflesir lo nou relasyon avek nou prosen i osi ed nou devlop limilite. Par egzanp, nou kapab pli bon ki lezot dan serten domenn, me zot kapab pli meyer ki nou dan bann laspe lavi ki bokou pli enportan. Oubyen nou frer Kretyen i kapab annan serten kalite ki nou napa. Annefe, bokou dimoun ki presye dan lizye Bondye pa kontan koz lo zot lekor akoz zot abes zot e zot annan limilite.—Proverb 3:34; Zak 4:6.

15. Ki mannyer fidelite pep Bondye i montre ki napa personn ki annan rezon pour santi li pli siperyer ki lezot?

¹⁵ Leksperyans bann Temwen Zeova anba leprev akoz zot lafwa i byen demontre sa pwen. Plizyer fwa se sa bann ki lemonn i konsider konman bann dernyen dimoun ki’n reste fidel avek Bondye dan bann gro leprev. Reflesir lo sa bann legzanp i kapab ed nou  kontinyen abes nou lekor e i ansenny nou pour ‘pa bezwen ganny en tro gran lopinyon lo nou menm.’—Romen 12:3. *

16. Ki mannyer tou dimoun dan kongregasyon i kapab vin en dimoun enportan par imit legzanp ki Zezi in kite?

¹⁶ Tou Kretyen, zenn konman vye, i devret fer zefor pour devlop pwennvi Kris lo sa ki fer en dimoun enportan. Dan kongregasyon, i annan plizyer kalite louvraz ki bezwen ganny fer. Pa zanmen mekontan si ou ganny demande pour fer en louvraz ki paret pa enportan. (1 Samyel 25:41; 2 Lerwa 3:11) Paran, eski ou ankouraz ou zanfan ek adolesan pour fer nenport louvraz ki zot gannyen avek lazwa, ki swa kot Lasal Rwayonm oubyen kot landrwa lasanble? Eski zot vwar ou fer bann dernyen louvraz? En frer ki aprezan pe servi kot biro prensipal Temwen Zeova i rapel byen legzanp son paran. I ti dir: “Lafason ki zot ti vwar netwayaz Lasal Rwayonm oubyen landrwa lasanble ti en lendikasyon ki zot ti konsider li enportan. Zot ti souvan volonter pour fer nenport keksoz ki ti benefisye kongregasyon oubyen bann frer ek ser. Sa latitid in ed mwan pour aksepte volonterman okenn travay isi dan Betel.”

17. Dan ki fason bann madanm ki annan limilite i kapab vin en benediksyon pour kongregasyon?

¹⁷ Konsernan met lentere lezot avan sa ki pour nou, Ester, ki ti vin larenn Lanpir Pers dan senkyenm syek A.N.L. i donn nou en legzanp ekselan. Menm si i ti pe viv dan en pale, Ester ti pare pour met son prop lavi an danze pour lentere pep Bondye, par azir an armoni avek lavolonte Bondye. (Ester 1:5, 6; 4:14-16) Dan nenport sitiasyon ekonomik ki zot ladan, bann madanm Kretyen ozordi i kapab montre en leta lespri parey pour Ester par ankouraz bann ki dekouraze, vizit bann malad, partisip dan predikasyon, e korpere avek bann ansyen. Vreman sa bann ser ki annan limilite i en benediksyon pour kongregasyon!

Benediksyon ler nou annan menm Pwennvi avek Kris

18. Ki byenfe nou gannyen ler nou annan menm pwennvi avek Kris konsernan vin enportan?

¹⁸ Ou pou ganny bokou benediksyon ler ou gard pwennvi Kris lo sa ki fer en dimoun enportan. Servi lezot i anmenn lazwa pour sa bann dimoun e pour ou. (Akt 20:35) Anmezir ki ou volonter e travay dir dan lentere ou bann frer, zot pou kontan ou plis. (Akt 20:37) Pli enportan, Zeova i vwar sa ki ou fer pour promot byennet lezot konpanyon Kretyen konman en sakrifis louanz ki fer li plezir.—Filipyen 2:17.

19. Ki nou devret determinen pour fer konsernan pwennvi Kris lo vin enportan?

¹⁹ Nou tou nou bezwen egzamin nou prop leker e demande: ‘Eski mon pou zis koz konsernan devlop pwennvi Kris lo vin enportan, oubyen eski mon pou fer bokou zefor pour met li an pratik?’ Santiman Zeova anver bann ki vantar i kler. (Proverb 16:5; 1 Pyer 5:5) Fotespere ki nou aksyon i montre ki i en plezir pour nou demontre menm pwennvi avek Kris lo vin enportan. Sa nou fer ki swa dan kongregasyon, dan nou lavi fanmiy, oubyen dan lafason ki nou azir avek lezot dimoun toulezour. Koumsa nou montre ki nou fer tou keksoz pour laglwar ek loner Bondye.—1 Korentyen 10:31.

[Not anba lo paz]

Eski ou kapab eksplike?

• Akoz nou devret evit pwennvi lemonn lo sa ki fer en dimoun enportan?

• Dapre Zezi kwa ki fer en dimoun enportan?

• Ki mannyer bann sirveyan i kapab imit limilite Kris?

• Kwa ki kapab ed nou devlop pwennvi Kris lo vin enportan?

[Kestyon]

[Bwat lo paz 27]

Lekel ki annan menm pwennvi avek Kris lo vin enportan?

Sa enn ki anvi lezot i servi li oubyen sa enn ki pare pour servi lezot?

Sa enn ki prefer ki tou dimoun i remark li oubyen sa enn ki aksepte bann senp louvraz?

Sa enn ki met li parlao lezot oubyen sa enn ki met lezot pli o ki li?

[Portre lo paz 24]

En manman stati Faraon Amenhotep 3

[Portre lo paz 25]

Eski ou konnen kwa ki ti fer Amann tonbe?

[Portre lo paz 26]

Eski ou rod loportinite pour servi lezot?