Gouvernman Bondye i en Realite ozordi

“Ki mannyer sa kantite pei, avek en kantite kiltir ki dan diferan staz devlopman, i kapab tonm dakor avek kanmarad? Dimoun in dir ki zis en latak sorti lo en lot plannet ki pou ini laras imen.”—The Age, zournal Ostralyen.

EN LATAK sorti lo en lot plannet? Ki swa sa pou anmenn tou nasyon lo later ansanm ouswa non, profesi Labib i koz lo en sitiasyon kritik ki pros pour arive ki pou fer bann nasyon dan lemonn zwenn ansanm. Annefe, bann lafors ki pou anmenn sa sitiasyon kritik pa sorti lo later.

Lerwa David dan ansyen Izrael ti predir sitiasyon sa lemonn. Anba lenspirasyon Bondye, i ti ekrir: “Bann lerwa later i pran zot pozisyon e bann o zofisye in rasanble konman en sel kont Zeova e kont sa enn ki i’n swazir, an dizan: ‘Annou kas zot lasenn e anvoy zot lakord lwen avek nou!’ ” (Psonm 2:2, 3; Akt 4:25, 26) Remarke ki bann dirizan lemonn pou ralye ansanm kont Zeova, Kreater liniver, ek sa enn ki i’n swazir, ouswa apwente konman Lerwa, Zezi Kri. Ki mannyer sa pou arive?

Dapre kronolozi Labib ek bann profesi ki’n ganny akonpli, an 1914, Rwayonm Bondye ti ganny etablir dan lesyel avek Zezi Kri konman Lerwa. * Sa letan bann nasyon ti annan en sel keksoz dan zot lespri. Olye soumet avek Rwayonm Bondye ki ti’n fek  ganny etablir e ki annan sa drwa pour dirize, zot ti pe lager pouvwar dan sa Gran Lager, ouswa Premye Lager Mondyal.

Ki mannyer Zeova Bondye i vwar reaksyon sa bann dirizan imen? “Sa Enn ki pe asiz dan lesyel pou riye; Zeova li menm pou monk zot. Sa letan, i pou koz avek zot dan son lakoler e dan son gran lakoler i pou trouble zot.” Apre, Zeova pou dir avek son Garson, ki Lerwa dan son Rwayonm: “Demann mwan, pour ki mon kapab donn ou bann nasyon konman leritaz e later antye konman ou propriyete. Ou pou kas zot avek en baton feray, ou pou kraz zot an morso parey resipyan en potye.”—Psonm 2:4, 5, 8, 9.

Destriksyon final bann nasyon ki opoze pou ganny fer avek en baton feray zour Armagedon. Revelasyon, dernyen liv Labib, i dekrir sa dernyen levennman konman “sa gran zour Bondye Toupisan,” ler “bann lerwa lo later an antye pour rasanble zot pour konbat.” (Revelasyon 16:14, 16) Anba lenfliyans bann demon, bann nasyon lo later pou finalman ini avek en sel lobzektif—pour lager kont Bondye Tou Pwisan.

Sa letan kot imen pou rasanble pour lager kont drwa Bondye pour dirize pe apros vitman. Zot “linite” pa pou anmenn okenn byenfe pour zot menm. Plito, zot fason azir pou entrodwir sa levennman ki pou anmenn sa lape ki tou imen ti pe espere depi lontan. Ki mannyer sa pou arive? Dan sa lager final, Rwayonm Bondye “pou kraz e met en lafen avek tou sa bann rwayonm [sa lemonn], e li menm i pou dire pour en letan endefini.” (Danyel 2:44) Se Rwayonm Bondye, pa okenn lorganizasyon imen, ki pou sa gouvernman ki pou akonpli dezir limanite pour anmenn lape dan lemonn.

Administrater prensipal sa Gouvernman

Rwayonm Bondye i sa Rwayonm ki bokou dimoun senser in priye, par dir: “Ki ou Renny i ganny etabli; ki ou lavolonte i ganny akonpli lo later parey dan lesyel.” (Matye 6:10) Olye en kondisyon leker, Rwayonm Bondye i en vre gouvernman ki’n fer bann bon keksoz depi ki i’n ganny etablir dan lesyel an 1914. Annou konsider serten keksoz enportan ki montre ki gouvernman Bondye pe fonksyonnen ozordi.

Premyerman, i annan en ladministrasyon pwisan e efikas ki ganny dirize par son Lerwa, Zezi Kri. Lannen 33 nou lepok, Zeova Bondye ti fer Zezi Kri vin Sef kongregasyon Kretyen. (Efezyen 1:22) Depi sa, Zezi in egzers son lotorite, par demontre son abilite lo kote ladministrasyon. Par egzanp, ler en gran lafanmin ti afekte Zide dan premye syek, kongregasyon Kretyen ti toudswit ed bann dimoun ki ti form par kongregasyon. En led sekour ti ganny organize, e Barnabas ek Sol ti ganny anvoye Antyos avek en kontribisyon.—Akt 11:27-30.

Nou kapab ekspekte plis avek Zezi Kri la aprezan ki sa gouvernman in ganny etablir e pe fonksyonnen. Ler bann dezas, tel parey tranbleman-d-ter, lafanmin, linondasyon, siklonn, tanpet, ouswa volkan i arive, kongregasyon Kretyen Temwen Zeova i  azir vitman pour ed bann konpanyon Kretyen ek lezot dimoun dan bann landrwa ki’n ganny afekte. Par egzanp, ler tranbleman-d-ter ti frap El Salvador an Zanvye ek Fevriye 2001, bann led sekour ti ganny organize partou dan sa pei. Bann group Temwen Zeova sorti Kanada, Gwatemala, ek Letazini ti donn lanmen ede. Trwa Lasal Rwayonm kot zot reini pour ladorasyon osi byen ki plis ki 500 lakaz ti ganny rekonstri dan en pti gin letan.

Sitwayen Gouvernman Bondye

Depi ki i’n ganny etablir an 1914, Rwayonm Bondye ki dan lesyel pe rasanble e pe organiz son bann sitwayen ki sorti parmi bann dimoun atraver lemonn. Sa pe akonpli en profesi remarkab ki ti ganny rikorde par Izai: “I devret arive dan bann dernyen zour ki montanny lakaz Zeova [son vre ladorasyon ki siperyer] pou ganny etabli parlao bann montanny, . . . e tou bann nasyon pou al ver li.” Sa profesi i montre ki “bokou dimoun” pou al kot sa montanny e aksepte lenstriksyon ek lalwa Zeova.—Izai 2:2, 3.

Sa aktivite in kree lorganizasyon pli enportan dan nou lepok. Sa se en lasosyasyon frer enternasyonal ki kontyen 6,000,000 Kretyen sorti dan plis ki 230 pei lo later. Dan bann lasanble Temwen Zeova, bann dimoun ki pe obzerve i souvan enpresyonnen pour vwar sa lanmour, lape, ek linite parmi sa gran kantite dimoun, kantmenm zot nasyonalite, kiltir, ek langaz i diferan. (Akt 10:34, 35) Pa ou pou dakor ki pour en gouvernman kapab anmenn plizyer santenn group etnik ansanm dan lape ek larmoni, i bezwen efikas, stab, e osi reel?

Rwayonm Bondye ek Ledikasyon

Sak gouvernman i annan bann standar ki son bann sitwayen i ekspekte swiv. Deplis, tou dimoun ki anvi viv anba sa gouvernman i bezwen swiv son bann standar. Pareyman, Rwayonm Bondye i annan bann standar pour tou dimoun ki pou kalifye konman son bann sitwayen swiv. Sirman i en gro travay pour kapab fer sa sitan kantite dimoun avek diferan lorizin aksepte e swiv menm standar. La, en lot keksoz ki montre ki Rwayonm Bondye i en realite. Sa se son progranm ledikasyon efikas ki tous e transform pa zis lespri me osi leker bann dimoun.

Ki mannyer sa gouvernman i akonpli sa latas difisil? Par swiv legzanp bann zapot pour pres port-an-port e ansenny Parol Bondye avek sak dimoun endividyelman. (Akt 5:42; 20:20) Eski sa kalite ledikasyon i efikas? Jacques Johnson, en pret Katolik, ti ekrir dan en zournal Kanadyen konsernan son bann zefor pour dekouraz en madanm pour etidye avek Temwen Zeova. I ti dir: “Mon ti en pe dekonserte e realize ki mon ti enplike dan en batay ki mon pa pou  kapab ranport laviktwar. Mon ti konmans realize ki pour plizyer mwan sa bann madanm Temwen Zeova ti’n devlop en bon relasyon avek sa zenn manman ki pa ti kapab kit son lakour. Zot ti vin pros avek li par ed li, fer zanmi avek li, e etablir bann bon relasyon avek li. Pa ti pran bokou letan pour li vin en manm aktif dan zot larelizyon e ti napa tro gran keksoz mon ti kapab fer pour anpes sa arive.” Zis parey leker sa dimoun ki ti en Katolik avan, ti ganny touse par mesaz Labib ki Temwen Zeova ti ansenny li e osi par zot kondwit, leker plizyer milyon dimoun atraver lemonn pe osi ganny touse.

Ledikasyon Rwayonm i en ledikasyon ki baze lo Labib. I siport bann prensip ek standar Labib lo moralite. I ansenny bann dimoun pour kontan e onor kanmarad menm si zot lorizin i diferan. (Zan 13:34, 35) I osi ed dimoun pour azir anver sa lavertisman: “Pa swiv bann koutim sa monn konmela me les Bondye transform zot par en sanzman konplet dan zot lentelizans. Pour ki zot a kapab konpran lavolonte Bondye: Sa ki bon, sa ki fer li plezir, sa ki parfe.” (Romen 12:2) Apre ki zot in abandonn zot fason viv lepase e swiv bann lalwa ek prensip sa gouvernman avek lazwa, plizyer milyon dimoun in trouv lape ek boner e zot osi annan en lespwar merveye pour lavenir.—Kolosyen 3:9-11.

En bon led ki kontribye ver sa linite atraver lemonn se sa magazin, Latour Veyer. Par mwayen tradiksyon ki’n ganny byen organize ek bann lekipman ki enprim dan plizyer langaz, bann lartik pli enportan dan Latour Veyer i ganny pibliye anmenmtan dan 135 langaz. Plis ki 95 poursan dimoun ki lir Latour Veyer atraver lemonn i kapab etidye li dan zot prop langaz anmenmtan.

En ekriven Mormon ti fer en lalis bann sikse pli remarkab ki lezot legliz pe fer dan domenn anons sa bon nouvel. I ti nonm Latour Veyer ek Réveillez-vous!, ki ganny pibliye par Temwen Zeova, konman sa pli bon magazin ki pres Levanzil e i ti dir: “Personn pa kapab zanmen dir ki Latour Veyer ek Réveillez-vous! pa fer dimoun konsyan sa ki pe arive. Okontrer, zot promot en leta lespri vizilan ki mon rarman trouve dan lezot piblikasyon relizye. Latour Veyer ek Réveillez-vous! i ankourazan akoz son lenformasyon i baze lo bann fe, i fer byen son resers, e i reel.”

I annan ase levidans pour montre ki Rwayonm Bondye i en realite e i pe fonksyonnen. Avek lazwa, Temwen Zeova pe aktivman partaz “sa Bonn Nouvel Rwayonm” avek zot prosen, e pe envit zot pour vin sitwayen sa Rwayonm. (Matye 24:14) Eski en tel lespwar i atir ou? Ou kapab benefisye ou osi ler ou frekant bann ki pe ganny edike e ki pe esey swiv bann standar sa Rwayonm. Pli enportan ankor, ou kapab annan sa lespwar pour viv anba dominasyon Rwayonm dan sa nouvo lemonn ki’n ganny promet, kot “pou annan lazistis.”—2 Pyer 3:13.

[Not anba lo paz]

[Portre lo paz 5]

Bann nasyon ti enplike dan en lager mondyal an 1914

[Portre lo paz 6]

Led sekour volonter i en levidans lanmour Kretyen

[Portre lo paz 7]

Bann Temwen Zeova atraver lemonn i benefisye avek menm progranm ledikasyon