Zeova i revel Son Laglwar avek bann ki annan Limilite
Zeova i revel Son Laglwar avek bann ki annan Limilite
“Limilite ek lakrent pour Zeova i anmenn larises ek laglwar e osi lavi.” —Proverb 22:4.
1, 2. (a) Ki mannyer liv Akt i montre ki Etyenn ti “en zonm ranpli avek lafwa ek Sent-Espri”? (b) Akoz nou kapab dir ki Etyenn ti annan limilite?
ETYENN ti “en zonm ranpli avek lafwa ek Sent-Espri.” I ti osi “ranpli avek lagras ek lafors.” Etyenn ki ti en disip Zezi dan premye syek, ti pe fer bann gran mirak ek siny ekstraordiner. En zour, detrwa zonm ti opoz li, “me Etyenn ranpli avek Sent-Espri ti koz avek lasazes e zot pa ti kapab reponn son largiman.” (Akt 6:5, 8-10) Etyenn ti etidye seryezman Parol Bondye, e i ti kapab byen defann Parol Bondye devan bann sef relizye Zwif dan son letan. Son diskour byen profon, rikorde dan Akt sapit 7, i montre son gran lentere ki i ti annan dan lakonplisman plan Bondye.
2 Me Etyenn ti konpletman diferan avek bann sef relizye dan son letan. Zot, zot pozisyon ek konnesans ti fer zot krwar ki zot pli siperyer ki bann dimoun ordiner dan lasosyete, tandis ki Etyenn li, i ti annan limilite. (Matye 23:2-7; Zan 7:49) Menm si Etyenn ti konn byen Lekritir, i ti byen kontan pour distribye manze afen ki bann zapot ti kapab ‘kontinyen donn tou zot letan pour lapriyer e pour predikasyon.’ Etyenn ti annan en bon repitasyon parmi bann frer. Pour sa rezon, i ti ganny swazir pour form parti sa set zonm ki ti annan bon repitasyon pour okip distribisyon manze toulezour. Avek limilite i ti aksepte sa latas.—Akt 6:1-6.
3. Ki laprev remarkab labonte Bondye ki Etyenn ti vwar?
3 Zeova ti rekonnet limilite, pwennvi spirityel, ek fidelite ki Etyenn ti annan. Ler Etyenn ti pe rann temwannyaz avek bann sef Zwif agresif dan Sannedren, zot “ti war son figir parey figir en lanz.” (Akt 6:15) Son vizaz ti parey en mesaze Bondye. Lape Bondye ek son laglwar ti lo Etyenn. Apre ki i ti’n donn en temwannyaz ardyese avek bann manm Sannedren, Etyenn ti vwar en levidans remarkab labonte Bondye. ‘Etyenn, ranpli avek Sent-Espri, ti lev son lizye e fikse dan lesyel. I ti war laglwar Bondye, ek Zezi pe debout lo kote drwat Bondye.’ (Akt 7:55) Pour Etyenn, sa vizyon spektakiler ti konfirm pozisyon Zezi konman Garson Bondye ek Mesi. Sa vizyon ti fortifye Etyenn e asir li ki i ti annan faver Zeova.
4. Avek lekel ki Zeova i revel son laglwar?
4 Sa vizyon ki Etyenn ti gannyen i demontre ki Zeova i revel son laglwar ek son plan avek bann dimoun ki annan limilite ek lakrent pour li e osi apresye zot relasyon avek li. Labib i dir: “Limilite ek lakrent pour Zeova i anmenn larises ek laglwar e osi lavi.” (Proverb 22:4) Alor, i tre enportan ki nou konpran kisisa vre limilite, ki mannyer nou kapab devlop sa kalite enportan, e konman nou benefisye par demontre li dan tou laspe lavi.
Limilite—En Kalite ki Bondye i demontre
5, 6. (a) Kisisa limilite? (b) Konman Zeova in demontre limilite? (c) Ki lefe limilite Zeova i devret annan lo nou?
5 Serten dimoun i kapab sirprann pour konnen ki Zeova, sa enn ki pli gran e pli merveye dan liniver, i pli gran legzanp limilite. Lerwa David ti dir sa lo Zeova: “Ou pou donn mwan ou boukliye delivrans, e ou lanmen drwat pou soutenir mwan, e ou limilite pou fer mwan gran.” (Psonm 18:35) Ler David ti dir ki Zeova i annan limilite, i ti servi en mo Ebre ki vedir “bese.” Apard ki sa mo “limilite,” lezot mo ki relye avek sa menm mo Ebre i vedir en dimoun ki napa en gran lopinyon lo son lekor e abes li devan lezot. Alors, Zeova ti demontre limilite ler i ti abes li pour annan en lanmitye avek David en zonm enparfe e i ti servi David pour reprezant Li konman lerwa. Parey lentrodiksyon pour Psonm 18 i montre, Zeova ti protez e siport David. I ti delivre li “dan lanmen tou son bann lennmi e dan lanmen Sail.” Li David lo son kote, ti konnen ki okenn laglwar ki i kapab gannyen konman lerwa i akoz Zeova i pare pour abes li e azir dan son faver. Sa panse ti ed David kontinyen annan limilite.
6 Ki nou pou dir lo nou menm? Zeova in vwar li apropriye pour ansenny nou laverite, e kekfwa i’n donn nou serten loportinite spesyal atraver son lorganizasyon. Petet osi, i’n kapab servi nou dan en serten fason pour akonpli son lavolonte. Ki mannyer nou devret santi konsernan tousala? Pa sa i devret fer nou abes nou? Eski pa nou devret remersi Zeova pour son limilite e evite elev nou lekor, ki pou sirman anmenn nou maler?—Proverb 16:18; 29:23.
7, 8. (a) Ki mannyer Zeova ti demontre limilite anver Manase? (b) Dan ki fason Zeova ek Manase in kit en legzanp pour nou swiv an rapor avek montre limilite?
7 Zeova pa’n zis demontre bokou limilite par pran ka avek imen enparfe me i osi pran pitye pour bann dernyen dimoun, menm elev bann ki abes zot lekor. (Psonm 113:4-7) Par egzanp, annou pran ka Lerwa Manase an Zida. I ti mal servi son pozisyon konman lerwa pour promot fo ladorasyon. I ti osi “fer sa ki mal dan lizye Zeova lo en bon degre, pour ofans li.” (2 Kronik 33:6) Finalman, Zeova ti pini Manase par les lerwa Asiryen tir li lo son tronn. Dan prizon, Manase ti adousi leker Zeova son Bondye e i ti “kontinyen abes son lekor en kantite.” Sa ti fer Zeova remet li lo tronn an Zerizalenm e Manase ti “arive konnen ki Zeova i sa vre Bondye.” (2 Kronik 33:11-13) Wi, alafen, sa limilite ki Manase ti demontre ti fer plezir Zeova, e an retour I ti demontre limilite par pardonn Manase e remet li lerwa.
8 Lefe ki Zeova ti pare pour pardonnen e osi latitid repantans Manase i fourni bann leson enportan pour nou konsernan limilite. Nou pa devret zanmen oubliye ki fason ki nou tret bann ki’n kapab ofans nou e latitid ki nou demontre ler nou fer pese i kapab annan lefe lo lafason ki Zeova i azir avek nou. Si nou pare pour pardonn fot lezot e avek limilite aksepte nou fot, alors nou kapab ekspekte ki Zeova pou pran pitye pour nou.—Matye 5:23, 24; 6:12.
Zeova i revel son Laglwar avek bann Dimoun ki annan Limilite
9. Eski limilite i en siny febles? Eksplike.
9 Me limilite ek lezot kalite ki mars ansanm avek li, pa devret ganny mal enterprete konman en siny febles oubyen konman en tandans pour toler sa ki mal. Parey Labib i montre, Zeova i annan limilite, me i demontre son lakoler ek lafors ler i neseser. Akoz Zeova i annan limilite, i pran swen avek bann dimoun senp, tandis ki avek sa bann vantar i reste lwen. (Psonm 138:6) Ki mannyer Zeova in rekonpans son bann serviter ki annan limilite?
10. Ki Zeova i revele avek bann ki annan limilite, parey 1 Korentyen 2:6-10 i fer resorti?
10 Dan son letan ek fason apropriye, Zeova in revel avek bann dimoun senp lenformasyon konsernan lakonplisman son plan. Bann dimoun ki vantar ouswa antete e ki depan oubyen reste atase avek lasazes imen, pa arive dekouver sa bann keksoz merveye. (1 Korentyen 2:6-10) Me i diferan avek bann dimoun ki annan limilite. Apre ki zot in ganny en konnesans egzakt lo plan Zeova, zot santi zot pouse pour glorifye li akoz zot apresye son laglwar enpresyonan plis ankor.
11. Dan premye syek, ki mannyer serten ti montre en mank limilite, e konman sa ti vin en danze pour zot?
11 Dan premye syek, bokou dimoun enkli serten ki ti pretann zot Kretyen pa ti montre limilite e sa ki zapot Pol ti revel avek zot lo plan Bondye ti fer zot tonbe. Pol ti vin en “zapot pour bann pep non-Zwif,” pa akoz son nasyonalite, ledikasyon, laz oubyen son leksperyans. (Romen 11:13) Souvannfwa, bann dimoun ki pa spirityel i krwar ki se sa bann keksoz ki determinen lekel ki Zeova i devret servi. (1 Korentyen 1:26-29; 3:1; Kolosyen 2:18) Me Pol ti sa enn ki Zeova ti’n swazir, an armoni avek Son labonte leker ek Son plan. (1 Korentyen 15:8-10) Sa bann ki Pol ti dekrir konman “bann zapot ki pas zot pour siperyer,” osi byen lezot lennmi, ti refize aksepte Pol ek son rezonnman lo Lekritir. Lefe ki zot ti napa limilite, sa ti anpes zot ganny konnesans ek konprenezon lo fason merveye ki Zeova i akonpli son plan. Annou pa zanmen sou estim oubyen ziz avan ler sa bann ki Zeova i swazir pour servi pour akonpli son lavolonte.—2 Korentyen 11:4-6.
12. Ki mannyer legzanp Moiz i montre ki Zeova i beni sa bann ki annan limilite?
12 Parkont, i annan bokou legzanp dan Labib ki montre konman bann dimoun ki annan limilite i ganny beni avek en apersi laglwar Bondye. Moiz, sa zonm ki ti annan plis limilite ki tou zonm, ti vwar laglwar Bondye e rezwir en relasyon entim avek li. (Nonm 12:3) Sa zonm ki ti pas laplipar son 40 lannen konman en senp berze dan dezer Arabi, ti ganny beni en kantite par Kreater dan bokou fason. (Egzod 6:12, 30) Avek sipor Zeova, Moiz ti vin portparol e organizater prensipal nasyon Izrael. Bondye ti ekout e kominik avek Moiz. Atraver en vizyon, i ti vwar “laparans Zeova.” (Nonm 12:7, 8; Egzod 24:10, 11) Bann dimoun ki ti rekonnet sa senp serviter ek reprezantan Bondye ti osi ganny beni. Pareyman, nou pou ganny beni si nou rekonnet e obeir Zezi sa pli gran profet ki Moiz, osi byen ‘lesklav fidel e pridan’ ki Zezi in apwente.—Matye 24:45, 46; Akt 3:22.
13. Ki mannyer laglwar Zeova ti ganny revele avek bann senp berze dan premye syek?
13 Avek ki laglwar Zeova ti ganny revele, kan sa lanz ti anons sa bon nouvel lo nesans en Sover, Kris? I pa ti avek bann sef relizye arogan oubyen avek bann dimoun enportan byen o plase, me avek bann senp berze ki ti pe “pas tou lannwit deor pour vey zot troupo mouton.” (Lik 2:8-11) Sa bann dimoun pa ti ganny rekonnet pour zot ledikasyon ek zot travay. Kantmenm sa, zot ti sa bann ki Zeova ti rekonnet e swazir pour enform zot premye konsernan nesans Mesi. Wi, Zeova i revel son laglwar avek bann ki annan limilite e lakrent pour li.
14. Ki mannyer Bondye i beni bann ki annan limilite?
14 Ki sa bann legzanp i ansenny nou? Zot montre nou ki Zeova i beni e revel konnesans ek konprenezon lo son plan avek bann ki annan limilite. I swazir bann dimoun ki kekfwa pa ranpli serten ekspektasyon imen e servi zot pour fer konnen son plan glorye avek lezot. Sa i devret motiv nou pour kontinyen rod gidans Zeova, dan son Parol profetik e avek son lorganizasyon. Nou kapab asire ki Zeova pou kontinyen enform bann ki annan limilite konsernan devlopman son plan glorye. Profet Amos ti anonse: “Souvren Senyer Zeova pa pou fer nanryen amwen ki i’n revel son keksoz konfidansyel avek son serviter bann profet.”—Amos 3:7.
Devlop Limilite e rezwir Faver Bondye
15. Akoz nou devret fer zefor pour mentenir limilite, e ki mannyer sa i evidan dan ka Lerwa Sail an Izrael?
15 Pour kontinyen annan faver Bondye, fodre nou pa perdi nou limilite. Si nou annan limilite sa pa vedir ki nou pou toultan reste koumsa. I posib pour en dimoun perdi limilite e les lafyerte ek lorgey domin li, ki fer en dimoun azir avek larogans e osi anmenn maler lo li. Sanmenm sa ki ti arive avek premye lerwa swazir Izrael, Sail. Ler i ti fek ganny swazir, i ti santi li ‘pti pti.’ (1 Samyel 15:17) Me apre de zan konman lerwa, i ti azir avek larogans. I pa ti respe laranzman Zeova pour ofer sakrifis atraver profet Samyel, e i ti envant en bann lekskiz pour azir dan son prop fason. (1 Samyel 13:1, 8-14) Sa ti konmansman en seri levennman ki ti sirman montre en mank limilite lo son par. Sa ti fer li perdi lespri sen Bondye e son faver, ki finalman ti anmenn son lanmor. (1 Samyel 15:3-19, 26; 28:6; 31:4) Leson pour nou i kler: Nou devret fer zefor pour devlop e mentenir limilite ek soumisyon e rezet bann panse ki nou ki la. Sa pou ed nou evite fer okenn keksoz ki nou napa drwa pour fer, ki pou fer nou perdi faver Zeova.
16. Ki mannyer reflesir lo nou relasyon avek Zeova ek avek nou konpanyon i ed nou pour devlop limilite?
16 Menm si limilite pa ganny mansyonnen konman en parti fri lespri Bondye, i en kalite ki Bondye i annan e ki nou devret devlope. (Galat 5:22, 23; Kolosyen 3:10, 12) Vi ki i enplik en leta lespri, savedir fason ki nou vwar nou lekor ek lezot, alor pour nou arive devlop limilite fodre nou fer en zefor konsyansye. Si nou rezonn e reflesir lo nou relasyon avek Zeova e avek nou konpanyon, sa i kapab ed nou pour pa perdi limilite. Dan lizye Bondye, tou imen enparfe i parey zerb ver ki pous pour en pe letan, me apre i sek. Bann imen i parey bann senp kasbol dan en laplenn. (Izai 40:6, 7, 22) Eski en zerb i annan rezon pour li fyer zis akoz i en pe pli long ki lezot zerb? Eski en kasbol i annan rezon pour li fer vantar zis akoz i kapab sot en pe pli lwen ki lezot kasbol? I pa fer sans pour mazin sa. Alors, zapot Pol ti rapel son bann konpanyon Kretyen: “Lekel ki fer ou diferan avek lezot? Ki ou posede ki ou pa ti resevwar? Si ou’n resevwar, alor, akoz ou vant ou lekor konmsi [ou] pa’n resevwar?” (1 Korentyen 4:7) Reflesir lo bann verse Labib parey sa bann, i kapab ed nou devlop e demontre limilite.
17. Kwa ki ti ed profet Danyel devlop limilite, e kwa ki kapab ed nou pour fer parey?
17 Zeova ti konsider profet Danyel ki ti en Ebre konman son byenneme akoz i ti “imilye” son lekor. I ti fer sa akoz son limilite. (Danyel 10:11, 12) Kwa ki ti ed Danyel devlop limilite? Premyerman, Danyel ti demontre en konfyans total dan Zeova, e i ti toultan priy Zeova. (Danyel 6:10, 11) Deplis, Danyel ti etidye Parol Bondye seryezman e i ti etidye avek en bon motif, ki ti ed li kit antet plan glorye Bondye. I ti osi pare pour rekonnet son prop defo, me pa zis pour son pep. Anmenmtan, i pa ti enterese pour promot son prop ladrwatir, me i ti fer tou pour promot ladrwatir Bondye. (Danyel 9:2, 5, 7) Eski nou kapab aprann atraver legzanp remarkab Danyel e esey devlop e demontre limilite dan tou laspe nou lavi?
18. Ki laglwar ki pe esper bann ki demontre limilite ozordi?
18 Proverb 22:4 i dir: “Limilite ek lakrent pour Zeova i anmenn larises ek laglwar e osi lavi.” Wi, Zeova i beni sa bann ki annan limilite, e rezilta i laglwar ek lavi. Psalmis Azaf ti pros pour abandonn son servis pour Bondye me apre Zeova ti koriz son fason panse. Apre sa leksperyans, sa psalmis ti rekonnet avek limilite: “Avek ou konsey ou pou gid mwan, e apre ou pou anmenn mwan ver laglwar.” (Psonm 73:24) Ki mannyer sa i aplik pour nou ozordi? Ki laglwar ki pe esper sa bann ki demontre limilite? Apard ki rezwir en bon relasyon avek Zeova, nou kapab en zour eksperyans lakonplisman parol enspire Lerwa David: “Bann dimoun ki annan limilite pou posed later, e zot pou vreman tir bokou plezir dan labondans lape.” Vreman en lavenir merveye!—Psonm 37:11.
Eski ou rapel?
• Ki mannyer Etyenn i en legzanp en dimoun ki ti annan limilite avek ki Zeova ti revel Son laglwar?
• Dan ki fason Zeova in demontre limilite?
• Ki legzanp ki montre ki Zeova i revel son laglwar avek bann dimoun ki annan limilite?
• Ki mannyer legzanp Danyel i kapab ed nou devlop limilite?
[Kestyon]
[Bwat lo paz 22]
Lafors ek Limilite
Dan en lasanble bann Etidyan Labib (ozordi bann Temwen Zeova) an 1919, Cedar Point, Ohio, Letazini, J. F. Rutherford aze 50 an ki ti pe organiz sa travay sa letan, ti kontan pour servi konman en porter, i ti anmenn bagaz e eskort bann frer ek ser kot zot lasanm. Lo dernyen zour lasanble, i ti sof sa lodyans 7,000 avek sa parol: “Ou en anbasader Lerwa tou lerwa ek Senyer tou senyer, anons sa rwayonm glorye nou Senyer . . . avek dimoun.” Menm si Frer Rutherford ti en zonm ki ti annan en konviksyon ferm, renonmen pour koz avek konviksyon, e pa fer konpromi pour sa ki i ti krwar i laverite, i ti osi senserman annan limilite devan Bondye. Sa ti souvan evidan dan son bann lapriyer lo progranm spirityel dan bomaten kot Betel.
[Portre lo paz 19]
Etyenn, ki ti konn byen Lekritir, ti distribye manze avek limilite
[Portre lo paz 20]
Zeova ti kontan letan Manase ti abes li
[Portre lo paz 22]
Kwa ki ti fer Zeova konsider Danyel konman son byenneme?