Ay nou san okenn Rezon

“Zot in ay mwan san okenn rezon.”—ZAN 15:25.

1, 2. (a) Akoz serten pa konpran pour ki rezon lezot i koz kont bann Kretyen, me akoz sa pa sirprann nou? (b) Ki sinifikasyon sa mo “ay” ki nou pou egzaminen dan sa lartik? (Vwar not anba lo paz.)

TEMWEN ZEOVA i sey zot mye pour viv an akor avek bann prensip dan Parol Bondye. Se pour sa ki zot annan en bon repitasyon dan bokou pei. Me parfwa, zot ganny mal reprezante. Par egzanp, en zofisye gouvernman dan lavil St. Petersburg, Larisi, i rapel sa: “Rapor ki nou ti gannyen lo Temwen Zeova se ki i ti en nespes sekt ki fer son bann zafer ansousekre e ki masakre bann manrmay e touy zot lekor.” Me apre ki sa menm zofisye ti’n travay avek Temwen Zeova an konneksyon avek en lasanble enternasyonal, i ti fer sa remark: “Aprezan, mon vwar bann dimoun normal avek sourir lo zot figir . . . Zot anpe e kalm, e zot kontan kanmarad en kantite.” I ti azoute: “Mon pa vreman konpran akoz dimoun i koz lalang lo zot.”—1 Pyer 3:16.

² Bann serviter Bondye pa kontan letan zot ganny akize konman bann mesan. Me zot pa sirprann kan dimoun i koz kont zot. Zezi ti averti son bann disip: “Si lemonn i ay zot, mazinen ki i’n ay mwan avan zot. . . . Pour ki sa parol ki’n ganny ekri dan zot lalwa i ganny akonpli: ‘Zot in ay mwan san okenn rezon.’ ” * (Zan 15:18-20, 25; Psonm 35:19; 69:4) Avan sa, i ti’n dir son bann disip: “Si zot in apel sef lafanmir, Belzebil, ki non zot pa pou donn lezot manm lafanmir?” (Matye 10:25) Bann Kretyen i konpran ki fer fas avek sa bann repros i form parti sa ‘poto siplis’ ki zot ti aksepte kan zot ti vin disip Kris.—Matye 16:24.

3. Ziska ki degre bann vre adorater in ganny persekite?

³ Depi byen byen lontan bann vre adorater ti konmans ganny persekite, depi letan “Abel, sa inosan.” (Matye 23:34, 35) Persekisyon bann vre adorater Zeova pa zis ennde ka ki’n ganny raporte dan rar. Zezi ti dir ki “tou dimoun pou ay” son bann disip akoz son non. (Nou ki’n met an italik; Matye 10:22) Deplis, zapot Pol ti ekrir ki tou bann serviter Bondye, enkli nou endividyelman, i devret ekspekte ganny persekite. (2 Timote 3:12) Akoz sa?

Kote sa Laenn ki pa zistifye i sorti

4. Ki mannyer Labib i montre kote sa bann laenn ki pa zistifye i sorti?

⁴ Parol Bondye i montre ki depi okonmansman i’n annan kelken ki nou pa vwar ki lakoz sa laenn anver bann vre adorater Bondye. Pran par egzanp lanmor kriyel sa premye zonm ki ti annan lafwa, Abel. Labib i dir ki son frer, Kaen, ki ti touy li “ti apartenir a dyab,” Satan. (1 Zan 3:12) Kaen ti adopte latitid Satan, e Satan ti servi li pour akonpli son bann vilen konplo. Labib i osi devwal rol Satan dan bann latak kriyel ki i ti fer lo Zob ek Zezi Kri. (Zob 1:12; 2:6, 7; Zan 8:37, 44; 13:27) Liv Revelasyon i klerman montre kote persekisyon bann disip Zezi i sorti. I dir: “Dyab pou anvoy byento serten antre zot dan prizon, pour teste zot.” (Nou ki’n met an italik; Revelasyon 2:10) Wi, tou  sa bann laenn ki pa zistifye kont pep Bondye i sorti kot Satan.

5. Akoz Satan i ay bann vre adorater Bondye?

⁵ Akoz Satan i ay bann vre adorater Bondye? Dan en konplo ki montre ki degre arogan i arogan, Satan in debout kont sa “Lerwa eternel,” Zeova. (1 Timote 1:17; 3:6) Son largiman se ki Bondye i tro strik dan lafason ki i diriz son bann kreatir e ki napa personn ki servi Zeova avek en bon motivasyon, zot fer li zis pour serten benefis ki zot kapab gannyen. Dapre Satan, si i ganny permet pour teste bann imen, i pou kapab fer zot tou aret servi Bondye. (Zenez 3:1-6; Zob 1:6-12; 2:1-7) Par kalonmi Zeova konman en dirizan kriyel, manter, e enkapab, Satan pe sey etablir li konman sa pli bon dirizan pour liniver. Alors, son laswaf pouvwar ki fer li tir son lakoler lo bann serviter Bondye.—Matye 4:8, 9.

6. (a) Ki mannyer nou tou endividyelman nou bezwen reponn sa kestyon lo drwa Zeova pour dirize? (b) Ki mannyer letan nou byen konpran sa kestyon i ed nou reste fidel? (Vwar bwat lo paz 12.)

⁶ Eski ou vwar ki mannyer ou personnelman ou bezwen reponn sa kestyon? Konman en serviter Zeova, petet ou’n realize ki menm si fer lavolonte Bondye i demann bokou zefor, bann byenfe ki ou gannyen i bokou plis. Me ki ou pou fer si ou sitiasyon i fer li difisil, menm en martir, pour kontinyen viv an akor avek lalwa ek prensip Zeova? Deplis, si ou pa paret pe ganny okenn benefis an retour? Eski ou pou konklir ki i pa vo lapenn kontinyen servi Zeova? Oubyen ou lanmour pour Zeova ek lapresyasyon profon pour son bann kalite merveye pou pous ou pour kontinyen mars dan son semen? (Deterononm 10:12, 13) Par les Satan anmenn serten difikilte lo nou, Zeova in donn nou tou en loportinite pour personnelman reponn sa lakizasyon ki Satan in fer.—Proverb 27:11.

‘Kan en Dimoun i repros zot’

7. Ki taktik Dyab i servi pour sey fer nou aret servi Zeova?

⁷ Aprezan, annou egzamin pli pre enn bann riz ki Satan i servi dan son zefor pour prouve ki son bann lakizasyon i vre. I servi repros baze lo mansonz. Zezi ti apel Satan “papa tou mansonz.” (Zan 8:44) Sa non Dyab, ki vedir kelken ki koz manti lo en lot dimoun pour sali son repitasyon, i idantifye li konman sa enn premye ki’n koz manti lo Bondye, son bon parol, ek son non sen. Dyab i servi bann parol ki annan de sans, bann fo lakizasyon, e pirman mansonz pour li konteste kont drwa Zeova pour dirize. I osi servi sa bann menm taktik pour kalonmni bann serviter Bondye. Par anmenn repros lo bann Temwen, i kapab fer en leprev dir vin pli difisil ankor pour siporte.

8. Ki mannyer Satan ti anmenn repros lo Zob, e ki lefe sa ti fer?

⁸ Annou vwar ki ti ariv Zob, ki son non i vedir “Target Laenn.” Apard ki fer Zob perdi son bann keksoz ki i ti bezwen pour viv, son zanfan, ek son lasante, Satan ti fer Zob pas pour en peser ki ti pe ganny pini avek Bondye. Kantmenm i ti en dimoun ki lezot ti respe bokou, Zob ti arive ganny deteste menm par son prop fanmiy ek zanmi. (Zob  19:13-19; 29:1, 2, 7-11) Deplis, Satan ti servi bann fo zanmi pour ‘kraz Zob avek zot parol.’ Premyerman, zot ti sizere ki i ti’n bezwen fer kek pese grav, apre sa zot ti direkteman kondann li konman en peser. (Zob 4:6-9; 19:2; 22:5-10) Sa ti’n bezwen vreman dekourazan pour Zob!

9. Ki mannyer Zezi ti pas pour en peser?

⁹ Konman sa enn ki’n pli soutenir drwa Zeova pour dirize, Garson Bondye in vin target prensipal laenn Satan. Kan Zezi ti vin lo later, Satan ti sey sali son repitasyon, fer li pas pour en peser, parey i ti fer avek Zob. (Izai 53:2-4; Zan 9:24) Dimoun ti dir i en soular e en gourman. Zot ti dir “i posede par en demon.” (Matye 11:18, 19; Zan 7:20; 8:48; 10:20) I ti ganny akize konmkwa i koz parol blasfenm. (Matye 9:2, 3; 26:63-66; Zan 10:33-36) Sa ti trakas Zezi en kantite, akoz i ti konnen ki sa ti reflekte an mal lo son Papa. (Lik 22:41-44) Finalman, Zezi ti ganny mete lo en poto konman en kriminel modi. (Matye 27:38-44) Par reste fidel, Zezi ti siport “sitan lopozisyon delapar bann peser.”—Ebre 12:2, 3.

10. Konman larestan Kretyen swazir in vin target Satan dan nou letan?

¹⁰ Dan nou letan, larestan Kretyen swazir in osi vin target laenn Satan. Satan i ganny dekrir konman ‘lakizater bann frer [Kris] devan Bondye lizour konman aswar.’ (Revelasyon 12:9, 10) Vi ki i’n ganny pouse dan lesyel e i kapab annan kontak zis avek later, Satan in entansifye son zefor pour fer dimoun rezet e mepriz bann frer Kris. (1 Korentyen 4:13) Dan serten pei, zot in ganny apele en sekt danzere, zis parey bann premye Kretyen ti ganny apele. (Akt 24:5, 14; 28:22) Parey nou’n fer remarke okonmansman, zot in ganny kalonmni par bann fo propagann. Me ‘kantmenm zot ganny loner oubyen laont, bon repitasyon oubyen move repitasyon,’ bann frer swazir Kris in sey zot mye pour avek limilite ‘obei komannman Bondye e fer travay pour rann temwannyaz lo Zezi.’—2 Korentyen 6:8; Zan 10:16; Revelasyon 12:17.

11, 12. (a) Pour ki rezon serten Kretyen i ganny reprose? (b) Dan ki fason en Kretyen i kapab soufer dan en fason enzis akoz son lafwa?

¹¹ Byensir, sa pa vedir ki sak fwa en serviter Bondye i ganny reprose i akoz i pe fer sa ki byen. (Matye 5:10) Serten problenm i kapab arive akoz nou prop lenperfeksyon. Napa okenn benefis si nou ‘bezwen siport move tretman pour fot ki nou’n fer.’ Parkont si en Kretyen i ‘soufer avek pasyans pour sa ki i’n byen fer, sa i ganny aprouve par’ Zeova. (1 Pyer 2:19, 20) Dan ki sirkonstans sa i kapab arive?

¹² Serten in ganny trete dan en move fason akoz zot pa’n oule partisip dan bann koutim fineray ki kont Labib. (Deterononm 14:1) Bann zenn Temwen in ganny tou sort kalite non akoz zot reste fidel avek bann standar moral Zeova. (1 Pyer 4:4) Serten paran Kretyen in ganny akize konman “neglizan” oubyen “move” akoz zot in sey rod bann tretman medikal ki pa konpoze avek disan pour zot zanfan. (Akt 15:29) I annan serten Kretyen ki zot fanmiy e vwazen pa oule zot zis akoz zot in vin serviter Zeova. (Matye 10:34-37) Zot tou zot pe swiv legzanp ki bann profet ek Zezi li menm ti kite par soufer dan en fason enzis.—Matye 5:11,  12; Zak 5:10; 1 Pyer 2:21.

Fer fas avek sa bann Repros

13. Kwa ki kapab ed nou gard nou balans spirityel kan nou pe ganny reprose severman?

¹³ Kan nou ganny reprose severman akoz nou lafwa, nou kapab dekouraze, parey profet Zeremi, e santi ki nou pa kapab kontinyen servi Bondye. (Zeremi 20:7-9) Kwa ki kapab ed nou gard nou balans spirityel? Esey vwar keksoz parey Zeova i vwar. I vwar bann ki reste fidel dan bann leprev konman bann venker, pa bann viktim. (Romen 8:37) Esey mazin bann ki’n soutenir drwa Zeova pour dirize kantmenm bann lensilt ki Dyab in saboul zot avek. Bann zonm ek fanm parey Abel, Zob, Mari ki ti manman Zezi, e lezot fidel dan lepase, e osi bann ki pe servi akote nou dan nou letan. (Ebre 11:35-37; 12:1) Reflesir lo zot fidelite. Sa gro nyaz Temwen fidel i envit nou pour zwenn zot lo podyonm ki’n ganny rezerve pour bann ki par zot lafwa in ranport laviktwar lo lemonn.—1 Zan 5:4.

14. Ki mannyer lapriyer senser i kapab donn nou lafors pour reste fidel?

¹⁴ Si nou ‘annan bokou keksoz ki pe fatig nou,’ nou kapab tourn ver Zeova dan lapriyer senser, e i pou konsol e donn nou lafors. (Psonm 50:15; 94:19) I pou donn nou lasazes ki nou bezwen pour fer fas avek nou leprev e ed nou gard antet sa kestyon konsernan son drwa pour dirize, ki lakoz sa laenn ki pa zistifye kont son bann serviter. (Zak 1:5) Zeova i kapab osi donn nou “lape Bondye ki depas tou konpreansyon imen.” (Filipyen 4:6, 7) Sa trankilite ki Bondye i donn nou i ed nou reste kalm e ferm anba bann gro presyon, olye les dout ek lafreyer domin nou. Zeova i kapab soutenir nou atraver son lespri dan nenport kwa ki i permet ariv lo nou.—1 Korentyen 10:13.

15. Kwa ki kapab ed nou evite gard rankin ler nou pe soufer?

¹⁵ Kwa ki kapab ed nou pour pa gard rankin anver bann ki ay nou san okenn rezon? Mazinen ki nou lennmi prensipal i Satan ek son bann demon. (Efezyen 6:12) Kantmenm serten imen i persekit nou volonterman e avek tou konnesans, bokou sa bann ki opoz pep Bondye i fer li par linyorans oubyen akoz lezot i servi zot pour fer li. (Danyel 6:4-16; 1 Timote 1:12, 13) Zeova i anvi “ki tou dimoun” i ganny sa loportinite pour “ganny sove e ganny konnesans laverite.” (1 Timote 2:4) Anfet, serten ki ti opoz nou oparavan in aprezan vin nou bann frer ek ser Kretyen apre ki zot in obzerv nou bon kondwit. (1 Pyer 2:12) Deplis, nou kapab tir en leson dan legzanp garson Zakob, Zozef. Kantmenm Zozef ti soufer en kantite akoz son bann frer, i pa ti gard rankin anver zot. Akoz non? Akoz i ti rekonnet lanmen Zeova dan sa zafer, ki ti pe diriz bann levennman pour akonpli Son plan. (Zenez 45:4-8) Pareyman, Zeova i kapab fer nenport soufrans ki nou pas atraver akoz nou lafwa, fini par anmenn loner lo son non.—1 Pyer 4:16.

16, 17. Akoz nou pa bezwen tro trakase konsernan zefor ki nou bann lennmi i fer pour anpes travay predikasyon avans pli devan?

¹⁶ Nou pa bezwen tro trakase si i paret ki nou bann lennmi pe reisi anpes sa bon nouvel avans pli devan. Zeova pe aprezan sakouy bann nasyon par sa temwannyaz global ki pe ganny donnen, e bann keksoz dezirab pe ganny rasanble. (Agai 2:7) Zezi Kri, sa Bon Berze, in dir: “Mon bann mouton i ekout mon lavwa, mon konn zot e zot  swiv mwan. Mon donn zot lavi eternel, . . . e personn pa kapab aras nanryen dan lanmen mon Papa.” (Nou ki’n met an italik, Zan 10:27-29) Bann lanz sen i osi enplike dan sa gran rekolt spirityel. (Matye 13:39, 41; Revelasyon 14:6, 7) Alors, napa nanryen ki nou bann lennmi i kapab dir oubyen fer ki pou kapab kas plan Bondye.—Izai 54:17; Akt 5:38, 39.

¹⁷ Souvan zefor bann ki opoz nou i annan en lefe tou okontrer avek sa ki zot ti ekspekte. Dan en kominote Afriken, bokou mansonz terib in ganny fannen lo Temwen Zeova, enkli ki zot ador Dyab. Se pour sa rezon ki Grace ti tay deryer lakaz pour kasyet sak fwa bann Temwen ti pas kot li. En zour, sa paster kot son legliz ti lev enn nou piblikasyon anler e dir tou sa ki ti prezan pa lir sa akoz i pou fer zot kit zot lafwa. Sa ti fer Grace vin kirye. Ler bann Temwen ti pas kot li ankor, olye kasyet safwasi i ti fer en konversasyon avek zot e i ti ganny en kopi sa piblikasyon. En letid Labib ti konmanse, e an 1996 i ti batize. Aprezan Grace pe servi son letan pour rod lezot ki’n kapab ganny mal enformen lo Temwen Zeova.

Fortifye ou Lafwa konmela menm

18. Akoz i neseser fortifye nou lafwa avan bann tes pli dir i vini, e ki mannyer nou kapab fer sa?

¹⁸ Vi ki Satan i kapab lans en latak nenport ler, i tre enportan ki nou fortifye nou lafwa konmela menm. Ki mannyer nou kapab fer sa? En rapor sorti dan en pei kot pep Zeova ti’n ganny persekite i fer sa remark: “En keksoz in vin byen evidan: Bann ki annan sa bon labitid dan bann keksoz spirityel ek en lapresyasyon profon pour laverite dan Labib, pa en problenm pour zot reste ferm  kan leprev i vini. Me bann ki dan ‘letan favorab’ i mank renyon, pa regilye dan predikasyon, e fer konpromi lo bann pti keksoz i souvan tonbe dan bann leprev vreman dir.” (2 Timote 4:2) Si ou vwar okenn domenn ki ou bezwen amelyore, pa tarde pour fer zefor pour koriz li.—Psonm 119:60.

19. Ki fidelite bann serviter Bondye malgre sa laenn ki pa zistifye i akonpli?

¹⁹ Fidelite bann vre adorater Bondye menm si zot bezwen siport laenn Satan, i en laprev vivan ki Zeova i annan drwa, i merit dirize, e i diriz dan en fason ki drwat. Zot fidelite i fer leker Bondye kontan. Kantmenm dimoun i anmenn repros lo zot, sa enn ki pli o ki later ek lesyel “pa onte pour ganny apele zot Bondye.” Anfet, konsernan sa bann fidel, nou kapab vreman dir: “Lemonn ti napa okenn valer pour zot.”—Ebre 11:16, 38.

[Not anba lo paz]

Eski ou kapab eksplike?

• Kwa ki par deryer sa laenn ki pa zistifye kont bann vre adorater Bondye?

• Ki mannyer Satan ti servi repros dan son zefor pour kas fidelite Zob ek Zezi?

• Ki mannyer Zeova i donn nou lafors pour reste ferm malgre laenn Satan?

[Kestyon]

[Bwat/Portre lo paz 12]

Zot ti konpran ki sa ki vreman konte

En Temwen Zeova an Likrenn, kot travay predikasyon ti’n enterdi pour plis ki 50 an, ti fer sa remark: “Sa sitiasyon ki Temwen Zeova i trouv zot ladan pa devret senpleman ganny vwar lo kote konman lezot dimoun i tret nou. . . . Laplipar sa bann zofisye ti pe zis fer zot travay. Kan gouvernman ti sanze, lwayote sa bann zofisye ti sanze, me nou nou’n reste parey. Nou’n realize ki vre sours nou bann problenm in ganny devwale dan Labib.

“Nou pa’n vwar nou lekor senpleman konman bann viktim inosan bann zonm dominer. Sa ki’n ed nou andire se en konprenezon kler lo sa kestyon ki ti ganny leve dan zarden Edenn—konsernan drwa Bondye pour dirize. . . . Nou ti pran en pozisyon vizavi sa kestyon, ki pa relye zis avek nou lentere personnel me osi avek lentere sa Enn pli o dan liniver. Nou’n arive ganny en pli bon konprenezon lo ki sa ki vreman konte. Sa in fer nou vin for e kapab reste fidel menm dan bann sitiasyon pli pir.”

[Portre lo paz 9]

Lekel ki ti par deryer sa repros ki Zezi ti gannyen?

[Portre lo paz 11]

Zob, Mari, ek bann serviter Bondye dan nou letan, parey Stanley Jones, in soutenir drwa Zeova pour dirize

[Portre lo paz 12]

Victor Popovych ti ganny arete an 1970